Disembre

Sarà che quel omo importante dela Etiòpia l’era pronto par far questa desission importante? Proa pensa: Lu ‘l’era ndato a Gerusalen par adorar a Dio’ nel témpio. (Ati 8:27) Alora, lu belche el gavea acetà la religion dei giudei e gavea imparà tante robe sora Geovà e sora le Scriture Ebraiche. Ma, savemo che lu el volea imparar ancora de pi parché quando Filipe lo ga catà par la strada, quel omo l’era drio leder le parole del profeta Isaia. (Ati 8:28) Lu el volea seitar imparar sora Dio. Quel omo el se ga tolto tempo par far el viaio dela Etiòpia fin Gerusalen par adorar a Geovà nel tèmpio. Alora, Filipe lo ga insegnà sora el Messia e tante altre verità importante. (Ati 8:34, 35) Cossita, el so amor a Geovà e al so Fiol l’è restà ancora pi grando e lu el ga volesto esser batesà come un dissìpolo de Gesù. Filipe el ga visto che quel omo l’era pronto e lo ga batesà. w23.03 p. 8, 9 §§ 3-6

Ancoi tanti i pensa che no l’è sbalià contar busie e che l’è una roba che tuti i fà. Ma Geovà el òdia tute le busie. (Pro. 6:16, 17) E anca noantri pensemo cossita. (Sal. 15:1, 2) Par quela, mai contemo busie. Sol ndaremo assar Geovà contento se sempre parlemo la verità. Quando semo drio contar una roba a una persona, ghemo anca de parlar tuto quel che la ga de bisogno par capirla de maniera giusta. Noantri gnanca no ghemo de parlar mal dei altri. (Pro. 25:23; 2 Tes. 3:11) Alora cossa te ghè de far se ti o nantra persona scomìnsia a parlar mal de qualchedun? Férmate e parla de una roba che la ndarà incoraiarve. Ancoi cada volta de pi persone le parla robe brute. Par quela che ghemo de sforsarse tanto par sempre parlar quel che ghe piase a Geovà. Se noantri se sforsemo, Geovà el ndarà giutarne a parlar quel che l’è bon nela predicassion, nele riunion e quando ciacolemo coi altri. Sicuro che dopo che questo mondo rugno el sarà destruto, sarà tanto pi fàcile darghe onor a Geovà par meso de quel che parlemo. — Giuda 15. w22.04 p. 9 §§ 18-20

El apòstolo Paolo el savea che Gesù el gavea dato la so vita anca par lu. Par quela, el ga dito: ‘El Fiol de Dio el me ga amà e el ga dato la so vita par mi.’ (Gàl. 2:20) Anca el to amor a Geovà e a Gesù el resta ancora pi forte quando te capissi che Gesù el ga dato la so vita par ti. Par causa del so sacrifìssio, l’è come se Geovà el te gavesse ciamà par esser so amigo. (Gio. 6:44) Proa pensa: Geovà el ga dato la vita de Gesù parché el ga visto qualcossa de bon in ti e el ga volesto esser to amigo! No te resti contento de capir come l’è grando el amor de Geovà e de Gesù par ti? Quando te capissi che lori i te ama tanto, anca ti te li amarè ancora de pi e te volarè mostrarghelo. (1 Gio. 4:10) Ma cossa questo amor el te motivarà a far? Se amemo a Geovà e a Gesù, volaremo mostrar amor anca ale persone. —2 Cor. 5:14, 15; 6:1, 2. w23.01 p. 28 §§ 6, 7

Geovà el dopera la so Parola par giutar i so servi a “adorarlo in union”. Quasi tute le persone le pol leder la Bìblia, ma sol i ùmili i pol capirla. (Luc. 10:21) Sol quei che i ze ùmili i ze boni de capir i so consili e meterli in pràtica. (2 Cor. 3:15, 16) La Bìblia la mostra la sabedoria de Geovà parché la ze stata scrita par tute le persone, ma la pol giutar e dar consolo a cada un de noantri. Par quela che, quando te ledi la Bìblia, te vedi che Geovà el se preocupa tanto con ti. (Isa. 30:21) Te ga belche sucedesto de catar fora un versìcolo che l’era pròpio quel che te gavei de bisogno? Questo sucede anca con milioni de persone. Una roba de queste sol la pol suceder parché la Bìblia la ze stata scrita par Geovà, che l’è la persona con de pi sabedoria che ghen’è. — 2 Tim. 3:16, 17. w23.02 p. 4, 5 §§ 8-10

Noantri volemo far el nostro meio a Geovà parché lo amemo tanto. Come podemo far el nostro meio par lu? Podemo sforsarse par gaver e mostrar le qualità che ghe piase a lu, imparar a far robe nove e sforsarse de giutar ai altri. Parché che ghemo de sforsarse par esser cada volta pi bravi servi de Geovà? Parché Geovà el resta tanto contento e parché la ze una maniera de giutar i nostri fradei e sorele. (1 Tes. 4:9, 10) Tuti noantri ghemo de sforsarse par farlo anca che servimo a Geovà fà tanto tempo. w22.04 p. 22 §§ 1, 2

I governi de questo mondo i ndarà finir fora con Babilònia, la Granda, che la ze tute le religion false. Quando questo sucederà, scominisiarà la granda tribolassion. Alora, sarà che tante persone le scominsiarà servir a Geovà? Nò. Apocalisse capìtolo 6 el mostra che le persone che no le serve mia a Geovà le ndarà in serca de protession nele montagne, o sia, nela polìtica e nel comèrsio de questo mondo. Le persone che no le ze leai al Regno de Dio le deventarà so nemighe. (Luc. 11:23; Apo. 6:15-17) Nela granda tribolassion, i servi de Geovà i sarà tanto difarenti de tute le altre persone. Come cossita? Sol lori i sarà drio adorar a Dio e no i volerà obedir ala bèstia cativa. — Apo. 13:14-17. w22.05 p. 16 §§ 8, 9

I servi de Dio i predica le bone notìssie, ma anca i giuta i àngeli a far el laoro che l’è scrito in Apocalisse capìtoli 8 al 10. (Mat. 24:14) In questo laoro, i àngeli i dise che sucederà arquante robe brute a quei che no i vol servir a Dio. Par quela, quel che le Testimònie de Geovà le parla ale persone l’è come “sassi de graniso e fogo” parché le dise che Dio el ndarà giulgar el mondo rugno de Sàtana. (Apo. 8:7, 13) Le persone le ga de saver che l’è darente e che le ga de far i cambiamenti nela so vita par salvarse nel Armagedon. (Sof. 2:2, 3) Ma come no ghe piase quel che le scolta, ne ocore gaver coraio par parlarghe. E nela granda tribolassion, gavaremo de parlarghe sora el giulgamento che Geovà el ghe darà. — Apo. 16:21. w22.05 p. 7 §§ 18, 19

Proa pensa in quel che sucede quando quei che i ze maridadi i ga fioi. Pol esser che vanti de gaverli lori i gàpia scoltà tanti discorsi sora slevar su i fioi. Ma adesso, i prinsipi sora questo i ze ancora pi importanti par lori. Sicuro che ghe vol far tanto sforso par slevar su i fioi. Quando càmbia qualcossa nela nostra vita, arquanti prinsipi dela Bìblia i deventa ancora pi importanti par noantri. Par quela che l’è tanto importante che femo quel che Geovà el ga dito ai rè de Israel. Lu el ga dito che lori i gavaria de leder la Parola de Dio e pensar sora ela tuti i giorni. (Deu. 17:19) Se te sì pare o mare, ricòrdate che insegnar sora Geovà ai to fioi l’è una dele robe pi importante che ghen’è. Ma ricòrdate che no te ghè sol de parlar sora Geovà ai to fioi, te ghè anca de giutarli a amarlo de tuto el cuor. w22.05 p. 26 §§ 2, 3

Se ghemo fato un sbàlio o un pecato, ghemo de far de pi che sol restar disgustadi de quel che ghemo fato. Ghemo anca de cambiar. Vanti de perdonar a qualchedun, Geovà el vede se lu l’è drio cambiar la so maniera de viver. Se el càmbia la so maniera de viver, lu el ndarà fermarse de far quel che l’è sbalià e el ndarà scominsiar a far quel che Geovà dise che l’è giusto. (Isa. 55:7) Lu el ga de cambiar la so maniera de pensar, o sia, fermarse de pensar robe sbaliade, e scominsiar a pensar compagno a Geovà. Lu el ga anca de fermarse de far quel che l’è sbalià. (Rom. 12:2; Efe. 4:23; Col. 3:7-9) Ma ghemo anca de ricordarse che Geovà sol el ndarà perdonarne se ghemo fede nel sacrifìssio de Gesù e se el vede che semo pròpio drio sforsarse de no far pi quel che l’è sbalià. — 1 Gio. 1:7. w22.06 p. 6 §§ 16, 17

Dopo che Adon e Eva i ga desobedio a Geovà, le persone le ze drio far robe tanto brute una al’altra. (Ecl. 8:9) Par esémpio, tanti i dopera la autorità che i ga par tratar mal i altri. Arquante persone le fà tante robe brute una al’altra, i gióveni nela scola i ghe dise su un ai altri e ghen’è tanta violensa anca rento casa. Par quela che le persone le ga paura una del’altra. Sàtana l’è drio doperar questa paura par farne desobedir a Dio. Ndemo veder come. Sàtana el dopera la paura che podemo gaver dele persone par fermarne de predicar e de obedir a Geovà. Par esémpio, Sàtana el dopera arquanti governi par proar intrigarne de predicar e de adorar a Geovà. (Luc. 21:12) Tante persone le parla busie dele Testimònie de Geovà e par via de questo, tanti i ne dise su o i ne trata mal. (Mat. 10:36) Ma no ghemo de restar spaventadi. Parché? Parché questo ga scominsià a suceder ancora nela època dei primi dissìpoli. — Ati 5:27, 28, 40. w22.06 p. 16 §§ 10, 11

Ma chi che i ze quei che i sarà giutadi a “far quel che l’è giusto”? Quei che i vegnarà fora del Armagedon, i ressussitadi e quei che i ndarà nasser in Paradiso. Nel fin dei mila ani, tute le persone le sarà perfete. No riceveremo la vita eterna sol parché saremo perfeti. Ricòrdate de quel che ga sucedesto con Adon e Eva. Anca se i era perfeti, lori i gavea de mostrar che i era obedienti a Geovà par viver par sempre. Ma lori i ga desobedio a Dio. (Rom. 5:12) Nel fin dei mila ani, tuti sarà perfeti nela Tera e i gavarà de seitar a mostrar che i vol pròpio esser governadi par el Regno de Dio. Ma arquanti i farà compagno a Adon e Eva, che i ze stati desobedienti ancora che i fusse perfeti. Alora, ne tocarà mostrar che semo obedienti. w22.09 p. 22 §§ 12-14

Quando le persone le vede quel che sucede nel mondo, no le ze bone de creder che le robe le restarà meio. Parché? Parché le fameie le ze drio spartirse, le persone le ze drio restar cada volta pi violente e pensar sol in lore stesse e tante no le ze pi bone de fidarse in quei che i ga autorità. Ma tute queste robe le prova che suito ghen sarà un mondo meio. Come cossita? La Bìblia belche la disea che le persone le faria queste robe “nei ùltimi giorni”. (2 Tim. 3:1-5) Tuti quei che i crede nela Bìblia e i vede quel che l’è drio suceder nel mondo i capisse che el Regno de Dio l’è belche drio governar. Podemo dir che cada professia dela Bìblia la ze come una parte de un desegno. Quando tute le parte le ze meteste insieme, semo boni de veder tuto el desegno. Dela medèsima maniera, quando studiemo sora queste professie, capimo meio in che època semo drio viver e che Geovà el fà tuto nela ora giusta. w22.07 p. 2 §§ 1, 2

Nela pandemia del COVID-19, la organisassion de Geovà ne ga dito come seitar a far le riunion e la predicassion. Suito ghemo scominsià a veder le nostre riunion, assemblee e congressi par meso dela internet. Ghemo anca scominsià a far la predicassion par meso dela internet, carte e telèfono. Che benedission Geovà el ne ga dato? Arquanti Betei i ga dito che tanti i ze deventadi predicadori e i fradei i ga bio bele speriense nela predicassion. Pol esser che arquanti i pensesse che no ne ocorea tenderse tanto come la organisassion la disea. Ma semo restadi cada volta pi sicuri che quel che la organisassion la ne dise l’è el meio par noantri. Vedemo che Gesù l’è drio tenderne con tanto amor. Questo ne assa ancora pi sicuri che Geovà e Gesù i ndarà sempre tender de noantri, no importa quel che ndarà suceder nel futuro. — Ebr. 13:5, 6. w22.07 p. 13 §§ 15, 16

Quando preghemo a Geovà, volemo ringrassiarlo par tute le bele robe che el ne dà. Par esémpio, podemo anca ringrassiarlo par i bei colori che ghen’è nei fiori, par tute le robe che lu el ga fato par noantri magnar e par i boni amighi che ghemo. Volemo anca ringrassiarlo par tute le robe che el ne dà par far pi forte la nostra fede e par la bela speransa che ghemo par el futuro. Geovà el vol che semo felici, par quela el ne dà queste e tante altre robe. (Sal. 104:12-15, 24) Pol esser che noantri se desmenteghemo de ringrassiar a Geovà par tute le robe bone che el fà par noantri. Alora, cossa che pol giutarne a nò desmentegarse de ringrassiarlo? Podemo scriver le robe che ghemo domandà a lu e dele volte vardar quel che gaveino scrito par capir come che Geovà el ne ga rispondesto. Cossita podemo ringrassiar a Geovà par el aiuto che el ne ga dato. — Col. 3:15. w22.07 p. 22 §§ 8, 9

Studiar la Bìblia l’è tanto importante, ma ghemo anca de meter in pràtica quel che imparemo par esser felici del bon. (Tia. 1:25) Ma come che podemo esser sicuri che semo drio meter in pràtica quel che imparemo? Un fradel el ga dito che podemo pensar sora le robe che semo belche drio far e quele che ne ocore far meio. El apòstolo Paolo el ga dito che anca se semo belche drio far una roba bona, ghemo de sforsarse par farla ancora meio. (Fil. 3:16) La nostra vita la resta tanto meio se seitemo a far quel che imparemo dela Bìblia. Par esémpio, semo felici, giutemo i nostri fradei e assemo Geovà contento. (Pro. 27:11; 3 Gio. 4) Alora, tuti noantri volemo sforsarse tanto par amar le verità dela Bìblia e meterle in pràtica nela nostra vita. w22.08 p. 18, 19 §§ 16-18

E come che i ansiani i pol mostrar che i ama a Geovà e a Gesù? Quel che Gesù el ga domandà a Piero mostra cossa lori i ga de far. Piero el gavea dito tre volte che no’l cognossea a Gesù. Alora, dopo che l’è stà ressussità, Gesù el ghe ga domandà: “Simon, fiol de Gioani, te me ami?” Sicuro che Piero el volea mostrar che el amea tanto al so Signor. Alora, Gesù el ghe ga dito: “Tendi dele me piegorete.” (Gio. 21:15-17) Par tuta la so vita, Piero el ga mostrà che el amea a Gesù parché el ga tendesto dele so piegorete. Dela medèsima maniera, i ansiani i pol mostrar che i ama a Geovà e a Gesù quando i tende dei so fradei. (1 Pie. 5:1, 2) Come che i ansiani i pol mostrar che quel che Gesù el ga dito a Piero l’è importante par lori? I ansiani i pol doperar del so tempo par incoraiar i fradei e giutar quei che i se ga fermà de servir a Geovà a tornar a farlo. — Eze. 34:11, 12. w23.01 p. 29 §§ 10, 11

Se te sì drio sforsarte par dàrghene fora con una voia sbaliada, no stà mai pensar che nissun l’è bon de capirte. Pensar cossita l’è una tràpola. Parché? Parché te pol pensar che no te gavarè la forsa par far quel che l’è giusto e che mai te sarè bon de dàrghene fora con questa voia sbaliada. Invesse, ricòrdate de quel che la Bìblia la dise: ‘Quando vegnarà la tentassion, Dio anca el ve giutarà a dàrghene fora. Cossita, valtri saré boni de soportarla.’ Alora, anca che te gàpia tanta voia de far una roba che la ze sbaliada, te pol far quel che l’è giusto. Sicuro che col aiuto de Geovà, te sarè bon de farlo. Pol esser che, dele volte, gavaremo voia de far quel che l’è sbalià, parché semo imperfeti. Cossa che ne toca far se ne sucede una roba cossita? Ghemo de cambiar quel che semo drio pensar. Podemo ricordarse de Giusepe, che el ga scampà via quando la dona de Potifar la ga volesto far imoralità sessual con lu. (Gén. 39:12) Alora, anca che ne vien voia de far quel che l’è sbalià, no ne ocore ndarghe drio. w23.01 p. 12, 13 §§ 16, 17

La giustìssia la ze una importante qualità de Geovà. (Deu. 32:4) Una persona giusta la trata tute le persone dela stessa maniera, e Geovà l’è pròpio cossita. (Ati 10:34, 35) Podemo veder la so giustìssia quando ghe pensemo sora le léngue che le ze state doperade par scriver la Bìblia. Geovà el ga dito che tanti i ndaria saver dela verità, o sia, i ndaria capir la Bìblia. (Dan. 12:4) E l’è pròpio quel che vedemo ancoi in tuto el mondo. La Bìblia e altre publicassion che le giuta a capirla le ze state traduside e stampade in tante léngue. Alora, el pòpolo de Dio el ga tradusio la Bìblia in de pi de 240 léngue, e le persone le pol gaverla sensa pagar gnente. Cossita, persone de tuto el mondo le ze drio imparar dele “bone notìssie del Regno” vanti del fin. (Mat. 24:14) Vedemo che el nostro Dio Geovà l’è giusto parché el vol che tute le persone lo cognossa par meso dela so Parola. Sicuro che Geovà el ama tanto a tute le persone. w23.02 p. 5 §§ 11, 12

Sicuro che tuti noantri amemo quel che Geovà el dise che l’è giusto. Ma ghemo de ricordarse che semo imperfeti, e dele volte, quel che le persone del mondo le dise che l’è giusto o sbalià pol farne pensar come lore. (Isa. 5:20) Tanti i pensa che una persona giusta la ze sprosiona, orgoliosa e la giulga i altri. Ma savemo che Dio no’l ghe piase persone cossita. Quando Gesù l’era qua nela Tera, el ga parlà contra i lìderi religiosi che i dessidia quel che l’era giusto o sbalià. (Ecl. 7:16; Luc. 16:15) Alora, la persona che la ze giusta no la pensa che la ze meio che i altri. La giustìssia la ze una bela qualità. La Bìblia la dise che la persona che la ga questa qualità la vive de acordo con quel che Dio el dise che l’è giusto. w22.08 p. 26, 27 §§ 3-5

Gesù el se fidea nei so dissìpoli anca se lori i sbaliesse. (Gio. 15: 16) Par esémpio, Tiago e Gioani i ga domandà a Gesù una posission pi importante nel Regno de Dio. Ma Gesù no’l ga dito che lori i era drio servir a Geovà sol par guadagnar qualcossa e gnanca che no i podaria pi esser so apòstoli. (Mar. 10:35-40) Un tempo dopo, quando Gesù l’è stà metesto in preson, tuti i so dissìpoli i lo ga abandonà. (Mat. 26:56) Ancora che i so dissìpoli i fusse imperfeti, Gesù el ga seità a fidarse in lori e li ga “amadi fin el fin”. (Gio. 13:1) E dopo che l’è stà ressussità, Gesù el ga dato ai so 11 apòstoli fedeli el importante laoro de predicar e tender dele so pressiose piégore. (Mat. 28:19, 20; Gio. 21:15-17) La confiansa de Gesù in questi òmini no la ze stata par gnente. Lori i ga seità fedeli tuta la vita. Sicuro che Gesù l’è un bel esémpio parché el ga seità a fidarse nele persone, ancora che lore le sbaliesse. w22.09 p. 6 § 12

Ghemo de esser sicuri che Geovà el ne ama e che el ndarà sempre giutarne. Cossita, saremo boni de dàrghene fora cole nostre paure. Varda el esémpio del scritor del Salmo 118. Lu el ga infrontà arquante brute robe. Lu el gavea tanti nemighi e arquanti de lori i era tanto poderosi (versìcoli 9 e 10). Dele volte, lu el restea tanto ansioso (versìcolo 13). Lu anca l’è stà dissiplinà par Geovà (versìcolo 18). Ma quando lu l’era drio infrontar tute queste robe, el ga cantà: “Mi no gavarò paura.” Lu el savea che anca se Geovà lo gavesse dissiplinà, lu lo amea. Lu el savea che el saria bon de infrontar tute le dificoltà, parché Geovà el ndaria sempre giutarlo. (Sal. 118:29) Noantri ghemo de creder del tuto che Geovà el ne ama. Se semo sicuri de questo, saremo boni de dàrghene fora (1) cola paura de no esser boni de dar quel che la nostra fameia la ga de bisogno par viver (2) cola paura de quel che le persone le pol farne e (3) cola paura dela morte. w22.06 p. 14, 15 §§ 3, 4

Par esser felici, ghemo de meter la adorassion a Geovà in primo posto nela nostra vita. Geovà el mèrita che metemo la nostra adorassion a lu in primo posto nela vita parché el ne ga creà. (Apo. 4:11; 14:6, 7) Ma come che lu el vol che lo adoremo? Geovà el vol che lo adoremo “con spìrito e verità”, o sia, che femo tuto de acordo cola Bìblia e che assemo che el spìrito santo el ne giute a farlo. (Gio. 4:23, 24) Ma cossa ghemo de far se semo de star nte un paese che el governo no’l ne assa lìberi par adorar a Geovà? Anca cossita, adorar a Geovà ga de esser la roba pi importante dela nostra vita. Nei nostri giorni, ghen’è de pi de sento fradei che i ze in preson sol parché i ze Testimònie de Geovà. Ma, lori i seita a far el so meio par studiar, pregar e parlar ai altri sora Dio e el so Regno. Se anca noantri infrontemo una dificoltà cossita podemo esser felici parché Geovà l’è dela nostra banda e ndarà benedirne. —1 Pie. 4:14. w22.10 p. 9 § 13

Nel libro de Proverbi, catemo tanti boni consili che i ne giuta tanto. Vedemo due de questi consili. Primo, stà contento con quel che te ghè. Proverbi 23:4, 5 mostra che ‘no ghemo de doperar tute le nostre forse par guadagnar richesse’ parché i soldi i pol zolar via compagno un osel. Tanti de quei che i ze siori e poareti i seita a ndarghe drio i soldi par ciaparghene cada volta de pi. Una persona che la fà cossita, la pol rovinar la so amicìssia coi altri, la vita in fameia, la so salute e quel che i altri i pensa sora ela. (Pro. 28:20; 1 Tim. 6:9, 10) Secondo, pensa vanti de parlar. Se no stemo atenti a quel che parlemo, podemo disgustar i altri. Proverbi 12:18 dise che quando parlemo ‘sensa pensar, ghe femo mal come colpi de una spada, ma la léngua dei sabi la ze una cura’. Quando no parlemo sora i sbali un del altro, giutemo che ghen sìpia pace intrà de noantri. — Pro. 20:19. w22.10 p. 21 § 14; p. 22 §§ 16, 17

Ezechiel el gavea de capir pròpio ben le parole che el ndaria dir. Cossita, lu el gavaria ancora pi voia de ndar predicar. Intanto che lo magnea, Ezechiel el ga visto che el rolo l’era “dolse come el miel”. (Eze. 3:3) Questo vol dir che l’era un onor, o una roba pròpio bona, parlar in nome de Geovà. (Sal. 19:8-11) Ezechiel el ghe dea tanto valor al laoro che Geovà el ghe gavea dato come profeta. Dopo, Geovà el ga dito a Ezechiel: ‘Daghe valor e scolta tute le parole che mi te digo.’ (Eze. 3:10) Geovà l’era drio dir che lu el gavea de tegnerse in mente quel che l’era scrito nel rolo e pensarghe sora. Cossita, Ezechiel el gavaria una forte fede e el saria bon de parlar al pòpolo quel che l’era scrito nel rolo. (Eze. 3:11) Alora, cole parole de Dio nel cuor e nela boca, lu el saria pronto par far el laoro che Geovà el ghe gavea dato. w22.11 p. 6 §§ 12-14

Cossa che te pol far se la organisassion la te domanda de cambiar qualcossa? Obedissi quando la organisassion la te domanda de cambiar qualcossa. Intanto che i era nel deserto, i coatiti i gavea un laoro tanto importante de far. Quando i israeliti i cambiea de acampamento, arquanti de lori i portea la Arca del Acordo. (Nùm. 3:29, 31; 10:33; Giosuè 3:2-4) Ma quando i israeliti i ze ndati rento la Tera Prometesta, i coatiti no i ga pi fato questo laoro tanto importante, parché la Arca del Acordo no la gavea pi de esser cambiada de un posto al altro. Alora, i coatiti i ga ricevesto altri laori de far. (1 Cró. 6:31-33; 26:1, 24) La Bìblia no la dise che i coatiti i ga sbrontolà o i ga domandà de far laori pi importanti sol parché vanti i gavea portà la Arca del Acordo. Cossa che imparemo del so esémpio? Quando la organisassion de Geovà la te domanda de cambiar qualcossa, te ghè de obedir anca se te ocore fermarte de far una roba che te piasea tanto. Resta contento con qualche laoro che te fè par Geovà. Ricòrdate che no ghe ocore che te fae un laoro importante par contentarlo. Invesse, Geovà el te dà valor se te lo obedissi, no importa el laoro che te fè nela so organisassion. w22.11 p. 23 §§ 10, 11

Un dissìpolo che el gavea nome Onesìforo l’è ndato in serca de Paolo, e quando lo ga catà, el ga proà giutarlo in tuto quel che el gavea de bisogno, anca che el gavesse de risciar la so vita. Cossa che imparemo? Ancora che te gàpie paura, no stà assar de giutar i to fradei che i ze drio esser perseghidi. Invesse, giùtali in tuto quel che i ga de bisogno, e sìpia sempre pronto par difenderli. (Pro. 17:17) Lori i ga tanto bisogno del to amor e del to aiuto. Varda el esémpio dei fradei e sorele che i ze de star nela Rùssia. Lori i seita a giutar quei cari fradei che i ze stati metesti in preson. Quando arquanti de lori i ze menadi al tribunal, tanti fradei e sorele i va là par mostrar che i ze dela so banda. Cossa che imparemo? Quando i nemighi i dise busie, i perseghe o i mete in preson i fradei che i tende dela organisassion, no stà gaver paura. Pitosto, prega par lori, giùtali a tender dela so fameia e pensa in altre robe che te pol far par giutarli. — Ati 12:5; 2 Cor. 1:10, 11. w22.11 p. 17 §§ 11, 12

I ansiani i ga el laoro de incoraiar i fradei par meso dela Bìblia e giutar quei che i ze desanimadi. (1 Pie. 5:2) Se sucede una desgràssia, i ansiani i ga de esser sicuri che tuti fradei i ga de magnar, robe de meter su e un posto de star. Anca dopo de arquanti mesi, fursi i ansiani i gavarà de seitar a incoraiarli par meso dela Bìblia. (Gio. 21:15) Varda el esémpio del fradel Harold. Lu el laora nte una Comission de Filial e el ga cognossesto tanti fradei e sorele che i ga passà par una desgràssia. Lu el ga dito: “Ghe vol tempo fin che i fradei che i ga passà par una desgràssia i reste meio. Pol esser che tante robe nela so vita le ze drio tornar a esser come prima, ma lori i seita a sofrir par causa de quei che i ze morti, de quel che i ga perso o dei perìcoli che i ga infrontà. E quando i se ricorda de queste robe, pol esser che i torne a sofrir come in quela època. Tuti quei che i ga infrontà una bruta desgràssia nela vita i se sente cossita. Ma questo no vol mia dir che ghe manca fede.” I ansiani i mete in pràtica el consìlio de “piander con quei che i piande”. — Rom. 12:15. w22.12 p. 22 § 1; p. 24, 25 §§ 10, 11

Geovà el ne giuta a seitar a far quel che l’è giusto par via del so spìrito santo. Alora, come che podemo gaverlo? Quando ledemo la Bìblia, assemo che el spìrito santo el ne mostre quel che ghemo de cambiar e el ne giute a farlo. Noantri anca ricevemo spìrito santo quando ndemo ale riunion. Restemo incoraiadi quando semo insieme ai nostri fradei parché anca lori i ze drio sforsarse par far quel che l’è giusto. (Ebr. 10:24, 25; 13:7) E quando preghemo a Geovà e ghe domandemo el so aiuto, lu el ne dà el spìrito santo e la forsa che ne ocore. Alora, ghemo de studiar la Bìblia, ndar ale riunion e pregar a Geovà cossita, anca se fursi ne vien voia de far quel che l’è sbalià, saremo boni dàrghene fora. Quando scominsiemo a far le robe che le ne giuta a gaver una forte amicìssia con Geovà, ghemo de seitar a farle e sforsarse par pensar sol in quel che l’è giusto. w23.01 p. 11 §§ 13, 14

La Bìblia no la dise mia come che ghemo de tender dela salute o cossa ghemo de magnar. Ma la spiega cossa che Geovà el pensa. Lu el dise che ghemo de ‘butar via le robe che le rovina el nostro corpo’, o sia, star distante de quel che fà mal ala nostra salute. (Ecl. 11:10) La Bìblia la dise che no ghemo de magnar massa gnanca bever massa. Queste robe le fà mal e le pol fin coparne. (Pro. 23:20) Par quela, Geovà el vol che se controlemo quando ndemo scòlier cossa che ndaremo magnar e bever. (1 Cor. 9:25) La sabedoria la ne giuta a far bone dessision e mostrar che ghe demo valor ala vita. (Sal. 119:99, 100; Pro. 2:11.) Alora, mostremo che semo sabi quando scoliemo ben quel che ndaremo magnar. Par esémpio, se te piase magnar qualcossa che la te fà mal, saria meio no magnarla. Se gavemo sabedoria, proaremo dormir ben e el tanto che ghe vol, sempre faremo esersissi e saremo persone nete, che se lava e tien la casa neta. w23.02 p. 21 §§ 6, 7

Come che te pol catar fora i tesori che ghen’è nela Parola de Dio? Intanto che te sì drio leder un testo, te pol far le quatro robe che dise 2 Timòteo 3:16, 17. Questo testo el dise che ‘tute le Scriture le ze bone par (1) insegnar, (2) coreger, (3) indrissar le robe e (4) dissiplinar’. Metemo dir che te sì drio leder un testo dela Bìblia. Alora, proa pensar cossa questo testo el te insegna sora Geovà, sora quel che lu el vol far nel futuro e sora prinsipi dela Bìblia. Dopo, proa anca veder come questo testo el pol coregerte, o sia, pol giutarte a fermarte de pensar o far qualcossa sbaliada e a seitar fedele a Geovà. Varda anca come te pol doperar questo testo par indrissar la maniera de pensar de una persona quando te sì nela predicassion. Par fin, proa veder come questo testo el pol darte dissiplina, o sia, come el pol giutarte a pensar come Geovà. Se te fè queste quatro robe intanto che te sì drio leder la Bìblia, te sarè bon de catar bei tesori. w23.02 p. 11 § 11

Una professia de Daniel la disea che Gesù el ndaria scominsiar a governar nel fin dei “sete tempi”. Ma sarà che podemo saver quando Gesù l’è deventà rè? (Dan. 4:10-17) I “sete tempi” i rapresenta 2.520 ani. Questo tempo el ga scominsià in 607 vanti de Cristo quando Babilònia la ga tolto el poder del rè che governea Gerusalen. I sete tempi i se ga finio nel ano 1914. In quel ano, Geovà el ga fato Gesù, che el ga el dirito de governar, deventar Rè del so Regno. (Eze. 21:25-27) Come che questa professia la ne giuta? Quando capimo la professia sora i “sete tempi”, se fidemo de pi che Geovà el ndarà far quel che el ga prometesto nela ora giusta. Compagno Geovà el ga scoliesto el tempo giusto par far che Gesù el deventesse Rè, anca tute le altre professie le ndarà suceder nela ora giusta. Alora, podemo esser sicuri che “el giorno de Geovà no’l tardigarà!”. — Aba. 2:3. w22.07 p. 3 §§ 3-5