Vhurifhi Ha U Thoma Ha Petro

4 Samusi Kristo o tambula,+ na inwi ni ḓilugiselele u humbula nga nḓila i fanaho na yawe; ngauri ane a tambula, u sumbedza uri o ṱutshela zwivhi,+ 2 uri musi a tshi kha ḓi tshila, a tshilele u ita zwi funwaho nga Mudzimu,+ hu si zwine zwa tamiwa nga vhathu.+ 3 Ngauri kale no vha ni tshi ita zwine zwa itwa nga vhathu vha shango.+ No vha ni tshi ita tshivhi ni sa shoni,* ni tshi tama u ḓifara luvhi, ni tshi nwesa, ni tshi ita zwimima zwi sa langei, ni tshi ṱaṱisana nga u nwa na u rabela midzimu ya zwifanyiso i nengisaho.+ 4 Vha vho mangala ngauri no litsha zwithu zwivhi zwe na vha ni tshi zwi ita navho, ndi ngazwo vha tshi vho ni sasaladza.+ 5 Fhedzi o lugelaho u haṱula vha tshilaho na vho faho,+ u ḓo haṱula vhenevha vhathu u ya nga mishumo yavho. 6 Ndi ngazwo mafhungo maḓifha o ḓivhadzwa na vho faho,+ uri vha tshile vha tshi livhiswa nga muya wa Mudzimu, naho vha tshi haṱulwa nga nḓila ine vhathu vha haṱulwa ngayo.

7 Vhufhelo ha zwoṱhe ho sendela. Ndi ngazwo ni tshi tea u vha na muhumbulo wo tshaho,+ ni fhaṱuwe, ni dzule ni tshi rabela.+ 8 Zwa ndeme vhukuma, ni funane nga maanḓa+ ngauri lufuno lu fukedza zwivhi zwinzhi.+ 9 Ni ṱanganedzane ni sa gunguli.+ 10 Sa vhashumeli vhe Mudzimu a vha sumbedza vhuthu vhuhulu nga nḓila dzo fhambananaho,+ ni shumelane ni tshi shumisa tshifhiwa tshe na ṋewa. 11 Ane a amba, a ambe u nga u khou ḓivhadza mulaedza wa Mudzimu; ane a thusa vhaṅwe, a ḓitike nga maanḓa a Mudzimu;+ uri Mudzimu a rendiwe+ kha zwoṱhe hu tshi shumiswa Yesu Kristo. Vhugala na maanḓa ndi zwawe lini na lini. Amen.

12 Vhafunwa, ni songo mangadzwa nga milingo i konḓaho* ine na khou sedzana nayo,+ ha tou nga hu khou itea zwithu zwine ni si zwi ḓivhe. 13 Fhedzi ni dzule no takala+ ngauri ni khou tambula na Kristo,+ uri musi vhugala hawe vhu tshi dzumbululwa,+ ni takale zwihulu. 14 Ni takale+ arali ni tshi khou semelwa dzina ḽa Kristo, ngauri zwi sumbedza uri ni na muya wa vhugala, une wa vha muya wa Mudzimu.

15 Naho zwo ralo, hu songo vha na ane a tambula nge a vha muvhulayi, mbava, muitazwivhi kana ane a dzhenelela kha mafhungo a vhaṅwe vhathu.+ 16 Ane a tambula nge a vha Mukriste, a songo shona,+ fhedzi a dzule a tshi renda Mudzimu nga u tshila u tendelana na ḽeneḽi dzina. 17 Tshifhinga tsho vhewaho tsha khaṱhulo tsho swika, i ḓo thoma kha vha nnḓu ya Mudzimu.+ Arali i tshi thoma nga riṋe,+ hu ḓo itea mini kha vhane vha si thetshelese mafhungo maḓifha a Mudzimu?+ 18 “Arali zwi tshi ḓo konḓela o lugaho uri a tshidzwe, hu ḓo itea mini kha a sa ofhi Mudzimu na muitazwivhi?”+ 19 Vhane vha khou tambula ngauri vha ita zwine Mudzimu a zwi funa, vha dzule vha tshi ita zwivhuya na u ḓikumedzela kha Musiki a fhulufhedzeaho.+