Mishumo Ya Vhaapostola

13 Ngei Antiokia ho vha hu na vhaporofita na vhane vha funza tshivhidzoni tsha henefho.+ Ho vha hu Baranaba, Saulo, Simioni ane a pfi Nigere, Lukio wa Kirene na Manahene we a gudiswa na Herode muvhusi wa tshiṱiriki. 2 Musi vha tshi khou shumela Yehova* na u ḓidzima zwiḽiwa, muya mukhethwa wa ri: “Nangani Baranaba na Saulo+ uri vha ite mushumo we nda vha vhidzela wone.”+ 3 Vha dovha vha ḓidzima zwiḽiwa, vha rabela, vha vha vhea zwanḓa, vha vha litsha vha ṱuwa.

4 Vhenevho vhanna vha ya Seleukia vho rumiwa nga muya mukhethwa, vha tshi bva henefho vha ṋamela tshikepe vha ya Kipiro. 5 Musi vha tshi swika ngei Salami, vha ḓivhadza ipfi ḽa Mudzimu sinagogoni dza Vhayuda. Vho vha vha tshi thuswa nga Yohane.+

6 Musi vho no tshimbila na tshiṱangadzime tshoṱhe vha swika Phafo, vha ṱangana na muṅwe munna wa Muyuda we a vha a tshi pfi Bara-Yesu, we a vha e muloi, e muporofita wa mazwifhi. 7 O vha e na muvhusi wa vundu* o ṱalifhaho ane a pfi Seregio Paulosi. Seregio a vhidza Baranaba na Saulo, ngauri o vha o ḓiimisela u pfa ipfi ḽa Mudzimu. 8 Fhedzi Elimasi wa muloi (zwenezwi ndi zwine dzina ḽawe ḽa amba zwone) a vha pikisa, a tshi ṱoḓa u thivhela muvhusi wa vundu uri a si tende. 9 Saulo ane a pfi Paulo, a ḓala muya mukhethwa, a mu lavhelesa, 10 a ri: “Iwe munna wo ḓalaho vhukwila na vhuvhi hoṱhe, u murwa wa Diabolo,+ iwe swina ḽa zwithu zwoṱhe zwo lugaho, naa a u litshi u kombamisa nḓila dzo lugaho dza Yehova?* 11 Zwino tshanḓa tsha Yehova* tshi ḓo lwa na iwe, u ḓo pofula, wa si tsha vhona tshedza tsha ḓuvha lwa tshifhinga tshilapfu.” Nga u ṱavhanya a vhona khuli khulu na swiswi, a phuphuledza a tshi ṱoḓa ane a nga mu tshimbidza. 12 Musi muvhusi wa vundu a tshi vhona zwe zwa itea, a tenda, nge a mangadzwa nga zwe a zwi guda nga ha Yehova.*

13 Paulo na vhe a vha e navho, vha ṱuwa Phafo nga tshikepe vha wela Perege ngei Pamfilia. Fhedzi Yohane+ a vha sia a humela Yerusalema.+ 14 Vha ṱuwa Perege vha ya Antiokia ngei Pisidia. Vha swika vha dzula sinagogoni+ nga ḓuvha ḽa Savhatha. 15 Musi vhahulwane vha sinagogo vho no vhala Mulayo+ na bugu dza Vhaporofita, vha rumela muthu uri a ambe navho a ri: “Vhahashu, arali hu na zwine na nga ri ṱuṱuwedza ngazwo, zwi ambeni.” 16 Paulo a takuwa, a fhumudza vhathu nga tshanḓa a ri:

“Inwi vhanna, Vhaisiraele na inwi ni ofhaho Mudzimu, thetshelesani. 17 Mudzimu wa havha vhathu vha Isiraele o nanga vhomakhulukuku washu, a vha hulisa musi vhe vhatsinda shangoni ḽa Egipita na u vha bvisa khaḽo nga maanḓa awe mahulu.*+ 18 A fhedza miṅwaha ya 40 a tshi khou konḓelela zwiito zwavho ngei sogani.+ 19 Musi o no fhelisa tshaka dza sumbe ngei shangoni ḽa Kanana, a vha ṋea shango ḽa dzenedzo tshaka uri ḽi vhe ifa ḽavho.+ 20 Zwenezwo zwoṱhe zwo itea miṅwahani i ṱoḓaho u vha ya 450.

“Nga murahu ha zwenezwo, a vha ṋea vhahaṱuli u swikela tshifhingani tsha muporofita Samuele.+ 21 Fhedzi u bva nga tshenetsho tshifhinga vha ṱoḓa khosi,+ Mudzimu a vha ṋea Saulo murwa wa Kishi, munna a bvaho kha lushaka lwa Benyamini,+ a vhusa miṅwaha ya 40. 22 Musi Mudzimu o no bvisa Saulo, a vhea Davida uri a vhe khosi.+ Mudzimu a amba nga hae a ri: ‘Ndo wana Davida murwa wa Isai,+ munna ane a takadza mbilu yanga,+ ane a ḓo ita zwoṱhe zwine nda zwi takalela.’ 23 Samusi Mudzimu o fhulufhedzisa, o ḓisela Isiraele mutshidzi, ane a vha Yesu a tshi bva kha vhana* vha onoyo munna.+ 24 Musi onoyo a sa athu u ḓa, Yohane o huwelela kha vhathu vhoṱhe vha Isiraele uri vha lovhedzwe u itela u sumbedza uri vho rembuluwa.+ 25 Musi Yohane e tsini na u fhedza mushumo wawe, o vha a tshi ri: ‘Ni humbula uri ndi nṋe nnyi? Muthu ane na khou humbula nga hae a si nṋe. Fhedzi a thi fanelei u bvula thovho* dza ane a khou ḓa murahu hanga.’+

26 “Vhahashu, inwi vharwa vha lushaka lwa Abrahamu na inwi ni ofhaho Mudzimu, wonoyu mulaedza wa u tshidza wo rumelwa kha riṋe.+ 27 Ngauri vhadzulapo vha Yerusalema na vhavhusi vhavho a vho ngo mu ḓivha, musi vha tshi mu haṱula, vho ita zwo ambiwaho nga Vhaporofita,+ zwine zwa vhaliwa nga Savhatha iṅwe na iṅwe. 28 Vho kombetshedza Pilato uri a mu vhulaye,+ naho vha songo wana mulandu une wa nga ita uri a vhulawe.+ 29 Musi vho no ita zwoṱhe zwo ṅwaliwaho nga hae, vha mu tsitsa kha danda* vha mu vhulunga vhiḓani.+ 30 Fhedzi Mudzimu a mu vusa vhafuni,+ 31 ha fhela maḓuvha manzhi a tshi vhonwa nga vhe a bva navho Galilea a tshi ya Yerusalema. Ndi vhone vhane vha khou vhudza vhathu nga hae.+

32 “Ri khou ni ḓivhadza mafhungo maḓifha nga ha zwe zwa fhulufhedziswa vhomakhulukuku washu. 33 Mudzimu o ita zwoṱhe zwe a fhulufhedzisa riṋe vhana vhavho nga u vusa Yesu vhafuni;+ samusi zwo ṅwaliwa kha phisalema ya vhuvhili ha pfi: ‘Iwe u murwa wanga, ṋamusi ndi khotsi au.’+ 34 Mudzimu o mu vusa vhafuni, ha nga dovhi a vha muthu ane a fa na u sina. Mudzimu o khwaṱhisedza uri zwenezwi ndi ngoho musi a tshi ri: ‘Ndi ḓo ni sumbedza lufuno lu sa shanduki lwe nda lu fhulufhedzisa Davida.’+ 35 Iṅwe phisalema ya ri: ‘U nga si tende muvhuya wau a tshi sina.’+ 36 Na Davida o ita zwi funwaho nga Mudzimu vhutshiloni hawe hoṱhe, a fa, a vhulungwa na vhomakhulukuku wawe, a sina.+ 37 Fhedzi we Mudzimu a mu vusa vhafuni, ho ngo sina.+

38 “Vhahashu ḓivhani uri ni khou ḓivhadzwa ḽa u hangwelwa zwivhi nga onoyu.+ 39 U ya nga Mulayo wa Mushe,+ no vha ni tshi ḓo vha ni tshi kha ḓi vha na mulandu. Fhedzi vhoṱhe vhane vha tenda vha dzhiiwa vhe si na mulandu nga nṱhani hawe.+ 40 Ni ṱhogomele uri zwe zwa ambiwa buguni dza Vhaporofita zwi si itee kha inwi: 41 ‘Inwi vhagoḓi, vhonani mushumo une nda khou ita misini yaṋu. Ni nga si vhuye na tenda uri ndo ita wonoyu mushumo naho muṅwe muthu a ni ṱalutshedza nga vhuḓalo.+ Fhedzi ni ḓo tou mangala na lovha.’”

42 Musi vha tshi khou bva sinagogoni, vhathu vha vha humbela uri vha ambe nga ha enea mafhungo nga Savhatha i tevhelaho. 43 Musi vho no balangana sinagogoni, Vhayuda vhanzhi na vhathu vho rembulutshelaho kha vhurereli ha Tshiyuda vha gwadamelaho Mudzimu vha tevhela Paulo na Baranaba, vhe vha vha ṱuṱuwedza uri vha dzule vha tshi ita zwine zwa ḓo ita uri vha funwe nga Mudzimu.*+

44 Nga Savhatha i tevhelaho, ha kuvhangana vhathu vhanzhi vha wonoyo muḓi uri vha pfe ipfi ḽa Yehova.* 45 Musi Vhayuda vha tshi vhona vhathu vhanzhi, vha vha na vivho, vha sema Mudzimu nga u hanedza zwe zwa vha zwi tshi khou ambiwa nga Paulo.+ 46 Paulo na Baranaba vha amba nga tshivhindi vha ri: “Zwo vha zwo tea uri ipfi ḽa Mudzimu ḽi vhudzwe inwi u thoma.+ Fhedzi no ḽi landula, na vhona ni sa fanelei u wana vhutshilo vhu sa fheli. Ndi ngazwo ri tshi khou ya u huwelela kha dziṅwe tshaka.+ 47 Ngauri Yehova* o ri laya a ri: ‘Ndo u nanga uri u vhe tshedza tsha dzitshaka, uri u ḓivhadze u swika magumoni a ḽifhasi nga ha nḓila ine nda ḓo tshidza ngayo vhathu.’”+

48 Musi vha dzitshaka vha tshi pfa zwenezwi, vha takala vha renda Yehova* nga nṱhani ha ipfi ḽawe, vhoṱhe vho ḓiimiselaho u wana vhutshilo vhu sa fheli vha tenda. 49 Zwiṅwe hafhu, ipfi ḽa Yehova* ḽo vha ḽi tshi khou ḓivhadzwa shangoni ḽeneḽo ḽoṱhe. 50 Fhedzi Vhayuda vha ṱuṱuwedza vhafumakadzi vha vhuimo ha nṱha vha ofhaho Mudzimu na vharangaphanḓa vha wonoyo muḓi, uri vha tovhole+ Paulo na Baranaba na u vha posela nnḓa ha muḓi. 51 Paulo na Baranaba vha fhufhura buse ḽi re milenzheni yavho uri zwi vhe vhuṱanzi khavho, vha ya Ikonio.+ 52 Vhafunziwa vha bvela phanḓa vho takala,+ vho ḓala muya mukhethwa.