Come giutar quei dela nostra fameia che no i serve a Geovà?

1-2. Cossa che fursi ga sucedesto quando te ghè parlà sora Geovà ala to fameia?

GESÙ el ga dito a un omo che el volea esser so dissìpolo: “Torna ala to fameia e ala to casa. Contaghe tuto quel che Geovà el ga fato par ti.” (Mar. 5:19) Gesù el ga dito queste parole parché el savea che ghemo voia de contar ala nostra fameia le robe bone che imparemo.

² Ricòrdito la prima volta che te ghè scoltà le bone notìssie? Fursi te sì restà tanto contento che te ghè volesto contar sora quel che te ghè imparà a tuta la to fameia. Ma pol esser che lori no ghe ga piasesto o i se ga ofendesto par causa dela maniera che te ghè parlà. Se te ga sucedesto una roba cossita, cossa che te pol far par seitar leal a Geovà e ancora cossita catarse ben cola to fameia?

3. Cossa che vederemo in questo stùdio?

³ In questo stùdio, ndaremo veder: (1) che, se noantri se sforsemo de capir la situassion de quei dela nostra fameia che no i serve a Geovà,a saremo boni de mostrarghe amor e passiensa, anca se no i vol mia imparar sora lu, (2) quel che ghemo de far se qualchedun dela fameia ne disgusta o ne dise su, (3) come portar passiensa e no perder la speransa che un giorno lori i podarà adorar a Geovà e (4) come podemo mostrar che li amemo.

SFÒRSATE DE CAPIR QUEL CHE LORI I SENTE

4. Come che Gesù el ga tratà quei che no i volea scoltarlo?

⁴ Gesù no’l se ga fermà de proar giutar le persone che no le volea scoltarlo. Lu el ga dito che l’era come un colono che el fea de tuto par giutar una pianta a dar fruti. (Luc. 13:6-9) Quando Gesù el ga fato questa ilustrassion, fea de pi de tre ani che lu el proea giutar i giudei a gaver fede e a deventar dissìpoli. Gesù el ga proà giutar le persone e el portea passiensa con lore parché le amea.

5. Parché a Gesù ghe fea pecà le persone de quela època?

⁵ A Gesù ghe fea pecà le persone de quela època parché el savea che i lìderi religiosi no i fea gnente par giutarle a cognosser a Dio. Lu el vedea che lore le era come “piégore sensa pastor”. (Mar. 6:34) Prima dela so morte, Gesù el ga piandesto quando el ga pensà nele persone de Gerusalen. Lu el savea che quasi tute le ndaria morir parché no le gavea fede in Dio. (Luc. 19:41-44) Quando femo compagno a Gesù e proemo pensar parché quei dela nostra fameia ghe ocore tanto cognosser a Geovà, gavaremo voia de giutarli.

6. Parché che ghemo de portar passiensa con quei dela nostra fameia che no i serve a Geovà? (Gàlati 6:9)

⁶ Ledi Gàlati 6:9.b Anca se quei dela nostra fameia ancora no i vol imparar sora Geovà, ghemo de portar passiensa e seitar a mostrarghe bontà. Noantri savemo che ghe vol tempo fin che una persona la càmbie la so maniera de pensar e la gàpia fede in Geovà. Pol esser che, nel passà, gnanca ti no te cognossei a Geovà. (Efe. 2:12) Ma qualchedun el ga mostrà passiensa e el ga proà giutarte a imparar sora lu. Par quela, se te mostri passiensa a quei dela to fameia, pol esser che lori i volarà imparar de pi sora Geovà.

PROA CAPIR QUEI DELA TO FAMEIA

7. Parché che fursi i fradei de Gesù no i ga suito credesto che lu l’era el Messia?

⁷ Pol esser che i fradei de Gesù i gavea savesto del miràcolo che lu el gavea fato nela Galilea. (Luc. 4:14, 22-24) Ancora cossita, lori no i ga suito credesto che lu l’era el Messia. (Gio. 7:5) Parché nò? La Bìblia no la dise parché, ma la spiega parché arquanti giudei no i ze ndati drio a Gesù. Arquanti de lori i gavea paura de infrontar perseghission. (Gio. 9:18-22) Altri no i ze ndati drio a quel che Gesù el parlea parché i lo cognossea ancora da picinin. (Mar. 6:1-4) Pol esser che anca i fradei de Gesù i pensea cossita. La medèsima roba pol suceder con quei dela to fameia. Fursi lori i ga paura dei altri o no i dà tanto valor a quel che te parli parché i te cognosse ancora da picinin.

8. Parché che fursi quei dela nostra fameia no i ne trata con bontà?

⁸ Proa pensar parché quei dela to fameia no i te trata con bontà. Fursi anca i fradei de Gesù i era intrà quele persone che le ga dito che ‘lu l’era deventà mato’. (Mar. 3:21) Parché che i ga pensà cossita? I versìcoli prima i mostra che Gesù l’era drio doperar tanto del so tempo par predicar e curar le persone e che lu no l’era gnanca bon de fermarse par magnar. (Mar. 3:20) Alora, pol esser che i so fradei i ga pensà che Gesù no’l fea pi gnente se no fusse quel. Fursi anca quei dela nostra fameia i pensa che doperemo massa del nostro tempo sol drio la nostra religion. Se lori i pensa cossita, ghemo de mostrar che se sforsemo de doperar ben el nostro tempo par servir a Geovà, ma anca par far altre robe.

9. Cossa che pol giutar quei dela nostra fameia a cambiar quel che i pensa sora i servi de Geovà? (1 Piero 3:1, 2) (Varda anca la stampa.)

⁹ Móstraghe sempre bontà. Se noantri se sforsemo de parlar con bontà con quei dela nostra fameia, pol esser che i càmbie quel che i pensa sora i servi de Geovà. (Ledi 1 Piero 3:1, 2.c) Varda come che una sorela la pol mostrar bontà al so omo che no’l serve a Geovà. Pol esser che lu el reste disgustà quando ela la va ale riunion e ala predicassion. Sicuro che ela no la vol che lu el se sinta cossita. Par quela, ela la fà un per de cambiamenti par star de pi tempo insieme de lu. Par esémpio, ela la va ala predicassion quando so omo l’è drio i so mestieri o no l’è casa. Se ela la fà cossita, lu el restarà contento e pol esser che el càmbie quel che el pensa sora le Testimònie de Geovà.

10. Come che podemo far compagno a Gesù quando le persone le parla robe contra noantri?

¹⁰ Se quei dela to fameia i dise qualcossa bruta contra ti, dele volte l’è meio no dir gnente. Quando le persone le ga dito che Gesù l’era un sgordo e un ciucheton, lu no l’è restà cativo, gnanca el ga proà mostrar che quel che le gavea dito l’era sbalià. Invesse, lu el ga assà star parché el volea che le persone lo vardesse e col tempo le dessidesse se l’era vero o nò. (Mat. 11:19) Lu anca el ga mostrà che l’era una persona compagna ai altri e che el volea goder la vita. (Varda anca Gioani 2:2, 6-10.) Cossita come Gesù, no stà pensar che te toca sempre provar che quel che le persone le dise sora ti no l’è vero. Invesse, assa che le veda che te sì una persona compagna ai altri e che te piase goder la vita. Cossita, lore le ndarà capir che le robe brute che le scolta contra ti no le ze vere.

SEITA PORTAR PASSIENSA E NO STÀ PERDER LA SPERANSA

11. Come che Gesù el ga tratà i so fradei?

¹¹ La Bìblia la mostra che Gesù sempre el ga portà passiensa coi so fradei. Par esémpio, fursi anca lori i era in Canà quando Gesù el ga fato el so primo miràcolo. (Gio. 2:11, 12) Ma come ghemo visto prima, lori no i ga suito credesto che lu l’era el Messia. Ancora cossita, Gesù no’l se ga fermà de parlar coi so fradei. La Bìblia la mostra che, intorno de tre ani dopo de questo miràcolo, Gesù el ga parlà con tanta bontà con lori. — Gio. 7:5-8.

12. Cossa che ndarà giutarne a no perder la speransa?

¹² Studiar sora la misericòrdia de Geovà ndarà giutarne a no perder la speransa che quei dela nostra fameia i podarà dessider servir a Geovà. Quando le religion false le sarà finide fora, fursi quei dela nostra fameia i ndarà ricordarse che gaveino dito che questo sucederia.d (Apo. 17:16) Lori i podarà vegner a servir a Geovà insieme de noantri anca dopo che scomìnsia la granda tribolassion! E adesso, quando lori i ze drio infrontar dificoltà, volemo far el nostro meio par giutarli. Fursi i volarà imparar sora la Bìblia dopo che i vede che ghe mostremo sempre bontà e che ghe volemo ben.

MOSTRA CHE TE LI AMI

13. Cossa che no volemo che le persone dela nostra fameia le pense?

¹³ Anca se ghemo tanto de far nel laoro a Geovà, no volemo mai che quei dela nostra fameia i pense che no ghemo tempo par lori o che no li amemo pi. (Mat. 7:12) Adesso, ndemo veder un per de robe che podemo far par mostrar che ghe volemo ben.

14-15. Come che podemo mostrar che amemo quei dela nostra fameia? Parla de un esémpio.

¹⁴ Parla sempre con quei dela to fameia e mostra che te li ami. Podemo far arquante robe par mostrar a quei dela nostra fameia che noantri li amemo. Par esémpio, podemo scriverghe un messàgio, mandarghe ritrati de un viaio che semo drio far o de qualcossa bela che ghemo fato. Podemo anca darghe un pìcolo presente o scriverghe un carton. Quando se sforsemo par mostrarghe bontà, lori i restarà contenti e i vederà che ghe volemo ben.

¹⁵ Varda el esémpio de Ana, una sorela dela Arménia. La so fameia sempre la se catea, ancora de pi nei feriadi e quando qualchedun el fea i ani. Quando Ana la ga dessidio servir a Geovà, la so fameia la ga pensà che ela la se fermaria de star insieme con lori. Anca i ga pensà che la ndaria tribolar dopo che la deventesse una Testimònia de Geovà. Cossa che Ana la ga fato? Ela la ga dito: “Quando vao visitarli, mi sempre ghe conto qualcossa che me ga sucedesto o cossa che son drio far. Anca me piase convidarli par vegner casa mia e par cognosser i me amighi. Cossita, tanti dela me fameia i resta contenti de discorer coi me amighi e i ga visto che mi son felice e che no ocore preocuparse con mi.”

16. Come che Gesù el ga mostrà che Tiago l’era importante par lu? (Varda anca la nota.)

¹⁶ Mostra che lori i ze importanti par ti. Dopo che Gesù l’è stà ressussità, el ga capità a Tiago e el ga parlà con lu. (1 Cor. 15:7) Proa pensar come che Tiago el se ga sentio de veder che Gesù no’l gavea desistio de lu. Pol esser che el ga scominsià a creder che Gesù l’era el Messia quando lo ga visto. E dopo, fursi el ga scominsià anca a giutar quei dela so fameia a capir che Gesù l’era el Fiol de Dio.e — Ati 1:14.

17. Come che podemo meter in pràtica quel che dise in Romani 12:15? (Varda anca la stampa.)

¹⁷ Ledi Romani 12:15.f Quando mostremo a quei dela nostra fameia che lori i ze importanti e li giutemo quando i ze drio infrontar dificoltà, pol esser che i càmbie quel che i pensa sora noantri.g Par esémpio, se qualchedun dela nostra fameia ga bio un fiol, podemo darghe un presente e mostrar che semo contenti. O quando un dela nostra fameia perde qualchedun nela morte, podemo darghe consolo, scriverghe un carton o giutarlo in quel che ghe ocore. E podemo anca ciamarli par telèfono, mandarghe messagi e visitarli, ancora de pi se i ze drio infrontar qualche dificoltà.

18. Come che podemo far compagno al dissìpolo Andrè?

¹⁸ Faghe cognosser ai fradei. Quando el dissìpolo Andrè el ga savesto che Gesù l’era el Messia, lu el ga suito contà al so fradel Piero e lo ga convidà par ndar catar Gesù. (Gio. 1:40-42) Noantri podemo far compagno a Andrè. Par esémpio, podemo convidar una persona dela nostra fameia par ndar ala riunion o par magnar insieme dei nostri amighi dela congregassion. Cossita, lori i vederà che le Testimònie de Geovà le ze persone come tute le altre e che le ze bona gente.

19. De acordo con 1 Piero 3:15, come che ghemo de tratar quei dela nostra fameia?

¹⁹ Ledi 1 Piero 3:15.h Pol esser che quei dela nostra fameia no i ndarà mai capir parché che no femo un per de robe, ma i ndarà ricordarse che li ghemo tratà sempre con bontà e rispeto. Anca se no selebremo pi arquanti feriadi o no ndemo drio a arquanti costumi de lori, i restarà contenti se se sforsemo de passar tempo insieme. Par esémpio, podemo visitarli, magnar insieme e darghe presenti in altri giorni del ano.

NO STÀ MAI PERDER LA SPERANSA

20. Parché che el esémpio de Tiago ne incoraia?

²⁰ L’è vera che Tiago l’è deventà un dissìpolo sol dopo che Gesù l’è morto. (Gàl. 1:18, 19; 2:9) Ma quando el ga scominsià a ndar drio a Gesù, l’è stà bravo meter in pràtica tuto quel che el gavea imparà. Par esémpio, lu el ga scrito una carta ai fradei de quel tempo che ga parlà de arquante bele robe che Gesù el gavea insegnà.i

21. Parché che no ghemo de desister de giutar quei dela nostra fameia?

²¹ Anca se se sforsemo tanto par mostrar amor e bontà a quei dela nostra fameia, pol esser che i seitarà a tratarne mal e no i volerà imparar sora Geovà. Ancora cossita, no ghemo mai de desister de giutarli. Parché? Parché saremo drio far compagno a Geovà e Gesù. (Luc. 6:33, 36) Pol esser che, col tempo, lori i càmbie quel che i pensa sora noantri e i se ricorde de quel che ghe ghemo dito sora Geovà e sora la nostra speransa. Se proemo seitar a giutarli e tratarli con bontà, fursi gavaremo la alegria de vederli servir a Geovà insieme con noantri!