No stà desmentegarte de quel che l’è pi importante

1-2. Fà un esémpio de una situassion che ghemo de scòlier cossa che l’è pi importante.

METEMO dir che te sì drio guidar el auto e el to selular el sona. Fursi l’è una persona che la ga bisogno de aiuto che la ze drio ciamarte. Questo l’è un assunto importante, ma te sè che el pi importante in quel momento l’è star atento ala strada. Ghen’è tante situassion nela nostra vita che noantri ghemo de dessider quala che la ze la roba pi importante de far in quel momento.

² Tuti noantri ghemo una mùcia de robe importante par far. Ma savemo che quel che femo par Geovàa l’è el pi importante. (Mat. 6:33) Par quela, stemo atenti par no assar che gnente ne intrighe de meter Geovà in primo posto. — Pro. 4:25; Mat. 6:22.

3. Come che questo stùdio ne giutarà?

³ Noantri sempre volemo che Geovà el sìpia el pi importante nela nostra vita. Ma tante robe le podaria intrigarne de far questo. (Luc. 21:34-36) Alora, in questo stùdio, ndaremo veder (1) cossa che pol intrigarne de meter Geovà in primo posto, (2) cossa che Gesù el ga fato par no assar che gnente lo intrighesse de far quel che l’è pi importante e (3) come che podemo far compagno a Gesù ancoi.

COSSA CHE PODARIA INTRIGARNE DE FAR QUEL CHE L’È PI IMPORTANTE?

4-6. Che robe le podaria intrigarne de far quel che l’è pi importante?

⁴ Tuti noantri ghemo tante robe importante de far. Par esémpio, ghemo de tender dela nostra salute e dela nostra fameia. Ma queste robe le podaria scominsiar a intrigarne de far quel che l’è pi importante se doperessino massa del nostro tempo e dela nostra forsa par ndarghe drio.

⁵ Arquanti anca i ze de star in posti ndove ghen’è tanta violensa, ndove l’è fadiga mantegnerse o ndove ghen’è tante malatie. (2 Tim. 3:1) Quando infrontemo situassion cossita, fursi restemo massa ansiosi e pensemo sol nei nostri problemi.

⁶ Fursi cognossemo persone che le tribola par causa de situassion cossita. Lore le resta tanto ansiose parché i umani no i ze stati creadi par sofrir. Par quela, tanti i sente che no i ze boni de gaver una vita tranquila. Alora, par proar desmentegarse dei so problemi, i guasta tuto el tempo drio divertirse. Pol esser che se nicordemo che anca noantri semo drio far cossita. Gesù no’l ga assà che gnente lo intrighesse de far quel che l’è pi importante. Alora, ndemo veder cossa che podemo imparar col so esémpio.

GESÙ EL GA SEITÀ A METER GEOVÀ IN PRIMO POSTO NELA VITA

7. Cossa che podaria intrigar Gesù de far quel che l’era pi importante?

⁷ Nel tempo de Gesù, ghen’era problemi nela polìtica e tanti problemi nel mondo. Ghen’era anca tante persone malade e poarete. (Mat. 14:14; Mar. 14:7) I romani e i giudei i fea la gente tribolar. Par quela, quando le persone le ga visto che Gesù el fea miràcoli, le ga volesto che lu el deventesse el so rè. (Gio. 6:14, 15) Ghen’era anca Sàtana che el ga dito a Gesù che el ndaria darghe tuti i governi del mondo se lu lo adoresse. Alora, Gesù el podaria pensar che questa saria una bona oportunità de giutar le persone. (Mat. 4:8, 9) Fin un dei amighi de Gesù, el apòstolo Piero, el ga dito che lu no’l ghe tocaria sofrir e che el podaria gaver una vita pi fàcile. (Mat. 16:21, 22) Alora, ghen’era tante robe che le podaria intrigar Gesù de far quel che l’era pi importante.

8. Cossa che Gesù el ga fato par no desmentegarse de quel che l’era pi importante?

⁸ Ghen’era tre robe che Gesù el ga fato che lo giutea a no desmentegarse de quel che l’era pi importante. Prima, lu el pensea come Geovà. (Gio. 8:28; 14:9) Seconda, lu sempre el gavea tanto de far nela predicassion. (Mat. 9:35) E tersa, lu el capia ben quel che l’era pi importante. (Gio 4:34) Come che Gesù el ga fato queste tre robe? Lu no’l ga acetà quel che Sàtana el volea darghe. E anca se Gesù el savesse che Piero el volea giutarlo, quel che Piero el ghe gavea dito no l’era de acordo cola volontà de Geovà. (Mat. 4:10; 16:23) Gesù no’l ga assà che quel che le persone le pensea, le disea o le fea lo intrighesse de obedir a Geovà. L’è vera che quel che podaria intrigarne de meter Geovà in primo posto l’è difarente de quel che podaria intrigar Gesù. Ma quando imparemo col so esémpio, saremo boni darghene fora cole robe che ne intriga.

COME CHE PODEMO SEITAR A METER GEOVÀ IN PRIMO POSTO NELA VITA?

9. Come che podemo far quel che dise Efesi 5:17?

⁹ Impara a pensar come Geovà. Far cossita ne giutarà a “capir quala che la ze la volontà de Geovà”. (Ledi Efesi 5:17.b) Tante volte, la Bìblia no la dise cossa che ghemo de far in arquante situassion. Ancora cossita, podemo capir quel che Geovà el vol che femo. Cossa che pol giutarne? Leder la Bìblia, pensarghe sora e meter in pràtica quel che imparemo. Cossita, saremo boni de pensar come Geovà e viver de acordo cola so volontà.

10. Come che podemo imparar sora la maniera de pensar de Geovà?

¹⁰ Podemo imparar sora la maniera de pensar de Geovà quando studiemo la Bìblia e pensemo come che lu el giuta le persone. (Ger. 45:5) Intanto che ledemo la Bìblia, podemo domandarse: ‘Cossa che questo me insegna sora Geovà? Cossa che posso cambiar par veder le robe dela medèsima maniera che Geovà?’ Savemo che Geovà l’è tanto pi sàbio che noantri. (Isa. 55:9) Par quela, ghemo de domandarghe aiuto par imparar a far la so volontà. (Sal. 143:10) E ghemo anca de domandarghe el so aiuto par giutarne a pensar compagno a lu. — 1 Gio. 5:14.

11. Cossa che Geovà el vol che femo?

¹¹ Geovà el sa che questo mondo el finirà presto, e el vol che semo ben pareciadi par el fin. (Mat. 24:44) Lu el sa che ghen’è tante robe che le pol intrigarne de consentrarse in quel che l’è pi importante. (Mat. 6:31, 32) Par esémpio, pol vegner fora problemi de salute, nel nostro laoro o altre preocupassion. Ma, se domandemo a Geovà sabedoria e forsa par darghene fora con questi problemi, lu el ne giutarà. — Sal. 55:22; Pro. 3:5-7.

12. De acordo Mateo 5:3, cossa che ne giutarà a gaver una vita felice anca con tuti i problemi che sucede nel mondo?

¹² Gàpia tanto de far nel laoro par Geovà. Tuti noantri se preocupemo coi problemi che i ze drio suceder nel mondo. Ma savemo che no podemo far gnente par finirli fora. Alora, femo el nostro meio nel laoro a Geovà e no se preocupemo tanto cole situassion che ghen’è nel mondo. Se seitemo a sforsarse par gaver una forte amicìssia con Geovà, gavaremo una vita felice. (Ledi Mateo 5:3.c) Par esser boni de far cossita, ghemo de studiar la Bìblia par cognosser sempre de pi a Geovà e adorarlo dela maniera giusta. Alora, saremo drio doperar el nostro tempo dela meio maniera e assaremo Geovà contento. — Pro. 23:15.

13. Come che podemo ‘doperar el nostro tempo dela meio maniera’?

¹³ La Bìblia la dise che ghemo de ‘doperar el nostro tempo dela meio maniera’. (Efe. 5:15, 16; varda la nota “usando o seu tempo do melhor modo possível” nela Bìblia de Stùdio in portoghese.) Questo testo no l’è drio parlar de come doperemo el nostro tempo nei afari de tuti i giorni. Invesse, el ne dise che ghemo de star atenti a come doperemo el poco tempo che ghemo vanti de vegner el fin. Ma come che podemo farlo? Una maniera la ze no guastar massa tempo drio le notìssie brute che ghen’è. Senò, podarissino restar desanimadi. Ma se doperemo ben el tempo, gavaremo de pi forsa e saremo boni de far el nostro meio par Geovà. Nantra maniera che podemo doperar ben el nostro tempo la ze quando predichemo. Par esémpio, podemo sforsarse par tornar a parlar con quei che i ga dimostrà interesse. Cossita, saremo drio doperar tute le oportunità par giutar le persone a ‘esser salve e a gaver la cognossensa giusta dela verità’. — 1 Tim. 2:4.

14. Parché che l’è bon gaver tanto de far par Geovà? (Varda anca la stampa.)

¹⁴ Noantri savemo che la Bìblia la disea che sucederia robe brute nel mondo come la violensa, problemi econòmichi o malatie. Ma se ghemo tanto de far par Geovà, no ndaremo restar massa preocupadi. Invesse de gaver paura, la nostra fede che Geovà el ndarà finir con questi problemi la restarà sempre pi forte. Cossita, saremo boni de ndar avanti e de restar tranquili parché savemo che Geovà el ne giutarà a darghene fora coi problemi. — Sal. 16:8; 112:1, 6-8.

15. De acordo con 1 Piero 4:7, cossa che ghemo de far, e parché?

¹⁵ No stà desmentegarte de quel che l’è pi importante. Tante persone nel mondo le pensa sol in divertirse e gnanca le se nicorde che el mondo l’è pròpio darente del fin. Savemo che no l’è sbalià divertirse, ma ne ocore gaver “bon giudìssio” e star atenti par no far compagno a lore. (Ledi 1 Piero 4:7.d) O sia, ghemo de far bone dessision invesse de guastar massa tempo drio divertirse. Se femo cossita, ndaremo far compagno a Geovà e mostraremo che capimo quel che l’è pi importante. — 2 Tim. 1:7.

16. Cossa che l’era pi importante par Gesù?

¹⁶ Gesù sempre el se ricordea de quel che l’era pi importante. Prima de morir, lu el savea che la roba pi importante l’era mantegnerse fedele a Dio e far la So volontà. Par quela, lu el ga suplicà che Geovà lo giutesse tante volte. Ma i so dissìpoli no i ga fato cossita. Invesse de pregar, lori i se ga indormensà parché i era “sfinidi de tristessa”. — Luc. 22:39-46; Gio. 19:30.

17. Parché che tanti i dopera la internet, e come che la podaria intrigarne? (Varda anca la stampa.)

¹⁷ Par causa de quel che sucede nel mondo, pol esser che anca noantri restemo massa preocupadi e strachi, compagno i dissìpoli de Gesù. Par proar desmentegarse de questi problemi, tanti i passa una mùcia de tempo su par la internet. Lori i dopera le rede sossiai par parlar coi amighi e cola fameia e mandarghe ritrati de quel che i ze drio far. Altri i dopera la internet par vardar vìdei, filmi e par ndar drio a giughi. Ma ghen’è tante robe par far e vardar nela internet che le persone no le ga pi tempo par far altre robe. Par no far compagno a queste persone, ghemo de domandarse: ‘Sarà che la me maniera de doperar la internet me fà sentirme meio o me intriga de far quel che l’è pi importante?’

18. Parché che l’è importante gaver bon giudìssio quando scoliemo la nostra diversion?

¹⁸ Dele volte, l’è bon divertirse e riposar. Ma ghemo de esser sicuri che ndaremo scòlier ben quel che giughemo e vedemo nela television o nela internet. Parché che ghemo de star atenti ale scólie che femo? Tante volte, quando finimo de veder un vìdeo, pol vegner un vìdeo drio man l’altro e pol esser che i ze violenti o imorai. Varda quel che ga sucedesto con un fradel dela Àsia. Lu el ga scominsià a veder tocheti de filmi nela internet e el vedea i vìdei che i vegnea fora, ma che i gavea imoralità. Poco tempo dopo, lu el ga scominsià a veder pornografia. Ma col aiuto dei ansiani e dei so amighi, lu el se ga fermà de far cossita. Lu el ga cavà via del so selular arquanti aplicativi e, adesso, l’è atento par no passar tanto tempo nel selular. El so esémpio el ne insegna che l’è importante scòlier ben le nostre diversion e come ndemo doperar el nostro tempo.

19. Cossa che pol suceder se guastemo massa tempo drio divertirse?

¹⁹ Tuti noantri ghemo bisogno de riposar del nostro laoro. Ma ghemo de pensar ben come farlo. Se pensemo massa in diversion, questo pol intrigarne de far quel che l’è pi importante. (Fil. 1:10) Par quela, ghemo de dessider cossa far par divertirse e par quanto tempo. Par giutarne a far questa dessision, podemo domandarse: ‘El tempo che mi guasto par divertirme mostra che go bon giudìssio? Mi mostro che son parecià par el fin de questo mondo rugno?’

20. Parché che l’è bon par noantri no assar che gnente ne intrighe de far quel che l’è pi importante?

²⁰ L’è bon par noantri quando no assemo che gnente ne intrighe de far quel che l’è pi importante, che l’è el nostro laoro a Geovà. (Isa. 48:17) Col so aiuto, saremo boni de darghene fora cole nostre dificoltà, no restaremo massa preocupadi coi problemi del mondo e no guastaremo massa tempo drio divertirse. Alora, ghemo de sforsarse par pensar come Geovà, par gaver tanto de far nel laoro a lu e ricordarse sempre de quel che l’è pi importante. Se femo cossita, no assaremo che gnente ne intrighe de ‘tegnerse firmi ala speransa dela vera vita’. — 1 Tim. 6:19.