Disembre

I dissìpoli de Gesù i credea in quel che le Scriture le disea e i se sforsea de obedir a Geovà. (Gio. 17:6) Ma lori no i era boni de capir parché che Gesù l’era stà morto come un criminoso. Gesù el savea che so dissìpoli i amea a Geovà e i gavea una forte fede, ma lu anca el ga visto che ghe ocorea aiuto par capir le Scriture. (Luc. 9:44, 45; Gio. 20:9) Alora, lu li ga giutadi a capir meio quel che i ledea nela Parola de Dio. Vedemo adesso come che lu el ga giutà quei due dissìpoli che i era drio ndar a Emaùs. Invesse de suito dirghe a quei due dissìpoli chi che lu l’era, Gesù el ghe ga fato domande. Parché? Parché lu el volea saver cossa che lori i era drio pensar e sentir. Dopo de scoltarli, Gesù el ga capio che lori i spetea che el Messia el deventesse rè de Israel e che li liberesse del governo de Roma. (Luc. 24:18-27) Alora, lu el ga doperà le Scriture par spiegarghe a quei due dissìpoli che gavea sucedesto tante professie. Pi tardi, in quel giorno, Gesù el ga giutà anca altri dissìpoli a capir meio queste professie. — Luc. 24:33-48. w24.10 p. 14 §§ 9, 10

Gesù el ga imparà del so Pare quel che el gavea de dir e far. Compagno a Gesù, la organisassion la dopera la Bìblia par giutarne a capir quel che l’è giusto e quel che l’è sbalià e a viver de una maniera che assa Geovà contento. (2 Tim. 3:16, 17) La organisassion anca la seita a ricordarne de leder la Bìblia e meter in pràtica quel che imparemo. Noantri imparemo tanto quando doperemo le publicassion par studiar la Bìblia. Par esémpio, semo boni de veder quel che la Bìblia la dise e quel che la organisassion de Geovà la ze drio far. E quando vedemo che le orientassion che ricevemo le ze pròpio de acordo cola Bìblia, se fidemo ancora de pi nela organisassion de Geovà. (Rom. 12:2) Gesù el predichea le “bone notìssie del Regno de Dio”. (Luc. 4:43, 44) E lu el ga domandà che anca i so dissìpoli i parlesse ai altri sora el Regno. (Luc. 9:1, 2; 10:8, 9) Ancoi, tuti noantri obedimo ala organisassion e predichemo sora el Regno de Geovà. Tuti parlemo ale persone sora el Regno, no importa ndove semo de star. w24.04 p. 9 §§ 5-7

Seita a fidarte nela organisassion de Geovà. Nel passà, Geovà el ga doperà Moisè, e dopo, Giosuè par darghe orientassion ai israeliti. (Gios. 1:17) I israeliti i era benedidi quando i acetea la orientassion de Geovà. Sècoli dopo, Geovà el ga doperà i 12 apòstoli par darghe orientassion ala prima congregassion. (Ati 8:14, 15) Pi tardi, Geovà el ga doperà anca altri ansiani che i era lì in Gerusalen. Cossita, “le congregassion le restea cada volta pi forte nela fede e ghen’era de pi persone che credea a cada giorno” parché i dissìpoli de Gesù i acetea la orientassion de quei òmini. (Ati 16:4, 5) Nei giorni de ancoi, Geovà el benedisse anca noantri quando obedimo ale orientassion dela so organisassion. w24.07 p. 10 § 10

Geovà el amea tanto el so servo Davi e el ga dito che ‘lu el contentea el so cuor’. Ancora cossita, Davi el ga copà una persona, el ga fato adultèrio e altri bruti pecati. De acordo cola Lege de Moisè, Davi el gavaria de esser copà. (Lev. 20:10; Nùm. 35:31) Ma Geovà el ga volesto giutarlo a ciamarse gramo. Alora, lu el ga mandà che el so profeta Natan el parlesse con Davi e el proesse farlo ciamarse gramo. Natan el ga contà una stòria che ga tocà el cuor de Davi. Davi el se ga nicorto che lu el gavea disgustà tanto a Geovà e el se ga ciamà gramo del bruto sbàlio che el gavea fato. (2 Sam. 12:1-14) Dopo, Davi el ga scrito un Salmo che mostra che lu el se gavea pròpio ciamà gramo. (Sal. 51, informassion nel scomìnsio del salmo) Questo Salmo el ga belche giutà tante persone a ciamarse grame dei so sbali, compagno a Davi. Cossa che te senti quando te pensi sora el amor che Geovà el ga mostrà a Davi quando el ga volesto giutarlo? w24.08 p. 11 § 9

Tante persone le dise che slevar un fiol no l’è mia fàcile. Semo sicuri che se te sì pare o mare, te sì drio sforsarte tanto par giutar el to fiol a gaver una forte fede. E te lodemo tanto par tuto quel che te sì drio far! (Deu. 6:6, 7) Ma pol esser che una ora o nantra, el to fiol el gavarà dubi sora quel che credemo e sora quel che la Bìblia la dise che l’è giusto o sbalià. Pol esser che quando el to fiol el te fà domande, suito te pensi che lu no’l ga pi fede in Geovà e nela Bìblia. Ma te ocore capir che el to fiol el ga de farse queste domande par gaver una forte fede. (1 Cor. 13:11) Alora, no stà mia restar preocupà. Invesse, dopera queste domande par giutarlo a imparar a pensarghe sora e a far pi forte la so fede in Geovà e nela Bìblia. w24.12 p. 14 §§ 1, 2

I fradei ebrei i ndaria infrontar brute dificoltà nela Giudea. Par quela, lori i gavea bisogno de una forte fede par seitar vivi. (Ebr. 10:37, 38) Gesù el gavea belche dito che quando i vedesse un esèrsito intorno la cità de Gerusalen, lori i gavea de scampar via par le montagne. Alora, i fradei ebrei rento la cità de Gerusalen e anca quei che i stea in colònia i gavea de scampar via. (Luc. 21:20-24) Lori i gavea bisogno de una forte fede par obedir. Parché? Parché in quela època, quando un esèrsito el acampea darente una cità, le persone che le stea in colònia le ndea protegerse rento le muràlie dela cità. Alora, pol esser che no ghe parea mia giusto scampar via par le montagne invesse de ndar rento la cità de Gerusalen. Sicuro che i giudei i gavea bisogno de una forte fede par far quel che Gesù el ghe gavea dito. I fradei ebrei anca i gavaria de fidarse in quei che Gesù l’era drio doperar par tender dele congregassion. Pol esser che quei fradei che tendea dele congregassion i ghe ga dito quel che i gavaria de far e quando i gavaria de scampar via. — Ebr. 13:17. w24.09 p. 10 §§ 9, 10

Quando Gesù l’era qua nela Tera, lu el ga fato de maniera perfeta el laoro che Geovà el ghe gavea dato. (Gio. 17:4) Ma podemo esser sicuri che lu no’l ga mai pensà: ‘Se te vol una roba ben fata toca farla ti.’ Parché che podemo dir questo? Parché Gesù el ga parecià altri par far questo laoro. E lu el ga dato ai so dissìpoli el laoro de predicar e insegnar. Quando i dissìpoli i gavea bisogno de cambiar qualcossa, Gesù sempre el ghe dea consili con amor. Arquanti dei so dissìpoli no i era pròpio sicuri che lu l’era stà ressussità, lu el ghe ga dato boni consili par esser sicuri che questo gavea pròpio sucedesto. (Luc. 24:25-27; Gio. 20:27) Gesù ghe ga dito che i gavaria de doperar de pi tempo par tender de altri fradei invesse de laorar par imuciar su soldi. (Gio. 21:15) Lu anca el ga dito che i so dissìpoli i gavea de star atenti de mai far comparassion in quel che cada un l’era drio far a Geovà. (Gio. 21:20-22) E Gesù li ga giutadi a capir meio la verità del Regno e a sforsarse de pi nela predicassion dele bone notìssie. — Ati 1:6-8. w24.10 p. 15, 16 §§ 13, 14

Podaremo viver par sempre se obedimo a Geovà. Cossita come ghe manchea poco par quei israeliti ndar rento la Tera Prometesta, ne manca poco par ndar rento el bel paradiso che Geovà el ne promete. (Isa. 35:1; Luc. 23:43) Pensa come sarà bel viver nel novo mondo. No ghen sarà pi Sàtana e i so demoni gnanca le religion false che le insegna busie sora Geovà. (Apo. 17:16; 20:2, 3) No ghen sarà governi che ne fà sofrir gnanca persone che le fà robe sbaliade. (Sal. 37:10, 11; Apo. 19:19, 20) Invesse, tuti i ndarà obedir ale lege de Geovà e i viverà in pace e union. Tuti i ndarà fidarse e amar un al altro. (Isa. 11:9) Sicuro che semo premosi de viver in Paradiso! Se noantri obedimo a Geovà, podaremo viver in questo paradiso par sempre. — Gio. 3:16. w24.11 p. 9 § 7

Semo sicuri che la professia del testo de ancoi la ze drio realisarse. Come? Ghen’è publicassion in de pi de mila léngue e, par meso del site jw.org, quasi tute le persone dela Tera le pol imparar sora le bone notìssie. Gesù el gavea dito ai so dissìpoli che lori no i saria mia boni de predicar pròpio in tute le cità e a tute le persone. (Mat. 10:23; 25:31-33) Quel che Gesù el ga dito sucede anca ancoi. Milioni de persone le vive in posti ndove no semo mia lìberi de predicar, e ghen’è sempre tanti bambini che i nasse tuti i giorni. Noantri femo el nostro meio par predicar a “cada nassion, tribo e léngua”. (Apo. 14:6) Ma no saremo boni de parlar con cada persona vanti del fin. w24.05 p. 10 §§ 6, 7

Gesù sempre el parlea quel che ndaria consolar e incoraiar i altri. Lu mai el ga dito su ai so dissìpoli. (Luc. 8:47, 48). Sicuro che Gesù l’è un bel esémpio par i fradei maridadi. Quando l’era qua nela Tera, lu el ga dito che Geovà el vol che el omo ‘el se una ala so dona’. (Mat. 19:4-6) In questo versìcolo, la parola “se unirà” nel greco la vol dir “tacarse”. Alora, el amor intrà un omo e una dona el ga de esser pròpio forte, come se lori i fusse tacadi. Se un de lori el proa finir con questa union, tuti i due i ndarà sofrir. Cossita, un omo che el se une ala so dona mai el ndarà vardar ‘robe sensa valor’, o sia, tuti tipi de pornografia. (Sal. 119:37) Podemo dir che lu el ‘fà un acordo coi so oci’ de mai ‘vardar una dona e pensar in robe sbaliade’. — Giò 31:1. w25.01 p. 10 §§ 12, 13

La maniera che Geovà el ne perdona la ze tanto difarente dela maniera che noantri perdonemo un al altro. Nissun pol perdonar compagno a Geovà. Parché? El salmista el ga dito sora Geovà: “Parché ti te perdoni del bon, e par quela le persone le te lodarà.” (Sal. 130:4) Alora, Geovà el ne perdona del bon. Par quela, sol Dio el pol mostrar cossa che pròpio vol dir perdonar. Arquanti versìcoli dele Scriture Ebraiche i dopera una parola par el perdon de Geovà che no la ze mai doperada par parlar del perdon che una persona la dà. Quando el nostro Pare el ne perdona, lu el finisse fora del tuto coi nostri pecati e el ne assa esser so amighi come prima. Sicuro che restemo tanto contenti de saver che sempre che sbaliemo, Geovà el ne perdona del tuto. w25.02 p. 8 §§ 1-3

Anca se le persone no le scolta quel che parlemo, saremo boni de far el nostro laoro de predicassion. Come cossita? Noantri saremo drio far quel che Geovà e Gesù i ne ga domandà e saremo boni de contentar el nostro grando Dio. (Pro. 27:11) Alora, anca se no catemo le persone casa o se no le aceta quel che parlemo, podemo gaver alegria de ndar predicar. Tuti noantri restemo tanto contenti quando un fradel el cata una persona che la vol studiar la Bìblia. Una Sentinela la ga dito che el laoro de predicassion l’è compagno al sforso che se fà par catar un toseto che l’è perso. Tante persone le va in serca in posti difarenti. Alora, quando qualchedun lo cata, tuti i resta contenti, invesse de sol quel che lo ga catà. Dela stessa maniera, tuti nela congregassion i se sforsa de predicar. Par quela, tuti i resta pròpio contenti quando una persona la scomìnsia a ndar ale riunion. w24.04 p. 18 §§ 13, 14

Semo premosi de veder le robe che le ndarà suceder. Col aiuto de Geovà, pol esser che arquante persone le acete le verità vanti che scomìnsie la granda tribolassion. E restemo maraveiadi de pensar in quel che sucederà dopo che scomìnsia la època pi bruta de tute. Pol esser che arquante persone no le volarà pi far parte del bruto mondo de Sàtana e le ndarà adorar a Geovà insieme a noantri. Ma, par intanto ghemo de predicar le bone notìssie del Regno de Dio in tuta la Tera, che l’è un laoro che mai pi faremo. Anca ne ocore parlar ai altri quel che presto ndarà suceder. Le persone le ga de saver che el fin del mondo de Sàtana l’è pròpio darente. Alora, seitaremo a predicar par causa del nostro amor par le bone notìssie, par le persone e par el nostro caro Dio, Geovà. Seitaremo a sforsarse de far questo laoro fin che Geovà el dise: “El laoro de predicassion l’è fato!” w24.05 p. 19 §§ 14-16

Nela note vanti de morir, Gesù el ga insegnà ai so apòstoli che lori i gavea de esser pi ùmili. Sicuro che lori i ze restadi spaventadi de veder che Gesù l’era drio far un laoro che i schiavi i gavaria de farlo. La Bìblia la dise che Gesù ‘el se ga cavà via la roba che la era par sora dela so veste. El ga ciapà una tovaia e la ga ligada intorno dela so sintura. Dopo, el ga metesto àqua nte una mastela e el ga scominsià a lavar i pié de tuti i apòstoli’. (Gio. 13:4, 5) Gesù el ga fin lavà i pié de Giuda, che dopo ndaria tradirlo. Sicuro che ghe ga metesto tempo par lavar i pié de tuti i so apòstoli, ma lu l’è stà ùmile e el ga finio el laoro. Dopo, el ghe ga dito: ‘Gavé visto quel che go fato? Valtri me ciamé de “Istrutor” e “Signor”, e gavé rason, parché son pròpio. Alora, se mi, che son el Signor e Istrutor, go lavà i vostri pié, anca valtri gavé de lavarve i pié un del altro.’ — Gio. 13:12-14. w25.03 p. 10 §§ 9-11

Parché che pol esser fadiga seitar a gaver una forte amicìssia con Geovà ancoi? In questo bruto mondo, tante persone no le crede in Dio. E pol esser che ne par che le ga una vita bona, anca se no le fà quel che Geovà el vol. Ancora che no assaremo de creder in Geovà, pol esser che scominsiemo a gaver dubi se lu el ndarà pròpio giutarne. El scritor del Salmo 73 el se ga sentio pròpio cossita. Lu el vedea che le persone dela so època le fea tante robe sbaliade, e ancora cossita, le gavea una bona vita. Par quela, lu el ga scominsià a domandarse se servir a Geovà l’era pròpio la meio roba de far. (Sal. 73:11-13) Cossa che ga giutà el salmista a cambiar la so maniera de pensar? Lu el ga pensà sora quel che sucede con quei che i se fermea de fidarse in Geovà e nele benedission che lu el gavea. (Sal. 73:18, 19, 27) Cossa che noantri imparemo? Anca noantri ghemo de pensarghe sora come saria la nostra vita se no servìssino a Geovà e nele robe bone che ghemo nela vita quando lo adoremo. w24.06 p. 25 §§ 16, 17

Nel passà, arquanti ghe dea soldi in préstio ai so fradei poareti sol par dopo guadagnar de pi. E arquanti giuisi i acetea soldi par condanar una persona che no la gavea fato gnente de sbalià. Sicuro che Geovà el restea tanto disgustà de veder queste robe. (Eze. 22:12) Alora, l’è tanto importante pensarghe sora come vedemo i soldi. Par esémpio, proa domandarte: ‘Seito a pensar sora i soldi e cossa che ancora posso comprar? Se mi ciapo soldi in préstio de qualchedun, ghe meto una mùcia de tempo par pagarghe parché penso che no ghe ocore mia? Se go soldi, penso che son pi importante che i altri? Sarà che me fà fadiga doperar quel che go par mostrar bontà ale persone? Sarà che penso che i fradei e le sorele che i ga capital i ama de pi i soldi che a Geovà? Sarà che vui esser amigo de quei che i ze siori e ghe dao poco valor ai poareti?’ Le risposte a queste domande le ndarà mostrarne se volemo pròpio seitar a esser amighi de Geovà. Se mai amemo i soldi, Geovà el sarà sempre con noantri! w24.06 p. 12, 13 §§ 17, 18

Se volemo contentar a Geovà, ghemo de sforsarse par gaver una forte voia de far quel che l’è giusto. Parché? Se noantri semo boni de ‘odiar quel che l’è rugno e amar quel che l’è bon’, saremo ancora pi dessididi a far quel che l’è giusto. (Amòs 5:15) E se ghemo una forte voia de far quel che l’è giusto, saremo boni de seitar leai a Geovà, anca quando de colpo vien fora una situassion che podaria farne sbaliar. Ghemo de doperar del nostro tempo par far robe che ne giutarà a amar ancora de pi a Geovà. Par esémpio, quando ndemo ale riunion e ala predicassion, femo ancora pi forte la nostra voia de assar Geovà contento. (Mat. 28:19, 20; Ebr. 10:24, 25) E quando ledemo e studiemo la Bìblia e ghe pensemo sora, femo pi forte el nostro amor par quel che l’è giusto e odiemo ancora de pi quel che l’è rugno. (Gios. 1:8; Sal. 1:2, 3; 119:97) Gesù el ga dito ai so dissìpoli: “Seité esser atenti e seité far orassion par no cascar in tentassion”. (Mat. 26:41) Ricòrdate che Geovà el pol giutarte a gaver ancora de pi voia de far quel che l’è giusto. — Tia. 4:8. w24.07 p. 17 §§ 14-16

Se ghemo de insegnarghe a qualchedun, ghemo de sforsarse de farlo compagno a Geovà. Come cossita? Geovà el ga caro de dar la so sabedoria ai altri e mai la tien sol par lu. Alora, noantri volemo insegnar ai nostri fradei tuto quel che savemo. No ghemo mai de tegner quel che savemo par noantri parché ghemo paura che dopo no gavaremo pi gnente de far e che la persona la ne ciaparà el posto. Mai ghemo de pensar: ‘Nissun me ga insegnà gnente. Alora assa che el impare lu lu sol.’ Geovà no’l vol che nissun pense cossita nela so organisassion. Invesse, volemo restar contenti de insegnar ai nostri fradei “tuto” quel che savemo. (1 Tes. 2:8) Noantri volemo che anca i fradei che semo drio giutar i sìpia ‘pareciadi par insegnar i altri’. (2 Tim. 2:1, 2) Se insegnemo ai nostri fradei quel che savemo, tuti i gavarà de pi sabedoria e alegria. w24.09 p. 29 §§ 12, 13

Arquante persone fursi le pensa che no le sà far gnente par giutar la congregassion. Se ti te pensi cossita, no stà restar desanimà. Te pol esser sicuro che tuti i pol giutar tanto la congregassion. Una roba che te pol far l’è leder quel che Paolo el ga scrito in 1 Corinti 12:12-30 e domandar che Geovà el te giute a capir quel che l’è scrito. Paolo el ga dito che tuti nela congregassion i ze importanti e i pol laorar par giutar i altri. Alora, anca ti e quel che te fè l’è tanto importante. Par quela, fà tuto quel che te pol par laorar par Geovà e giutar i to fradei e sorele. Te pol esser sicuro che i ansiani i ndarà veder el to sforso e i te darà laori che te sì bon de far. (Rom. 12:4-8) Quel che un fradel ga de far par deventar un servo ministerial l’è compagno a quel che tuti noantri ghemo de far par adorar a Geovà. w24.11 p. 16, 17 §§ 12, 13

Ana la ga bio tante dificoltà che la ga fato piander. Par esémpio, so omo el gavea anca nantra dona, Penina. Penina la gavea tanti fioi intanto che Ana no la gavea gnanca un fiol. (1 Sam. 1:1, 2) Penina la gavea òdio de Ana, la seitea a dirghe su e a riderghe drio. La Bìblia la dise che Ana “la piandea e no la era bona de magnar” e la era deventada pròpio triste. (1 Sam. 1:6, 7, 10) Cossa che Ana la ga fato? Prima, ela la ze ndata adorar a Geovà nel tabernàcolo. Dopo, ela la ga parlà a Geovà tuto quel che la sentia e la pensea. Ana “la ga domandà a Geovà: ‘Varda la aflission dela to serva e ricòrdate de mi.’ (1 Sam. 1:11) Geovà el capia i so sentimenti, quel che la era drio infrontar, el ga scoltà la so orassion e dopo el ghe ga dato un fiol. — 1 Sam. 1:19, 20; 2:21. w24.12 p. 21 §§ 5-7

El sacrifìssio de Gesù ne insegna che lu el se preocupa tanto cole persone, ancora de pi coi so dissìpoli. (Gio. 13:1) Par esémpio, Gesù el savea che el gavaria tante dificoltà qua nela Tera e che el ndaria sofrir tanto vanti dela so morte. Ancora cossita, lu el ga fato tuto quel che Geovà ghe gavea domandà, parché el ne ama. Lu el ga mostrà questo amor quando el ga predicà, el ga insegnà e el ga giutà le persone. Nel ùltimo giorno dela so vita qua nela Tera, Gesù el ga lavà i pié dei so apòstoli par insegnarghe e incoraiarli. (Gio. 13:12-15) Quando l’era nel pal de tortura, Gesù el ga dato speransa a quel criminoso e el ga dito che lu el saria in Paradiso. Dopo, lu el ga domandà che Gioani el tendense dela so mare. (Luc. 23:42, 43; Gio. 19:26, 27) Sicuro che Gesù el ga mostrà so grando amor, nò sol quando el ga dato la so vita, ma par meso de tuto quel che el ga fato intanto che l’era qua nela Tera. w25.01 p. 23 § 11

La Bìblia la dise che noantri semo schiavi del pecato. Ma par causa del perdon de Geovà, l’è come se el ne gavesse liberà de esser ‘schiavi dei nostri pecati’. (Rom. 6:17, 18; Apo. 1:5) Alora, saver che Geovà el ne ga perdonà ne assa contenti compagno un schiavo che l’è stà liberà! Par giutarne a capir el perdon de Geovà, la Bìblia anca la ne compara a una persona che la ga una bruta malatia. Quando Geovà el ga mandà el so Fiol qua ala Tera par morir par noantri, l’è come se fussino stati curadi de questa bruta malatia. (1 Pie. 2:24) Come cossita? Quando femo un pecato, rovinemo la nostra amicìssia con Geovà, o sia, restemo come che maladi. Ma par causa del sacrifìssio de Gesù, podemo tornar a esser amighi de Geovà, o sia, semo curadi. Cossita come una persona che la ze stata curada de una bruta malatia la resta tanto contenta, noantri restemo pròpio contenti de saver che podemo esser amighi de Geovà nantra volta. w25.02 p. 11 § 16; p. 13 § 17

Nela stòria dei talenti, Gesù el ga parlà de due schiavi che i ze stati fedeli al so paron e un schiavo che no l’è stà mia fedele. (Mat. 25:14-30) I due schiavi fedeli i ze i fradei untadi che i seita leai. El paron, Gesù, li ga convidadi par ‘esser felici insieme’ a lu. Questo sucede quando lori i ze ressussitadi par viver in cielo. (Mat. 25:21, 23; Apo. 20:5b) Ma i untadi i pol imparar tanto con quel che ga sucedesto col schiavo miserion. Come cossita? Ghemo de sforsarse de esser bravi laoradori. Compagno la stòria dele vèrgine, quando Gesù el ga contà la stòria dei talenti, lu no l’era drio dir che arquanti untadi i saria miserioni. Invesse, lu el ga spiegà quel che ndaria suceder se i untadi no i se sforsesse de esser bravi laoradori. Lori no i ndaria mia ricever quel che Geovà el ndaria darghe, o sia, ndar rento el Regno del cielo. w24.09 p. 22 § 10; p. 23, 24 §§ 12, 13

Tuti noantri volemo gaver i soldi par dar ala nostra fameia quel che ghe ocore. (Ecl. 7:12; 1 Tim. 5:8) E, l’è vera che quando ndemo scòlier un laoro, se preocupemo con quanto ndemo ciapar. Ma, se sol se preocupemo con quel lì, semo drio viver de acordo con quel che vedemo. Se vivemo de acordo cola fede, ghemo de pensar se el laoro che ndaremo scòlier el ndarà intrigar la nostra amicìssia con Geovà. Podemo domandarse: ‘Sarà che in questo laoro me tocarà far una roba che disgusta a Geovà?’ (Pro. 6:16-19) ‘Me tocarà perder le riunion, o gavarò manco tempo par predicar e studiar la Bìblia? Sarà che me tocarà restar massa tempo distante dela me fameia?’ Se vedemo che si, saria meio no acetar el laoro, anca se l’è fadiga catarghene nantro. Come vivemo de acordo cola fede, le nostre dessision le mostrarà che se fidemo che Geovà el ndarà tenderne. — Mat. 6:33; Ebr. 13:5. w25.03 p. 21 §§ 5, 6

Noantri volemo sempre veder i nostri fradei e sorele come Geovà li vede. Par quela, ghemo de vardar le so bele qualità invesse de ndar in serca dei so sbali. Se se ghemo disgustà un colaltro, ghemo de meter a posto le robe con amor. Alora, quei che i vol esser tratadi cossita i volerà adorar a Geovà insieme a noantri. Noantri volemo seitar a adorar a Dio come lu el vol. Tuti quei che i vol esser ben tendesti, contenti, calmi e viver sensa paura i ga de adorar a Geovà e seitar a farlo. Ma ghemo de star atenti parché Sàtana el fà de tuto par fermarne. (1 Pie. 5:8; Apo. 12:9) Noantri no volemo assar che Sàtana el sìpia bon. Invesse, volemo seitar a adorar a Geovà in pace, union e dela maniera giusta! w24.04 p. 24, 25 §§ 18, 19

Se te ghè fioi, sfòrsate par giutarli a gaver voia de adorar a Geovà. Insegnaghe par meso de quel che te parli e del to esémpio che studiar la Bìblia, ndar ale riunion e ala predicassion le ga de esser le robe pi importante dela so vita. Se no te fè cossita, i to fioi i pol pensar che esser una Testimònia de Geovà l’è sol far parte dela “religion dela fameia”. Cossita, adorar a Geovà no la sarà mia la roba pi importante dela so vita, e pol esser che lori fin i va fermarse de servirlo. Pol esser che qualchedun el se ga fermà de servir a Geovà. Sarà che el pol esser ancora so amigo? Si. Lu el pol ciamarse gramo e tornar a adorar a Geovà. Sicuro che el gavarà de assar de banda el so orgòlio e acetar el aiuto dei ansiani. (Tia. 5:14) Anca se ghe vol tanto sforso par tornar a esser amigo de Geovà, el pol esser sicuro che el sarà tanto ricompensà! w24.07 p. 24 §§ 18, 19

Come smorosar de una maniera che ghe dà onor a Geovà? L’è importante farse questa domanda parché i sentimenti che gavé un par el altro i deventa pi forti col tempo. Alora, cossa che pol giutarve a seitar a far tuto polito? No sté restar valtri soli, parlar de robe imorai gnanca bever massa. (Efe. 5:3) Queste robe pol far cresser la voia de far sesso e sarà pi fadiga far quel che l’è giusto. Alora, parlé sempre de come che valtri podé mostrarve rispeto un al altro e far quel che Geovà el dise che l’è giusto. (Pro. 22:3) Intanto che sì drio smorosar, valtri ve volaré cada volta pi ben e fursi vegnarà la voia de dimostrar sentimenti un par el altro. Ma, se la voia de far sesso la deventa pi forte, sarà pi difìcile far bone dessision. (Cànt. 1:2; 2:6) Quando mostré che ve volé ben un al altro, pol esser pi fadiga controlarve e far quel che ghe piase a Geovà. (Pro. 6:27) Alora, quando valtri scominsié a smorosar, gavé de parlarve sora come dimostrar che ve volé ben de una maniera che ghe piase a Geovà. — 1 Tes. 4:3-7. w24.05 p. 29 §§ 10, 11

Volemo che i altri i sàpia che i pol domandar el nostro aiuto quando ghe ocore. (Pro. 17:17) Ma come che podemo mostrar che semo persone de fidarse? Ghemo de sforsarse de far compagno a Geovà tuti i giorni. Par esémpio, ne toca far pròpio quel che ghemo prometesto e sforsarse de rivar sempre nela ora giusta. L’è tanto bel quando i ansiani i ze pròpio de fidarse. Come che lori i pol esser persone de fidarse? Lori i ga de esser sempre pronti par giutar i fradei quando ghe ocore. Cossita i fradei e le sorele i resta pi calmi parché i sa che i pol domandarghe aiuto ai ansiani sempre che ghe ocore e i se sentirà amadi. E i ansiani i ga de doperar la Bìblia e le publicassion par dar un consìlio, invesse de dir quel che i pensa, far pròpio quel che i ga prometesto e no parlar in volta robe personai che i sa. Cossita tuti i se fidarà ancora de pi in lori. w24.06 p. 30 §§ 14, 15

L’è vera che no podemo mia spetar che Geovà el fà un miràcolo par finir fora con una malatia ancoi. Ancora cossita, lu sempre el ndarà giutarne. (Sal. 41:3) Come? Par meso del so spìrito santo Geovà el ne dà la forsa, la sabedoria e la pace che ne ocore par ndar avanti. (Pro. 18:14; Fil. 4:13) E lu ne dà consolo par meso dela speransa che ndaremo viver sensa malatie nel futuro. (Isa. 33:24) Geovà el ga volesto che arquante robe fusse scrite nela Bìblia par giutarne a dàrghene fora con brute situassion. (Rom. 15:4) Varda el esémpio de una sorela dela Àfrica che la piandea tanto dopo che la ga savesto che la gavea càncaro. Ela la ga dito: “Un testo che me ga consolà tanto l’è stà Isaia 26:3. Questo testo me giuta a ricordar che Geovà el pol darme pace e giutarme a dàrghene fora.” Ghen’è qualche testo dela Bìblia che te ga giutà quando te eri drio infrontar una bruta situassion cossita? w24.12 p. 24 §§ 17, 18

I ansiani i fà tuto quel che i pol par far par giutar quei che i ze stati cavadi via dela congregassion, compagno a Geovà. Lori i vol che quei che i ze stati cavadi via dela congregassion i torne a servir a Geovà. (Luc. 15:22-24, 32) La Bìblia la dise che Geovà, Gesù e i àngeli i resta pròpio contenti quando una persona la torna ala congregassion. E sicuro che anca tuti i altri nela congregassion i resta contenti! (Luc. 15:7) Geovà no’l aceta che un servo suo el seite a far parte dela congregassion se el ga fato un bruto pecato e se no’l se ga ciamà gramo. Ma ancora cossita, Geovà el proa giutarlo parché el vol che lu el torne a servirlo. El testo de Oseia 14:4 mostra cossa che Geovà el sente sora queste persone: ‘Mi vao curarli, e lori no i ndarà pi far sbali. Mi vao amarli de volentiera parché no go pi ràbia.’ Come i ansiani i sa cossa Geovà el vol, lori i restarà atenti a qualche pìcolo cambiamento che mostra che una persona la ze drio scominsiar a ciamarse grama. E questo testo anca assa ciaro che Geovà ancora el ama quei che i lo ga abandonà e el vol che lori i torne presto. w24.08 p. 28 §§ 8, 9

Pol esser che qualchedun no ndarà mia ringrassiarne par quel che ghemo fato. Fursi ghemo doperà del nostro tempo, forsa e soldi, ma ne par che la persona gnanca no la ne ga mia badà. Se ne sucede una roba cossita, cossa podemo far par no restar disgustadi? Ghemo de ricordarse che noantri sentimo alegria quando giutemo i altri, no vol mia dir se lori i dà valor a quel che ghemo fato o nò.(Ati 20:35) Ma cossa che podemo far quando i altri no i ne dà valor? Ricòrdate che quando te fè robe bone ai altri, te sì drio far compagno a Geovà. Lu el seita a dar robe bone ai altri, anca se no i ghe dà valor. (Mat. 5:43-48) E lu el promete che se femo robe bone ai altri ‘sensa spetar gnente indrio’, lu el ndarà ‘ricompensarne tanto’. (Luc. 6:35) Pol esser che quando el testo el parla de no ‘spetar gnente indrio’, vol dir no spetar gnanca che la persona la ne ringràssie. Ma ghemo de ricordarse che Geovà el ndarà ricompensarne se giutemo e femo robe bone ai altri. — Pro. 19:17; 2 Cor. 9:7. w24.09 p. 29 §§ 14-16