Levitiko

25 Yehova a dovha a amba na Mushe ngei Thavhani ya Sinai a ri: 2 “Amba na Vhaisiraele u ri: ‘Musi ni tshi swika shangoni ḽine nda khou ni ṋea ḽone,+ ni songo lima masimu ngauri ndi savhatha ya Yehova.+ 3 Ni zwale mbeu tsimuni yaṋu miṅwaha ya rathi, ni khwathele tsimu yaṋu ya minḓirivhe, ni kuvhanganye zwibveledzwa zwa masimuni.+ 4 Fhedzi nga ṅwaha wa vhusumbe ni litshe tshoṱhe u lima masimu, uri u vhe ṅwaha wa savhatha ya Yehova. Ni songo zwala mbeu tsimuni yaṋu kana u khwathela minḓirivhe. 5 Ni songo kaṋa zwe zwa sokou mela zwi tshi bva kha thoro dze dza wela fhasi nga murahu ha khaṋo, na nḓirivhe dza minḓirivhe yaṋu i songo khwathelwaho ni songo dzi kuvhanganya. Hu fhele ṅwaha hu sa limiwi masimu. 6 Naho zwo ralo, ni nga ḽa zwiḽiwa zwine zwa mela masimuni nga savhatha; inwi na vhalanda vhaṋu vha vhanna na vha vhafumakadzi, mushumi waṋu we na mu thola na vhatsinda vhane vha dzula na inwi vha nga ḽa, 7 u katela na zwifuwo na phukha dzi re shangoni ḽa haṋu. Zwiṅwe na zwiṅwe zwine masimu a zwi bveledza ni nga zwi ḽa.

8 “‘Ni vhalele miṅwaha ya sumbe ya savhatha, miṅwaha ya sumbe i tshi andiswa nga sumbe, maḓuvha a miṅwaha ya sumbe ya savhatha a ḓo lingana na miṅwaha ya 49. 9 Ndi hone ni tshi ḓo lidza luṋanga nga ṅwedzi wa vhusumbe nga ḓuvha ḽa vhufumi ḽa ṅwedzi; nga Ḓuvha ḽa u Pfumelelwa,+ ni ite uri luṋanga lu pfale shangoni ḽa haṋu ḽoṱhe. 10 Ni ite uri ṅwaha wa vhu 50 u vhe mukhethwa, ni ḓivhadze mbofholowo kha vhadzulapo vhoṱhe vha shango.+ U ḓo vha Ṅwaha wa Mbofholowo kha inwi, muṅwe na muṅwe waṋu u ḓo wana thundu yawe murahu, muṅwe na muṅwe u ḓo humela muṱani wa hawe.+ 11 Ṅwaha wa vhu 50 u ḓo vha Ṅwaha wa Mbofholowo kha inwi. A ni nga zwali mbeu kana u kaṋa zwe zwa sokou mela zwi tshi bva kha thoro dze dza sala kana u kuvhanganya nḓirivhe dza minḓirivhe i songo khwathelwaho.+ 12 Ngauri ndi Ṅwaha wa Mbofholowo. U vhe ṅwaha mukhethwa kha inwi. Ni nga ḽa zwo sokou melaho masimuni fhedzi.+

13 “‘Nga wonoyu Ṅwaha wa Mbofholowo muṅwe na muṅwe waṋu a vhuyelele ha hawe.+ 14 Arali na rengisela muṅwe muthu tshithu naho tshi tshifhio, kana na renga khae, ni songo fhurana.+ 15 Ni renge kha muṅwe muthu ni tshi vhalela miṅwaha ya nga murahu ha Ṅwaha wa Mbofholowo, a ni rengisele a tshi vhalela miṅwaha yo salaho ya zwiliṅwa.+ 16 Arali ho sala miṅwaha minzhi, a nga gonyisa mutengo wayo, arali ho sala miṅwaha miṱuku, a tsitse mutengo wayo, ngauri u khou u rengisela tshivhalo tsha zwiliṅwa, zwine zwa nga bveledzwa. 17 Hu songo vha na ane a fhura muṅwe muthu,+ ni tea u ofha Mudzimu waṋu,+ ngauri ndi nṋe Yehova Mudzimu waṋu.+ 18 Nga u tevhedza maitele anga na mahaṱulele anga, ni ḓo dzula no tsireledzea kha ḽeneḽo shango.+ 19 Shango ḽi ḓo bveledza mitshelo yaḽo,+ ni ḓo ḽa na fura na dzula no tsireledzea.+

20 “‘Fhedzi arali na ri: “Ri ḓo ḽa mini nga ṅwaha wa vhusumbe arali ra sa zwala mbeu kana u kuvhanganya zwiliṅwa zwashu?”+ 21 Ndi ḓo ni fhaṱutshedza nga ṅwaha wa vhurathi, masimu a ḓo bveledza zwiliṅwa zwo eḓanaho miṅwaha miraru.+ 22 Nga zwenezwo, ni ḓo zwala mbeu nga ṅwaha wa vhumalo na ḽa zwiliṅwa zwa kale u swika nga ṅwaha wa vhuṱahe. Ni ḓo ḽa zwiliṅwa zwa kale u swika zwa wonoyo ṅwaha zwi tshi swika.

23 “‘Tsimu i songo rengiswa lwa tshoṱhe,+ ngauri ndi yanga.+ Ngauri u ya nga nṋe, ni vhatsinda.+ 24 Kha shango ḽaṋu ḽoṱhe, ni vhe na ndugelo ya u rengulula shango.

25 “‘Arali wahau a vha mushai, a rengisa iṅwe ya thundu yawe, murengululi ane a vha shaka ḽawe ḽa tsini a ḓe a rengulule zwe wahawe a zwi rengisa.+ 26 Arali muthu a si na murengululi, fhedzi a pfuma a vha na tshelede ya u i rengulula, 27 a vhalele mutengo wayo u bva nga tshifhinga tshe a i rengisa ngatsho, a lifhele muthu we a i renga. Ndi hone a tshi ḓo wana tsimu yawe murahu.+

28 “‘Fhedzi arali a sa wana tshelede ya u i rengulula khae, zwe a zwi rengisa zwi ḓo dzula na murengi u swika nga Ṅwaha wa Mbofholowo;+ i ḓo vhuyelela khae nga Ṅwaha wa Mbofholowo, ndi hone a tshi ḓo wana tsimu yawe murahu.+

29 “‘Arali muthu a rengisa nnḓu i re muḓini wo tangwaho nga luvhondo, u ḓo vha na ndugelo ya u rengulula u swika ṅwaha u tshi fhela u bva nga tshifhinga tshe a i rengisa ngatsho; ndugelo yawe ya u rengulula+ i ḓo vha ya ṅwaha woṱhe. 30 Fhedzi arali i songo rengululwa mafheloni a ṅwaha, nnḓu i re muḓini wo tangeledzwaho nga luvhondo i ḓo vha thundu ya tshoṱhe ya murengi wayo kha mirafho yawe yoṱhe. I songo humiswa nga Ṅwaha wa Mbofholowo. 31 Naho zwo ralo, nnḓu dza mahayani dzi songo tangeledzwaho nga mbondo dzi fanela u dzhiiwa sa tsimu dza mahayani. Dzi dzule dzi na ndugelo ya u rengulula, dzi humele murahu nga Ṅwaha wa Mbofholowo.

32 “‘Vhalevi vha ḓo vha na ndugelo ya tshoṱhe ya u rengulula miḓi+ yavho na nnḓu dzavho dzi re muḓini. 33 Musi thundu ya Vhalevi i songo rengululwa, nnḓu yavho yo rengiswaho muḓini i ḓo humiselwa murahu nga Ṅwaha wa Mbofholowo,+ ngauri nnḓu dza miḓini ya Vhalevi ndi thundu yavho vhukati ha Vhaisiraele.+ 34 Zwiṅwe hafhu, pfulo+ yo monaho na miḓi yavho a yo ngo tea u rengiswa, ngauri ndi thundu yavho lini na lini.

35 “‘Arali wahau ane a vha tsini na iwe a vha mushai, a si kone u ḓiṱhogomela, u mu ṱhogomele+ samusi u tshi ṱhogomela mutsinda,+ uri a bvele phanḓa a tshi khou tshila. 36 Ni songo ṱoḓa nzwalelo khae kana u bindulisa ngae.+ Ni ofhe Mudzimu waṋu,+ ndi hone wahaṋu a tshi ḓo bvela phanḓa a tshi khou tshila. 37 Ni songo mu hadzimisa tshelede yaṋu u itela u wana nzwalelo+ kana u mu ṋea zwiḽiwa uri ni vhuyelwe. 38 Ndi nṋe Yehova Mudzimu waṋu, we a ni bvisa shangoni ḽa Egipita+ uri a ni ṋee shango ḽa Kanana, u itela u sumbedza uri ndi Mudzimu waṋu.+

39 “‘Arali wahau ane a dzula tsini na inwi a vha mushai, a ḓirengisela inwi,+ ni songo mu kombetshedza u ita mushumo wa vhupuli.+ 40 A farwe sa mushumi o tholwaho,+ u fana na mutsinda. A u shumele u swika nga Ṅwaha wa Mbofholowo. 41 Nga murahu ha zwenezwo u ḓo ṱuwa, ene na vhana* vhawe, a humela kha muṱa wawe. A humele ha vhokhotsi awe.+ 42 Ngauri ndi vhalanda vhanga vhe nda vha bvisa shangoni ḽa Egipita.+ Vha songo ḓirengisa nga nḓila ine mulanda a rengiswa ngayo. 43 Ni songo mu fara nga tshiṱuhu,+ ni ofhe Mudzimu waṋu.+ 44 Ni ḓo wana vhalanda vha vhanna na vha vhafumakadzi kha tshaka dzo ni tangaho, ni nga renga khavho mulanda wa munna kana wa mufumakadzi. 45 Na kha vhana vha vhatsinda vhane vha dzula na inwi,+ ni nga renga vhalanda khavho na kha vhana vhavho vhe vha vha beba shangoni ḽaṋu, vha ḓo vha vhaṋu. 46 Ni nga vha fhirisela kha vhana vhaṋu sa ifa uri vha vhe ifa ḽavho ḽa lini na lini. Ni nga vha ita vhashumi, fhedzi a no ngo tea u fara nga tshiṱuhu Vhaisiraele vhahaṋu.+

47 “‘Fhedzi arali mutsinda vhukati haṋu a pfuma, wahaṋu wa mushai a ḓirengisele kha mutsinda ane a dzula nae, kana kha muraḓo wa muṱa wa mutsinda, 48 a bvele phanḓa e na ndugelo ya u rengululwa nga murahu ha musi o ḓirengisa. Muṅwe wa vhahawe a nga mu rengulula,+ 49 kana khotsimunene wawe kana khotsimuhulu wawe kana ṅwana wa khotsimunene wawe kana wa khotsimuhulu wawe a nga mu rengulula, kana shaka* ḽawe ḽa tsini naho ḽi ḽifhio, ane a vha muṅwe wa muṱani wawe na ene a nga mu rengulula.

“‘Kana arali ene muṋe o no pfuma na ene a nga ḓirengulula.+ 50 Ene na murengululi wawe vha vhalele tshifhinga u bva musi a tshi ḓirengisa u swika nga Ṅwaha wa Mbofholowo,+ tshelede ya u ḓirengulula i ḓo tshimbidzana na tshivhalo tsha miṅwaha.+ Nga tshenetsho tshifhinga maḓuvha awe a u shuma a ḓo vhalelwa u fana na a mushumi o tholwaho.+ 51 Arali hu na miṅwaha minzhi yo salaho, a badele mutengo wawe wa u rengulula u linganaho na miṅwaha yo salaho. 52 Arali ho sala miṅwaha i si gathi u swika nga Ṅwaha wa Mbofholowo, a vhalele ene muṋe a badele mutengo wawe wa u rengululwa u linganaho na miṅwaha yo salaho. 53 A bvele phanḓa a tshi mu shumela ṅwaha muṅwe na muṅwe sa mushumi o tholwaho; u ite vhungoho ha uri ha mu fari nga tshiṱuhu.+ 54 Arali a sa koni u ḓirengulula nga yeneyo nḓila, u ḓo vhofhololwa nga Ṅwaha wa Mbofholowo,+ ene na vhana* vhawe.

55 “‘Ngauri Vhaisiraele ndi vhalanda vhanga. Ndi vhalanda vhanga vhe nda vha bvisa shangoni ḽa Egipita.+ Ndi nṋe Yehova Mudzimu waṋu.