Evangeli Ya Luka

8 Nga murahunyana, a tshimbila a ya miḓini na miḓanani, a tshi khou huwelela na u ḓivhadza mafhungo maḓifha a Muvhuso wa Mudzimu.+ O vha e na vhaapostola vha 12, 2 na vhaṅwe vhafumakadzi vhe a vha fhodza malwadze na u pandela madimoni khavho. Vhenevho ndi Maria ane a pfi Magdalena, we ha pandelwa madimoni a sumbe khae; 3 na Yohana+ mufumakadzi wa Khuza, munna we a vha a tshi ṱhogomela zwa nḓuni ya Herode; na Susana; na vhaṅwe vhafumakadzi vhanzhi, vhane vha thusa Yesu na vhaapostola vhawe nga zwine vha vha nazwo.+

4 Musi ho no kuvhangana gogo na vhe vha ḓa khae vha tshi bva kha miṅwe miḓi, a amba nga tshifanyiso+ a ri: 5 “Muzwali o bva a ya a zwala mbeu. Musi a tshi khou zwala, iṅwe mbeu ya wela thungo ha nḓila ya kandekanyiwa, zwiṋoni zwa ḓa zwa i ḽa.+ 6 Iṅwe ya wela matomboni, musi yo no mela, ya oma ngauri yo vha i sa wani maḓi.+ 7 Iṅwe ya wela mipfani, ya hula na mipfa, zwenezwo zwa ita uri mbeu i si tsha hula zwavhuḓi.+ 8 Iṅwe ya wela mavuni avhuḓi, musi yo no mela, ya aṋwa ya ita 100.”+ Musi o no amba zwenezwo, a vhidzelela a ri: “A re na nḓevhe nga a pfe.”+

9 Fhedzi vhafunziwa vhawe vha mu vhudzisa zwine tshenetsho tshifanyiso tsha amba zwone.+ 10 A ri: “Inwi no tendelwa uri ni ḓivhe zwiphiri zwikhethwa zwa Muvhuso wa Mudzimu, fhedzi vhaṅwe ndi vha vhudza nga zwifanyiso,+ uri naho vha tshi lavhelesa vha si vhone, naho vha tshi pfa vha si zwi ṱalukanye.+ 11 Tshifanyiso tshi amba hezwi: Mbeu ndi mulaedza wa Mudzimu.+ 12 Mbeu ye ya wela thungo ha nḓila i fanyisela vhane vha pfa mulaedza, fhedzi Diabolo a ḓa a dzhia mulaedza mbiluni dzavho, uri vha si tende vha tshidzwa.+ 13 Yo welaho matomboni i fanyisela vhane vha ri u pfa mulaedza, vha u ṱanganedza nga dakalo, fhedzi vha si vhe na midzi. Vhenevho vha a tenda lwa tshifhinganyana, fhedzi musi vha tshi lingwa vha a wa.+ 14 Yo welaho mipfani i fanyisela vhane vha pfa mulaedza, fhedzi vha thithiswa nga mbilaelo, lupfumo+ na madakalo a vhutshilo,+ zwenezwi zwithu zwa kwanyeledza mulaedza vha si aṋwe mitshelo.+ 15 Yo welaho mavuni avhuḓi i fanyisela vha re na mbilu yavhuḓi,+ vhane vha ri u pfa mulaedza vha u ṱanganedza, vha konḓelela vha tshi khou aṋwa mitshelo.+

16 “A hu na ane a nga funga luvhone a lu tiba nga manngi kana u lu vhea fhasi ha mmbete, fhedzi lwonolwo luvhone u lu vhea khagala, uri lu vhonetshele vhane vha dzhena.+ 17 Ngauri zwoṱhe zwo dzumbiwaho zwi ḓo dzumbululwa, na zwiphiri zwoṱhe zwi ḓo ḓivhiwa na u bvela khagala.+ 18 Ni ṱhogomele nḓila ine na thetshelesa ngayo, ngauri ane a vha nazwo, u ḓo ṋewa zwo engedzeaho,+ fhedzi ane a si vhe nazwo, u ḓo dzhielwa na zwine a humbula u nga u nazwo.”+

19 Mme awe na vharathu vhawe+ vha ḓa u mu vhona, fhedzi vha si kone u swika he a vha e hone ngauri ho vha ho ḓala.+ 20 Vhathu vha amba na Yesu vha ri: “Mme au na vharathu vhau vho ima nnḓa, vha khou ṱoḓa u u vhona.” 21 Ene a ri: “Mme anga na vharathu vhanga ndi vhane vha pfa ipfi ḽa Mudzimu, vha ita zwine ḽa amba zwone.”+

22 Ḽiṅwe ḓuvha Yesu na vhafunziwa vhawe vha dzhena tshikepeni, a amba navho a ri: “Kha ri wele seli ha lwanzhe.” Vha wela.+ 23 Musi tshikepe tshi tshi khou tshimbila, Yesu a farwa nga khofhe. Ha vuwa ḓumbu ḽihulu lwanzheni, maḓi a thoma u ḓadza tshikepe, tsha ṱoḓou ṋupela.+ 24 Vha ya khae vha mu vusa, vha ri: “Mufunzi, Mufunzi, ri khou fa!” A vuwa a kaidza ḓumbu na magabelo, ha dzika.+ 25 A amba navho a ri: “Ndi ngani ni si na lutendo?” Fhedzi vho vha vho tshuwa, vha mangala vha amba nga tshavho vha ri: “Ndi muthu-ḓe onoyu? Ngauri u a kaidza maḓumbu na maḓi zwa mu thetshelesa.”+

26 Vha wela dzinguni ḽa Gerasini,+ ḽi re seli ha Galilea. 27 Musi Yesu a tshi tou tsa tshikepeni, a ṱangana na muṅwe munna wa henefho muḓini we a vha e na madimoni. Ho vha hu kale a si tsha ambara zwiambaro, a si tsha dzula hayani, a tshi dzula mavhiḓani.+ 28 Musi a tshi vhona Yesu, a ṱavha mukosi a gwadama phanḓa hawe, a vhidzelela a ri: “Wo ḓela mini iwe Yesu, Murwa wa Mudzimu Wa-Ṱaḓulu-ṱaḓulu? Ndi khou humbela uri u songo ntambudza.”+ 29 (Ngauri Yesu o vha o vhudza dimoni uri ḽi bve kha onoyo munna. Ho vha hu kale ḽi khae,+ vhathu vha tshi dzulela u mu vhofha zwanḓa na milenzhe nga ngeḓane na u mu linda, fhedzi o vha a tshi dzi ṱhukhula, dimoni ḽi tshi mu isa fhethu hu re kule na muḓi.) 30 Yesu a mu vhudzisa a ri: “U pfi nnyi?” Ene a ri: “Ndi pfi Mmbi,” ngauri o vha e na madimoni manzhi. 31 Madimoni a mu humbela lunzhi-lunzhi uri a songo a pandelela mugodini.+ 32 Ho vha hu na nguluvhe+ dze dza vha dzi tshi khou ḽa henefho thavhani, madimoni a mu humbela uri a tendelwe u dzhena khadzo, Yesu a a tendela.+ 33 Madimoni a bva kha onoyo munna a dzhena kha nguluvhe, dza gidimela luwani dza wela lwanzheni, dza fela henefho. 34 Hone vhalisa vhadzo vha tshi vhona zwe zwa itea, vha shavha, vha ya muḓini na mivhunduni ya henefho vha amba zwoṱhe zwe zwa itea.

35 Vhathu vha ya vha vhona zwe zwa itea. Vha ḓa kha Yesu vha wana uḽa munna a si tshee na madimoni, o ambara a si tsha lwala, o dzula tsini na milenzhe ya Yesu, vha tshuwa. 36 Vhe vha zwi vhona vha ṱalutshedza vho ḓaho nḓila ye munna we a vha e na madimoni a fhodzwa ngayo. 37 Vhathu vhanzhi vha dzinguni ḽa Gerasini vha humbela Yesu uri a ṱuwe, ngauri vho vha vho tshuwa zwihulu. A dzhena tshikepeni uri a ṱuwe. 38 Munna we a vha e na madimoni o vha a tshi khou humbela Yesu uri a ṱuwe nae, fhedzi Yesu a ri:+ 39 “Iya hayani, u dzule u tshi amba zwithu zwe Mudzimu a u itela zwone.” Onoyo munna a ṱuwa, a ḓivhadza muḓini woṱhe zwe Yesu a mu itela zwone.

40 Musi Yesu a tshi vhuya Galilea, gogo ḽa mu ṱanganedza nga vhulenda, ngauri vhoṱhe vho vha vho mu lavhelela.+ 41 Ha ḓa muṅwe munna ane a pfi Yairo, muhulwane wa sinagogo. A gwadama milenzheni ya Yesu a mu humbela uri a ḓe muḓini wawe,+ 42 ngauri o vha e na ṅwananyana muthihi fhedzi we a vha e na miṅwaha i ṱoḓaho u vha 12, we a vha a tshi khou fa.

Musi Yesu a tshi khou ya henengei, gogo ḽa mu kwanyeledza. 43 Ho vha hu na muṅwe mufumakadzi we a vha o no fhedza miṅwaha ya 12 o farwa nga vhulwadze ha u shuluwa malofha,+ hu si na ane a nga kona u mu fhodza.+ 44 A ḓa kha Yesu nga murahu a kwama lupendelo lwa tshiambaro tshawe,+ vhulwadze hawe ha u shuluwa malofha ha fhola nga u ṱavhanya. 45 Yesu a ri: “Ndi nnyi o nkwamaho?” Musi vhathu vhoṱhe vha tshi khou hanedza, Petro a ri: “Mufunzi, gogo ḽo u kuvhanganela, ḽi khou u kwanyeledza.”+ 46 Yesu a ri: “Hu na muthu o nkwamaho, ngauri ndi a zwi ḓivha uri ho bva maanḓa+ kha nṋe.” 47 Musi mufumakadzi a tshi vhona uri zwe a ita zwi vho ḓivhea, a ḓa a tshi khou tetemela a gwadama phanḓa hawe. A amba vhathu vhoṱhe vha tshi zwi pfa uri o mu kwamela mini na nḓila ye a fhodzwa ngayo nga u ṱavhanya. 48 Yesu a amba nae a ri: “Ṅwananga, lutendo lwau lwo u fhodza. Ṱuwa nga mulalo.”+

49 Musi Yesu a tshi kha ḓi amba, ha swika muṅwe munna a bvaho hayani ha muhulwane wa sinagogo, a ri: “U songo tsha dina Mufunzi; ṅwananyana wau o lovha.”+ 50 Musi Yesu a tshi pfa zwenezwo, a ri: “U songo ofha, ivha na lutendo, ṅwananyana wau u ḓo vuwa.”+ 51 Musi a tshi swika hayani ha Yairo a dzhena na Petro, Yohane, Yakobo na vhabebi vha ṅwananyana. A si tende vhaṅwe vha tshi mu tevhela. 52 Fhedzi vhathu vhoṱhe vho vha vho ṱungufhala vha tshi khou lilela ṅwananyana. Ene a ri: “Litshani u lila,+ ngauri ho ngo fa, o eḓela.”+ 53 Musi vha tshi pfa zwenezwo vha mu sea na u mu goḓa, ngauri vho vha vha tshi zwi ḓivha uri o fa. 54 A fara tshanḓa tsha onoyo ṅwana a ri: “Ṅwananyana, vuwa!”+ 55 A vuwa nga u ṱavhanya,+ Yesu a ri ṅwananyana a ṋewe zwiḽiwa. 56 Vhabebi vhawe vho vha vho takala nga maanḓa, fhedzi a vha vhudza uri vha songo vhudza muthu zwe zwa itea.+