Disembre

Gesù el ghe vol ben i so dissìpoli cossita come un pastor el ghe vol tanto ben ale so piégore. (Gioani 10:14) E le piégore le cognosse la voce del so pastor e le ghe va drio. Anca i dissìpoli i cognosse la voce de Gesù e i ghe va drio. Un omo el ga visto questo suceder cole piégore. Lu el ga dito: “Noantri voleino che le piégore le vegnesse pi darente de noantri par farghe ritrati. Ma lore no le vegnea parché no le cognossea la nostra voce. Alora l’è rivà un toseto che l’era el so pastor, e quando lu le ga ciamà, lore le ze ndate drio a lu.” Gesù el ga dito che i so dissìpoli i ndaria scoltar la so voce. Ma come podemo scoltar la so voce se lu l’è nel cielo? Noantri scoltemo el nostro pastor, Gesù, quando femo quel che lu el ne ga insegnà. — Mat. 7:24, 25. w21.12 p. 16 §§ 1, 2

Prima, el apòstolo Paolo l’era tanto rugno con quei che i ndea drio a Cristo e el volea coparli. Ma dopo, lu el ga visto che quel che el fea l’era sbalià e el ga cambià. (1 Tim. 1:12-16) Geovà lo ga giutà a esser un ansiano che el mostrea tanto amor, passiensa e el gavea tanta umiltà. E Paolo el se fidea che Geovà ndaria perdonarlo. (Rom. 7:21-25) Come Paolo l’era ùmile, el savea che el gavea bisogno del aiuto de Geovà par far quel che l’è giusto e par far el laoro che el ghe gavea domandà. Lu anca el seitea a sforsarse par gaver le qualità che ghe piase a Geovà. (1 Cor. 9:27; Fil. 4:13) L’è vera che i ansiani i ndarà sbaliar parché i ze imperfeti. Geovà el vol che i ansiani i se nicorde de quel che i fà de sbalià e i seite a gaver cada volta de pi le bele qualità. (Efe. 4:23, 24) Cossa pol giutar un ansiano a cambiar quel che ghe ocore? Studiar la Bìblia. Cossita, Geovà ndarà giutarlo a esser un bravo ansiano e a restar contento col laoro che el fà nela congregassion. — Tia. 1:25. w22.03 p. 29, 30 §§ 13-15

Cossa podemo far se vedemo che semo drio giulgar qualchedun? Ghemo de ricordarse che ne ocore amar i nostri fradei. (Tia. 2:8) Podemo anca pregar a Geovà de tuto el cuor e domandar el so aiuto par fermarse de giulgar. Ghemo anca de tor del nostro tempo par cognosser meio la persona e quel che la infronta nela so vita. Par esémpio, podemo convidarla par laorar nela predicassion o par magnar qualcossa insieme. Cossita, saremo boni de veder le so bele qualità, come Geovà e Gesù i fà. Alora ndaremo scoltar la voce de Gesù, che el ga dito che ghemo de fermarse de giulgar. Come le piégore le scolta la voce del so pastor, noantri scoltemo la voce de Gesù. Tuti quei che i ndarà viver nel cielo e nela Tera i ga de seitar a scoltar a Gesù e far quel che lu el dise. — Luc. 12:32; Gioani 10:11, 14, 16. w21.12 p. 19 § 11; p. 21 §§ 17, 18

Quando Roboan l’è deventà rè, i israeliti i ghe ga domandà che li assasse laorar manco. Alora, el rè el ga mostrà sabedoria parché el ga domandà ai òmini pi veci de Israel cossa che el gavea de far. E questi òmini i ghe ga dito che el gavaria de far quel che el pòpolo el gavea domandà. Cossita, el pòpolo el ndaria sempre servirlo. (1 Rè 12:3-7) Ma Roboan no ghe ga piasesto quel che questi òmini ghe ga dito. Alora, l’è ndato domandar consili ai so amighi. Lori i ghe ga dito che el gavea de far el pòpolo laorar ancora de pi. (1 Rè 12:9-11) Cossa saria la roba giusta da far? Domandar che Geovà lo giutesse a saver cossa far. Ma, lu el ga fato quel che i òmini pi gióveni i ghe ga dito. Ma questa scòlia la ze stata bruta par Roboan e par el pòpolo. Cossa che imparemo de questo? Ghemo de scoltar quando qualchedun el ne dà un consìlio de acordo cola Bìblia, anca se no l’è quel che volarìssino scoltar. w22.02 p. 9 § 6

Una persona che la ze ùmile e modesta no la va pensar che i gióveni no i sarà boni de far arquanti laori parché no i ga tanta speriensa. Pitosto la ndarà pensar de pi nele so bele qualità e che sarà bel laorar insieme, e mai la ndarà pensar che i altri i ze so nemighi. I fradei pi veci i vede i fradei pi gióveni come presenti de Geovà. Lori i ze tanto grati par tuto quel che i fà. Quando i pi veci no i ga pi tanta forsa, i resta contenti de saver che ghen’è fradei pi gióveni cola forsa e la voia de far i laori che ghe vol. Noemi la ze un bel esémpio nela Bìblia de una persona pi vècia che la ze stata grata. Prima, Noemi la gavea dito che Rute, la so nora, la tornesse al so pòpolo. Ma quando Rute la ga dito che la volea ndar con Noemi a Belen, Noemi la ga acetà el aiuto dela so nora, che la era pi gióvena. (Rut. 1:7, 8, 18) Questo l’è stà una benedission par tute due! (Rut. 4:13-16) I fradei pi veci, che i ze ùmili, i fà come Noemi. w21.09 p. 10, 11 §§ 9-11

El nostro Pare, Geovà, el sa che semo difarenti un del altro. Fursi ti te pol far de pi a Geovà che altri fradei. O pol esser che no te sì bon de far come i altri parché te ghè belche una bela età, qualche malatia o te ghè tante robe da far par tender dela to fameia. (Gàl. 6:4) Ma Geovà el vol che te resti contento con quel che te sì bon de far par lu. E lu mai ndarà desmentegarse del to laoro. Sicuro che se te sì drio far el meio che te pol parché te lo ami, lu el resta contento. Lu l’è anca bon de veder quel che te ghè rento el to cuor e quel che te volarissi farghe a lu. Anca restemo tranquili parché savemo che, se infrontemo problemi, Geovà el ndarà giutarne. (Isa. 41:9, 10) Sicuro che restemo tanto contenti de adorar el nostro Pare, che ‘el mèrita ricever la glòria e el onor’ de tuto quel che el ga creà! — Apo. 4:11. w22.03 p. 24 § 16; p. 25 § 18

Volemo far come Gesù, ma no ghemo de restar desanimadi se no semo boni de far pròpio compagno a lu. (Tia. 3:2) Imagina un maestro che l’è tanto bon de far una roba e un aluno che el proa far compagno a lu. Anca se lu no l’è bon de farla compagno al so maestro, el impara coi so sbali e el proa far dela meio maniera. Cossita, lu l’è bon de far quela roba cada volta meio. Anca noantri volemo seitar a sforsarse par far come Gesù. Come saremo boni de farlo? Se metemo in pràtica quel che imparemo dela Bìblia e se noantri se sforsemo par far cada volta meio. (Sal. 119:59) Noantri vivemo nte un mondo che le persone le pensa sol in lore stesse, ma i servi de Geovà no i ze cossita. Noantri restemo maraveiadi col esémpio de Gesù parché el fea sempre quel che l’era meio par i altri, e volemo far compagno. (1 Pie. 2:21) Se lo femo, restaremo tanto contenti parché saremo drio far quel che ghe piase a Geovà. w22.02 p. 24 § 16; p. 25 § 18

Geovà ancora l’è drio tender del so pòpolo par meso dela Bìblia. Ma, sol saremo boni de obedir a Geovà e farghe un bel laoro se tolemo del nostro tempo par pensar sora quel che lu el ne insegna. (1 Tim. 4:15, 16) Geovà anca el dopera el schiavo fedele e prudente par tender del so pòpolo. (Mat. 24:45) Pol esser che el schiavo el ne domanda de far una roba che no capimo tanto ben. Par esémpio, pol esser che el ga dito che ghemo de pareciarse par una desgràssia che pensemo che mai la podaria suceder nel posto che semo de star. Ma cossa ghemo de far se pensemo che no ne tocaria tenderse tanto cossita? Ricordarse de tanti esempi dela Bìblia de quei che i ga sempre obedio a Geovà. Arquante volte, el pòpolo de Geovà no’l ga capio parché che lu l’era drio domandarghe de far qualcossa. Ma anca cossita, lori i ga obedio, e questo ga salvà la so vita. — Giuisi 7:7; 8:10. w22.03 p. 18 §§ 15, 16

Gesù l’era sicuro de questo e par quela el ga dito le parole del testo de ancoi. Lu el savea che quel che ndaria suceder dopo, l’era nele man de Geovà e che el so Pare el ndaria ricordarse de lu. Cossa che imparemo de quel che Gesù el ga dito? Noantri ghemo de fidarse in Geovà, anca che la nostra vita la sìpia in perìcolo. Sol saremo boni de far questo se se fidemo in lu ‘de tuto el nostro cuor’. (Pro. 3:5) Varda el esémpio de Joshua, che l’era una Testimònia de Geovà che el gavea 15 ani. Lu el gavea una bruta malatia e el savea che el ndaria morir. Lu no’l ga mia acetà tratamenti che no i fusse de acordo cola lege de Dio. Prima de morir, lu el ga dito ala so mare: “Mama, Geovà el ndarà tender de mi . . . Mama, mi son pròpio sicuro che Geovà el ndarà ressussitarme. Lu el sa quel che mi penso e quel che mi sinto e mi lo amo tanto!” Tuti noantri podemo domandarse: ‘Se mi infrontesse una roba compagna, sarà che ndaria fidarme in Geovà e saria sicuro che lu el ndaria ricordarse de mi?’. w21.04 p. 12, 13 §§ 15, 16

Geovà el ne dà forsa par meso dela predicassion. Quando parlemo dela Bìblia ai altri, semo incoraiadi anca se lori no i vol scoltar sora la Bìblia. Tanti i pensa che no i pol far de pi par Geovà par causa de qualcossa che l’è drio suceder nela so vita. Se te te senti cossita, ricòrdate che Geovà el resta contento quando te fè el to meio a lu. Fursi no te pol ndar fora de casa, ma te piaseria far de pi nela predicassion. Te pol esser sicuro che Geovà el capisse quel che te sì drio infrontar, e lu el pol giutarte a predicar a quei che i te tende e ai dotori. No stà pensar in quel che te eri bon de far nel passà parché questo ndarà assarte desanimà. Proa anca veder quel che Geovà l’è drio far par giutarte adesso. Cossita, te gavarè forsa par infrontar tute le dificoltà contento. Parché che volemo seitar a predicar? Noantri no savemo quale semense che le ndarà far radise e vegner su. — Ecl. 11:6. w21.05 p. 24, 25 §§ 14-17

Geovà el gavea dato tante robe a Davi. Par esémpio, lu l’era sior, l’era una persona importante e el gavea vinsesto tante guere. Davi el savea che Geovà el ghe gavea dato tante robe che no l’era gnanca bon de parlar sora tute. (Sal. 40:5) Ma, dopo de un tempo, el se ga desmentegà de quel che Geovà el ghe gavea dato. Anca che Davi el gavesse tante done, el ga scominsià a voler la dona de nantro omo. Questa dona la era Bate-Seba e so omo l’era Uria, el itita. Davi el ga scominsià a pensar sol in lu stesso. Alora, lu el ga bio relassion sessuai con Bate-Seba, e la ze restada gràvida. Dopo de quel bruto pecato, Davi el ga mandà copar Uria. (2 Sam. 11:2-15) Cossa che Davi el ga pensà de far una bruta roba come questa? Sarà che el pensea che Geovà no l’era drio vederlo? Davi no l’era contento con quel che el gavea e l’era drio pensar sol in lu stesso. Par causa de questo, ghe ga sucedesto brute robe. Ma Davi el ga parlà del so sbàlio, el se ga ciamà gramo e Geovà lo ga perdonà. L’è sicuro che Davi el ga ringràssia tanto a Geovà par causa de questo! — 2 Sam. 12:7-13. w21.06 p. 17 § 10

Fursi pensemo che no semo boni de far un stùdio dela Bìblia. Fursi te pensi che te sè poco e che no te sì un bon maestro. Ma varda tre robe che pol giutarte a gaver de pi coraio. Prima, Geovà l’è sicuro che te ghè quel che te ocore par insegnar le persone sora lu. Seconda, Gesù, che el ga la ‘autorità nel cielo e nela tera’, el te ga domandà de far questo. (Mat. 28:18) Tersa, te pol domandar el aiuto dei altri. Par esémpio, te pol domandar al superintendente del to grupo, a un pioniero o a nantro predicador che el te giute a scominsiar e a far un stùdio dela Bìblia. Te pol anca ndar insieme nei studi de questi fradei par imparar con lori. Cossita, te vè far come Gesù, che el se ga fidà in Geovà e el ga fato come lu ghe ga insegnà. — Gioani 8:28; 12:49. w21.07 p. 6 § 12

Come suito Geovà el ndarà finir fora con questo mondo rugno, ghemo de imparar a fidarse nela so maniera de far le robe belche adesso. Parché? Nela granda tribolassion, quei che Geovà el ga scoliesto par tender dela so organisassion fursi i ndarà domandarne de far qualcossa che no ndaremo capir o che no sarà fàcile obedir. Alora, Geovà el ndarà doperar questi òmini par dirne quel che gavaremo de far, e no’l ndarà parlar con cada un de noantri. Cossita, ghemo de star atenti par mai pensar: ‘Sarà che questi òmini i ze drio far quel che Geovà el vol o quel che lori i vol?’ Nela granda tribolassion, gavaremo de fidarse tanto in Geovà e nei òmini che lu el ga scoliesto par tender del so pòpolo. Ma sol saremo boni de fidarse in lori nel futuro se lo femo belche adesso. Alora, fìdate in questi òmini e obedissi suito quando i te domanda de far qualcossa. w22.02 p. 6 § 15

Col aiuto de Geovà, Gideon e i so 300 òmini i ze stati boni de vinser una guera. Lori i podea deventar orgoliosi, ma no i ga fato questo. Ma, poco tempo dopo, i òmini de Efrain i ze ndati catarse con Gideon par dirghe su parché Gideon no li gavea ciamà par ndar a quela guera. (Giuisi 8:1) Gideon el ga anca parlà come Geovà el gavea benedio la tribo de Efrain. Cossita, i òmini de Efrain i ze restadi pi tranquili. (Giuisi 8:3) Gideon el ga bio de mostrar tanta umiltà par mantegner la pace e union intrà el pòpolo. La roba pi importante la ze darghe onor a Geovà e nò a noantri. Se semo paroni de fameia o ansiani, imparemo una bela roba con Gideon. Se qualchedun l’è restà disgustà con noantri, ghemo de proar capir parché che l’è drio pensar de quela maniera. Podemo anca lodarlo par causa de quel che el ga belche fato de bon. Par far queste robe, ghemo de esser ùmili. Ghemo de ricordarse che viver in pace l’è pi importante che mostrar ai altri chi che l’è giusto e chi che l’è sbalià. w21.07 p. 16, 17 §§ 10-12

Geovà el ne ga fato de una maniera che podemo gaver le medèsime qualità de lu. Se ghemo qualità come el amor, compassion, lealtà e giustìssia, podemo far parte dela fameia de Geovà. (Sal. 86:15; 145:17) Quando femo sforso par gaver queste qualità, mostremo a Geovà che semo grati de esser creadi cossita e anca ghe demo onor. (1 Pie. 1:14-16) Quando femo questo, la nostra vita la ze pi bela e felice. Geovà el ga creà un bel posto par noantri. Tanto tempo vanti de Geovà crear i umani, el ga parecià la Tera par lori. (Giò 38:4-6; Ger. 10:12) Geovà l’è tanto amoroso e generoso, par quela che el ga fato tante robe che ne assa contenti. (Sal. 104:14, 15, 24) Quando Geovà el vardea tuto quel che el gavea creà, el vedea che tuto l’era tanto bon! — Gén. 1:10, 12, 31. w21.08 p. 3 §§ 5, 6

Tuti noantri ghemo de predicar e far dissìpoli. (Mat. 28:19, 20; Rom. 10:14) Te piaseria far questo laoro ancora meio? Alora, te pol studiar la revista Sfòrsate. Proa pensar in arquante robe che te vol meter in pràtica e sfòrsate par farlo. Mai ghemo de desmentegarse che la roba pi importante l’è gaver cada volta de pi le qualità che ghe piase a Geovà. (Col. 3:12; 2 Pie. 1:5-8) Sicuro che tuti noantri volemo far de pi par Geovà. In Paradiso, podaremo far questo de maniera perfeta. Ma anca ancoi podemo restar contenti e nò disgustadi. Come? Se proemo far meio quel che belche semo boni de far. Cossita ndaremo dar onor e glòria a Geovà, el Dio felice. (1 Tim. 1:11) Alora, restemo contenti col laoro che ghemo ancoi nela organisassion de Geovà! w21.08 p. 24, 25 §§ 18-20

Quando semo nassesti, fursi i nostri genitori i era belche Testimònie de Geovà. Alora, i ne ga insegnà che l’è stà Geovà che el ga creà tute le robe. Lori i ne ga insegnà anca sora le so bele qualità e che el vol che vivemo felici nel Paradiso. (Gén. 1:1; Ati 17:24-27) Tanti no i crede in Dio e manco ancora che l’è stà lu che el ga creà tute le robe. Lori i crede che la vita la ga scominsià ela sola e che le robe le ze deventade pin pian quel che ghen’è adesso. Arquanti de lori i ze studiadi e fursi i dise che i ga prove che la Bìblia la ze sbaliada. Fursi anca i dise che quei che i crede che Dio el ga fato tute le robe i ze ignoranti, stùpidi e bauchi. Ghemo de seitar a far pi forte la nostra fede anca se servimo a Geovà fà tanti ani. Cossita no saremo imbroiadi par quei che no i crede nela Bìblia. — Col. 2:8; w21.08 p. 14 §§ 1-3

Abel, Noè, Abraon, e Giò i ga mostrà che i amea e che rispetea a Geovà parché i lo obedia, i gavea fede in lu e i ghe fea sacrifissi. Lori i se sforsea de far quel che ghe piase a Dio e che lu el restea contento cola so adorassion. Dopo, Geovà el ga dato ai israeliti la lege par meso de Moisè e in questa lege el disea come che i gavea de adorarlo. Dopo che Gesù l’è morto e l’è stà ressussità, Geovà no’l spetea pi che le persone le obedisse ala Lege de Moisè. (Rom. 10:4) Adesso lori i gavea de obedir una nova lege, “la lege del Cristo”. (Gàl. 6:2) Alora, invesse de ndarghe drio a una mùcia de lege, lori i gavea de far compagno a Gesù, e obedir ai so comandamenti. Anca ancoi, i servi de Geovà i fà el meio che i pol par ndarghe drio a Gesù. Cossita lori i fà quel che ghe piase a Geovà e i ze incoraiadi. — Mat. 11:29. w22.03 p. 20, 21 §§ 4, 5

Geovà el scolta i so fioi. Quando el so fiol, Gesù, l’era qua nela Tera, lu el ga pregà tante volte a Geovà e Geovà lo ga scoltà. Quando Gesù el gavea de dessider robe tanto importante, lu el preghea a Geovà e Geovà lo scoltea. Par esémpio, quando el ga bio de scòlier i dódese apòstoli. (Luc. 6:12, 13) Gesù el ga anca pregà quando l’era tanto preocupà, e Geovà lo ga scoltà. Poco vanti de esser tradio, el ga pregà de tuto el cuor sora quel che el ndaria infrontar. In quela ora, Geovà el ga scoltà e el ga anca mandà un àngelo par dar la forsa che el so caro Fiol el gavea de bisogno. (Luc. 22:41-44) Geovà el scolta i so servi anca ancoi. Lu el risponde ale so orassion nela ora giusta e dela meio maniera. (Sal. 116:1, 2) Varda el esémpio de una sorela dela Ìndia che la era drio sofrir tanto par causa dela ansietà. Ela la ga pregà a Geovà e la ga parlà tuto quel che l’era drio suceder. Ela la ga dito: “El JW Broadcasting^® de maio de 2019, che el parlea sora come dàrghene fora coi pensieri e cola ansietà, l’è stà pròpio quel che gavea de bisogno. L’è stà anca la risposta de Geovà ale me orassion.” w21.09 p. 21, 22 §§ 6, 7

Sicuro che no l’è stà fàcile par questi giudei del primo sècolo scominsiar la so vita in nantro posto sensa gaver gnente. Ma cossa che li ga giutà? La fede che Geovà el ndaria darghe quel che i gavea de bisogno. Nantra roba che li ga giutà l’è stà el consìlio che Paolo el ga dato ai ebrei sinque ani vanti. Lu el ga dito: “Che la vostra maniera de viver la mostre che no amé mia i soldi. Sté contenti cole robe che valtri gavé. Parché lu el ga dito: ‘Mi mai vao assarte e mai vao abandonarte.’ Cossita, podemo parlar con tuto el coraio: ‘Geovà l’è quel che me giuta, no gavarò mia paura. Cossa che pol farme i òmini?’” (Ebr. 13:5, 6) Questo consìlio li ga giutà a viver con ben manco robe e a esser sicuri che Geovà sempre el ndaria tenderli. w22.01 p. 4 §§ 7, 9

Quando pensemo in qualchedun che l’è misericordioso, imaginemo qualchedun bondoso, amoroso, generoso e che el ga compassion. Fursi anca se ricordemo dela ilustrassion de Gesù sora el bon samaritano. Lu no l’era giudeo e el ga tendesto del omo che l’era giudeo. Le persone le gavea dato bote a questo omo giudeo e lo gavea ciavà. Ma el bon samaritano l’è stà misericordioso con lu e lo ga tendesto con amor. (Luc. 10:29-37) Podemo imparar tanto sora la misericòrdia in questa ilustrassion. La misericòrdia la ze una bela qualità de Geovà e lu la mostra tuti i giorni e de arquante maniere. Lu el fà questo parché el ne ama. Ghen’è nantra maniera de mostrar misericòrdia. Par esémpio, pol esser che la persona misericordiosa la dessida no dissiplinar a qualchedun, anca che el merite. Alora, podemo dir che Geovà l’è tanto misericordioso parché “no’l ne trata de acordo coi nostri pecati”. (Sal. 103:10) Ma, dele volte, Geovà el dissiplina a una persona che la ga fato un pecato. w21.10 p. 8 §§ 1, 2

Come ghemo belche visto, Geovà el mostra amor leal sol par i so amighi. Podemo capir questo par meso dele parole del rè Davi e del profeta Daniel. Par esémpio, Davi el ga dito: ‘Seita a mostrar el to amor leal a quei che te cognosse.’ Lu el ga anca dito: ‘Geovà el ga amor leal par sempre a quei che i lo rispeta.’ E Daniel el ga dito: ‘Geovà el mostra amor leal a quei che i lo ama e a quei che i obedisse i so comandamenti.’ (Sal. 36:10; 103:17; Dan. 9:4) Alora, Geovà el mostra amor leal ai so amighi parché lori i lo cognosse, i lo rispeta, i lo ama e i lo obedisse. Par quela che Geovà el mostra amor leal sol par quei che i lo serve. Vanti de cognosser a Geovà, lu el ne amea come el ama a tuti i altri. (Sal. 104:14) Ma dopo che semo deventadi so servi, lu el ga scominsià a gaver el amor leal par noantri. w21.11 p. 3, 4 §§ 8, 9

Anca che le persone le sìpia contra noantri, ndaremo obedir ale parole de Gesù de adorar sol a Geovà. Tante persone le scolta e le ghe va drio ai lìderi religiosi che i ghe piase. Quel che queste persone le fà l’è quasi come adorarli. Lore le va ale ciese de questi lìderi religiosi, le compra i so libri e le ghe dà tanti soldi par giutarli in quel che i fà. Tante persone le crede in tuto quel che questi lìderi i dise. Fursi lore no le restaria tanto contente cossita se le vedesse Gesù qua nela Tera. Ma i veri dissìpoli de Gesù no i va drio a òmini. Noantri rispetemo a tuti lìderi religiosi, ma savemo che Gesù el ga dito che tuti semo fradei. (Mat. 23:8-10) Noantri no adoremo ai polìtichi, ai lìderi religiosi, e gnanca li giutemo in quel che lori i vol far. Cossita, vedemo che le Testimònie de Geovà le ze pròpio difarente dele altre religion. — Gioani 18:36. w21.10 p. 20 §§ 6, 7

Cossa che imparemo de queste parole? Se volemo esser santi, no assaremo che gnanca una roba e gnanca una persona la intrighe la nostra amicìssia con Geovà. E come semo Testimònie de Geovà, anca no volemo far qualcossa che la fae i altri parlar mal del nome de Geovà. (Lev. 19:12; Isa. 57:15) I israeliti i mostrea che Geovà l’era el so Dio quando i obedia ale so lege. Levìtico 18:4 dise: “Gavé de obedir ai me comandamenti e gavé de obedir ale me lege. Mi son Geovà, el vostro Dio.” El capìtolo 19 el parla de arquante de queste lege che i gavea de obedir. Par esémpio, i versìcoli 5-8, 21, 22 i parla sora sacrifissi de bèstie. I israeliti i gavea de far i sacrifissi a Geovà de una maniera che ghe mostresse rispeto. Cossa che imparemo? Ghemo de assar Geovà contento e far sacrifissi de lode de una maniera che ghe piase a lu, come dise Ebrei 13:15. w21.12 p. 5 §§ 14, 15

Quei che i ze pena maridadi e che i vol far de pi par Geovà i pol domandar consili a quei che i ga belche imparà a fidarse in Geovà. Par esémpio, i pol domandar consili a quei che i ze maridadi e che, par ani, i dopera quasi tuto el so tempo nel laoro a Geovà. Se quei che i ze pena maridadi i fà questo, i ze drio mostrar che i se fida in Geovà. (Pro. 22:17, 19) Ricòrdate che el matrimònio l’è un presente de Geovà, e Geovà el vol che el omo e la dona i sìpia felici. (Mat. 19:5, 6) Valtri sì drio far el vostro meio par mostrar che sì grati a Geovà par questo presente? Come sì drio doperar la vostra vita? Quel che pol giutarve l’è pregar a Geovà, ndar in serca de prinsipi dela Bìblia e meterli in pràtica. Cossita, valtri gavaré una vita tanto bela e felice parché saré drio meter el laoro a Geovà in primo posto nela vita! w21.11 p. 18 § 16; p. 19 § 18

Tiago no’l pensea che l’era meio che i altri. Tiago l’era fradel de Gesù e el gavea tanti laori de far nela congregassion. Anca cossita, lu no’l ga mai pensà che l’era meio che i altri. Invesse, lu el ga dito che tuti i era come fradei par lu e che li amea tanto. (Tia. 1:16, 19; 2:5) Tiago anca no’l volea che i altri i pensesse che mai el sbaliea. Cossa che podemo imparar? Ghemo de ricordarse che tuti noantri sbaliemo. No podemo pensar che semo meio che i nostri studianti e gnanca farli pensar che mai sbaliemo. Parché? Parché se femo questo, lori i ndarà restar desanimadi e i ndarà pensar che mai i sarà boni de far quel che Dio el vol. Ma come podemo giutarli a capir che i pol meter in pràtica quel che i impara? Podemo spiegarghe che anca noantri ghemo bio de sforsarse par far quel che la Bìblia la dise e come che Geovà el ne ga sempre giutà. w22.01 p. 11 §§ 13, 14

Ghemo de saver come Gesù el pensa e sforsarse de pensar compagno a lu. Cossita sarà cada volta pi fàcile far compagno a Gesù e gaver la so personalità. (Ebr. 1:3) Fursi pensemo: ‘Mai mi sarò bon de far come Gesù parché lu l’era perfeto.’ Se pensemo cossita, tre robe le pol giutarne. Prima, semo stati creadi cole medèsime qualità che Geovà e Gesù, par quela che podemo far compagno a lori e gaver le qualità che lori i ga. (Gén. 1:26) Seconda, Geovà el pol darne el so spìrito santo, che la ze la forsa pi poderosa del Universo, par giutarne a far le robe che mai sarìssino boni de far noantri soli. Tersa, Geovà el sa che no saremo boni de mostrar le qualità del fruto del spìrito santo de maniera perfeta adesso. Par quela che la Bìblia la dise che ghen sarà mila ani par le persone deventar perfete. (Apo. 20:1-3) Ma, Geovà el vol che seitemo a far el meio che podemo e che se fidemo nel so aiuto. w22.03 p. 9, 10 §§ 5, 6

Studiar la Bìblia e ndar ale riunion ndarà giutarte a far pi forte la to amicìssia con Geovà. Alora come che te pol doperar ben el tempo che te ghè par far queste robe? Domàndate: ‘Cossa me intriga quando son drio studiar o vardar le riunion?’ Fursi te te nicordi che l’è meio assar el telèfono o altre robe eletróniche de una maniera che no i sone. Pol esser che se sentimo desanimadi, ansiosi, o fin pensemo in altre robe intanto che semo drio studiar o semo nele riunion. Se questo sucede con ti, cossa te pol far? Prega a Geovà e domàndaghe che el te dae la so pace. Alora, la pace de Dio la ndarà proteger ‘el to cuor e la to mente’. — Fil. 4:6, 7 w22.01 p. 29 §§ 12-14

El rè Uzia l’è ndato rento una parte del témpio che sol i sasserdoti i podea, e el ga proà brusar insenso. Alora, i sasserdoti i ghe ga dito che sol lori i podea farlo. Ma el rè Uzia l’è restà inrabià e no’l ga scoltà el consìlio. Invesse de esser ùmile, Uzia el ga pensà che el podea far tuto quel che el volea parché l’era el rè. Se lu el gavesse scoltà el consìlio, Geovà fursi lo perdonaria. Ma come Uzia no’l ga scoltà, Geovà lo ga fato gaver lepra fin la so morte. (2 Cró. 26:16-21) Cossa che imparemo? Se volemo far quel che ghe piase a Geovà, ghemo de scoltar quando qualchedun ne dà un consìlio de acordo cola Bìblia. w22.02 p. 9 § 7

La persona che la ga “la vècia personalità” la pensa e la fà robe che no ghe piase a Geovà. (Col. 3:9) Par esémpio, la pol pensar sol in quel che l’è meio par ela, restar suito cativa, no esser bona de veder quel che i altri i fà de bon e esser orgoliosa. Fursi ghe piase veder pornografia e anca altre robe imorai o de violensa. Pol esser che questa persona la gàpia bele qualità e la se sente in colpa de far o parlar robe sbaliade, ma no la ga voia de cambiar. (Gàl. 5:19-21; 2 Tim. 3:2-5) Anca che cavemo via la vècia personalità, gavaremo de seitar a sforsarse par no far e pensar robe sbaliade. Come semo imperfeti, pol esser che femo o parlemo qualcossa che ndaremo ciamarse grami. (Ger. 17:9; Tia. 3:2) Ma quando cavemo via la vècia personalità, semo pi boni de far quel che l’è giusto. Noantri deventemo una persona pròpio difarente. — Isa. 55:7. w22.03 p. 3 §§ 4, 5

I ansiani i ga de sforsarse de veder le qualità dei fradei e sorele. Anca che semo imperfeti, tuti noantri ghemo bele qualità. L’è vera che i fradei i fà sbali e dele volte i ansiani i ga de darghe consili. Anca cossita i ansiani i ga de sforsarse par veder quel che i fradei i ga de bon. Par esémpio, el amor che lori i ga par Geovà, el so sforso de far quel che l’è giusto e quel che ancora i pol deventar. Cossita tuti i restarà contenti nela congregassion. Valtri che sì ansiani gavé de ricordarve che Geovà l’è drio domandarve che sì fedeli e nò perfeti. (1 Cor. 4:2) Valtri anca podé esser sicuri che Geovà el dà tanto valor a tuto quel che fé par la congregassion. Ricordeve che lu no’l ndarà mai “desmentegarse del vostro laoro e del amor che gavé dimostrà par el so nome, par servir i santi e par continuar a servirli”. — Ebr. 6:10. w22.03 p. 31 §§ 19, 21