Yoshua

4 Musi lushaka lwoṱhe lwu tshi tou pfuka Mulambo wa Yorodane, Yehova a amba na Yoshua a ri: 2 “Nanga vhanna vha 12 kha vhathu, u nange munna muthihi kha lushaka luṅwe na luṅwe,+ 3 u vha ṋee heyi ndaela: ‘Hwalani matombo a 12 a re vhukati ha Mulambo wa Yorodane, a bvaho fhethu he vhotshifhe vha vha vho ima hone,+ ni a hwale ni ṱuwe nao, ni a vhee fhethu hune na ḓo eḓela hone.’”+

4 Ngauralo, Yoshua a vhidza vhanna vha 12 vhe a vha nanga kha Vhaisiraele, munna muthihi kha lushaka luṅwe na luṅwe, 5 Yoshua a amba navho a ri: “Rangani phanḓa Mbulungelo ya Yehova Mudzimu waṋu ni dzhene vhukati ha Mulambo wa Yorodane, muṅwe na muṅwe waṋu a hwale tombo kha shaḓa ḽawe, u ya nga tshivhalo tsha tshaka dza Isiraele, 6 uri enea matombo a vhe tshiga kha inwi. Arali tshifhingani tshi ḓaho vhana* vhaṋu vha ni vhudzisa uri: ‘Ndi ngani no vhea enea matombo henefha?’+ 7 ni vha vhudze uri: ‘Ndi nga nṱhani ha uri maḓi a Mulambo wa Yorodane o ima a si tsha elela phanḓa ha mbulungelo+ ya Yehova ya mulanga. Musi i tshi pfuka Mulambo wa Yorodane, maḓi o ima a si tsha elela. Enea matombo a ḓo dzula e tshihumbudzi* tsha vhathu vha Isiraele.’”+

8 Nga zwenezwo, Vhaisiraele vha ita zwe Yoshua a vha laya. Vha hwala matombo a 12 a bvaho vhukati ha Mulambo wa Yorodane, sa zwe Yehova a laya Yoshua, uri a tshimbidzane na tshivhalo tsha tshaka dza Isiraele. Vha ṱuwa nao fhethu he vha vha vha tshi ḓo eḓela hone, vha a vhea henefho.

9 Yoshua a dovha a imisa matombo a 12 Mulamboni wa Yorodane fhethu he vhotshifhe vha vha vho ima hone musi vho hwala mbulungelo ya mulanga,+ eneo matombo a kha ḓi vha hone u swika na ṋamusi.

10 Vhotshifhe vho hwalaho Mbulungelo vho vha vho ima vhukati ha Mulambo wa Yorodane u swika Yoshua a tshi fhedza u vhudza vhathu zwoṱhe zwe Yehova a vha o mu laya, u tendelana na zwoṱhe zwe Mushe a laya Yoshua. Nga tshenetsho tshifhinga vhathu vha ṱavhanya vha wela mulambo. 11 Musi vhathu vhoṱhe vho no wela mulambo, vhotshifhe vha wela vho hwala Mbulungelo ya Yehova vhathu vha tshi zwi vhona.+ 12 Vharubeni, Vhagada na hafu ya lushaka lwa Manase vha wela mulambo phanḓa ha Vhaisiraele vho ḓilugiselela u lwa,+ sa zwe Mushe a vha laya.+ 13 Maswole a ṱoḓaho u vha 40 000 o ḓiṱamaho a wela mulambo phanḓa ha Yehova a wetshela midavhini ya sogani ḽa Yeriko.

14 Nga ḽeneḽo ḓuvha Yehova o hulisa Yoshua Vhaisiraele vhoṱhe vha tshi zwi vhona,+ vha thoma u mu ṱhonifha* nga ho dzikaho maḓuvha oṱhe a vhutshilo hawe samusi vho vha vha tshi ṱhonifha Mushe nga ho dzikaho.+

15 Ngauralo, Yehova a amba na Yoshua a ri: 16 “Vhudza vhotshifhe vho hwalaho mbulungelo+ ya mulanga* uri vha bve Mulamboni wa Yorodane.” 17 Nga zwenezwo, Yoshua a vhudza vhotshifhe a ri: “Ibvani Mulamboni wa Yorodane.” 18 Musi vhotshifhe vho hwalaho mbulungelo+ ya mulanga wa Yehova vha tshi bva vhukati ha Mulambo wa Yorodane, musi milenzhe yavho i tshi kanda ho omaho, maḓi a Mulambo wa Yorodane a dovha a elela a ḓala a guma nga philiphili+ sa u thomani.

19 Vhathu vha bva Mulamboni wa Yorodane nga ḓuvha ḽa vhufumi nga ṅwedzi wa u thoma, vha atha madennde Giligala+ mukanoni wa vhubvaḓuvha wa Yeriko.

20 Yoshua a imisa eneo matombo a 12 e a hwaliwa Mulamboni wa Yorodane henefho Giligala.+ 21 Nga zwenezwo, a amba na Vhaisiraele a ri: “Tshifhingani tshi ḓaho musi vhana vhaṋu vha tshi vhudzisa vhokhotsi avho uri: ‘Aya matombo a amba mini?’+ 22 ni ṱalutshedze vhana vhaṋu ni ri: ‘Vhaisiraele vho wela Mulambo wa Yorodane vha tshi kanda ho omaho+ 23 musi Yehova Mudzimu waṋu a tshi xisa maḓi a Mulambo wa Yorodane phanḓa havho u swika vha tshi wela, samusi Yehova Mudzimu waṋu o zwi ita Lwanzheni Lutswuku musi a tshi lu xisa phanḓa hashu u swika ri tshi lu wela.+ 24 O ita zwenezwo uri vhathu vhoṱhe kha ḽifhasi vha ḓivhe uri Yehova u na maanḓa,+ u itela uri ni dzule ni tshi ofha Yehova Mudzimu waṋu.’”