Novembre

Nel passà, quando i israeliti i fea bruti sbali, Geovà no’l spetea che lori i se ciamesse grami par sol dopo giutarli. Invesse, lu suito el proea giutarli a ciamarse grami e a cambiar. Geovà el ga domandà che Oseia el perdonesse e el acetesse nantra volta la so dona, che la era ancora drio tradirlo. Cossita, Geovà el ga mostrà che el ndaria perdonar e acetar el so pòpolo nantra volta, se i se ciamesse grami. (Ose. 3:1; Mal. 3:7) Ancoi, compagno a Geovà, i ansiani i se sforsa par mostrar misericòrdia a un fradel che l’è stà cavà via dela congregassion. Lori i vol che questo fradel el se ciame gramo e el torne ala congregassion. Par quela, i ansiani i ndarà far tuto quel che i pol par giutarlo e mai i ndarà far gnente che podaria intrigarlo de tornar ala congregassion. Gesù el ga contà la stòria de un fiol che l’è ndato via de casa e el ga fato bruti sbali. Ma dopo, l’è tornà. Alora, quando so pare lo ga visto de distante, “lu l’è ndato de carera e el ghe ga dato un strucon e lo ga basà con tanto amor”. (Luc. 15:20) El pare de questa stòria no’l ga mia spetà che so fiol el rivesse casa e el domandesse scusa par i so sbali. Invesse, lu l’è ndato de carera par catarse con so fiol, parché lo amea tanto. w24.08 p. 27, 28 §§ 7, 8

El testo de ancoi el mostra che Geovà no’l tien mia la so sabedoria sol par lu, ma che la dà ai altri de maniera generosa. Queste parole anca le mostra che quando Geovà el ne dà la so sabedoria, lu no’l proa farne de manco. Lu no’l vol farne sentirse sensa valor parché ghe domandemo el so aiuto. Invesse, Geovà el ga pròpio caro che ghe domandemo la so sabedoria. (Pro. 2:1-6) Sarà che podemo far compagno a Geovà e doperar quel che savemo par giutar i altri? (Sal. 32:8) Si! Tuti noantri podemo insegnar ai altri quel che savemo. Par esémpio, podemo giutar quei che ga scominsià a ndar ala predicassion fà poco tempo. I ansiani i pol insegnar con passiensa i servi ministeriai e i fradei pena batesadi a far i so laori nela congregassion. E quei che i giuta a tender e a far su Saloni del Regno i pol insegnarghe ai altri fradei quel che i sa. w24.09 p. 28-29 §§ 11, 12

Par esser un ansiano, te ghè de “far tuto polito”, o sia, i fradei i ga de vederte come una persona che sempre fà quel che l’è giusto. (1 Tim. 3:2) Ma la Bìblia la dise che te toca anca gaver una bona reputassion davanti le persone de fora dela congregassion. Alora, ancora che quei che no i serve mia Geovà no i sìpia de acordo con quel che ti te credi, lori i ga de vederte come una persona bona e de fidarse. (Dan. 6:4, 5) Alora, domàndate: ‘Sarà che i fradei e quei de fora dela congregassion i me vede come una bona persona?’ Par esser un ansiano, anca te ghè de “amar la bontà”. Cossa che questo vol dir? Vol dir star atento ale bele qualità dei to fradei e sorele. (Tito 1:8) Anca, vol dir restar contento de giutarli e far de pi de quel che ghe vol. Parché che l’è tanto importante che i ansiani i ‘ame la bontà’? Parché lori i laora tanto par incoraiar i fradei e le sorele e par far tanti laori nela congregassion. (1 Pie. 5:1-3) Anca se i ansiani i gàpia tanto laoro, lori i resta pròpio contenti de giutar i altri. — Ati 20:35. w24.11 p. 20, 21 §§ 3-5

I servi ministeriai i fà laori pròpio importanti in tute le congregassion. El apòstolo Paolo el ghe dea tanto valor a quel che questi bravi fradei i fea. Par quela, quando el ga scrito la carta ai Filipensi, lu el ga saludà i servi ministeriai e i ansiani. (Fil. 1:1) Tanti fradei gióveni e veci i ga tanta alegria de laorar come servi ministeriai. Par esémpio, Devan el ga ricevesto questa responsabilità quando el gavea 18 ani. E anca se Luis el gavesse de pi de 50 ani quando l’è deventà servo ministerial, lu el ga dito: “Mi son tanto contento de giutar la congregassion come un servo ministerial. I me fradei e sorele i ga mostrà che i me ama tanto, e adesso anca mi posso mostrar che li amo.” Tanti servi ministeriai i se sente cossita. Se te sì un fradel batesà, sarà che te podarissi esser un servo ministerial? w24.11 p. 14 §§ 1-3

Quando Ezechia, el rè de Giudà, el gavea 39 ani, lu el ga bio una bruta malatia. Par meso del profeta Isaia, Geovà el ghe ga dito che lu el ndaria morir. (2 Rè 20:1) Dopo che el ga scoltà la notìssia de Isaia, Ezechia el ga sofrio e el ga piandesto tanto. Par quela, el ga pregà e domandà el aiuto de Geovà. Geovà el ga visto che Ezechia el piandea tanto intanto che l’era drio pregar a lu e ghe ga fato pecà. Alora, Geovà el ghe ga dito: ‘Go scoltà la to orassion e go visto le to làgrime. Par quela, vao curarte.’ Par meso del profeta Isaia, Geovà el ga dito che el ndaria salvar Gerusalen dei assiri e che Ezechia el seitaria vivo. (2 Rè 20:4-6) Gheto una bruta malatia e te par che no ghen’è pi gnente che te pol far? Alora, anca se te sì drio piander, parla a Geovà quel che te sì drio sentir. Te pol esser sicuro che lu el ndarà scoltarte, parché Geovà l’è “el Pare dele grande compassion e el Dio de tuto el consolo” che sempre ne giuta quando ghemo dificoltà. — 2 Cor. 1:3, 4. w24.12 p. 24 §§ 15-17

Pensa come sarà bel imparar sora Geovà e sora le bele robe che lu el ga creà, e ricever quei che i ndarà ressussitar! (Sal. 104:24; Isa. 11:9) E restaremo tanto contenti de adorar a Geovà sensa sentirse in colpa par causa de sbali. La nostra vita in Paradiso la sarà tanto bona. Alora, ghemo de seitar a esser leai a Geovà, invesse de ndarghe drio ale voie sbaliade che fursi ghemo. Parché? Parché sol se seitemo leai podaremo gaver questa bela vita. Podemo esser sicuri che la nostra vita in Paradiso la sarà tanto meio de tuto quel che podemo gaver in questo mondo. (Ebr. 11:25) E la vita in Paradiso no la ze sol una bela roba che volemo che suceda. Invesse, la ze una roba che semo sicuri che la ndarà suceder nel futuro. Ma sol podaremo gaver questa bela vita in Paradiso parché Geovà el ne ga amà tanto e el ne ga dato la vita del so caro Fiol. w25.01 p. 29 § 12

Nel libro de Ebrei, ghen’è tanti esempi de bravi servi de Geovà che i se ga fidà del tuto in lu. Un de questi bei esempi l’è stà Moisè. (Ebr. 3:2-5; 11:23-25) Lu el se ga fidà in Geovà e questa la ze stata la meio dessision parché Geovà el ga dato tuto quel che el pòpolo el ga bio de bisogno nel deserto. (Éso. 15:22-25; Sal. 78:23-25) Intorno de un ano dopo che i israeliti i era stati liberadi del Egito, Moisè el ga scominsià a domandarse come che Geovà el ghe daria carne al pòpolo. Pol esser che Moisè no l’era mia bon de creder che Geovà el saria bon de darghe carne a milioni de israeliti che i era in meso el deserto. Alora Geovà el ghe ga dito: “Sarà che ghen’è qualcossa che la man de Geovà no la pol far?” (Nùm. 11:21-23) Alora, l’era come se Geovà el fusse drio dir a Moisè: ‘Pénsito che no son mia bon de far quel che go dito?’ w25.03 p. 26 §§ 1, 2

Sarà che podemo dir che quel che ga sucedesto nel Dilùvio ga mostrà quel che sucederia ancoi? Nò, parché no ghen’è mia un testo che dise quel lì. L’è vera che Gesù el ga dito che i ùltimi giorni i saria compagni ai “giorni de Noè”. Ma lu no’l ga mia dito che tute le robe che le ga sucedesto prima che vegnesse el Dilùvio sucederia ancoi. (Mat. 24:37-39) Ancora cossita, podemo imparar tante robe de quel che ga sucedesto nel Dilùvio. Noè el ga obedio a Geovà e el ga mostrà fede quando el ga fato su la arca. (Ebr. 11:7; 1 Pie. 3:20) Ancoi, dela stessa maniera, le persone che le scolta le bone notìssie sora el Regno le ga de meter in pràtica quel che le impara. (Ati 3:17-20) Piero el ga dito che Noè l’è stà un “predicador dela giustìssia”. Ancoi, anca se se sforsemo tanto, no saremo mia boni de predicar a tute le persone vanti che vegna el fin. w24.05 p. 9, 10 §§ 3-5

Noantri ghemo de catar fora maniere de mostrarghe rispeto e bontà ai amighi de Dio. (Rom. 12:10) Come che podemo mostrar bontà e rispeto ai nostri fradei? El Salmo 15:4 el mostra che mai ghemo de ‘cambiar la nostra promessa, anca se quel che ghemo prometesto no l’è mia bon par noantri’. Se no femo quel che ghemo prometesto a qualchedun, fursi lo faremo sofrir tanto. (Mat. 5:37) Come amemo tanto a Geovà e ai altri, volemo sforsarse par sempre far quel che ghemo prometesto. Par esémpio, Geovà el speta che el omo e la dona i fae quel che i ga prometesto nel giorno che i se ga maridà. Lu anca el vol che el pare e la mare i fae quel che i promete ai so fioi. Noantri anca podemo dar onor ai nostri fradei quando ghe mostremo bontà e li convidemo par restar insieme de noantri. (Rom. 12:13) Ghemo de doperar ben el tempo che ghemo coi nostri fradei nele riunion, nela predicassion e anca in altre ore. Cossita, faremo pi forte la nostra amicìssia con lori e con Dio. E quando ghe mostremo bontà ai nostri fradei e li convidemo par restar insieme, semo drio far compagno a Geovà. w24.06 p. 12 §§ 15, 16

Geovà el mostra la verità a quei che i ze ùmili. (Mat. 11:25) Noantri semo ùmili e acetemo aiuto par imparar la verità. (Ati 8:30, 31) Ghemo de star atenti de mai esser orgoliosi. Parché? Parché se semo orgoliosi, scominsiemo a pensar che la nostra opinion la ze tanto importante quanto quel che la Bìblia e la organisassion de Geovà le dise. Par seitar a esser ùmili, ghemo de ricordarse che semo pròpio pìcoli davanti de Geovà. (Sal. 8:3, 4) Anca ghemo de pregar che Geovà el ne giute a esser ùmili e a acetar quel che lu el ne insegna. Lu el ne giuta a capir quel che el pensa par meso dela Bìblia e dela so organisassion. Cossita capimo che queste robe le ga pi valor de quel che noantri pensemo. Quando te ledi la Bìblia, proa veder come Geovà el mostra che lu el ama la umiltà e el resta tanto disgustà quando qualchedun el ga orgòlio o el pensa che l’è pi importante che i altri. E stà ancora pi atento de esser ùmile quando te ricevi un laoro de far che te dà autorità e che i altri i te vede tanto. w24.07 p. 10 §§ 8, 9

In 1919, Gesù el ga scominsià a doperar un pìcolo grupo de fradei untadi par tender del laoro de predicassion e giutar i so dissìpoli a capir meio la Bìblia. (Luc. 12:42) Semo sicuri che Geovà l’è drio benedir el so laoro. (Isa. 65:13, 14) Noantri mai sarìssino boni de far el laoro de predicassion se no fùssino mia organisadi. (Mat. 28:19, 20) Metemo dir che le congregassion no le savesse mia el posto ndove cada una la gavaria de predicar, e che podarìssino predicar dà par tuto. Se fusse cossita, pol esser che i fradei i ndaria sempre predicar tuti nel medèsimo posto. Proa pensar anca in altre robe bone che sucede parché semo organisadi. Cossita come Gesù el ga organisà i so dissìpoli quando l’era qua nela Tera, lu el seita a tender dei servi de Geovà ancoi. w24.04 p. 8, 9 §§ 2-4

El primo fiol de Adon e Eva l’è stà Cain. Compagno ai so genitori, anca lu el fea pecati. La Bìblia la dise che “i so laori i era rugni”. (1 Gio. 3:12) Pol esser che l’è stà par causa de questi laori rugni che Geovà “no’l ga aprovà Cain e la so oferta”. Invesse de cambiar quel che l’era drio far, “Cain l’è restà tanto inrabià e disgustà”. Alora, cossa che Geovà el ga fato par giutarlo? Geovà el ga parlà con Cain con bontà. (Gén. 4:3-7) El ga dito che el ndaria benedirlo se lu el cambiesse quel che l’era drio far. Geovà anca el ghe ga dito cossa che ndaria suceder se lu el seitesse a far robe sbaliade. Ma, invesse de acetar el aiuto de Geovà, Cain l’è stà testardo e no’l se ga mia ciamà gramo. Sicuro che Geovà l’è restà pròpio disgustà. Ma ancora che Cain no’l gavesse acetà el so aiuto, Geovà no’l ga mia desistio de giutar i pecadori a ciamarse grami. w24.08 p. 10 § 8

Moisè el ga giutà i israeliti a ricordarse dela bela speransa che i gavea. Geovà li giutaria a viver tranquili nte una tera tanto bela e con tanto magnar. Moisè el ga dito che lori i cataria cità ‘che no i gavea fato su, con case piene de tuti i tipi de robe bone, che no i gavea mia laorà par gaverle, con possi che no i gavea mia verto e con vignai e olivere che no i gavea mia impiantà’. (Deu. 6:10, 11) Ma Moisè anca el ga dito ai israeliti cossa che lori i gavaria de far par seitar a viver in quela tera. Moisè el ga dito che lori i gavaria de obedir a Geovà e restar darente a lu se i volesse “seitar a viver”. (Deu. 30:20) Ancora cossita, lori no i ga seità leai a Geovà. Par quela, Dio el ga assà che i assiri e anca i babiloni i tolesse el poder dela nassion e i portesse via i israeliti de quela bela tera. — 2 Rè 17:6-8, 13, 14; 2 Cró. 36:15-17, 20. w24.11 p. 9 §§ 5, 6

Tanti i dise che par gaver la vita eterna basta sol creder in Gesù e vederlo come quel che el salva. (Gio. 6:29) Ma ghe vol far de pi de questo. Arquanti nela Galilea i disea che i credea in Gesù, ma dopo i se ga fermà de ndarghe drio. Parché che ga sucedesto quel lì? Quasi tute quele persone nela Galilea le era drio ndar drio a Gesù sol parché le volea guadagnar quel che lu el podea darghe. Lore le volea veder miràcoli, magnar sensa pagar gnente e che lu el ghe insegnesse quel che lore le volea. Ma Gesù no l’è vegnesto ala Tera par darghe quel che le persone le volea. Invesse, lu l’è vegnesto par dirghe quel che le gavea de far par esser veri dissìpoli. Lore le gavea de ‘vegner a lu’, o sia, acetar e obedir a tuto quel che lu el insegnea. — Gio. 5:40. w24.12 p. 12 §§ 12, 13

Cossa che pol giutar un omo a fermarse de tratar mal la so dona? Lu el ga de imparar dela maniera che Gesù el ga tratà i so dissìpoli e sforsarse de tratar la so dona compagno a lu. Gesù sempre el mostrea bontà e rispeto ai so apòstoli. Lu mai el restea cativo gnanca el parlea robe brute a lori. Anca se lu el gavesse de pi poder e autorità che i so apòstoli, lu mai el ga proà farli sentirse fiachi o spauradi. Invesse, lu l’era ùmile e sempre el fea quel che lori i gavea de bisogno. (Gio. 13:12-17) Lu el ga dito ai so dissìpoli: “Imparé de mi, parché mi son manso e ùmile de cuor, e gavaré ànimo par valtri stessi.” (Mat. 11:28-30) Gesù l’era pròpio manso, e una persona mansa no la ze mia fiaca. Parché? Parché ghe vol tanta forsa par controlar quel che la sente. Anca quando la ze disgustada, la ze bona de restar calma e controlar i so sentimenti. w25.01 p. 10 §§ 10, 11

Come semo drio viver nei ùltimi giorni, savemo che infrontaremo cada volta de pi dificoltà par causa dei governi, dele guere, dele desgràssie dela naturesa o dele malatie che vien fora in tuto el mondo. Se ne sucede una roba cossita, cossa pol giutarne a far dessision che mostra che se fidemo del tuto in Geovà? Noantri ghemo de parlar a Geovà sora tute le nostre preocupassion e domandarghe che el ne dae calma e sabedoria par far bone dessision. (Luc. 12:29-31) Podemo seitar a domandarghe che el ne giute a restar contenti cole robe che ne ocore. (1 Tim. 6:7, 8) Podemo anca studiar le publicassion nel jw.org e vardar i vìdei che i pol giutarne a infrontar problemi coi soldi. w25.03 p. 28, 29 §§ 10, 11

Geovà el ga mandà che el apòstolo Piero el predichesse a Cornèlio parché el volea che, de lì avanti, tuti i podesse adorarlo insieme. In quela època, i giudei no i stea mia insieme de quei che no i era mia giudei. Ma, Piero l’è stà bon de cambiar la so maniera de pensar. Podemo esser sicuri de questo parché dopo che Geovà lo ga giutà a capir quel che el volea, Piero l’è ndato de “volentiera” predicar a Cornèlio. (Ati 10:28, 29) Cossita, Cornèlio e tuti dela so casa i ze stati batesadi. (Ati 10:21-23, 34, 35, 44-48) Un per de ani dopo, Piero el ga dito che ai fradei ghe ocorea “gaver la medèsima maniera de pensar”. (1 Pie. 3:8) Ma cossa pol giutarne a pensar cossita? Par meso dela Bìblia, ghemo de imparar come che Geovà el pensa e sforsarse de pensar compagno. w25.03 p. 9 §§ 7, 8

La maniera de pensar dele persone la ze cada volta pi sbaliada. (Pro. 17:15) Par quela, ne ocore esser boni de capir quel che l’è sbalià e mai creder in busie. No podemo mai assar che i nostri nemighi i fae pi fiaco el nostro coraio e la nostra voia de servir a Geovà. Paolo el ga incoraià i fradei ebrei a deventar ancora pi bravi servi de Geovà. E anca noantri ghemo de sforsarse par meter in pràtica questo consìlio. Cossa che pol giutarne? Noantri ghemo de studiar la Bìblia e imparar a pensar come Geovà el pensa. Ghemo de seitar a studiar la Bìblia anca dopo del batésimo e, ancora se semo batesadi fà tanto tempo, ghemo de leder e studiar la Parola de Dio tuti i giorni. (Sal. 1:2) Cossita come el apòstolo Paolo el ga parlà coi fradei ebrei, se sempre studiemo la Bìblia, saremo boni de gaver una forte fede. — Ebr. 11:1, 6. w24.09 p. 10 §§ 7, 8

Se ghemo una forte amicìssia con Geovà, sarà pi fàcile seitar leai a lu. Ricòrdate che Giusepe no’l ga volesto far imoralità sessual. Lu l’era amigo de Geovà e no’l volea far gnente che lo assesse disgustà. (Gén. 39:9) Ma cossa ghemo de far par gaver una amicìssia forte cossita con Geovà? Ne ocore torse el tempo par pregar a lu e studiar la Bìblia. Cossita, saremo cada volta pi amighi de Dio. Se la nostra amicìssia con Geovà la ze forte, mai volaremo far gnente che lo disguste. Quei che i assa de fidarse in Geovà fursi anca i assa de esser leai. Varda quel che ga sucedesto coi israeliti quando i era nel deserto. Lori i credea in Geovà, ma i ga scominsià a gaver dubi se lu el ndaria pròpio tenderli. (Éso. 17:2, 7) Par quela, un tempo dopo, lori i ga scominsià a ndar contra Dio. Sicuro che mai volemo far compagno i israeliti e desobedir a Geovà. — Ebr. 3:12. w24.06 p. 24 §§ 14, 15

Noantri semo darente del fin de questo bruto mondo, e pol esser che ancora ndaremo piander. Geovà el vede quando piandemo e ghe fà pecà veder el nostro sofrimento. Lu el resta tanto contento de veder che seitemo fedeli anca cole dificoltà e el ndarà ricordarse de tute le volte che ghemo piandesto. Alora, se infrontemo una bruta dificoltà, ghemo de sforsarse de star insieme dei nostri cari fradei e sorele. Ghemo anca de pregar a Geovà e parlarghe tuto quel che semo drio sentir e leder la Bìblia par ricever el consolo che vien de lu. Se seitemo fedeli, Geovà el ndarà benedirne tanto, e nel futuro, ‘lu el sugarà tute le làgrime dei nostri oci’ e el ndarà finir fora con tuto quel che ne fà sofrir. (Apo. 21:4) In Paradiso, sol ndaremo piander de contenti! w24.12 p. 20 § 3; p. 25 § 19

Geovà el ne ga scoliesto par esser so Testimònie e el ga dito che el ndaria darne coraio. (Isa. 43:10, 11) Vedemo quatro robe che Geovà el fà par giutarne. Prima, sempre che ndemo predicar, Gesù l’è con noantri. (Mat. 28:18-20) Seconda, Geovà el dopera i so àngeli par giutarne a far questo laoro. (Apo. 14:6) Tersa, Geovà el ne dà el so spìrito santo par giutarne a ricordarse quel che ghemo imparà. (Gio. 14:25, 26) Quarta, sempre ghemo i nostri fradei e sorele insieme a noantri. Sicuro che col aiuto de Geovà e dei nostri cari fradei e sorele, saremo boni de seitar a predicar con coraio. Pol esser che te resti disgustà se no te sì bon de catar le persone casa. Alora, te pol domandarte: ‘Ndove che posso catarle?’ (Ati 16:13) ‘Sarà che lore le ze drio laorar o le ze ndate a spasso?’ Dopo, proa pensar ndove che te podarissi catarle. w24.04 p. 17 §§ 10, 11

Se te sì maridà e te vol esser un ansiano, prima te ghè de esser un bravo paron de fameia. Par quela, te ghè de ‘tender ben dela to fameia’. Come? Móstraghe sempre amor e fà bone dessision par la fameia. Anca te ghè de giutarli a sempre ndar ale riunion e a far el so meio nela predicassion. Cossita te sarè bon de giutarli in tuto quel che ghe ocore par adorar a Geovà. Se te sì pare, i to fioi i ga de ‘obedirte e rispetarte’. (1 Tim. 3:4) Par quela, te ghè de insegnarghe con amor e bontà. Sicuro che te vol che i to fioi i gàpia diversion, giughi e i sìpia contenti, compagno i altri tosatei. Se te ghe insegni, lori i sarà obedienti, i ndarà mostrar rispeto ai altri e i gavarà bona creansa. El pi importante l’è far el to meio par giutar i to fioi a gaver una bona amicìssia con Geovà, imparar e meter in pràtica prinsipi dela Bìblia e esser batesadi. w24.11 p. 22 §§ 10, 11

Quando te te sforsi de far de pi par Geovà, te sarè ancora pi sicuro che te pol fidarte in lu e che lu el ndarà sempre giutarte. (1 Cor. 3:9) Ricòrdate che Geovà no’l fà mia comparassion intrà quel che ti te sì bon de far e quel che i altri i fà. Invesse, lu el varda quanto grando l’è el to amor par lu. Lu el resta tanto contento quando el vede che te ghe dè valor al bel presente che lu el te ga dato, o sia, la vita del so caro Fiol. (1 Sam. 16:7; Mar. 12:41-44) Noantri sol podemo esser perdonadi dei nostri pecati, gaver una amicìssia con Geovà e gaver la speransa dela vita eterna par causa del sacrifìssio che Gesù el ga fato. Geovà el ga dessidio mandar el so Fiol ala Tera par dar la so vita par noantri parché el ne ama tanto. Volemo mostrar che ghe demo valor a tute le bele robe che Geovà el ne ga dato. (1 Gio. 4:19) Volemo mostrar che ghe demo valor anca a tuto quel che Gesù el ga fato par noantri. Par causa del so grando amor, lu el ga dato la so vita par tuti noantri! w25.01 p. 31 §§ 16-18

Proa pensar come el scritor de questo salmo el se sentia. Lu el ga visto che tante persone che no le servia a Geovà le gavea una bona salute, le era siore e ghe parea che le gavea una bona vita. (Sal. 73:3-5, 12) Lu el ga pensà che el sforso che l’era drio far l’era par gnente. El salmista el gavea ‘dificoltà tuto el giorno’ par causa dei so pensieri. (Sal. 73:13, 14) Ma cossa che lo ga giutà a dàrghene fora con questi bruti sentimenti? El scritor de questo salmo l’è ndato al témpio de Geovà e l’è stà bon de pensar meio nele dessision che el gavea fato. (Sal. 73:16-18) Lu el ga capio che ancora se quele persone le gavesse una bona vita, lore no le gavea mia una bona speransa par el futuro. Questo lo ga giutà a restar tranquilo e esser sicuro che servir a Geovà la ze la meio dessision che podemo far. Par quela, lu el ga bio coraio e voia de seitar servir a Geovà. — Sal. 73:23-28. w24.10 p. 27 §§ 11, 12

Geovà el ne ga scoliesto par esser so “testimònie”. (Isa. 43:10-12) Arquanti ani indrio, el Corpo Governante el ga scrito una carta che la disea: “La roba pi importante che ghemo nela vita la ze esser cognossesti come Testimònie de Geovà.” Come cossita? Metemo dir che te sì stà acusà de far una roba sbaliada e che te tocarà ndar al tribunal. Te gavarissi bisogno de una testimònia par dirghe a tuti che no te ghè mia fato quela bruta roba. Chi che te scolierissi? Sicuro che te scolierissi una persona che te cognossi, che te te fidi, che anca i altri i se fida e che tuti i creda che quel che la dise l’è vero. L’è pròpio questo che Geovà el ga fato quando el ga scoliesto le so testimònie. Alora, restemo pròpio contenti de saver che Geovà el ne cognosse e el se fida che ndaremo parlar ai altri la verità sora lu. Cossita, ghemo de far tuto quel che podemo par parlar ai altri che le brute robe che Sàtana el ga dito le ze busie. L’è par meso dela predicassion che mostremo che semo pròpio Testimònie de Geovà. — Rom. 10:13-15. w24.05 p. 18 § 13

Gesù sempre el ga giutà i altri e el ga bio tanta alegria. Lu el ga insegnà le persone sora Geovà, ma anca le ga giutade de altre maniere. Par esémpio, una volta, lu el ga fato un miràcolo par darghe de magnar a una mùcia de persone, e el ga domandà che so dissìpoli ghe desse quel magnar. (Mar. 6:41) Cossita, Gesù el ga insegnà i so dissìpoli come che i podaria giutar i altri. Lori i ga fato un laoro sémplisse, ma tanto importante. Alora, proa pensa come quei apòstoli i ze restadi contenti de giutarlo a darghe de magnar a tute le persone che le ga “magnà fin che ghe bastesse”. (Mar. 6:42) Ma Gesù no’l ga giutà le persone sol quela volta. Invesse, lu el ga laorà tuta la so vita par giutar i altri. (Mat. 4:23) Gesù el gavea pròpio caro de insegnar le persone e giutarghe con quel che ghe ocorea. w24.11 p. 16 §§ 10, 11

Come semo nei “ùltimi giorni”, sicuro che i nostri fradei e sorele i gavarà cada volta de pi bisogno del nostro aiuto. Alora, ghemo de star pronti par giutarli con quel che ghe ocore. Noantri anca podemo darghe el consolo e el amor che i ga de bisogno. Volemo parlar, darghe atension e consolar i nostri cari fradei e sorele quando i ze nele riunion insieme a noantri. Volemo che lori i se sinta incoraiadi e che i sìpia sicuri del nostro amor. I ansiani i pol darghe consolo e aiuto ai fradei che i ze drio infrontar dificoltà. Par esémpio, i ansiani i fà presto giutar i so fradei e sorele quando sucede una desgràssia dela naturesa o quando i ghe ocore de aiuto par tender dela so salute. Lori anca i dopera la Bìblia par incoraiarli. L’è pi fàcile che una sorela o un fradel el domande aiuto a un ansiano che sempre el mostra bontà, che lo scolta e che el proa capir i so sentimenti. Queste qualità giuta i fradei a sentir che i ze amadi. Cossita, sarà pi fàcile che lori i se sforse de meter in pràtica le orientassion che i riceve dei ansiani. — 1 Tes. 2:7, 8, 11. w24.06 p. 29 §§ 12, 13

Geovà el ne ga creà con sentimenti compagno a quei che lu el ga. Alora, ancora che Geovà el sìpia el Dio Tuto Poderoso, anca lu el ga sentimenti. Par esémpio, la Bìblia la dise che lu el se ga sentio “disgustà”. (Sal. 78:40, 41) Sicuro che Geovà el ga sofrio tanto quando el ga visto so caro Fiol esser maltratà e copà. El sacrifìssio de Gesù ne insegna che nissun ne ama tanto quanto Geovà. Lu el te ama de pi che i to amighi o qualchedun dela to fameia. (Rom. 8:32, 38, 39) Geovà el te ama tanto de pi che ti stesso. Proa pensar: Ti te vol viver par sempre? Geovà l’è ancora pi premoso de darte la vita eterna. Ti te vol gaver perdon dei to pecati? Geovà el vol perdonarte ancora de pi. E quel che lu el speta de ti l’è che te mostri fede, che te sìpia obediente e che te ghe dè valor al sacrifìssio del so Fiol. Sicuro che el sacrifìssio de Gesù el ne insegna tanto sora el amor de Geovà. — Ecl. 3:11. w25.01 p. 22 §§ 8, 9

Dele volte, tuti noantri femo dessision de acordo con quel che vedemo, scoltemo o sentimo. Ma, no se pol mia fidarse sol in quel che vedemo e scoltemo. E rivarà una ora che faremo una dessision che disgusta a Geovà. (Ecl. 11:9; Mat. 24:37-39) Invesse, se femo le dessision de acordo cola fede, ndaremo contentar a Geovà, sentiremo pace, vera felicità e podaremo viver par sempre. (Sal. 16:8, 9; Isa. 48:17, 18; 2 Cor. 4:18) Come podemo saver se semo drio viver de acordo cola fede o de acordo con quel che vedemo? Podemo domandarse: ‘Cossa che mi penso vanti de far una dessision? Sarà che mi me preocupo sol con quel che posso veder, o anca con quel che Geovà el pensa?’ w25.03 p. 20, 21 §§ 3, 4

Tuti noantri podemo far qualcossa par giutar le persone a vegner adorar a Geovà. Ma come che podemo farlo? Ghemo de far compagno a Geovà. Lu no’l obriga le persone a vegner rento la so organisassion. Invesse, lu el vol che le vegna de volentiera. (Gio. 6:44; Ger. 31:3) Cossita, le persone sinsiere che le impara sora el amor de Geovà e sora le so altre qualità le ga voia de adorarlo. E noantri? Come che podemo giutar le persone a adorar a Geovà par meso dele nostre qualità e dele robe bone che femo? Quando le persone le vien ale riunion, le ga de sentir la medèsima roba che quei che i ze ndati a una riunion in Corinto i ga sentio nel passà. Lori i ga dito: “Dio l’è pròpio intrà de valtri.” (1 Cor. 14:24, 25; Zac. 8:23) L’è par quela che ghemo de meter in pràtica el consìlio del testo del giorno de ancoi. w24.04 p. 24 §§ 16, 17