Mishumo Ya Vhaapostola

12 Misini yeneyo, Khosi Herode a tovhola vhaṅwe tshivhidzoni.+ 2 A vhulaya Yakobo mukomana* wa Yohane+ nga banga.+ 3 Musi a tshi vhona uri zwi khou takadza Vhayuda, a fara na Petro. (Ho vha hu tshifhinga tsha Vhuṱambo ha Vhurotho vhu si na Mbiliso.)+ 4 A mu fara a mu valela dzhele,+ a vhea zwigwada zwiṋa zwa maswole maṋa uri zwi mu linde nga u tou sielisana, samusi o vha a tshi khou ṱoḓa u mu isa phanḓa ha vhathu nga murahu ha Paseka. 5 Musi Petro o valelwa dzhele, tshivhidzo tsha dzula tshi tshi mu rabelela kha Mudzimu.+

6 Herode o vha o dzudzanya u bvisa Petro dzhele nga ḓuvha ḽi tevhelaho, fhedzi honoho vhusiku Petro o vha o eḓela o vhofhiwa nga ngeḓane mbili e vhukati ha maswole mavhili, muṋangoni wa dzhele hu na vhalindi. 7 Ha ḓa muruṅwa wa Yehova* a ima tsini nae,+ ha vha na tshedza he a vha o valelwa hone. Muruṅwa a phaphatha Petro kha lurumbu, a mu vusa a ri: “Vuwa nga u ṱavhanya!” Ngeḓane dza wa zwanḓani zwawe.+ 8 Muruṅwa a ri: “Ḓilugise, u ambare thovho* dzau.” A ita nga u ralo. Mafheleloni muruṅwa a ri: “Ambara tshiambaro tsha nga nṱha u ntevhele.” 9 A mu tevhela, a sa ḓivhi uri zwine muruṅwa a khou zwi ita ndi zwa vhukuma. Khae zwo vha zwi tshi tou nga ndi bono. 10 Vha fhira tshigwada tsha maswole tsha u thoma na tsha vhuvhili, vha swika vothini ḽa tsimbi ḽi dzhenaho muḓini, ḽa vulea nga ḽoṱhe. Musi vho no bva vha ya kha iṅwe nḓila, nga u ṱavhanya muruṅwa a ṱuwa. 11 Musi Petro a tshi ṱhogomela zwe zwa vha zwi tshi khou itea, a ri: “Zwino ndi a zwi ḓivha zwa uri Yehova* o ruma muruṅwa wawe a mponyokisa tshanḓani tsha Herode na kha zwoṱhe zwe Vhayuda vha vha vho lavhelela uri zwi ḓo itea.”+

12 Musi o no ṱhogomela zwenezwi, a ya nḓuni ya Maria mme a Yohane ane a pfi Marko,+ he ha vha ho kuvhangana vhafunziwa vhanzhi vha tshi khou rabela. 13 Musi a tshi khokhonya muṋangoni, Rode mushumeli wa mufumakadzi a ya muṋangoni uri a pfe uri ndi nnyi. 14 Musi a tshi pfa uri ndi Petro, a takala zwihulu lwe a kundwa na u vula muṋango, a humela murahu a tshi khou gidima, a amba uri Petro o ima muṋangoni. 15 Vhone vha ri: “U khou penga.” Fhedzi a ḓi isa phanḓa a tshi ri ndi ene. Vha amba uri: “Ndi muruṅwa wawe.” 16 Petro a ima henefho a tshi khou khokhonya. Musi vha tshi vula, vha mu vhona vha mangala. 17 A vha fhumudza nga tshanḓa, a vha vhudza nga vhuḓalo nḓila ye Yehova* a mu bvisa ngayo dzhele, a ri: “Ni vhudze Yakobo+ na vhaṅwe vhatendi enea mafhungo.” A ṱuwa a ya huṅwe.

18 Musi ḽi tshi tsha, ha vuwa bonyongo vhukati ha maswole ḽa uri ho itea mini nga Petro. 19 Herode a mu sedza hoṱhe, musi a songo mu wana, a sengisa vhalindi a laedza uri vha pfiswe vhuṱungu;+ Herode a ṱuwa Yudea a tsela Kesarea a fhedza tshifhinganyana e henengei.

20 Herode a sinyutshela* vhathu vha ngei Tiro na vha ngei Sidoni. Vhenevha vhathu vho vha vha tshi renga zwiḽiwa shangoni ḽawe, vha langana u ya u amba na Blasto, munna a langaho zwa pfamoni ya khosi, uri a vha thuse uri vha vhe na mulalo na khosi. 21 Ḽiṅwe ḓuvha musi vhathu vho kuvhangana, Herode a ambara zwiambaro zwa vhuhosi a dzula hune ha sengiselwa hone, a amba navho. 22 Vhathu vho kuvhanganaho vha vhidzelela vha ri: “Heḽo ndi ipfi ḽa mudzimu, a si ḽa muthu!” 23 Nga u ṱavhanya muruṅwa wa Yehova* a ita uri a lwale, ngauri ho ngo hulisa Mudzimu, a ḽiwa nga mbungu a fa.

24 Fhedzi ipfi ḽa Yehova* ḽa bvela phanḓa ḽi tshi phaḓalala.+

25 Musi Baranaba+ na Saulo vho no thusa vha re ngei Yerusalema,+ vha humela murahu vha ṱuwa na Yohane+ ane a pfi Marko.