13-19 DE APRIL DE 2026
CÀNTICO 52 La nostra dedicassion a Geovà
Cossa che l’è el batésimo e parché l’è importante?
‘Gavé de far dissìpoli e batesarli.’ — MAT. 28:19.
COSSA CHE NDAREMO IMPARAR?
Ndaremo imparar parché che ne ocore batesarse, cossa che mostremo quando se batesemo e come che l’è fato el batésimo.
1. Come che savemo che el batésimo l’è un dei insegnamenti pi importanti dela Bìblia?
NOANTRI restemo tanto contenti quando ghen’è qualchedun che se batesa! Anca i primi dissìpoli de Gesù i era tanto contenti quando i ga visto tante persone che se batesea nel Pentecoste del ano 33. In quel tempo, el apòstolo Piero el ga fato un discorso che el ga spiegà che l’era tanto importante batesarse. (Ati 2:38, 40, 41) El apòstolo Paolo el ga scrito che intrà “i primi insegnamenti sora el Cristo” ghen’è el ‘insegnamento sora i batésimi’. (Ebr. 6:1, 2) El batésimo l’è un dei primi insegnamenti che ghemo imparà, e l’è tanto importante capirlo ben. Parché?
2. Parché che ghemo de capir ben el insegnamento del batésimo?
2 Se ti te vol una casa firme, che no la va do quando vien una tempesta forte, te ghè de farla su con una bona fondassion. Dela stessa maniera, se ti te vol gaver una forte fede, te ghè de capir ben cossa vol dir el batésimo. Alora, no importa se te sì drio studiar fà poco tempo o se te sì batesà fà tanti ani, te ghè de capir ben el insegnamento importante del batésimo. In questo stùdio, ndaremo risponder a queste domande: Cossa che vol dir el batésimo? Come che el batésimo el ga de esser fato? E parché che semo batesadi nel nome del Pare, del Fiol e del spìrito santo?
COSSA CHE VOL DIR EL BATÉSIMO?
3. Cossa che te mostri quando te te batesi?
3 Cossa che te mostri quando te te batesi? Ti te mostri che te credi in tuto quel che te ghè imparà dela Bìblia sora Geovà e Gesù, che te te ghè ciamà gramo dei to pecati e che te ghè fato cambiamenti nela to vita par servir a Geovà. Anca te mostri che te capissi che Dio el dopera Gesù par salvarte del pecato e dela morte. El batésimo anca el mostra che te ghè fato una orassion a Dio par prometerghe che te ndarè far la so volontà insieme ala so organisassion. Dopo de far questa promessa e de batesarte, ti te scominsi a viver par Geovà e te podarè viver par sempre.
4. Cossa che vol dir ndar rento dela àqua e dopo vegner fora? (Varda anca la stampa.)
4 Nel batésimo, ti te vè rento dela àqua del tuto e dopo te vien fora. L’è come se una persona la morisse e dopo la fusse ressussitada.a (Varda anca Colossensi 2:12.) Come cossita? Quando te vè rento la àqua, ti te mostri che no te viverè pi come te vivei prima, e quando te vien fora dela àqua, ti te scominsi una nova vita. Far la volontà de Dio deventa la roba pi importante dela to vita.
Quando te te batesi, te mostri che no te vivi pi come vanti de cognosser a Geovà, e te scominsi a viver par contentarlo (Varda el paràgrafo 4.)
5. Podemo dir che pareciarse par el batésimo l’è compagno a cossa? (1 Piero 3:18-21)
5 Ledi 1 Piero 3:18-21.b Podemo dir che quel che te fè par pareciarte par el batésimo l’è compagno al laoro che Noè el ga fato par far su la arca. Se te ghè pena scominsià a imparar sora Geovà, fursi te par che ghen’è massa robe de far par batesarse. Fin te pol pensar che l’è massa fadiga, come far su una arca. Ma sarà che te ghè pròpio de far tute queste robe? Si. Pensa nel esémpio de Noè. Dio el ghe ga dito come costruir la arca, e Noè el ga bio de ndar drio ale istrussion par salvarse nel Dilùvio. Lu l’è stà bon de far su la arca parché el gavea fede in Geovà, el ghe ga obedio e Geovà lo ga giutà. Alora, cossita come Noè ‘el ga fato tuto quel che Geovà ghe gavea dito’, anca ti te pol far compagno. — Gén. 6:22.
6. De che maniera el batésimo el pol salvarne?
6 Nel versìcolo 21, el apòstolo Piero el ga scrito che “el batésimo el ve salva”. Questo no vol dir che ndar rento la àqua fà che i to pecati i sìpia perdonadi e te gàpie la salvassion, parché questo sucede sol par meso del sacrifìssio de Gesù. (1 Gio. 1:7) Ancora cossita, el batésimo l’è tanto importante parché Geovà el ga mandà che fussino batesadi. E quando se batesemo, semo drio domandar a Geovà che lu el ne dae “una bona cossiensa”. Lu el gavarà tanto caro de perdonar i nostri pecati de acordo col sacrifìssio de Gesù. Alora, el batésimo el ne salva parché ne ocore esser batesadi par gaver la vita eterna.
COME CHE EL BATÉSIMO EL GA DE ESSER FATO?
7. Come che el batésimo el ga de esser fato?
7 La Bìblia la dise che una persona che la se batesa la ga de ndar rento dela àqua del tuto. Ma no la dise tante robe sora come el batésimo el ga de esser fato. Ancora cossita, ghen’è prinsipi dela Bìblia che i giuta quei che i ndarà batesarse a saver come vestirse e anca giuta quei che li varda a saver come comportarse. (1 Cor. 14:40; 1 Tim. 2:9) Batesar qualquedun l’è un grando privilègio e quasi sempre l’è un ansiano che lo fà. Ma questo no vol dir che lu l’è pi importante dele altre persone. (1 Cor. 1:14, 15) E el batésimo el ga valor no importa se ghen’è tante o poche persone che lo vede. — Ati 8:36.
8. Che domande quei che i ndarà batesarse i ga de risponder, e parché? (Ati 2:38-42) (Varda anca la stampa.)
8 La Bìblia la dise che ghemo de far “declarassion pùblica par la salvassion”, o sia, ghemo de dir che ghemo fede. (Rom. 10:9, 10; varda la nota “declarar publicamente” nela Bìblia de Stùdio in portoghese.) Femo questa declarassion no sol quando predichemo ai altri, ma anca nel giorno che semo batesadi. Par quela, quei che i ndarà batesarse i ga de risponder a queste due domande. La prima la ze: “Te sì ciamà gramo dei to pecati, te sì dedicà a Geovà, e te ghè acetà che la maniera de Geovà salvar l’è par meso de Gesù Cristo?” Questa domanda la mostra quel che la persona la ga belche fato par poder batesarse. El apòstolo Piero el ga dito una roba cossita nel Pentecoste quando el ga dito ale persone de ciamarse grame e esser batesade. La seconda domanda la ze: “Te capissi che quando te sì batesà, te deventi una Testimònia de Geovà e te scominsi a far parte dela organisassion de Geovà?” Questa domanda la ne ricorda che la persona la promete ndarghe drio ale orientassion dela organisassion e de servir a Geovà coi fradei e sorele, come i ga fato i dissìpoli del primo sècolo dopo de batesarse. (Ledi Ati 2:38-42.c) Quei che de volentiera i risponde “si” a tute le due domande i pol esser batesadi.
Nel to batésimo, te fè una “declarassion pùblica par la salvassion” (Varda el paràgrafo 8.)h
9. Cossa che tute le persone le ga de far par deventar amighe de Dio?
9 E se te si stà sempre una bona persona e no te ghè mai fato bruti pecati, o quando te sì nassesto i to genitori i era belche Testimònie de Geovà e i te ga giutà a imparar la verità, sarà che ancora cossita te ghè de ciamarte gramo e esser batesà par esser amigo de Geovà? Si. Parché? Parché tuti noantri femo pecati e par quela no podarìssino esser amighi de Geovà. (Sal. 51:5) Ma quando imparemo cada volta de pi sora Geovà, dessidimo far quel che lu el vol e nò quel che noantri volemo. Dopo de far quel lì, se ciamemo grami de come che viveino vanti e se fermemo de far robe che no ghe piase a Dio, e scominsiemo a viver come ghe piase a lu. Cossita, podemo esser batesadi. — Ati 3:19.
10. Cossa che te ghè de far anca se te sì stà batesà nte nantra religion?
10 Quando el apòstolo Paolo el se ga catà con òmini de Èfeso che i era stati batesadi ma che no i capia ben la verità sora Gesù, lori i se ga nicorto che i gavea de esser batesadi nantra volta.d (Ati 19:1-5) Anca ancoi sucede cossita. Se te te ghè batesà in nantra religion, sarà che te ocore batesarte come Testimònia de Geovà? Si. Parché? Parché quando te te ghè batesà, no te capii tanto ben la verità sora Geovà e sora Gesù. E anca, se te ghè fato una orassion a Dio, la to promessa no la era de acordo cola cognossensa dela so volontà. Alora, ancoi Geovà el aprova el batésimo de una persona sol quando la capisse ben la so volontà.
“NEL NOME DEL PARE, DEL FIOL E DEL SPÌRITO SANTO”
11. Cossa che vol dir esser batesadi “nel nome del Pare, del Fiol, e del spìrito santo”? (Mateo 28:18-20)
11 Gesù el ga ordinà che i novi dissìpoli i fusse batesadi “nel nome del Pare, del Fiol, e del spìrito santo”. (Ledi Mateo 28:18-20.e) Ma cossa che vol dir? Nela Bìblia, la parola “nome” tante volte la vol dir la reputassion de qualchedun, anca la rapresenta la posission o el poder che una persona la ga. Alora, quando noantri femo qualcossa “nel nome de” qualchedun o de qualcossa, semo drio ricognosser la autorità de quel che el ga questo nome. (Varda Mateo 10:41; varda la nota “porque ele é profeta” nela Bìblia de Stùdio in portoghese.) Alora, quando se batesemo nel nome de Geovà e de Gesù, questo vol dir che savemo che lori i ga el dirito e el poder de dirne quel che ghemo de far. E quando se batesemo nel nome del spìrito santo vol dir che ndemo drio ala so orientassion. Adesso ndemo veder come che podemo farlo.
12. Come che se batesemo nel nome del Pare? (Apocalisse 4:11) (Varda anca la stampa.)
12 Batesadi nel nome del Pare. Questo vol dir che savemo che Geovà l’è el nostro Pare, che l’è stà lu darne la vita, che lu l’è Tuto Poderoso e el Creador. (Ledi Apocalisse 4:11.f) Ricognossemo che l’è lu che scolta le orassion e doperemo el so nome quando preghemo e parlemo de lu ai altri. (Sal. 65:2) Ma ghen’è altre robe che ghemo de saver quando se batesemo nel nome del Pare. Nel Pentecoste, el apòstolo Piero el ga parlà a persone che belche le cognossea a Geovà, ma che le gavea de capir che lu el dà la vita eterna sol par meso de Gesù Cristo. — Rom. 5:8.
Dopo del to batésimo, seita a obedir al Pare (Varda el paràgrafo 12.)
13. Come che se batesemo nel nome del Fiol? (Varda anca la stampa.)
13 Batesadi nel nome del Fiol. Noantri ricognossemo Gesù come el ùnico Fiol de Dio. Gesù l’è “la strada”, o sia, l’è sol par meso de lu che podemo gaver una amicìssia con Geovà. (Gio. 14:6) Gesù anca el ne libera del pecato e dela morte, parché lu l’è morto par noantri, e cossita podemo gaver la vita eterna. Saver de questo ne motiva a ndar drio al so esémpio tuti i giorni dela nostra vita e no sol nel giorno del nostro batésimo. (1 Gio. 2:6) Cossita come Gesù, noantri no assemo che gnente ne intrighe de predicar. (Luc. 4:43) E se semo perseghidi, seitemo servir a Dio con lealtà. (2 Tim. 3:12) Rispetemo ‘la autorità del Cristo sora la congregassion’, quando obedimo de volentiera a quei che lu el ghe ga dato autorità par tender dei so dissìpoli. — Efe. 4:8, 11, 12; 5:23.
Dopo del to batésimo, seita a obedir al Fiol (Varda el paràgrafo 13.)
14. (a) Come che se batesemo nel nome del spìrito santo? (Varda anca la stampa.) (b) Che altri batésimi ghen’è par i untadi? (Varda el quadro “Altri batésimi par i untadi”.)
14 Batesadi nel nome del spìrito santo. Noantri acetemo la verità sora el spìrito santo. Savemo che el spìrito santo no l’è una persona o parte de una Trinità, ma l’è la forsa ativa de Dio. Savemo che Geovà el ga doperà el so spìrito par giutar i profeti a saver cossa ndaria suceder e par dir cossa che i scritori dela Bìblia i gavaria de scriver. Par quela, sempre la ledemo e femo quel che la dise. (2 Pie. 1:20, 21) Anca se sforsemo tanto par no far bruti pecati parché questo podaria intrigar che noantri o fin la congregassion riceva spìrito santo de Dio. — Efe. 4:30.
Dopo del to batésimo, seita a ndarghe drio ale orientassion del spìrito santo (Varda el paràgrafo 14.)
15. Cossa che ghemo de sforsarse de far?
15 Se te sì belche batesà, sfòrsate par capir tuto quel che ghe vol sora el batésimog, e a viver de acordo cola promessa che te ghè fato a Geovà quando te te ghè dedicà e batesà. Ma e se no te sì gnancora batesà? Sarà che ghen’è qualcossa che l’è drio intrigarte? Nel pròssimo stùdio, ndaremo veder come che te pol seitar a sforsarte par esser batesà.
CÀNTICO 161 Son qua par far to volontà
a La parola greca tradusida par “batésimo” la vol dir “ndar rento dela àqua”. Alora, questo vol dir che quando la persona la se batesa la ga de ndar rento dela àqua con tuto el corpo e nò sol meter un per de gosse nela testa, come arquante religion le insegna.
b (1 Piero 3:18-21) Infati, Cristo l’è morto una volta par sempre, una persona giusta par i ingiusti, par finir fora coi pecati e par menarve a Dio. Lu l’è morto nela carne, ma el ga ricevesto la vita nel spìrito. 19 E cossita lu l’è ndà a proclamar el messàgio de giudìssio ai spìriti in preson, 20 che i ze stati desobedienti quando Dio el spetea con passiensa nei giorni de Noè, intanto che lu el fea su la arca, e poche persone, o sia, oto persone, le ze state salve passando par la àqua. 21 Questo el rapresenta el batésimo, che el salva anca a valtri adesso par meso dela ressuression de Gesù Cristo. El batésimo el ve salva, nò parché el tira via la sporchìssia del corpo, ma parché domandé una bona cossiensa a Dio.
c (Ati 2:38-42) Piero ga dito a lori: “Gavé de ciamarse grami, e tuti valtri gavé de esser batesadi in nome de Gesù Cristo, par gaver el perdon dei vostri pecati. Alora, ndaré ricever el spìrito santo come presente. 39 Parché Dio el ga prometesto dar spìrito santo a tuti valtri, ai vostri fioi e a tuti quei che i ze distanti. Geovà, el nostro Dio, el fà questa promessa a tuti quei che lu el scòlie.” 40 Piero el ghe dea un testimònio completo e el ghe spieghea tante robe. Lu el disea: “Gavé de salvarve de queste persone rugne.” 41 Cossita, quei che i ga acetà de volentiera in quel che Piero el ghe ga dito i ze stati batesadi. In quel giorno, intorno de 3.000 persone le ze deventade dissìpoli. 42 Lori i ga seità a imparar de quel che i apòstoli i insegnea, a magnar, a star insieme e a pregar.
d Quei òmini in Èfeso i gavea fato el ‘batésimo de Gioani’. (Ati 19:3) Gioani, el Batesador, el ga dito ai giudei de ciamarse grami dei so pecati contra la Lege de Moisè. E Gioani el ga batesà quei che i se gavea ciamadi grami. (Mar. 1:4, 5) Ma, dopo che no ocorea pi obedir la Lege de Moisè, Geovà no’l ga pi acetà el batésimo de Gioani. De lì avanti, Dio el aprova “un sol batésimo” che el dà la salvassion. — Efe. 4:5.
e (Mateo 28:18-20) Gesù l’è rivà darente de lori e el ghe ga dito: “Dio el me ga dato autorità sora tute le robe nel cielo e nela tera. 19 Alora, gavé de ndar e far dissìpoli intrà le persone de tute le nassion, e batesarle nel nome del Pare, del Fiol, e del spìrito santo. 20 Gavé de insegnarghe a obedir tuto quel che mi ve go ordinà. E podé esser sicuri che sarò insieme con valtri tuti i giorni, fin che se finisse questo sistema de cose.”
f (Apocalisse 4:11) “Geovà, nostro Dio, ti te mèriti ricever la glòria, el onor e el poder, parché te ghè creà tute le cose, e par la to volontà le ze vegneste a esister e le ze state creade.”
g Varda el artìcolo “Cossa che l’è el batésimo?” nela session “Domande che la Bìblia la risponde” nel jw.org e nel JW Library®.
h STAMPA: Nte una assemblea, quei che i va batesarse i ze in pié e i fà una declarassion pùblica dela so fede.