Genaro

Parché che Geovà el ghe volea tanto ben a Timòteo? Parché lu el gavea tante bele qualità. (Fil. 2:19-22) Par via de quel che el apòstolo Paolo el ga scrito, vedemo che Timòteo l’era ùmile, leal, el laorea tanto e l’era una persona che se podea fidarse. Lu sempre el volea giutar i so fradei. Par quela che Paolo el se fidea de dar a Timòteo laori che no l’era fàcile de far. Cossa che imparemo? Se se sforsemo par gaver bele qualità, podaremo far altri laori nela congregassion e Geovà el restarà ancora pi contento con noantri. (Sal. 25:9; 138:6) Alora, domanda a Geovà che el te giute a veder che qualità te podarissi mostrar ancora meio. Dopo sfòrsate par mostrarla. Fursi te podarissi sforsarte de pi par viver in pace con tuti, o par perdonar de pi i altri. Te pol domandar a un bravo amigo che el te giute a saver come farlo. — Pro. 27:6. w22.04 p. 23 §§ 4, 5

Geovà el vol che semo felici. Savemo de questo parché la alegria la fà parte del fruto del spìrito santo. (Gàl. 5:22) Come la Bìblia la dise che ghen’è de pi felicità in dar, semo felici quando femo el nostro meio par predicar e par giutar i altri. (Ati 20:35) Nel testo de ancoi, el apòstolo Paolo el ga dito che ghen’è due robe che pol giutarne a seitar felici. La prima roba la ze de far el nostro meio a Geovà. Sicuro che se semo drio far el nostro meio, restaremo contenti. (Mat. 22:36-38) La seconda roba la ze de no far comparassion coi altri. Fursi ghemo una bona salute, stùdio e arquante bele abilità, ma tuti noantri ghemo de ringrassiar a Geovà par quel che semo boni de far. Ma quando vedemo che un fradel l’è pi bravo che noantri nela predicassion, ghemo de restar contenti che lu l’è drio farlo par lodar a Geovà. w22.04 p. 10 §§ 1, 2

Nte un giorno che nissun l’è drio spetar, questi governi i ndarà finir fora con Babilònia, la Granda. (Apo. 18:8-10) Le persone de tuto el mondo le saverà che le religion false le ze state finide fora e fursi ghen sarà tante dificoltà. Ma quei che i serve a Dio i restarà tanto contenti. Parché? Prima, parché no ghen sarà pi le religion false. Seconda, parché pena dopo Dio el ndarà finir fora questo bruto mondo! Daniel el ga dito che ghen saria tanto saver sora la verità dela Bìblia nei ùltimi giorni. Questo l’è pròpio drio suceder parché semo boni de capir le professie sora i nostri giorni. (Dan. 12:4, 9, 10) Veder le professie realisarse del tuto ne fà rispetar cada volta de pi Geovà e la so Parola. (Isa. 46:10; 55:11) Alora, volemo seitar a studiar la Bìblia e giutar anca i altri a gaver una forte amicìssia con Geovà. Cossita, gavaremo la protession de Geovà e seitaremo a gaver pace. — Isa. 26:3. w22.07 p. 7 §§ 16, 17

El libro de Apocalisse el parla che el Regno de Dio l’è drio governar nel cielo e che Sàtana l’è stà parà via qua ala Tera. (Apo. 12:1-9) Par quela che quei che i ze nel cielo i ze drio viver in pace, ma el pòpolo de Dio qua nela Tera l’è drio infrontar tanti problemi. Parché? Parché Sàtana l’è inrabià e el seita a vegner contra el pòpolo de Dio. (Apo. 12:12, 15, 17) Come che podemo seitar leai a Geovà anca con quel che Sàtana l’è drio far? (Apo. 13:10) Una dele robe che pol giutarne l’è saver cossa ndarà suceder nel futuro. Nel libro de Apocalisse, el apòstolo Gioani el parla de arquante robe bone che le ndarà suceder. Par esémpio, i nemighi de Dio i sarà finidi fora. El primo versìcolo de Apocalisse el mostra che el apòstolo Gioani el ga parlà de maniera simbòlica arquante volte. — Apo. 1:1. w22.05 p. 8 §§ 1-3

I nemighi de Geovà i restarà tanto inrabiadi coi servi fedeli de Dio. Alora, le nassion, o sia, Goghe de Magoghe, le se meterà insieme par ndar contra el pòpolo de Dio in tuta la Tera. (Eze. 38:14, 15) Cossa che Geovà el farà quando le nassion le ndarà contra el so pòpolo? La Bìblia la dise che Geovà el restarà tanto inrabià. (Eze. 38:18, 21-23) El capìtolo 19 de Apocalisse el dise che Geovà el ndarà mandar el so Fiol par proteger el so pòpolo e par finir fora coi so nemighi. I àngeli fedeli e i 144 mila, o sia, el esèrsito del cielo i ndarà lotar con Gesù contra Goghe de Magoghe. (Apo. 17:14; 19:11-15) E cossa che ndarà suceder in questa guera? Tute le persone e organisassion che no le ze leai a Geovà le sarà finide fora! — Apo. 19:19-21. w22.05 p. 16, 17 §§ 9, 10

Pena dopo che Adon e Eva i ga fato el pecato, Geovà el ga fato una professia par dar speransa a quei che i ndaria nasser dopo de lori. Questa professia la ze in Génesi 3:15 e la dise: “E mi farò che ti e la dona sìpie nemighi, e anca el to dissendente e el so dissendente. Lu el te schissarà la to testa, e ti te farè mal al so calcagno.” Questa professia la ze nel primo libro dela Bìblia, ma tuti i altri libri i ne giuta a capirla meio. Le poche parole de Génesi 3:15 le mostra tuto quel che la Bìblia la dise che ndaria suceder. Dio el ndaria mandar qualchedun par salvar le persone e che el ndaria finir fora Sàtana e quei che i ghe va drio. Quei che i ama a Geovà i restarà tanto contenti quando questa professia la ndarà realisarse del tuto. Se studiemo la Bìblia, saremo boni capir come questa professia la ndarà realisarse e parché che la ze importante par noantri. w22.07 p. 14 §§ 1-3

Domanda a Geovà la sabedoria che te ocore par insegnar to fioi a amarlo. (Tia. 1:5) Geovà l’è la meio persona par giutarte a farlo. Parché? Parché lu l’è el pi bravo Pare che ghen’è e anca parché se femo quel che Geovà el dise, sarà el meio par noantri. (Sal. 36:9; Isa. 48:17) Sicuro che i genitori i vol tanto giutar i so fioi a amar a Geovà. Geovà el giuta i genitori a farlo par meso dela Bìblia e dela so organisassion. (Mat. 24:45) Lori i pol catar tanti bei consili sora slevar i fioi nel site jw.org, ndove ghen’è tanti bei vìdei e i artìcoli par leder in “Ajuda para a Família”, che vanti ghen’era nela Despertai!. — Pro. 2:4, 5. w22.05 p. 27 §§ 4, 5

La maniera che Geovà el perdona la ze la meio. Primo, lu el vol sempre perdonarne. Secondo, el ne cognosse tanto ben, e se femo qualcossa de sbalià, lu el sa se noantri se ghemo pròpio ciamà grami. Terso, se el desside perdonarne, lu no’l pensa pi nei nostri pecati. Cossita, semo boni de gaver una cossiensa tranquila e assarlo contento. Tuti noantri seitemo a far sbali parché semo imperfeti. Una roba che pol giutarne la ze le parole che ghen’è nel Perspicaz, Volume 1, pàgina 210. Varda cossa che el dise: “Geovà el ga misericòrdia de noantri. Alora, lu el capisse che sbaliemo parché semo imperfeti. Par quela che no ne ocore seitar disgustadi par via dei nostri sbali. (Sal. 103:8-14) Se semo drio far el meio che podemo par obedir a Geovà, podemo restar contenti. — Fil. 4:4-6; 1 Gio. 3:19-22. w22.06 p. 7 §§ 18, 19

Sàtana el dopera anca nantra roba par farne gaver tanta paura. Arquanti che i desside deventar Testimònie de Geovà i ga paura de quel che le persone dela so fameia le ndarà pensar. Lori i vol tanto che queste persone le cognossa e le ame a Geovà. Alora, i resta tanto disgustadi quando le parla mal de Geovà e dei fradei. L’è vera che arquante volte le persone dela fameia che ghe vegnea contra le ze deventade Testimònie de Geovà. Ma cossa gheto de far se lore no le vol pi vederte o parlar con ti? Le parole del Salmo 27:10 pol darne tanto consolo. Pol esser che la nostra fameia la ne abandone. Ma se noantri se ricordemo che Geovà el ne ama tanto, gavaremo forsa par dàrghene fora con questa dificoltà e saremo sicuri che Geovà el ndarà benedirne. Lu el ndarà darne quel che ghemo de bisogno par viver, giutarne a esser felici e a seitar a esser so amighi. w22.06 p. 16, 17 §§ 11-13

Quando Gesù l’era qua nela Tera, arquante persone le disea che lu l’era un omo che el magnea e el bevea massa, che el laorea par Sàtana, che no’l obedia ala lege del sabo e che no’l rispetea a Dio. (Mat. 11:19; 26:65; Luc. 11:15; Gio. 9:16) Anca cossita, Gesù no’l ghe ga mia dito su. Cossa imparemo? Quando qualchedun el ne dise su, no ghemo mia de risponderghe dela medèsima maniera. (1 Pie. 2:22, 23) Sicuro che no l’è fàcile far cossita. (Tia. 3:2) Alora, cossa pol giutarne? Quando qualchedun el ne dise su nela predicassion, no ghemo de restar ofendesti. Un fradel de nome Sam el ga dito: “Mi proo ricordarme che l’è tanto importante che la persona la impare sora Geovà e che la pol cambiar.” Pol esser che la persona anca la ne dise su parché semo rivadi nela so casa nte una ora che no la pol discorer. Quando catemo qualchedun che l’è cativo nela predicassion, podemo far una pìcola orassion a Geovà e domandar el so aiuto par seitar tranquili e no dirghe gnente de bruto indrio. w22.04 p. 6 §§ 8, 9

Un pare e una mare i ga de doperar la Bìblia par giutar so fioi a cognosser a Geovà. (2 Tim. 3:14-17) Ma la Bìblia la mostra che lori i pol doperar anca la creassion par giutar so fioi a imparar sora Geovà. El libro de Proverbi el parla de un pare che el ga incoraià so fiol a mai desmentegarse de quel che la creassion la insegna sora Geovà. (Pro. 3:19-21) El pare e la mare i ga caro de passar tempo insieme dei fioi in meso la naturesa. Alora, doperé ben questo tempo e giuté vostri fioi a imparar dele bele qualità de Geovà par meso de quel che lu el ga creà. Par giutarve, ndemo veder come che Gesù el ga insegnà i so dissìpoli. (Rom. 1:20) Varda come che Gesù el ga doperà quel che Geovà el ga creà par insegnarghe so dissìpoli. Una volta, lu el ghe ga dito che i vardesse i osei nel cielo e i fiori del campo. (Luc. 12:24, 27- 30) Cossita, lu el ghe ga insegnà che Geovà el trata i so servi con tanta bontà e generosità, e che lu el ndarà darghe de magnar e robe de vestir compagno el fà coi osei e coi fiori del campo. w23.03 p. 20, 21 §§ 1-4

Par meso de Gesù, podemo parlar con Geovà. Noantri ringrassiemo tanto a Geovà parché podemo farlo. Geovà sol ndarà scoltar e risponder ale nostre orassion quando le femo par meso de Gesù e el perdona i nostri pecati parché Gesù el ga dato la so vita come sacrifìssio par noantri. (Rom. 5:1) La Bìblia la dise che Gesù l’è el nostro ‘somo sasserdote, sentà do ala drita del trono del Sovrano dei cieli’. (Ebr. 8:1) E Gesù Cristo “l’è insieme al Pare” par giutarne. (1 Gio. 2:1) Par quela restemo tanto contenti che Geovà el ne ga dato un Somo Sasserdote che el vol giutarne e che el capisse che no semo mia perfeti! (Rom. 8:34; Ebr. 4:15) No podarìssino pregar a Dio se Gesù Cristo no’l gavesse dato la so vita par noantri. Sicuro che el sacrifìssio de Gesù l’è un presente tanto importante par noantri e che mai saremo boni de ringrassiar a Geovà come el mèrita! w22.07 p. 23 §§ 10-12

Una persona de fidarse sempre la dise la verità e la se sforsa de far quel che la ga prometesto. (Sal. 15:4) Tuti i sa che i pol fidarse nte una persona cossita. Volemo che i nostri fradei i pense questo de noantri. I altri sol ndarà fidarse in noantri se provemo che semo persone de fidarse. Arquanti i dise che gaver la confiansa dei altri l’è come gaver soldi, parché l’è fadiga guadagnar, ma fàcile de perder. Geovà l’è un bel esémpio parché tuto quel che el fà l’è de fidarse. (Sal. 33:4) E lu el vol che femo compagno el so esémpio. (Efe. 5:1) Restemo tanto contenti de far parte dela fameia de Geovà parché podemo fidarse un nel altro. Ma tuti noantri ghemo de mostrar che semo una persona de fidarse. Par quela, ghemo de sforsarse par mostrar amor, esser ùmili, capir la ora giusta de parlar e de taser, parlar sempre la verità e controlar quel che parlemo. Quando femo cossita, ghen’è confiansa intrà tuti nela congregassion. L’è vera che ghe vol sforso, ma se femo cossita, saremo drio far compagno al nostro Dio e mostraremo che semo persone de fidarse. w22.09 p. 8 §§ 1, 2; p. 13 § 17

Anca se ghemo tanti fradei e sorele in tuto el mondo, pol esser che dele volte se sentimo soli. Fursi, restemo desanimadi e pensemo che ghemo de dàrghene fora col nostro sentimento noantri soli. Ma Geovà no’l vol che se sentimo cossita. Varda cossa Geovà el ga fato par giutar Elia. Lu el volea tanto che Elia el parlesse quel che l’era drio sentir, parché el ghe ga domandà due volte: ‘Cossa sito drio far qua?’. (1 Rè 19:9, 13) E quando Elia el ga parlà quel che l’era drio sentir, Geovà lo ga scoltà e el ghe ga dito che l’era un Dio poderoso e che el ndaria sempre giutarlo. Geovà el ga anca dito che ghen’era anca altri israeliti che i lo servia. (1 Rè 19:11, 12, 18) Sicuro che Elia el se ga sentio tanto meio dopo che el ga parlà a Geovà tuto quel che l’era drio sentir. Dopo, Geovà ghe ga anca dato tanti laori importanti. Par esémpio, Geovà el ga domandà a Elia che el scoliesse Azael come rè dela Assìria, Geù come rè de Israel e Eliseo come profeta. (1 Rè 19:15, 16) Cossita, Geovà el ga giutà Elia a vardar le robe bone che el gavea de far e a gaver un amigo, el profeta Eliseo. w22.08 p. 8 § 3; p. 9 § 5

Sito belche ndato nela prima riunion nte un Salon che l’era stà pena fato su? Sicuro che te eri tanto contento e fursi no te sì stà gnanca bon de cantar el primo càntico. Noantri savemo che ghe demo tanto onor a Geovà quando giutemo a far su o a rangiar un Salon del Regno. Ma ghen’è nantro laoro che podemo far che ghe dà ancora de pi onor a Geovà. Che laoro l’è questo? El laoro de incoraiar e edificar i nostri fradei. El apòstolo Paolo l’era drio pensar pròpio in questo quando el ga scrito el testo de ancoi. Lu l’è un bel esémpio parché el se sforsea de capir quel che i so fradei infrontea e el savea come incoraiarli. Noantri podemo far compagno al esémpio del apòstolo Paolo. — 1 Cor. 11:1. w22.08 p. 20 §§ 1, 2

Un servo de Dio el ga de far quel che l’è giusto nel so laoro e nei negossi. La persona giusta anca la ama la giustìssia. Alora, la òdia quando la vede che qualchedun no l’è tratà con giustìssia. E una persona giusta la vol sempre contentar a Geovà. Par quela, vanti de far una scólia, ela la pensa in quel che lu el dise che l’è giusto. La Bìblia la dise che la giustìssia la vien de Geovà. (Ger. 50:7) Sol lu el pol dessider quel che l’è giusto o sbalià parché el ga creà tuto quel che ghen’è. Noantri semo sicuri che quel che Geovà el desside l’è giusto. (Pro. 14:12; Isa. 55:8, 9) Come semo stati fati cole medèsime qualità che lu, semo boni de far quel che lu el dise che l’è giusto. (Gén. 1:27) E noantri se sforsemo tanto par farlo parché lo amemo tanto. — Efe. 5:1. w22.08 p. 27 §§ 5, 6

Dele volte, tuti noantri infrontemo problemi e restemo desanimadi. Par quela, pol esser che ghemo bisogno de far qualcossa par passarsela fora un pochetin. L’è vera che l’è bon farlo, ma ghemo de star atenti par no far una roba che la ndarà disgustar a Geovà. (Efe. 5:10-12, 15, 16) Paolo el ga dito ai fradei filipensi che lori i gavea de seitar a pensar in tuto quel che l’è ‘giusto, in tuto quel che l’è puro, in tuto quel che ne giuta a gaver de pi amor e in tuto quel che l’è bon’. (Fil. 4:8) Anca se Paolo no’l fusse drio parlar de diversion, podemo meter in pràtica quel che lu el ga dito quando ndemo scòlier le nostre diversion. Alora, vanti de leder un libro, scoltar una mùsica, vardar un filme o giugar qualcossa, varda se l’è de acordo con questo testo. Cossita, te sarè bon de capir se quel che te vol far assarà Geovà contento, o nò. Noantri volemo viver dela maniera che ghe piase a Geovà. — Sal. 119:1-3. w22.10 p. 8, 9 §§ 11, 12

I ingiusti i ga fato tante robe sbaliade vanti de morir. Ma Geovà el ndarà ressussitar i ingiusti, e lori i gavarà de imparar sora lu e obedir le so lege. Par quela, el governo de Dio el ndarà organisar un grando laoro par giutar questi ressussitadi a imparar sora lu. Chi che ghe insegnarà ai ingiusti? La mùcia de gente e i giusti che i sarà ressussitadi. Ma i ingiusti sol i gavarà el so nome scrito nel libro dela vita, se i deventa amighi de Geovà e i se dedica a lu. Gesù Cristo e i untadi i sarà atenti par veder se i ingiusti i meterà in pràtica quel che i impara. (Apo. 20:4) Geovà e Gesù i sa cossa le persone le ga rento el so cuor. Lori i ndarà finir fora con tute quele che no le volarà obedirghe, anca se le gavarà de pi de 100 ani. (Isa. 65:20) Cossita, no ghen sarà pi nissuni che fae robe brute nel novo mondo. — Isa. 11:9; 60:18; 65:25. w22.09 p. 17 §§ 11, 12

In questo testo, le “autorità superior” le ze i governanti che ghen’è in questo mondo. E noantri ghemo de obedir a queste autorità. La Bìblia la dise che ghemo de pagar i imposti e mostrarghe rispeto. (Rom. 13:7) Parché? Parché lore le fà lege che le giuta le persone, e dele volte, anca le protege i servi de Geovà. (Apo. 12:16) Varda cossa che imparemo de quel che Gesù el ga dito al governador Pónsio Pilato. Quando Pilato el ga dito che el gavea la autorità par mandar copar Gesù o molarlo, Gesù el ghe ga dito: ‘Ti no te gavarissi gnanca una autorità sora mi se no te la gavessi ricevesto del cielo.’ (Gio. 19:11) Cossita, capimo che l’è stà Geovà che el ga dato la autorità ai governi e che lori no i ga pròpio autorità sora tuto. w22.10 p. 14 § 6

Noantri sempre doperemo el Salmo 37:11 nela predicassion par mostrar ale persone come sarà la vita in Paradiso. El rè Davi el ga scrito queste parole par parlar de un rè tanto bravo e fedele che el ndaria governar nel futuro. (Sal. 37:10, 11, 29) Ma quel che lu el ga dito anca ga sucedesto nel regno de Salomon. Quando Salomon el ga governà Israel, i servi de Dio i vivea in pace. Lori i gavea tuto quel che ghe ocorea parché i vivea nte una tera de ndove vegnea fora “late e miel”. Dio el gavea dito: “Se valtri seité a obedir ale me lege e ai me comandamenti, e a meterli in pràtica, mi vao far che ghen sìpia pace nela tera, e valtri ndaré butarve do e no gavaré paura de nissuni.” (Lev. 20:24; 26:3, 6) E l’è stà pròpio cossita che le persone le ga vivesto nel regno de Salomon. (1 Cró. 22:9; 29:26-28) Anca Gesù el ga doperà questo testo par parlar de come sarà la vita nel futuro. (Mat. 5:5) Par quela, podemo dir che le parole de Salmo 37:10, 11 e 29 le ga sucedesto nel passà e le sucederà anca nel futuro. w22.12 p. 10 § 8

Noantri volemo adorar a Dio dela maniera giusta e sempre ndemo drio ale orientassion che ricevemo. La Bìblia la insegna che, quando ricevemo consili de quei che i ga sabedoria, le robe le va pi ben nela nostra vita. (Pro. 24:6) Come che questo versìcolo pol giutarte a esser pi bravo de predicar e insegnar ai altri? Invesse de far la predicassion come che te vol, fà quel che te impari nei discorsi e dimostrassion nele nostre riunion. L’è importante anca cognosser e saver doperar ben quel che la organisassion de Geovà la ne dà par giutar a insegnar i altri, come le nostre publicassion e vìdei. Semo sicuri che sensa i consili de Dio no semo boni de esser felici. Par quela, ghe demo tanto valor a quel che la Bìblia la dise e volemo sforsarse tanto par meter in pràtica tuto quel che imparemo. — Pro. 3:13-17. w22.10 p. 23 §§ 18, 19

Quando magnemo, el nostro corpo el deventa pi forte. E quando studiemo la Parola de Dio e ghe pensemo sora, la nostra fede la resta pi forte. Questo mostra che Geovà el vol che capimo ben la Bìblia. Cossa bisogna far par capirla ben? Ghemo de far orassion, leder la Bìblia e pensarghe sora quel che ledemo. Alora, vanti de leder la Bìblia, prega a Geovà par esser bon de capir i so pensamenti. Dopo, ledi un toco dela Bìblia e pénsaghe sora quel che te ghè ledesto. Se te fè cossita, te sarè bon de capir cada volta meio la Bìblia, e la to fede la restarà ancora pi forte. Parché che l’è tanto importante leder la Parola de Dio e pensarghe sora? Parché gavaremo forsa par predicar le bone notìssie del Regno. Questo ne giutarà anca nel futuro quando gavaremo de parlar ale persone sora el giulgamento de Geovà. E quando ghe pensemo sora le bele qualità de Geovà, la nostra amicìssia con lu la resta ancora pi forte. w22.11 p. 7 §§ 16, 17

Gesù el ga dito che tuti i vederia el amor che ghen saria intrà i so dissìpoli. E semo difarenti par causa del amor. Ma, no ghen’è gnanca una Testimònia de Geovà che la sìpia perfeta. (1 Gio. 1:8) Par quela, quando cognossemo meio i nostri fradei, vedemo de pi so difeti. (Rom. 3:23) E par causa dei difeti dei altri, arquanti fradei i ga assà de servir a Geovà. Alora, l’è importante che se domandemo: ‘Come che Gesù el ga mostrà che el amea i so apòstoli? Come che podemo ndar drio el so esémpio ancoi?’ Cossita, saremo boni de mostrar cada volta de pi amor, ancora che restemo disgustadi coi difeti dei altri. — Efe. 5:2. w23.03 p. 26, 27 §§ 2-4

In questi ùltimi giorni, ndaremo infrontar cada volta de pi dificoltà rento la congregassion, e sarà cada volta pi fadiga seitar leai a Geovà. Par quela, ghemo de seitar atenti in tute le robe. Sarà che qualchedun nela congregassion el te ga ofendesto? No stà seitar disgustà. Gheto ricevesto dissiplina? Invesse de pensar sol nela vergogna che te sì drio sentir, aceta el consìlio e càmbia quel che te ocore. La organisassion la te ga domandà de cambiar qualcossa che te piasea tanto de far? Aceta con tuto el cuor e obedissi. No stà mai assar de fidarte in Geovà e nela so organisassion. Resta calmo, pensa dela maniera giusta e vedi le robe come Geovà le vede. Domanda el aiuto de Geovà e no stà mai tirarte distante dei fradei. Cossita, Sàtana mai el sarà bon de farne abandonar a Geovà e ala so organisassion. — Tia. 4:7. w22.11 p. 25 §§ 14-16

I ansiani i giuta i fradei a esser pareciadi vanti che suceda una desgràssia. Lori i vede se i fradei i sa cossa che i ga de far par protegerse e come che i pol ciamarli. Cossa che ti te pol far? Se ga sucedesto una desgràssia darente de ndove te sì de star, domanda ai ansiani come che te pol giutar. Fursi, te pol convidar quei fradei che ghe ga tocà ndar via dele so case o quei che i ze vegnesti giutar par restar nela to casa. Pol esser che te sìpia bon de portarghe de magnar o altre robe che ghe ocore. Ma cossa che te pol far se ga sucedesto una desgràssia distante de ndove te sì de star? Te pol pregar par i fradei. (2 Cor. 1:8-11) Nantra roba che te pol far la ze mandarghe soldi ala òpera mondial. (2 Cor. 8:2-5) Se te sì bon de viaiar fin el posto ndove ga sucedesto la desgràssia, te pol domandar ai ansiani cossa te ghè de far par giutar. E se i te convida par ndar giutar, i fradei i ndarà insegnarte cossa far. w22.12 p. 24 § 8; p. 25 §§ 11, 12

Arquanti de quei fradei e sorele i gavea fato tante robe sbaliade vanti de cognosser a Geovà, come imoralità sessual e bever massa. (1 Cor. 6:9-11) L’è vera che lori i era drio servir a Geovà e i gavea la speransa de viver nel cielo. Ma quei fradei i era imperfeti e ghe tochea seitar a sforsarse par no far quel che l’è sbalià. L’è bon saver che altri servi de Geovà i ga bio de sforsarse tanto par far quel che l’è giusto. Parché? Parché se lori i ze stati boni de dàrghene fora cola voia de far quel che l’è sbalià, anca noantri saremo boni de farlo. Quando vedemo che fradei de tuto el mondo i ze drio infrontar i medèsimi problemi che noantri, ghemo pi forsa par seitar leai a Geovà. — 1 Pie. 5:9. w23.01 p. 12 § 15

Gesù el ga domandà che Geovà giutesse i so dissìpoli. (Gio. 17:11) E nela note vanti de morir, Gesù el ga dito ai so dissìpoli: “Valtri ndaré tribolar nel mondo, ma coraio! Mi go vinsesto el mondo.” (Gio. 16:32, 33) Parché che quel che Gesù el ga dito ne dà coraio? Parché Geovà el sa tuto e l’è pi poderoso che i nostri nemighi. (1 Gio. 4:4) Alora, semo sicuri che Geovà el ne giutarà a gaver coraio e a dàrghene fora con tute le nostre paure. Gheto belche bio paura dei òmini? Gheto belche sentio vergogna de dir che te sì una Testimònia de Geovà nela scola o nel laoro? Sito drio meterghe tanto par ndar predicar o par batesarte parché te ghè paura de quel che i altri i ndarà pensar? No stà assar che la paura la te intrighe de far quel che te sè che l’è giusto. Alora, se te ghè paura, cossa che pol giutarte? Prega a Geovà, dighe tuto quel che te sì drio sentir e domandeghe che el te dae coraio. Dopo, quando te vedi che Geovà l’è drio risponderte, te gavarè ancora de pi coraio. — Isa. 41:10, 13. w23.01 p. 29 § 12; p. 30 § 14

Una volta, i farisei i ga dito che i dissìpoli de Gesù i gavea desobedio la lege del Sabo. Alora, Gesù el ga domandà a lori: ‘No gavé mia ledesto?’, par mostrarghe che no i gavea mia capio le Scriture dela maniera giusta. (Mat. 12:1-7) Quei òmini no i era mia boni de capir le Scriture e gnanca meterle in pràtica parché i era orgoliosi e i la doperea par catar fora sbali dei altri. (Mat. 23:23; Gio. 5:39, 40) Alora, Gesù el ga doperà quel che el profeta Osea el ga scrito e le Scriture par mostrar ai farisei che lori no i capia la lege del Sabo e che gnanca i era boni de mostrar misericòrdia. Varda anca Mateo 19:4-6, ndove Gesù el ga domandà nantra volta ai farisei: “No gavé mia ledesto?” Anca se i cognossea cossa le Scriture le dise sora la creassion del primo omo e dela prima dona, lori no i era boni de capir quel che Dio el pensa sora el matrimònio. Alora, quando la ledemo, no ghemo de esser orgoliosi come i farisei e gnanca lederla par catar fora i sbali dei altri. Pitosto, ghemo de esser ùmili e voler imparar. w23.02 p. 12 §§ 12, 13

Nel passà, Geovà el ga dato lege ai israeliti par protegerli de assidenti che podaria suceder casa o intanto che i era drio laorar. (Éso. 21:28, 29; Deu. 22:8) Par esémpio, se una persona la copesse qualchedun la gavaria la colpa anca se no la gavea fato aposta. (Deu. 19:4, 5) E se una persona la ghe fesse mal a un bambin che no l’era gnancora nassesto, questa persona la gavaria de esser castigada, ancora che no la gavesse fato aposta. (Éso. 21:22, 23) Alora, la Bìblia la mostra che Geovà el vol che se tendemo par no far vegner fora un assidente che podaria far mal a qualchedun. Mostremo che ghe demo valor ala vita quando semo atenti a robe che le podaria far mal a qualchedun casa o nel laoro. Noantri ghemo de meter via robe che le taia, produti che se dopera par netar la casa, veleni e rimedi nte un posto che i toseti no i pol mia ciaparli. E quando butemo via queste robe, ghemo de farlo dela maniera giusta. Stemo atenti anca quando ndemo impissar el fogo, boier la àqua o doperar una feramenta che se taca nela luce. Mai ndaremo molar queste robe sensa nissuni par tenderle se ne toca ndar in volta far qualcossa. No ndaremo ciapar el auto se ghemo bevesto rimedi, àlcol o se semo massa cansi. Gnanca ndaremo farlo intanto che semo drio doperar el telèfono. w23.02 p. 21, 22 §§ 7-9

Geovà l’è pròpio el meio istrutor che ghen’è parché el ne trata con passiensa, con bontà, el ne capisse e sempre el vol el meio par noantri. (Sal. 130:3) Geovà no’l vol che femo de pi de quel che semo boni. Ma ghemo de seitar a imparar. Par quela che Geovà el ne ga dato el nostro sarvel e la voia de imparar cada volta de pi. (Sal. 139:14) Alora, l’è importante voler imparar de pi sora la Bìblia ancora adesso. (1 Pie. 2:2) Come che ti te pol farlo? Sfòrsate par sempre leder e studiar la Bìblia e pensa in come che ti te pol far meio el to stùdio. (Gios. 1:8) Sicuro che, col aiuto de Geovà, te piaserà studiar la Bìblia e te sarè bon de imparar cada volta de pi. L’è importante seitar a studiar la Bìblia parché cossita, ndaremo cognosser de pi a Geovà e nostro amor e nostra fede in lu i restarà cada volta pi grandi. (1 Cor. 8:1-3) Ma ghemo de far de pi che sol studiar. Ne ocore domandar che Geovà el ne dae pi fede. (Luc. 17:5) Alora, ghemo de pregar a Geovà, e podemo esser sicuri che lu el ndarà scoltarne. w23.03 p. 10 §§ 11, 13

I primi dissìpoli de Gesù no i ze restadi sensa far gnente fin che Gerusalen e el témpio i fusse finidi fora. Parché? Parché Gesù el ghe ga dato un laoro de far. Alora, i dissìpoli de Gesù i ga predicà le bone notìssie “in Gerusalen, in tuta la Giudea e Samaria e fin la parte pi distante dela tera”. (Ati 1:6-8) Questo l’era un laoro pròpio grando! Sicuro che lori i ga doperà el so tempo dela meio maniera, parché i ze stati boni de finirlo. Noantri ghemo de pensar ben come semo drio doperar el nostro tempo ancoi. Parché? Parché arquante robe le pol suceder de colpo e podemo fin morir. (Ecl. 9:11) La meio maniera de doperar el nostro tempo la ze far quel che Geovà el vol e far pi forte la nostra amicìssia con lu. (Gio. 14:21) Par quela, ghemo de esser ‘forti, firmi e gaver sempre tanto da far nel laoro del Signor’. (1 Cor. 15:58) Cossita, anca se morimo o se riva el fin, saremo sicuri che ghemo fato el nostro meio a Geovà. — Mat. 24:13; Rom. 14:8. w23.02 p. 18 §§ 12-14