20-26 DE APRIL DE 2026
CÀNTICO 49 Come far contento el cuor de Geovà
Sfòrsate par rivar al batésimo
“Adesso l’è el tempo pròpio giusto.” — 2 COR. 6:2.
COSSA CHE NDAREMO IMPARAR?
Ndaremo veder parché che l’è adesso el tempo de deventar amighi de Geovà e batesarse.
1. (a) Che bele robe sucede quando se batesemo? (b) Cossa che ndaremo veder in questo stùdio?
GHETO belche pregà a Geovà par dirghe che te vol servirlo tuta la vita e te te ghè batesà? Se te ghè fato questo, Geovà el te ga perdonà dei to pecati e el ga acetà che te lo servissi coi so servi. (1 Pie. 3:21) Anca, te ghè dato un bel esémpio par quei che no i se ga gnancora batesà. Alora, te ghè fato una bela dessision. E se invesse no te te ghè gnancora batesà? L’è sicuro che ti te ami a Geovà e te vol far la so volontà. E anca te sè che par gaver el perdon dei pecati e deventar so amigo, te ghè de esser batesà. (Ati 2:38-40) Ma cossa pol giutarte se te sì drio tirarte indrio de batesarte? In questo stùdio, ndaremo veder (1) parché che arquanti i se tira indrio de batesarse, (2) parché che l’è importante ricordarse che el fin l’è darente e (3) parché che l’è importante far cambiamenti par batesarse prima che se pol.
PARCHÉ ARQUANTI I SE TIRA INDRIO DE BATESARSE?
2. Parché che arquanti i se tira indrio de batesarse?
2 Arquanti i se tira indrio de batesarse par paura. Par esémpio, anca se lori i vol servir a Geovà, i ga paura che mai i sarà boni de contentarlo del tuto. Se te te senti cossita, varda versìcoli dela Bìblia che i te giuta a veder che Geovà no’l speta che te sìpia perfeto e che lu el resta contento quando te fè el to meio. (Sal. 103:13, 14; Col. 3:23) E se te ghè paura che qualchedun el te vegna contra parché te ghè dessidio batesarte, domanda a Geovà che el te giute a pensar come el salmista, che el ga scrito: “Geovà l’è dela me banda, mi no gavarò paura. Cossa che el omo el pol farme?”. — Sal. 118:6.
3. Parché che arquanti i speta par batesarse? (Varda anca la stampa.)
3 Arquanti i speta batesarse parché i pensa che lori ancora no i cognosse che basta a Geovà e la Bìblia. Ma sarà che te ghè de cognosser tuta la Bìblia par batesarte? Nò. Varda un esémpio. Una note, Geovà el ga fato vegner un teremoto par liberar Paolo e Sila dela preson. Lori i ga bio la oportunità de insegnar la verità al comandante dela preson e la so fameia. Lori i ga capio che l’era stà un miràcolo de Dio, e in quela note i ga imparà tanto sora Geovà e Gesù. Par quela, cossa gali fato? Lori i ga dessidio batesarse suito. (Ati 16:25-33) Alora, se te cognossi a Geovà, te lo ami de tuto el cuor, te vol pròpio obedirlo, te cognossi i insegnamenti prinsipai dela Bìblia e te te ghè ciamà gramo dei to pecati, ti te sì pronto par el batésimo. — Mar. 12:30.
Paolo e Sila i parla dela verità al comandante dela preson e ala so fameia. Lori i desside batesarse suito. (Varda el paràgrafo 3.)
4. Sora cossa i pensa arquanti che no i se ga gnancora batesà? (Varda anca la stampa.)
4 Arquanti i ghe piaseria de far i cambiamenti che ghe vol par contentar a Dio e batesarse, ma i pensa che sarà massa fadiga farlo. (Luc. 14:27-30) L’è vera che vanti de far una dessision toca pensarghe sora ben, ma arquanti i se preocupa massa coi sacrifissi che i gavarà de far par servir a Dio. Varda el esémpio de Candace. Quando la era una toseta, la ga imparà un pochetin sora la Bìblia, ma sol dopo granda la ga scominsià a studiar la Bìblia. Ela la dise: “Mi savea quel che gavea de far par Geovà, ma me piasea la me vita nel mondo e savea che l’era difìcile cambiar.” Altri i pensa che no i sarà boni de far tuto polito come che Geovà el vol. Lori i ga paura de far un bruto sbàlio dopo del batésimo e esser cavadi via dela congregassion. Cossa che te pol far se gnancora no te te ghè batesà parché te pensi cossita?
Arquanti che i vol contentar a Dio i ze preocupadi coi sacrifissi che i ga de far par servirlo (Varda el paràgrafo 4.)
5. Se no te ghè gnancora pensà de batesarte, sora cossa che te ghè de pensar de pi? (Mateo 13:44-46)
5 Quando te vol comprar qualcossa, te vardi no sol quanto che costa, ma anca quanto importante questa roba la ze. Se una roba la ga tanto valor par ti, te la compri suito anca se la costa tanto. Dela stessa maniera, quando te sì drio dessider de batesarte, no stà pensar sol nele robe difìcile che te ghè de far. Pitosto, pensa de pi in come la to vita la sarà meio e nela forte amicìssia che te gavarè con Geovà. Par spiegarne meio, Gesù el ga fato due ilustrassion. (Ledi Mateo 13:44-46.a) In cada ilustrassion, un omo el ga vendesto de volentiera tuto quel che el gavea par comprar una roba pressiosa che lu el gavea catà. Anca ti te ghè catà una roba pressiosa, o sia, la verità. Alora, se ti te sì drio tirarte indrio de far cambiamenti par batesarte, pensa ben nele ilustrassion de Gesù. Proa domandarte: ‘Mi credo pròpio che le bone notìssie del Regno le ze pressiose? Mi ghe dao tanto valor ala amicìssia con Geovà, ala speransa de viver par sempre e ai fradei e le sorele che lu el me ga dato?’ Le to risposte le mostrarà se te ghè de dar de pi valor ala verità e le te giutarà a capir cossa che l’è drio intrigarte de batesarte.
6. Come che te pol gaver un cuor sinsiero e bon?
6 Nela ilustrassion del omo che semena, Gesù el ga dito che el nostro cuor el pol intrigarne de batesarse. Ma Gesù anca el ga mostrà che quei che i ga “un cuor sinsiero e bon” i ndaria meter in pràtica quel che i impara. (Luc. 8:5-15) Se te pensi che no te sarè bon de meter in pràtica quel che te impari, no stà mia desister. Geovà el pol giutarte a gaver la voia de obedirlo. Alora, domandaghe a Geovà par meso de una orassion che el te giute a amar quel che te sì drio imparar e a meterlo in pràtica nela to vita. — Eze. 18:31; 36:26.
7-8. Parché che arquanti gióveni i ghe mete tanto tempo par rivar al batésimo? (Varda anca la stampa.)
7 Arquanti gióveni i ama a Geovà, ma no i fà i cambiamenti par batesarse par causa de quel che altri i dise e i fà. Par esémpio, arquanti maestri i insegna ai so aluni che i ga de acetar la maniera de tute le persone viver, anca se le fà robe che Dio no ghe piase. Ma far cossita l’è un grando sbàlio e pol portarte a tanti problemi nela vita. (Sal. 1:1, 2; Pro. 7:1-5) Alora, cossa che te pol far? Fà compagno al salmista che el ga dito a Geovà: “Go de pi saver de che tuti i me maestri, parché ghe penso sora i to avisi.” — Sal. 119:99.
8 Arquanti genitori che i ze Testimònie de Geovà i ze drio intrigar i so fioi de batesarse. Pol esser che lori i se preocupa massa cola istrussion e col laoro che i so fioi i farà, o che lori no i insentiva i so fioi a far de pi par Geovà. Alora, se te pensi che i to genitori i podaria giutarte a batesarte, parla con lori sora questo. Sìpia sicuro che no importa quanti ani che te ghè, ti te pol deventar amigo de Geovà. — Pro. 20:11.
Parla coi to genitori sora el batésimo (Varda el paràgrafo 8.)
9. Parché che arquanti i ghe mete tempo par batesarse?
9 Arquanti che i ze pronti par el batésimo fursi i ze drio spetar parché i vol batesarse nel medèsimo giorno che un amigo o un parente. L’è vera che no l’è mia sbalià batesarse nel medèsimo giorno de una persona che te ami. Ma sarà che questo ga de intrigarte de farlo adesso? Ricòrdate che la dedicassion la ze una promessa che te fè ti con Geovà. Alora, no stà vardar quel che i altri i fà par dessider quando te ndarè batesarte. — Rom. 14:12.
RICÒRDATE CHE EL FIN L’È DARENTE
10. Parché che fursi arquanti i ghe mete par far cambiamenti par batesarse?
10 Arquanti fursi i ghe mete par far i cambiamenti par batesarse parché i pensa che ghe vol ancora tanto tempo par vegner el fin. Ma sarà che l’è giusto pensar cossita? Gesù el ga dito ai so dissìpoli: ‘Gavé de esser pronti parché el Fiol del omo el riva nte una ora che no speté.’ — Luc. 12:40.
11. De acordo con Salmo 119:60, quando imparemo de pi sora Geovà cossa se sentimo motivadi a far, e parché?
11 Noantri se dedichemo a Geovà e se batesemo parché lo amemo. E quanto de pi imparemo sora el nostro Dio, saremo pi motivadi a amarlo e a far suito tuto quel che lu el vol. (Ledi Salmo 119:60.b) El dissìpolo Tiago el ne ga dito che ghemo de obedir suito a quel che Geovà el vol, parché nissuni i sa quel che sucederà doman. Come no savemo quel che ndarà suceder, ghemo de sforsarse de far ancoi quel che Geovà el vol che femo. — Tia. 4:13-17.
12. Cossa che podemo imparar dela ilustrassion de Gesù sora el vignal?
12 Pensa nela ilustrassion de Gesù sora el vignal. Lu el ga spiegà che arquanti i ndaria laorar sol una ora e ancora cossita i ndaria ricever el medèsimo salàrio de quei che i gavea laorà tuto el giorno. Ma parché che quei che i ga laorà sol una ora no i ga scominsià vanti? Lori i ga dito che i gavaria laorà tuto el giorno se qualchedun li gavesse contratà. Pena che i ze stati contratadi, lori i ga scominsià a laorar. (Mat. 20:1-16) Ancoi, Gesù el ne dise de esser so dissìpoli e de predicar. Alora, ghemo de far suito quel che Gesù el ne dise.
13. Cossa che podemo imparar dela dona de Lò?
13 Arquanti fursi i se tira indrio de far cambiamenti adesso parché i pensa che i sarà boni de farli poco vanti de rivar el fin. Ma, quanto de pi te speti, pi difìcile sarà far questi cambiamenti par servir a Dio. Gesù el savea de questo e el ga dito ai so dissìpoli: ‘Ricordéve dela dona de Lò.’ (Luc. 17:31-35) La dona de Lò la savea che Geovà el ndaria finir fora ben presto con Sodoma e Gomora, ma ne par che ela no la era pronta par assar indrio le so robe. (Gén. 19:23-26) Questo che ga sucedesto con ela ne ricorda che Geovà el ga la ora giusta par finir fora con questo bruto mondo e, quando riva la ora, sarà massa tardi par far i cambiamenti. — Luc. 13:24, 25.
14. Cossa che le professie dela Bìblia sora el fin ga de motivarte a far?
14 Tuto quel che le professie dela Bìblia le disea l’è drio suceder ancoi. Fursi no te vedi tante de queste robe ndove te sì de star. Ancora cossita, saver che le ze drio suceder in altri posti ga de motivarte a far i cambiamenti par batesarte el pi presto che te pol. El apòstolo Piero el ga dito che i fradei i gavea de “esser sempre pronti”, parché ‘el fin de tute le robe l’era darente’. (1 Pie. 4:7) In questo versìcolo, par che “el fin” l’era el tempo che Gerusalen e el so témpio i saria finidi fora. Questi fradei i era de star distante de Gerusalen, alora no i saria là quando la cità la saria destruta. (1 Pie. 1:1) Ma, quando i vedesse che l’era drio suceder quel che la professia la gavea dito, lori i saria pi sicuri che Geovà el ndaria realisar anca le altre promesse. Dela medèsima maniera, l’è importante che te resti atento a come che le professie le ze drio realisarse. Veder che semo pròpio nel fin te motivarà a far i cambiamenti che ghe vol par batesarte.
15. Cossa ghemo de far par mostrar che semo pronti par el giorno de Geovà? (2 Piero 3:10-13)
15 Nela so seconda carta, Piero el ga spiegà come che podemo restar pronti par el giorno de Geovà, o sia, par el fin de questo bruto mondo. Nel tempo che Piero el ga scrito questo, ghe manchea ancora tanti ani par veder el giorno de Geovà. Ma Piero el ghe ga dito de ‘gaver ben in mente’ quel giorno, o sia, de spetarlo premosi. (Ledi 2 Piero 3:10-13.c) Come che podemo gaver ben in mente questo giorno? Ghemo de ricordarse sempre che el fin l’è darente e pareciarse par questo giorno. Anca ghemo de ‘comportarse de una maniera santa e far robe che dimostra che semo fedeli a Dio’. L’è sicuro che Geovà l’è contento de vederte far queste robe e el sarà ancora pi contento de veder che te dedichi a lu e te te batesi.
PARCHÉ BATESARSE ADESSO?
16. Quando che la ze la meio ora par far quel che ghe vol par batesarse? (2 Corinti 6:1, 2) (Varda anca la stampa.)
16 La meio ora par far quel che ghe vol par batesarse la ze adesso. (Ledi 2 Corinti 6:1, 2.d) Poco dopo che el eunuco etiope el ga scoltà le bone notìssie, lu el ga capio che el gavea de batesarse suito. Quando el ga visto un posto ndove el podea batesarse, lu no’l ga mia pensà: ‘Prima me piaseria imparar de pi sora le bone notìssie. Ghen sarà nantro posto che ghen’è àqua par batesarme.’ Invesse lu el ga domandà a Filipe: “Cossa che me intriga de esser batesà?”. (Ati 8:26, 27, 35-39) Che bel esémpio par noantri! Dopo che el eunuco el se ga batesà, el ga seità col so viaio pròpio contento.
Impara una lession pressiosa col eunuco etiope: la meio ora par far quel che ghe vol par batesarse la ze adesso (Varda el paràgrafo 16.)e
17. De cossa che podemo esser sicuri?
17 Se ti te sì drio tirarte indrio de batesarte, sìpia sicuro che Geovà el vol giutarte a deventar so amigo. (Rom. 2:4) Lu el pol giutarte se te ghè paura, se te pensi che l’è massa fadiga far cambiamenti, o se altre persone le ze drio intrigarte o no le ze drio insentivarte a batesarte. Dopo che te te batesi, te gavarè tanta alegria de contentar a Geovà e te vedarè che le robe che te ghè “assà indrio” no le ga pi valor par ti. (Fil. 3:8, 13) Te podarè veder le robe che le ze avanti, o sia, te podarè veder suceder quel che Dio el ga prometesto a quei che se dedica a lu e i se batesa. — Ati 3:19.
CÀNTICO 38 Geovà el te farà forte
a (Mateo 13:44-46) “El Regno del cielo l’è come un tesoro sconto nel campo che un omo lo ga catà e lo ga sconto nantra volta. L’è restà tanto contento che l’è ndato e el ga vendesto tute le robe che el gavea e el ga comprà quel campo. 45 “Anca, el Regno del cielo l’è come un omo che compra e vende che el ndea in serca de pèrole de bona qualità. 46 Quando el ga catà una pèrola de grando valor, l’è ndato e el ga vendesto suito tute le robe che el gavea, e la ga comprada.
b (Salmo 119:60) Mi vao suito e no vao meterghe par obedir i to comandamenti.
c (2 Piero 3:10-13) Ma el giorno de Geovà el rivarà come un ladron. In quel giorno, el cielo el sparirà con un grando scioco, ma i elementi i deventarà caldi e i se desfarà, e se podarà veder la tera e quel che se fà sora ela. 11 Tute queste robe le sarà disfate cossita. Alora, penséghe sora che tipo de persone valtri gavé de esser. Gavé de comportarve de una maniera santa e far robe che dimostre che sì fedeli a Dio, 12 intanto che valtri speté e gavé ben in mente la presensa del giorno de Geovà. In questo giorno, el cielo el sarà finio fora con fogo, e i elementi i deventarà tanto caldi che i sarà disfati. 13 Ma de acordo cola so promessa, noantri spetemo un novo cielo e una nova tera, e in questi ghen sarà la giustìssia.
d (2 Corinti 6:1, 2) Laoremo insieme con Dio, alora ve suplichemo: no sté acetar la granda bontà de Dio e dopo desmentegarve del so ogetivo. 2 Parché lu el ga dito: “Nte un tempo giusto mi te go scoltà, e nte un giorno de salvassion te go giutà.” Vardé, adesso l’è el tempo pròpio giusto. Eco, ancoi l’è el giorno de salvassion!
e STAMPA Prima pàgina: Paolo e Sila i parla dela verità al comandante dela preson e ala so fameia. Lori i desside batesarse suito. Pàgina 18: Compagno el eunuco etiope el ga parlà a Filipe che el volea batesarse, una studiante dela Bìblia la parla coi ansiani che la vol batesarse.