Sito parecià par le dificoltà che pol vegner fora dopo del batésimo?

1-2. Cossa che ne giutarà a seitar leai a Geovà se vien fora problemi? Parla de un esémpio.

SAVEMO che gavaremo problemi in questo mondo che Sàtana el governa. Gesù el ga dito ai so dissìpoli che lori i infrontaria dificoltà che podaria far pi fiaca la so fede. (Mat. 18:7) Par esémpio, fursi gavaremo problemi coi nostri fradei e sorele. Ma podemo pareciarse par infrontar problemi cossita e seitar leai a Geovà.

² Pensaghe sora questo esémpio. Noantri sempre semo ricordadi de cossa che podemo far vanti che suceda una desgràssia dela naturesa. Ma come che podemo esser pareciadi? Prima, ghemo de saver che tipo de desgràssia pol suceder ndove semo de star, ancora de pi se fà poco tempo che stemo lì. Alora, podemo pensar cossa podemo far par protegerse e par salvar la nostra vita. (Pro. 21:5) Dela medèsima maniera, podemo pensarghe sora che tipo de problemi pol suceder dopo che se batesemo e veder cossa che podemo far par darghene fora. Cossita, ndaremo proteger la nostra amicìssia con Geovà. (Sal. 17:5) In questo stùdio, ndaremo veder tre dificoltà che pol vegner fora dopo che se batesemo e come che podemo pareciarse par darghene fora.a

UN FRADEL O UNA SORELA TE DISGUSTA

3. Che dificoltà pol esser che infrontemo nela congregassion?

³ Ricòrdito la prima volta che te sì vegnesto a una riunion? Fursi te ghè visto el amor che ghen’è intrà i fradei e le sorele. Par quela, te ghè dessidio servir a Geovà. (Gio. 13:35; Col. 3:12) L’è cossita che Blancab la se ga sentio. Ma dopo che la ze stata batesada ga sucedesto una roba che no la spetea mia. Ela la ga dito: “Una sorela la me ga tratà mal. Mi go visto anca che la parlea robe brute dei fradei dela congregassion. Mi gavea imparà che le Testimònie de Geovà le se sforsa par viver in pace e par dimostrar amor un al altro.” Noantri savemo che i nostri fradei e sorele i se sforsa tanto de mostrar bone qualità. Ma come semo imperfeti, dele volte, disemo robe sbaliade. (Efe. 4:23, 24; 1 Gio. 1:8) E pol esser che anca i altri i ndarà dir qualcossa che ne disgusta. (Tia. 3:8) Par causa de problemi come questi, arquanti fradei i se ga fermà de servir a Geovà.

4. De acordo con Efesi 4:32, cossa che pol giutarne a saver cossa far se un fradel o una sorela ne disgusta?

⁴ Cossa che te pol far se un fradel o una sorela te disgusta? Sfòrsate par far quel che l’è scrito in Efesi 4:32.c (Ledi.) Se te fè el to meio par tratar i altri con bontà, sarà pi fadiga che te li disgusti. Sfòrsate de perdonar le persone. Cossa che pol giutarte a far questo? Ricòrdate che Geovà sempre el te perdona. (Mat. 6:12) Quando te pensi in tute le volte che Geovà el te ga belche perdonà, sarà pi fàcile che te perdoni i sbali dei altri.

5. De acordo con Proverbi 19:11, cossa ghemo de far quando qualchedun ne disgusta? (Varda anca la stampa.)

⁵ Ledi Proverbi 19:11.d La Bìblia la dise che quando i altri i ne disgusta, ghemo de proar capirli.e Cossita, sarà pi fàcile portar passiensa. Questo consìlio ga giutà Rima, che la ze stata batesada pochi ani indrio. Ela la ga dito: “Quando vedo un fradel o una sorela far una roba che disgusta i altri, me ricordo de Proverbi 19:11. Mi proo pensarghe sora cossa che ga sucedesto con lori nel passà e parché che fursi lori i ga dito o i ga fato quela roba. Mi proo anca laorar con lori in predicassion. Far cossita me giuta a cognosserli meio.” Questa la ze una bela roba de far parché, se te cognossi ben i fradei, te sì bon de capirli. Alora, l’è pi fàcile perdonarli quando lori i fà qualcossa che te assa disgustà.

6. Cossa che te giutarà a gaver bone amicìssie nela congregassion?

⁶ Cossa che te giutarà a gaver bone amicìssie coi fradei e sorele? Consentrate nele so bone qualità. (Varda anca Proverbi 10:12; Rom. 12:10; Fil. 2:2, 3) Varda come che far cossita ga giutà un fradel de nome Marco che el se ga batesà fà poco tempo. Quando el ga scominsià a passar de pi tempo coi fradei e cole sorele dela congregassion, lu el ga visto i so difeti. Ma cossa che lo ga giutà a no restar desanimà par causa dei sbali dei fradei? Lu el ga dito: “Mi son nicorto che i sbali che arquante persone del mondo le fà i ze tanto pi grandi dei sbali dei fradei. Alora, go scominsià a consentrarme de pi nele so bone qualità.” Se ti te fè cossita, anca ti te gavarè forte amicìssie nela congregassion.

QUANDO TE SEITI A PENSAR IN QUEL CHE TE GHÈ ASSÀ INDRIO

7. Parché che fursi scominsiemo a voler nantra volta le robe che ghemo assà indrio?

⁷ Quando te sì deventà una Testimònia de Geovà, sicuro che te sì restà tanto contento de no far pi parte del mondo de Sàtana. Fursi te pensi che saria massa fadiga che una persona la volesse nantra volta quela vita de prima. Ma ancora cossita, quando vien fora dificoltà, pol esser che te scominsi a pensar nele robe che te ghè assà indrio par servir a Geovà. (Varda anca Nùmeri 11:4-6.) Par esémpio, fursi te ghè dessidio assar indrio un bon laoro, ma che ghe tolea tanto tempo. O pol esser che arquante persone no le ga pi volesto esser to amighi dopo che te ghè scominsià a studiar la Bìblia. Fursi te ghè assà indrio un costume che te piasea tanto, ma che Geovà el òdia. Sicuro che Geovà el restaria tanto disgustà se tornessino a far le robe che ghemo assà indrio! Cossa che te pol far adesso par mai ciamarte gramo dela to dessision de scominsiar a servir a Geovà?

8. Cossa che imparemo del esémpio de Abraon e Sara?

⁸ Nela Bìblia, ghen’è tanti esempi de servi fedeli del passà che i podaria gaver voia de tornar indrio ale robe che i gavea assà. Par esémpio, Geovà el gavea dito a Abraon e Sara de ndar via de Ur, che la era una cità granda e bela, par viver in tende. (Ebr. 11:8, 9) Sicuro che lori i se ricordea de come l’era la so vita, ma se i ‘seitesse a pensar’ nele robe bele che i gavea in Ur, i podaria gaver voia de tornar indrio. Invesse, lori i se ga consentrà nele promesse che Geovà el ghe gavea dato par el futuro. — Ebr. 11:15, 16.

9. De acordo con Filipensi 3:7, 8, 13, cossa che el apòstolo Paolo el pensea de tuto quel che el gavea assà indrio?

⁹ Anca el apòstolo Paolo el ga fato arquanti cambiamenti par servir a Geovà. Vanti de deventar un dissìpolo de Cristo, lu el gavea imparà de Gamaliel, che l’era un omo tanto importante intrà i giudei. (Ati 22:3) Paolo el podaria esser deventà un lìder giudeo importante. (Gàl. 1:13, 14) Ma, quando el ga acetà le bone notìssie, lu el ga assà indrio tuto questo. Sarà che la so vita la ze stata pi fàcile dopo che lu l’è deventà un dissìpolo de Cristo? Nò. Lu el ga ciapà bote, l’è stà metesto in preson e tanti giudei i lo odiea. (2 Cor. 11:23-26) Se Paolo se gavesse consentrà sol nele so dificoltà, fursi el podaria pensar che la so vita la era meio vanti de imparar la verità. Invesse, el se ga consentrà nel grando privilègio de ndar drio a Cristo e nela bela speransa che el gavea par el futuro. Paolo mai el se ga ciamà gramo de tuti i cambiamenti che el ga fato par servir a Geovà, parché el ga ricevesto tante benedission! — Ledi Filipensi 3:7, 8,f 13.g

10. De acordo con Marco 10:29, 30, in cossa che ghemo de pensarghe sora? (Varda anca la stampa.)

¹⁰ Cossa che podemo imparar? No l’è mia sbalià pensar nele robe che ghemo assà indrio par esser una Testimònia de Geovà. Ma se te pensi in queste robe, ricòrdate anca parché te le ghè assade indrio. (Ecl. 7:10) Pensa che le robe che te ghè adesso le ze tanto meio de quele che te gavei prima. Par esémpio, adesso te ghè una forte amicìssia con Geovà. (Pro. 3:32) Te ghè una grande fameia de fradei e sorele che te ama tanto. (Ledi Marco 10:29, 30.h) E Geovà el te ga dato una bela speransa par el futuro! (Isa. 65:21-23) Se sempre te pensi sora le benedission che te ghè de servir a Geovà, no te ciamarè gramo de quel che te ghè assà indrio.

11. Cossa che te ghè imparà col esémpio de Rosemary?

¹¹ Varda la speriensa de Rosemary, una sorela che la se ga batesà quando la gavea intorno de 50 ani. Cossa che la ga giutada a no ciamarse grama dele robe che la ga assà indrio? Ela la ga dito: “Nel scomìnsio, quando mi son deventada Testimònia de Geovà, me manchea far feste de Nadal cola me fameia. Me piasea dar presenti ai me fioi e ai me neti e veder come che lori i restea contenti.” Cossa che la ga fato? Rosemary la ga dito: “Mi go imparà a passar tempo cola me fameia de altre maniere. Una volta al ano, mi convido la me fameia par passar un tempo con mi. Mi ghe dao presenti e digo che li amo tanto.” Rosemary la ga infrontà anca nantra dificoltà. Ela la ga dito: “Quando mi go imparà la verità, arquanti i ga assà de esser me amighi. Alora, go scominsià a sentirme massa sola.”i Cossa che la ga giutada? Ela la ga scominsià a predicar con sorele difarente. Cossita, ela la ga fato amicìssie che la ghe dà tanto valor. Cossa che podemo imparar con Rosemary? Fursi te manca tanto qualcossa che te fei vanti de imparar la verità. Ma ricòrdate che adesso te pol gaver robe pi bele de quele che te gavei prima. (Fil. 4:8, 9) Gàpia sempre in mente che Geovà el te dà tanto de pi de quel che te ghè assà indrio par servirlo.

QUANDO ALTRI I SE FERMA DE SERVIR A GEOVÀ

12. Che dificoltà podarìssino infrontar nela congregassion?

¹² Quando te sì deventà una Testimònia de Geovà, sicuro che te sì restà tanto contento de scominsiar a servir a Geovà insieme de persone che le proa far quel che l’è giusto. (Isa. 65:14) Ma, ancora cossita, fursi te vegni a saver che un fradel o una sorela ga fato una roba sbaliada. Pol esser che la persona fin la ze stata cavada via dela congregassion. (1 Cor. 5:13) Varda come una sorela de nome Samar la se ga sentio quando ghe ga sucedesto una roba cossita. Ela la ga dito: “Poco tempo dopo del me batésimo, un ansiano el ga fato un bruto pecato e l’è stà cavà via dela congregassion. Mi quasi me go fermà de servir a Geovà. Mi no pensea che un ansiano el podaria far un pecato bruto e disgustar le persone dela congregassion.” Noantri se fidemo che i nostri fradei e sorele i ama a Geovà e i vol seitar leai a lu. (1 Cor. 13:4, 7) Ma, ancora cossita, ghen’è de quei che i ze cavadi via dela congregassion. Questo pol esser ancora pi fadiga se sucede con un amigo o con qualchedun che l’era un esémpio par noantri.

13. Cossa che te pol far adesso par seitar leal a Geovà anca se una persona che te ami lo abandona?

¹³ Cossa che te pol far adesso par seitar leal a Geovà anca se una persona che te ami lo abandona? Seita a far pi forte la to amicìssia con Geovà. (Tia. 4:8) Ricòrdate che te ghè dessidio servirlo no importa quel che i altri i fà. Par esémpio, anca se te lo adori cola to fameia e cola congregassion, te ghè anca de far le to orassion a Geovà e studiar la Bìblia ti ti sol. — Sal. 1:2; 62:8.

14. Cossa che imparemo del apòstolo Piero? (Gioani 6:66-68)

¹⁴ Anca el esémpio del apòstolo Piero pol giutarne a saver cossa far. Ghen’è stà un colpo che tanti dissìpoli de Gesù i se ga fermà de ndar drio a lu parché no i gavea capio quel che lu el ghe gavea insegnà. Gnanca Piero el gavea capio, ma el ga seità leal. (Ledi Gioani 6:66-68.j) Invesse de ndar drio ai altri, Piero el se ga consentrà nela verità che Gesù el ghe gavea insegnà. Par quela, lu no’l se ga fermà de ndar drio a Gesù. Noantri ghemo de pensar compagno a lu. No l’è parché i altri i se ga fermà de servir a Geovà che quel che la organisassion insegna no l’è giusto. Seita a tegnerghe de conto la verità che te ghè imparà e a esser leal a Geovà! Samar, la sorela che ghemo parlà prima, la ga dito: “Mi sempre go in mente che no l’è parché una persona la ga fato una roba sbaliada che tuta la congregassion la ga fata e che quel che la organisassion la insegna l’è sbalià. Geovà l’è un Dio maraveioso, no importa quel che le persone le fà.”

15. Cossa che te ghè imparà del esémpio de Emily?

¹⁵ Varda el esémpio de Emily. Una stimana dopo che la ze stata batesada, la so mare la ga abandonà la fameia e la ze stata cavada via dela congregassion. Emily la ga dito: “Mi no gavea mai imaginà che me mama la ndaria fermarse de servir a Geovà. Questa la ze stata la roba pi difìcile che me ga belche sucedesto. Me mama la me manca tanto.” Cossa che ga giutà Emily a darghene fora? Ela la ga dito: “Mi sinto che no son mi sola. El me pare el me ama tanto e el tende ben de mi. Mi go anca fradei e sorele nela congregassion che i me vol tanto ben. Tuti i ze drio infrontar dificoltà, par quela che l’è importante volerse ben coi fradei e incoraiarse un al altro.” (1 Pie. 5:9) Alora, proa cognosser meio i fradei e le sorele dela congregassion vanti che suceda dificoltà nela to vita. Cossita, no importa quel che ndarà suceder, no te te sentirè mai ti sol.

16. De cossa che ghemo de ricordarse? (Varda anca la stampa.)

¹⁶ Ricòrdate anca che Geovà el dissiplina quei che lu el ama. (Ebr. 12:6) Lu el vol che tuti quei che i ze stati cavadi via dela congregassion i torne a servirlo. (2 Pie. 3:9) Fursi qualchedun che te cognossi l’è stà cavà via dela congregassion. Ma te pol esser sicuro che i ansiani i farà tuto quel che i pol par giutar la persona a tornar a esser amiga de Geovà. — 2 Tim. 2:24, 25.

17. De cossa che te pol esser sicuro?

¹⁷ Ghemo parlà de un per de dificoltà che pol vegner fora dopo del batésimo. Pol esser che arquante te par massa fadiga de darghene fora. Ma no te ocore gaver paura parché te pol pareciarte prima. E no stà mai desmentegarte che Geovà Dio l’è dela to banda. Lu el te ga belche giutà e el vol giutarte par sempre! (1 Pie. 5:10) Lu anca el te darà la forsa che te ghè de bisogno par darghene fora cole dificoltà. Se te seiti a assar che Geovà el te giute, lu el sarà el to amigo par sempre! — Sal. 119:165; Rom. 8:38, 39.