Febraro

Cossa che podemo capir del testo de ancoi? Gesù el volea dir che ghemo de amar ai altri de pi che a noantri stessi, o sia, esser pareciadi fin par morir par salvar un fradel. La Parola de Dio la mostra che el amor l’è tanto importante. Par esémpio, ela la dise che “Dio l’è amor”, che ‘ghemo de amar ai altri come a noantri stessi’, che el amor el ne giuta a perdonar e che “el amor no’l se finisse mai”. (1 Gio. 4:8; Mat. 22:39; 1 Pie. 4:8; 1 Cor. 13:8) Arquante persone le ghe piase tanto queste parole. Questi e altri testi i mostra che l’è pròpio importante amar e mostrar che gavemo questa bela qualità. Alora, sol quei che i ga el spìrito santo de Dio e el so aiuto i ga el vero amor. (1 Gio. 4:7) Par quela che Gesù el ga dito che el amor el ndaria mostrar chi che i ze so veri dissìpoli. Lu el ga dito che tanti i saria boni veder chi che i ze so veri dissìpoli par causa del amor che ghen’è intrà de lori. w23.03 p. 27, 28 §§ 5-8

Pol esser che te ghè de imparar a perdonar de pi i altri. Alora te pol studiar esempi de persone dela Bìblia che le ga perdonà e altre che no le ga perdonà. Par esémpio, pensa in quel che Gesù el fea. Lu sempre el perdonea i altri. (Luc. 7:47) Lu sempre el vardea le bone qualità che i gavea e nò quel che i fea de sbalià. Lu l’era tanto difarente dei farisei, parché lori i vedea le persone come se le valesse poco o gnente. (Luc. 18:9) Dopo de pensar sora questi esempi, te pol domandarte: ‘Cossa che mi penso dei altri? Sarà che proo vardar sol le so qualità?’ Se te fè fadiga perdonar qualchedun, proa pensar in arquante qualità che lu el ga. Dopo domàndate: ‘Cossa Gesù el pensaria de questa persona? Sarà che lu ndaria perdonarla?’ Se te fè cossita, te ndarè cambiar la to maniera de pensar. Pol esser che te ghè de sforsarte tanto par perdonar una persona che la te ga disgustà. Ma se te seiti a sforsarte, sarà pi fàcile perdonar i altri. w22.04 p. 23 § 6

El libro de Apocalisse parla de maniera simbòlica arquante volte. Par esémpio, el parla de bèstie cative par parlar dei nemighi de Dio. Una de queste bèstie cative la ‘vien su del mar’ e la ga ‘diese corni e sete teste’. (Apo. 13:1) Dopo, una bèstia cativa la ‘vien su dela tera’, e ‘la parla come un dragon’ e la fà vegner do fogo del cielo. (Apo. 13:11-13) Alora, vien una bèstia cativa de ‘color scarlate’ e ghen’è una prostituta sentada sora questa bèstia. Queste tre bèstie le rapresenta i nemighi de Dio che i ze drio vegner contra lu e el so Regno fà tanto tempo. Sicuro che l’è tanto importante saver chi che le rapresenta queste bèstie. (Apo. 17:1, 3) Ghemo de capir chi che rapresenta le bèstie cative e la prostituta par saver chi che i ze i nemighi de Dio. E la meio maniera de saver chi che le rapresenta l’è assar che la Bìblia la ne giute a capirlo. Come che podemo farlo? Podemo studiar altri libri dela Bìblia che i parla de queste bèstie. w22.05 p. 8, 9 §§ 3, 4

Arquanti no i ze boni de far quel che ghe piaseria a Geovà par via de una malatia o dela so età. Fursi anca ti te senti desanimà parché no te sì bon de far quel che te piaseria a Geovà. Fursi te te domandi: ‘Cossa che Geovà el vol che mi fao?’ Geovà el vol che te fae el to meio. Metemo dir che una sorela de 80 ani la ze disgustada parché no la ze bona de far quel che la fea quando la gavea 40 ani. E anca che la sìpia drio far el so meio, la pensa che Geovà no l’è mia contento. Ma sarà che l’è pròpio cossita? Nò, parché la ga fato el so meio nel passà e la ze ancora drio farlo. Alora se femo el nostro meio, podemo esser sicuri che Geovà el resta tanto contento! (Varda anca Mateo 25:20-23.) L’è pi fàcile che se sentimo felici quando pensemo in quel che podemo far invesse de quel che no semo boni de far. w22.04 p. 10 § 2; p. 11 §§ 4-6

El capìtolo 21 de Apocalisse el dise che dopo del matrimònio, i 144 mila i sarà come una cità tanto bela che la gavarà nome “Nova Gerusalen”. Questa cità la sarà sora 12 sassi che i ze scriti i nomi dei 12 apòstoli del Piegoreto. (Apo. 21:10-14; Efe. 2:20) La Nova Gerusalen la ze una cità tanto difarente de tute le altre. La so strada prinsipal la ze de oro, i so 12 portoni i ze de pèrole e la so fondassion e le so muràlie le ze fate de tanti sassi pressiosi. Tute le mesure de questa cità le ze giuste. (Apo. 21:15-21) Ma Gioani el vede che no ghen’è una roba. Lu el ga dito: ‘Mi no go visto el témpio nela cità parché Geovà, Dio, el Tuto Poderoso e el Piegoreto i ze el so témpio. E la cità no la ga bisogno del sol e gnanca dela luna par slusarla parché la ga la glòria de Dio, e la so làmpada la ze el Piegoreto.’ (Apo. 21:22, 23) Alora, tuti quei che i fà parte de questa cità i podarà star sempre insieme con Geovà. — Ebr. 7:27; Apo. 22:3, 4. w22.05 p. 17, 18 §§ 14, 15

L’è vera che Geovà el ne creà, el ga fato le lege che ghen’è nela Bìblia e l’è el nostro Giuis. Ma lu l’è anca el nostro Pare e el ne ama tanto. (Sal. 100:3; Isa. 33:22) Quando sbaliemo e se ciamemo grami, lu el pol perdonarne e el vol tanto farlo. (Sal. 86:5) Geovà el ga dito questo par meso del profeta Isaia: “Anca se i vostri pecati i ze come un pano rosso, i deventarà bianchi come la neve.” (Isa. 1:18) Tuti noantri semo imperfeti, e podemo far o parlar qualcossa che ndarà disgustar i altri. (Tia. 3:2) Anca cossita, podemo viver in union coi altri. Come? Ghemo de seitar a perdonarse un al altro. (Pro. 17:9; 19:11; Mat. 18:21, 22) Alora Geovà el vol che seitemo a perdonar i altri, anca se lori i parla o i fà qualcossa pìcola contra noantri. (Col. 3:13) La Bìblia la dise che Geovà el perdona del tuto. (Isa. 55:7) Alora, anca noantri volemo farlo! w22.06 p. 8 §§ 1, 2

No ghemo mia de far comparassion coi altri, ma podemo imparar tanto del esémpio de servi fedeli de Geovà. E el meio esémpio che ghen’è l’è de Gesù Cristo. Anca se lu el fusse perfeto, podemo imparar tanto dele so bele qualità e dele robe che el fea. (1 Pie. 2:21) Quando se sforsemo tanto par far compagno a Gesù, deventemo bravi servi de Geovà. Nela Bìblia, ghen’è tanti bei esempi che podemo far compagno. Un de questi esempi l’è del rè Davi. Geovà el ga dito che lu ‘l’era un omo che contentea el so cuor’. (Ati 13:22) Ma Davi el ga fato bruti pecati. Alora, parché che ancora podemo dir che lu l’è un bel esémpio? Parché lu el ga capio che el gavea fato una roba tanto bruta e el se ga ciamà gramo. Par quela che Geovà lo ga perdonà. — Sal. 51:3, 4, 10-12. w22.04 p. 13 §§ 11, 12

La Bìblia la dise che la morte la ze un nemigo. (1 Cor. 15:25, 26) Fursi ghemo paura dela morte quando ghemo de infrontar una bruta malatia o quando savemo che qualchedun dela nostra fameia l’è malà. Ma parché che ghemo paura dela morte? Parché Geovà ne ga fato cola voia de viver par sempre. (Ecl. 3:11) Magari l’è bon gaver un poco de paura de morir parché questo pol protegerne. La paura la ne giuta a scòlier ben quel che ndaremo magnar, a far esersissi, a ndar al dotor quando semo maladi e a no far gnente che mete in rìscio la nostra vita. Sàtana el sa che ghe demo tanto valor ala nostra vita. Par quela, lu el dise che ndaremo far de tuto no morir, anca assar de esser amighi de Geovà. (Giò 2:5) Sicuro che lu l’è sbalià! Ma savemo che Sàtana el pol doperar arquante robe par proar coparne. Par quela lu el dopera la paura che ghemo de morir par farne abandonar Geovà. — Ebr. 2:14, 15. w22.06 p. 18 §§ 15, 16

Se ghen’è perseghission, fursi ghemo de riunirse in pìcoli grupi. Par quela, l’è tanto importante esser in pace con tuti. Ghemo de ricordarse che el nostro nemigo l’è Sàtana, nò i nostri fradei. Alora, no ghemo de vardar i so sbali. E se ga sucedesto un problema con qualchedun, ghemo de suito far la pace e meterse intesi. (Pro. 19:11) Ne ocore anca sforsarse par sempre giutar i nostri fradei. (Tito 3:14) El aiuto che un grupo de predicassion el ga dato a una sorela l’è stà pròpio importante par la union de so grupo de predicassion. Lori i ze deventadi come una fameia. (Sal. 133:1) Tanti dei nostri fradei i serve a Geovà anca che i sìpia de star in paesi ndove ghen’è perseghission. Arquanti i ze fin metesti in preson. Ma noantri podemo pregar che Geovà el giute a lori e anca ale so fameie. Ghemo de pregar anca par quei fradei coraiosi che i rìscia la so libertà par giutar i fradei che i ze in preson. (Col. 4:3, 18) Noantri ghemo de ricordarse che le nostre orassion le pol giutar tanto questi fradei! — 2 Tes. 3:1, 2; 1 Tim. 2:1, 2. w22.12 p. 26, 27 §§ 15, 16

I fioi i vede tuto quel che i so genitori i fà e i proa far compagno. L’è vera che no ghen’è genitori perfeti, ma ancora cossita, lori i ga de sforsarse par esser un bon esémpio par i so fioi. (Rom. 3:23) Un pare el ga dito: “I fioi i ze come una sponga. Lori i ze atenti al esémpio dei so genitori e i proa far compagno. E quando i vede che no semo drio far quel che ghe insegnemo, lori i ne dise.” Alora, se volemo che i nostri fioi i ame a Geovà, anca noantri ghemo de mostrar che lo amemo tanto. I genitori i pol far tante robe par giutar i so fioi a amar a Geovà. Un gióveno de 17 ani el ga dito: “I me genitori i me ga sempre insegnà che l’è tanto importante pregar a Geovà. Tute le note vanti de dormir me pare el preghea con mi, anca se mi gavesse belche pregà a Geovà. Par quela, ancoi, sento che Geovà l’è un Pare che el me vol tanto ben, e par mi, l’è tanto fàcile pregar a lu.” Se te sì pare o mare, ricòrdate che el to amor par Geovà pol giutar anca i to fioi a amarlo. w22.05 p. 28 §§ 7, 8

La persona che la vol batesarse la ga de ciamarse grama dei so pecati. (Ati 2:37, 38) Se la persona la se ga pròpio ciamà grama de quel che la ga fato, la ndarà cambiar. Alora, la ga de fermarse de far qualcossa che disgusta a Geovà come, far imoralità, fumar sigri, dirghe su ai altri o parlar robe sporche. (1 Cor. 6:9, 10; 2 Cor. 7:1; Efe. 4:29) Anca la ga de seitar a sforsarse. Ela la podarà domandarghe aiuto al fradel o ala sorela che ghe insegna la Bìblia o ai ansiani dela so congregassion. E se ancora la ze de star con so pare o so mare, la pol domandarghe che i ghe giute a cambiar quel che la ga de bisogno. L’è importante seitar adorar a Geovà. Alora, ghemo de sempre ndar e partissipar nele riunion. (Ebr. 10:24, 25) Par quela, se ti te sì belche drio predicar cola congregassion, proa farlo sempre che te pol. w23.03 p. 10, 11 §§ 14-16

Génesi 3:14, 15 parla sora la “serpente” e el “dissendente” dela serpente. Savemo che la serpente no la ze mia una bèstia parché no la ndaria capir quel che Geovà l’era drio parlar. Invesse, gavaria de esser qualchedun che el fusse bon de parlar con lu e de capir quel che l’era drio suceder. Alora, chi che la ze la serpente? Apocalisse 12:9 dise che la ‘serpente original’ la ze Sàtana, el Diaol. Tante volte, la Bìblia la dopera la parola “dissendente” par parlar de una persona che la vol far tuto compagno a nantra che ghe par fin esser so fiola. Alora, el dissendente dela serpente l’è tuti i àngeli rugni e tuti quei che i fà compagno a Sàtana. Par esémpio, i àngeli che i ga dessidio desobedir a Geovà nei giorni de Noè e le persone che le vien contra Dio e so pòpolo. — Gén. 6:1, 2; Gio. 8:44; 1 Gio. 5:19; Giuda 6. w22.07 p. 14, 15 §§ 4, 5

El apòstolo Paolo el amea i so fradei e l’era bon de capirli tanto ben. Parché? Parché lu el gavea belche infrontà tante dificoltà nela so vita. Par esémpio, una volta Paolo l’è restà sensa soldi e el ga bio de laorar par gaver quel che lu e i fradei che i viaiea insieme a lu i gavea de bisogno. (Ati 20:34) Par quela che, quando l’è rivà in Corinto, Paolo el ga scominsià a far tende insieme a Prissila e Àquila. Anca cossita, tuti i sabi, lu el predichea par i giudei e i grechi. Dopo, quando Sila e Timòteo i ze rivadi in Corinto, Paolo el ga doperà tuto el so tempo par predicar. (Ati 18:2-5) Anca se Paolo el gavesse de laorar par gaver quel che ghe ocorea par viver, la roba pi importante nela so vita la era servir a Geovà. Par quela, lu l’era bon de capir quel che i so fradei i era drio infrontar, e l’era bon de incoraiarli. Lu el ghe ga dito che el so laoro e le so preocupassion de gaver le robe par viver no i gavea de intrigarli de adorar a Geovà. w22.08 p. 20 § 3.

Geovà el vol tanto che le bone notìssie le sìpia predicade in tuta la Tera. (1 Tim. 2:3, 4) Come questo laoro l’è tanto importante, Geovà el ga scoliesto el so Fiol, Gesù, par tenderlo. Podemo esser sicuri che Gesù el ndarà far questo laoro del tuto vanti del fin e dela maniera che Geovà el vol. (Mat. 24:14) Come che savemo che Gesù l’è drio tender del laoro de predicassion? Par via de quel che el ga dito a arquanti dei so dissìpoli poco vanti de ndar al cielo. Lu el ghe ga dito: “Dio el me ga dato autorità sora tute le robe nel cielo e nela tera. Alora, gavé de ndar e far dissìpoli intrà le persone de tute le nassion.” (Mat. 28:18, 19) Alora, Geovà el ga anca dato a Gesù la autorità de tender del laoro de predicassion. Alora, Gesù l’è drio tender del laoro de predicassion anca ancoi. w22.07 p. 8 §§ 1, 3; p. 9 § 4

I giusti, che i ze quei che i ga fato robe bone vanti de morir, i gavarà “una ressuression de vita” parché el so nome el seita ancora scrito nel libro dela vita. Romani 6:7 dise che quando qualchedun el more, i so pecati i ze perdonadi. Alora, Geovà el se ga desmentegà dei so pecati, ma no’l se ga mia desmentegà dele robe bone che i ga fato vanti de morir. (Ebr. 6:10) Questo vol dir che, quando la Bìblia la parla dela ressuression de quei che i ga fato robe bone e dela ressuression dei giusti, la ze drio parlar dela stessa ressuression. (Gio. 5:29; Ati 24:15) Ancora cossita, questi giusti i gavarà de seitar fedeli a Geovà se i vol che el so nome seite scrito nel libro dela vita. w22.09 p. 18 §§ 13, 15

El profeta Daniel l’è un bel esémpio parché l’è stà una persona de fidarse. Pena dopo che l’è rivà in Babilònia, le persone suito le ga visto che le podea fidarse in lu. Par esémpio, Geovà el ga giutà Daniel a spiegar cossa volea dir quel che el rè Nabucodonosor el se gavea insognà. Daniel anca el ga mostrà esser una persona de fidarse quando el ga parlà al rè che el gavea disgustà a Geovà. Lu el ga fato questo, ancora che el savesse che el rè l’era pròpio cativo e no ghe piaseria saverlo. (Dan. 4:20-22, 25) Anca le persone le ga visto che le podea fidarse in lu parché el ga savesto parlar cossa che volea dir le parole che le ze capitade nela casa del rè in Babilònia. (Dan. 5:5, 25-29) Par quela, el rè Dario e altre autorità i ga visto che Daniel l’era un omo tanto bravo, che el ga fato sempre polito e una persona de fidarse. (Dan. 6:3, 4) Alora, podemo domandarse: ‘Sarà che i altri se fida in mi e i me vede come una persona de fidarse?’ L’è tanto importante farse queste domande parché quando semo persone de fidarse, ghe demo glòria a Geovà. w22.09 p. 8, 9 §§ 2-4

Se ghe ndemo drio a quel che Geovà el dise che l’è giusto o sbalià, gavaremo protession de brute robe. Varda due esempi che pol giutarne a capir questo. Se cada un che el vol far su una costrussion la fesse sensa doperar le mesure giuste, vegnaria fora una desgràssia. Se cada dotor el tratesse una malatia come che el volesse lu, tante persone le podaria morir. Alora, ghen’è una maniera giusta de far arquante robe, e l’è una protession ndarghe drio. Dela medèsima maniera, ndar drio a quel che Geovà el dise che l’è giusto o sbalià l’è una protession par noantri. Geovà el ndarà benedir tanto le persone che le ghe va drio a quel che lu el dise che l’è giusto. Lu el ga prometesto: “I giusti i sarà paroni dela tera e i viverà par sempre ntela tera.” (Sal. 37:29) Gheto belche imaginà come sarà bon viver in union, pace e con tanta felicità quando tute le persone le farà sol quel che l’è giusto? Geovà l’è premoso de darte questa vita. Come ghemo visto, amar quel che Geovà el dise che l’è giusto l’è tanto bon par noantri. w22.08 p. 27, 28 §§ 6-8

Quando sucede qualcossa che ne assa disgustadi, pol esser che ne fà fadiga seitar leai a Geovà e ala so organisassion. Alora, cossa che ghemo de far se una roba cossita la sucede? Ghemo de seitar atenti in tute le robe. Come? Ne ocore restar calmi, pensar dela maniera giusta e veder le robe come Geovà le vede. Se femo cossita, no ndaremo assar che i nostri sentimenti i controle le nostre dessision e saremo boni de restar firmi nela fede. Pol esser che un fradel o un ansiano el ne ga tratà mal. Anca che te credi che lu no’l ga fato aposta, pol esser che te sì restà tanto disgustà. (Rom. 3:23; Tia. 3:2) Fursi te ghè seità a pensar in quel che gavea sucedesto e te te ghè domandà: ‘Se un fradel el fà queste robe, sarà che questa la ze pròpio la organisassion de Dio?’ Ma ghemo de ricordarse che l’è pròpio questo che Sàtana el vol che pensemo. (2 Cor. 2:11) Se pensemo cossita, fursi ndaremo fermarse de servir a Geovà e assar la so organisassion. Alora, ghemo de star atenti par no restar ofendesti. w22.11 p. 20 §§ 1, 3; p. 21 § 4

Geovà el ne ga dato la bela speransa de vita eterna. Arquanti i ga la speransa de viver par sempre nel cielo. (1 Cor. 15:50, 53) Ma, quasi tute le persone le ga la speransa de viver par sempre nela Tera con alegria e bona salute. (Apo. 21:3, 4) Sicuro che tuti noantri ghe demo tanto valor ala nostra speransa. Noantri semo sicuri che quel che spetemo ndarà suceder parché l’è stà Geovà che el ga prometesto, e savemo che lu sempre el fà quel che el promete. (Rom. 15:13; Nùm. 23:19) Noantri savemo che Geovà el vol e el pol far tuto quel che el ga prometesto. Nostro Pare Geovà el ne vol ben e el vol che se fidemo in lu. Quando se fidemo in Geovà e ghemo una forte speransa, semo pi contenti e ghemo coraio, anca quando infrontemo dificoltà. w22.10 p. 24 §§ 1-3

Le persone no le volea scoltar e Isaia el ga dito che Geovà el ndaria assarle sofrir. (Isa. 30:5, 17; Ger. 25:8-11) E questo ga pròpio sucedesto quando i giudei i ze stati menadi a Babilònia. Magari, Isaia el ghe ga dito ai giudei fedeli che Geovà li giutaria a tornar a Gerusalen dopo de un tempo. (Isa. 30:18, 19) Dopo de 70 ani, ga sucedesto quel che Geovà el ghe gavea prometesto, parché lu el ga liberà so pòpolo de Babilònia. (Isa. 10:21; Ger. 29:10) Ghe ga volesto tanto tempo fin che questo sucedesse, parché la professia la disea: “Geovà l’è drio spetar con passiensa par giutarve.” Dopo de sofrir e piander tanto, quei giudei i ze restadi tanto contenti quando i ze tornadi a Gerusalen. w22.11 p. 9 § 4

Quel che i nostri fradei e sorele i ze drio infrontar ancoi l’è compagno a quel che i apòstoli de Gesù i ga infrontà nel passà. Lori i ze stati perseghidi parché i era drio predicar sora Gesù. Tante volte, i giuisi dei giudei i ghe ga dito de fermarse de insegnar sora el nome de Gesù. (Ati 4:18; 5:27, 28, 40) Alora, Piero e Gioani i ga dito quel che tuti i apòstoli i pensea. Lori i ga spiegà che i gavea de obedir prima a Dio invesse che ai òmini e che no i ndaria mai fermarse de parlar sora Gesù. Anca se i apòstoli i gavea ciapà bote, lori i ze restadi contenti parché i savea che l’era un onor sofrir par causa del nome de Gesù. Par quela, lori i ga seità a predicar. — Ati 5:41, 42. w22.10 p. 12, 13 §§ 2-4

Quando te ghè scominsià cognosser a Geovà, te ghè imparà robe importante e fàcile de capir. Ma varda cossa che el apòstolo Paolo el ga scrito ai ebrei. Lu el ga dito che queste verità, che le ze fàcile de capir, le ze compagno al late che un bambin el beve. (Ebr. 5:12; 6:1) Lu no’l volea dir che queste robe le ze sensa valor. Invesse, el volea incoraiarli a studiar altre verità, anca che no le fusse fàcile de capir. Alora, domandate: ‘Gonti voia de seitar a studiar la Bìblia? Son premoso de imparar cada volta de pi sora Geovà e sora quel che lu el ndarà far?’ Tanti i ghe fà fadiga studiar. Fursi, lori no i ga imparà come studiar quando i era nela scola. Par quela, pol esser che ancora i pensa che no i ze mia boni de imparar quel che i lede, o che no i sà come studiar. E ti, pénsito cossita? Alora, ricòrdate che Geovà el pol giutarte parché lu l’è el meio maestro che ghen’è. w23.03 p. 9, 10 §§ 8-10

La Bìblia la dise che ghemo de ‘esser mansi par acetar quel che la dise’. Alora, quando la ledemo, no ghemo de esser orgoliosi come i farisei e gnanca farlo par catar fora i sbali dei altri. Pitosto, ghemo de esser ùmili e voler imparar. Cossita, la Parola de Dio la ndarà giutarne a cambiar quel che semo e saremo boni de meter in pràtica quel che la dise sora misericòrdia, compassion e amor. I farisei no i ga mia assà che la Parola de Dio li giutesse a cambiar. Par quela, tante volte, lori i ga condanà persone che no le gavea fato gnente de sbalià. (Mat. 12:7) La medèsima roba la pol suceder con noantri ancoi. Alora, come che podemo saver se la Bìblia la ze pròpio drio cambiar chi che semo? Par via dela maniera che tratemo i altri. Par esémpio, proa domandarte: ‘Quando parlo de qualchedun, sarà che mi parlo dei so difeti o son bon de veder quel che el fà de bon? Sonti pronto par perdonar un fradel che ga fato qualcossa contra mi, o seito inrabià e a parlarghe contra?’ Farse queste domande ndarà mostrarne se semo drio assar che la Parola de Dio la ne giute a cambiar quel che pensemo, quel che sentimo e quel che femo. — 1 Tim. 4:12, 15; Ebr. 4:12. w23.02 p. 12 §§ 13, 14

Varda el esémpio de Giusepe de Arimatea. Le persone lo rispetea tanto parché lu el fea parte del Sinèdrio, che l’era el tribunal pi importante dei giudei. Ma lu el gavea paura che le persone no lo rispetesse pi. Fin Gioani el ga scrito che Giusepe el gavea paura che i giudei i savesse che lu l’era un dissìpolo. (Gio. 19:38) Ma dopo che Gesù l’è morto, Giusepe el ga mostrà coraio. Parché? Parché lu l’è ndato “davanti de Pilato e el ghe ga domandà el corpo de Gesù”. (Mar. 15:42, 43) Cossita, Giusepe el ga assà che le persone le savesse che lu l’era un dissìpolo de Cristo. Compagno Giusepe de Arimatea, gheto belche bio paura dei òmini? w23.01 p. 30 §§ 13, 14

El governo de Salomon l’era tanto bon che fin la regina de Sabà lo ga savesto. Par quela, ela la ga fato un grando viaio fin Gerusalen par veder se l’era vera quel che la gavea scoltà. (1 Rè 10:1) Dopo che la ga visto come l’era el regno de Salomon, ela la ga dito quel che l’è scrito nel testo de ancoi. Alora, l’è sicuro che l’era tanto bel viver intanto che Salomon l’era rè. Ma, podemo esser sicuri che el governo de Gesù el sarà ancora meio. Varda parché el governo de Gesù el sarà tanto meio de quel de Salomon. El rè Salomon l’era imperfeto e el pòpolo el ga sofrio tanto par causa dei so sbali. Ma Gesù l’è un governante perfeto e no’l sbàlia mai. (Luc. 1:32; Ebr. 4:14, 15) Gesù no’l ndarà mai sbaliar o far qualcossa che ne fae tribolar parché lu el ga seità leal a Dio anca quando el ga sofrio. Restemo pròpio contenti de saver che gavaremo el meio Rè che ghen’è. w22.12 p. 11 § 9, 10

Cossa ne ocore far se vien fora una bruta malatia ndove semo de star? Ghemo de obedir ale orientassion del governo, come lavarse le man, star distante de altre persone, doperar la màscara e, se ocore, restar in quarantina. Se femo queste robe, mostraremo che ghe demo tanto valor al presente dela vita che Geovà el ne ga dato. Quando sucede una desgràssia, pol esser che scoltemo dei nostri visigni e amighi arquante informassion che no le ze mia vera. Fin le notìssie che vien fora nela television o nela internet le pol esser busie. Alora, cossa che ghemo de far? Invesse de ‘creder in tuto quel che scoltemo’, l’è meio fidarse in quel che el governo e i dotori i dise. (Pro. 14:15) Vanti de darne orientassion sora come far le riunion e la predicassion, el Corpo Governante e i Betei sempre i va in serca dele informassion pi giuste che ghen’è. Alora, ghemo de meter in pràtica quel che lori i dise, parché podemo proteger la nostra vita e quela dei altri. Se femo cossita, podaremo anca giutar le persone ndove semo de star a pensar ben dele Testimònie de Geovà. — 1 Pie. 2:12. w23.02 p. 23 §§ 11, 12

Quando i israeliti i ze ndati rento la Tera Prometesta, cada un l’è ndato par una banda e i gavea laori difarenti un del altro. Alora, saria tanto fàcile che lori no i se catesse pi, e no i fusse pi boni de incoraiarse. Par quela, Geovà el ghe ga dito che lori i gavea de riunirse par scoltar la Lege. (Deu. 31:10-12; Nee. 8:2, 8, 18) Sicuro che i israeliti i restea tanto contenti de ndar fin Gerusalen e catarse con altri milioni de servi de Geovà. Nela època dei primi dissìpoli de Gesù, ghen’era persone importante e siore nela congregassion, e persone poarete. Lori i era difarenti un del altro, ma i restea unidi par adorar a Geova e i era boni de capir la Parola de Dio parché i la studiea insieme. — Ati 2:42; 8:30, 31. w23.02 p. 3 § 7

Geovà el promete dar la “vita eterna” a quei che ghe obedisse. (Rom. 6:23) El nostro amor par Geovà el resta ancora pi forte quando ghe pensemo sora la bela speransa che lu el ne dà. Imagina sol: Dio el ne ama tanto che el vol che semo so amighi par sempre! La promessa de vita eterna la ne giuta a infrontar qualche dificoltà che vegna fora adesso. Par esémpio, anca se i nemighi i dise che i va coparne, no ndaremo fermarse de servir a Geovà. Parché? Parché Geovà el ndarà ressussitar quei che i ze stati leai fin la morte e el ghe darà la speransa de mai pi morir. (Gio. 5:28, 29; 1 Cor. 15:55-58; Ebr. 2:15) Noantri savemo che Geovà el pol farne viver par sempre parché lu l’è la Fonte dela vita e lu el vive par sempre. (Sal. 36:9) La Bìblia la mostra che Geovà el ga sempre esistio e mai el ndarà morir. — Sal. 90:2; 102:12, 24, 27. w22.12 p. 2 §§ 1-3

Noantri belche saveino che ndarissìno infrontar tante dificoltà. Parché? Parché la Bìblia la dise che i servi de Geovà i gavaria de infrontar tante dificoltà fin che i ndesse rento el Regno de Dio. (Ati 14:22) Noantri anca savemo che i nostri problemi sol i ndarà finirse nel novo mondo de Dio, quando “no ghen sarà pi la morte, gnanca pi tristessa, gnanca piander, gnanca dolor”. (Apo. 21:4) No l’è parché servimo a Geovà che no gavaremo mia problemi. Ma lu el ne giuta a ndar avanti. Varda quel che el apòstolo Paolo el ga dito ai fradei in Roma. Dopo de parlar de arquante dificoltà che lori i era drio infrontar, lu el ga dito: ‘Gràssie a quel che el ne ga amà che semo boni de vinser a tute queste robe.’ (Rom. 8:36, 37) Alora, podemo esser sicuri che Geovà el ndarà giutarne anca quando semo drio infrontar una dificoltà. w23.01 p. 14 §§ 1, 2