Cossa che podemo far par insegnar meio?

1. Cossa che ghemo de imparar a far, e parché? (2 Timòteo 4:2) (Varda anca la stampa.)

GESÙ el ga dito a quei che i ndea drio a lu: ‘Gavé de far dissìpoli e insegnarghe a obedir tuto quel che mi ve go ordinà.’ (Mat. 28:19, 20) Alora, Gesù el ga mandà tuti i cristiani insegnar ai altri. L’è vera che Geovà el giuta a rivarse darente de lu quei che i vol cognosserlo, e i àngeli i ne giuta a catarli. (Ati 13:48; Gio. 6:44; Apo. 14:6) Ancora cossita, ghemo de far la nostra parte. Par esémpio, varda quel che i apòstoli Paolo e Barnabè i ga fato. La Bìblia la mostra che, quando lori i ga predicà nte una sinagoga in Icónio, ‘i ga parlà de una maniera che ghe ga piasesto ale persone, e tanti giudei e grechi i ze deventadi cristiani’. (Ati 14:1) Sicuro che Paolo e Barnabè i gavea imparà come insegnar ben. (Ledi 2 Timòteo 4:2.a) Anca ancoi tuti i cristiani i ga de imparar a far cossita.

2. Parché arquanti i cata che no i ze mia boni de insegnar ben ai altri?

² Arquanti i pensa che no i ze mia boni de insegnar polito parché i ga poco stùdio o i cata che no i sa spiegar ben. Anca arquante persone del passà le pensea cossita. (Éso. 4:10; Ger. 1:6) Altri fursi i cata che no i sarà boni de insegnar parché no i ga gnanca un stùdio dela Bìblia, gnanca tante bele speriense come i altri i ga nela predicassion. Savemo che no i ze mia tuti che i volarà scoltar le bone notìssie. Ma anca se le persone le scolta, l’è Geovà e i àngeli che i ne giuta a catarle. Ancora cossita, volemo predicar le bone notìssie dela meio maniera che podemo. In questo stùdio, ndemo veder tre maniere che podemo insegnar meio ale persone nela predicassion.

MOSTRA INTERESSE NELE PERSONE

3. Parché che le persone ghe piasea de scoltar Gesù?

³ La Bìblia la dise che Gesù ‘el savea ben come che le persone le era’. (Gio. 2:25) Questo vol dir che lu el savea come che le persone le pensea e parché che le pensea cossita. Gesù el capia pròpio quel che lore ghe ocorea. I lìderi religiosi le fea sofrir, parché i volea che le fusse drio ale so règole. Ma Gesù el vedea che le persone le gavea bisogno de imparar sora Geovà e de esser consolade. (Mat. 9:36; 23:4) Alora, el ghe ga insegnà robe che le podaria giutarle.

4. Come che podemo mostrar interesse nele persone? (Varda anca la stampa.)

⁴ Podemo mostrar interesse nele persone quando proemo capir le so preocupassion. Tute lore le ze drio sofrir de una maniera o nantra par causa dele brute robe del mondo de Sàtana. Se noantri se ricordemo de queste robe, gavaremo de pi voia de giutarle. Par esémpio, podemo domandarse: ‘Ghen’è qualche notìssia che la ze drio preocupar le persone ndove son de star? Sarà che quei che i ga fioi i ze preocupadi che pol suceder qualcossa bruta con lori nela scola? Ndove mi son de star, elo fadiga catar laoro?’ Proa imaginar come che ze la vita par queste persone che le ga de infrontar questi ‘tempi difìcili de soportar’ sensa gaver la speransa che la Bìblia la dà. — 2 Tim. 3:1; Isa. 65:13, 14.

5. Parché che podemo dir che Gesù l’era difarente dei farisei? (Mateo 11:28-30)

⁵ Intanto che i farisei i tratea mal le persone e i ghe fea de poco, Gesù el mostrea interesse e el tratea ben quei che i lo scoltea. (Mat. 23:13; Gio. 7:49) Gesù sempre el tratea le persone con bontà e rispeto. Lu l’era “manso e ùmile de cuor”, e questo lo ga giutà a esser un bravo maestro. (Ledi Mateo 11:28-30.b) Anca noantri volemo tratar le persone a chi predichemo con bontà e rispeto.

6. Come podemo mostrar bontà e rispeto a quei che no i vol mia scoltar?

⁶ Arquanti no i vol mia scoltarne e altri fin i vien cativi quando parlemo con lori. Alora, cossa ghemo de far? Gesù el ga dito che no ghemo de tratar mal queste persone. Invesse, ghemo de ‘far el ben a quei che i ne òdia’, ‘benedir quei che i ne dise su’ e fin ‘pregar par quei che i ne trata mal’. (Luc. 6:27, 28) L’è vera che ghen’è de quei che i ze contra la nostra predicassion. Ma ghen’è altri che no i vol scoltarne parché fursi i ze drio infrontar una dificoltà nela fameia o i ze preocupadi par causa de altri problemi. Pol esser che semo rivadi nte una ora rugna par la persona. Alora, sarà pi fàcile noantri mostrarghe bontà a quei che i ne trata mal se se ricordemo de queste robe. Par quela, l’è sempre bon far de acordo con quel che dise Colossensi 4:6: “Le vostre parole le ga de esser sempre bele, come che consade con sal. Cossita valtri ndaré saver come risponder a cada persona.” Se proemo capir le persone, ghe mostremo interesse e se se ricordemo che anca lore le infronta dificoltà, proaremo insegnarghe una roba che la pol giutarle. Far cossita ne giutarà a esser bravi maestri.

FIDATE NELA PAROLA DE DIO

7. Come che Gesù el ga mostrà che el se fidea nela Parola de Dio par insegnar? (Gioani 7:14-16)

⁷ Nel tempo de Gesù, i studiosi dela lege i insegnea de acordo con quel che altri lìderi religiosi i disea. Ma Gesù el insegnea de acordo cola Parola de Dio. El insegnea le persone de una maniera sémplisse, fàcile de capir e de ricordarse. La Bìblia la dise che lore le restea ‘maraveiade cola so maniera de insegnar, parché lu el ghe insegnea come una persona che la ga autorità, e nò come i studiosi dela Lege’. (Mar. 1:22; varda la nota “não como os escribas” nela Bìblia de Stùdio in portoghese.) Gesù l’era el Fiol de Dio e el gavea vivesto tanto tempo insieme de so Pare nel cielo. Alora, el podaria parlar de tante robe bele par assar le persone maraveiade e farse veder, ma no’l ga mia fato cossita. Invesse, lu sempre el se fidea nela Parola de Dio par insegnar. (Ledi Gioani 7:14-16.c) Cossita, Gesù el ga assà ai so dissìpoli un belìssimo esémpio de come insegnar.

8. Come che Piero el ga fato compagno al esémpio de Gesù?

⁸ I dissìpoli de Gesù anca i doperea la Parola de Dio par insegnar. Par esémpio, varda el discorso che el apòstolo Piero el ga fato nel Pentecoste del ano 33. Piero no’l gavea mia studià in scole importante. Ancora cossita, lu el ga doperà ben le Scriture par spiegar de una maniera fàcile de capir come Gesù el gavea realisà tante professie. (Ati 2:14-37) Cossa ga sucedesto dopo del so discorso? Tante persone lo ga scoltà e, ‘in quel giorno, intorno de 3.000 le ze state batesade’. — Ati 2:41.

9. Parché che ghemo de doperar la Bìblia par insegnar?

⁹ Sol la Bìblia la ga el poder de far le persone cambiar par piaserghe a Dio. (Ebr. 4:12) Par quela, quel che la Bìblia la dise ga de esser el pi importante quando insegnemo. Volemo ‘predicar la parola’, e nò quel che noantri pensemo. (2 Tim. 4:2) Proverbi 2:6 dise: “Geovà el dà la sabedoria. Par meso dele so parole, el dà cognossensa e bon giudìssio.” Cossita, quando doperemo la Bìblia par insegnar, semo drio assar Geovà parlar. (Mal. 2:7) Volemo che le persone le veda che la sabedoria che ghen’è nela Bìblia la ze tanto meio che la sabedoria del mondo. La Bìblia la vien de Dio, e la ne insegna tuto quel che ne ocore saver par piaserghe al nostro Creador e gaver una vita felice. — 2 Tim. 3:16, 17.

10. Come che podemo giutar nostro studiante a capir che quel che lu el impara vien dela Bìblia?

¹⁰ Quando te sì drio pareciarte par un stùdio dela Bìblia, pensa in come giutar el studiante a capir quel che la Bìblia la insegna. Come che te pol farlo? Intanto che te sì nel stùdio, ledi testi che ndarà giutar el to studiante a capir meio el punto prinsipal. Dopo, giutalo a pensarghe sora quel che el pol imparar de quei testi. Anca quando te doperi stampe e vìdei, giuta el to studiante a veder quala ze la lession che el pol imparar dela Bìblia. No te ocore mia parlar tanto, gnanca leder una mùcia de testi. Invesse, daghe al to studiante el tempo che ghe ocore par pensarghe sora e capir quel che el testo el vol dir, anca se dele volte te ocore leder el medèsimo testo nantra volta. Cossita, no saremo drio far un stùdio del libro, dele stampe o dei vìdei, ma pròpio dela Bìblia. — 1 Cor. 2:13.

11-12. (a) De acordo con Ati 17:1-4, come che podemo mostrar passiensa coi nostri studianti? (Varda anca la stampa.) (b) Cossa che tanti no i sa sora la Bìblia, e come che podemo giutarli?

¹¹ Se ghen’è una verità che el to studiante el cata fadiga de capir o de creder, ricordate che ghemo de predicar la Parola “con tuta la passiensa”. Ghen’è verità che par noantri le ze fàcile de capir, ma par arquante persone ghe vol de pi tempo. Quando Paolo el ga predicà ai giudei in Tessalònica, lori no i ga mia capio suito quel che el volea insegnarghe. Par quela, el ghe ga tocà spiegarghe de pi de una volta col aiuto dele Scriture fin che lori i ga capio. — Ledi Ati 17:1-4.d

¹² Noantri anca podemo mostrar passiensa quando ghe femo bele domande ai nostri studianti e ghe demo tempo par risponderle. Sfòrsate de capir come che el to studiante el pensa e scoltalo con atension. Dopo, ledi testi dela Bìblia che i ndarà giutarlo a capir cossa che Geovà el pensa sora quel che lu l’è drio imparar. Arquante persone no le sa mia che la Bìblia la ga tante bele verità par insegnarne. Se questo sucede col to studiante, te pol mostrarghe la parte “Come che te pol scominsiar a leder la Bìblia?”, nel libro Te pol viver felice par sempre!. Cossita, lu el vederà come la Bìblia la pol giutarlo a gaver una vita felice. Alora, sarà pi fàcile che lu el fae quel che la dise e che el gàpia voia de imparar de pi.

GIUTA I TO STUDIANTI A COGNOSSER A GEOVÀ

13. Cossa che volemo che i nostri studianti i capissa?

¹³ Noantri volemo giutar nostri studianti a cognosser a Geovà e deventar so amighi. (Tia. 4:8) Anca volemo che i nostri studianti i capissa che l’è Geovà che l’è drio insegnarghe. Alora, quando semo drio far un stùdio, no volemo farse veder. Invesse, volemo che Geovà e quel che lu el insegna sìpia la roba pi importante par el nostro studiante.

14. Come che te pol giutar el to studiante a voler assar Geovà contento?

¹⁴ Giuta el to studiante a amar a Geovà e a gaver voia de assarlo contento. (Pro. 27:11) Ricòrdate che no te sì drio insegnarghe sol quel che ghe toca far par deventar una Testimònia de Geovà. Invesse, te vol giutarlo a far quel che l’è giusto par assar Geovà contento. Par esémpio, se el to studiante no l’è bon de fermarse de far una roba sbaliada, domandaghe: “Parché che Geovà el resta disgustà se femo questa roba? Parché che lu l’è drio domandar che te te fermi de far una roba che te piase? Come che questo mostra che Geovà el te ama?” Se te giuti el to studiante a pensar sora Geovà e sora le so bele qualità, lu el ndarà capir che Lu l’è un Pare che lo ama tanto. Cossita, el ndarà amar cada volta de pi a Geovà e el volerà assarlo contento.

SEITA A SFORSARTE PAR INSEGNAR MEIO

15. Come che te pol seitar a sforsarte par insegnar meio?

¹⁵ Te pol pregar a Geovà e domandar che el te mostre come te pol insegnar meio ai altri. (1 Gio. 5:14) E come che te pol mostrar che te vol far cossita? Stà atento a quel che imparemo nele riunion sora come insegnar meio. Convida bravi fradei e sorele par ndar insieme de ti nel stùdio e domandaghe consili. Ricòrdate che fursi l’è la prima volta che el to studiante l’è drio imparar sora un assunto. Alora, proa capir come che el se sente sora quel che l’è drio studiar. Giutalo a veder come quel che l’è drio imparar l’è bon par lu e giutalo a pensar sora le bele promesse de Geovà. Cossita, sarà pi fàcile che el devente amigo de Geovà e el gàpia una vita felice. — Sal. 1:1-3.

16. Parché che l’è bon sforsarse par insegnar meio?

¹⁶ Una dele robe che ne dà de pi alegria la ze insegnar ai altri sora Geovà. Questo laoro el sarà tanto importante in Paradiso. Alora, seitemo a mostrar interesse nele persone, a fidarse nela Parola de Dio e a giutar i studianti a cognosser a Geovà. Se femo cossita, saremo boni de insegnar la Bìblia ai altri cada volta meio.