Capir ben le robe te giuta a infrontar situassion difìcile

1-2. (a) Cossa che la Bìblia la ne incoraia a far? (b) Parché che l’è importante far come la Bìblia la dise?

QUALCHEDUN el te ga belche mancà de rispeto o te ga parlà qualcossa che te ga ofendesto? O ti te ghè belche infrontà una situassion che te ga assà spaurà? Sicuro che no l’è fàcile saver cossa dir o cossa far quando sucede robe cossita. Cossa che pol giutarne? La Bìblia la ne dà boni consili par saver cossa far.

² La Bìblia la ne incoraia a pensar ben vanti de far qualcossa. Questo vol dir che no ghemo de far una dessision sol de acordo con quel che podemo veder. Noantri ghemo de prima capir parché che una roba la ga sucedesto o parché che una persona la ga dito o fato qualcossa. Cossita, saremo boni de mostrar sabedoria. Par esémpio, pensar ben vanti pol giutarne a capir la ora de parlar e la ora de taser. (Pro. 10:19; Sal. 4:4) Pol giutarne anca a no restar massa cativi e a perdonar i altri. Anca ne giutarà a acetar consili dei altri e scoltar quando qualchedun ne dise che no semo drio far polito. (Pro. 19:20) Quando pensemo ben vanti de parlar o far qualcossa, assemo Geovà contento, le robe le ndarà meio par noantri e assaremo quei che i ze intorno de noantri felici. E quando semo nte una situassion che ne assa disgustadi, no ndaremo restar massa cativi e far robe sbaliade. Adesso ndemo veder tre esempi dela Bìblia che mostra come che pensar e capir ben le robe vanti de dir o far qualcossa pol giutarne a seitar ùmili, tranquili e a fidarse del tuto in Geovà.

SÌPIA ÙMILE E NÒ ORGOLIOSO

3. Chi che l’era Naaman?

³ Par far la roba giusta ghemo de esser ùmili. (1 Pie. 5:5) E quando capimo ben le robe l’è pi fàcile esser ùmili. Ma come cossita? Vedemo el esémpio de Naaman. Lu l’era de star nela Sìria, un paese darente de Israel e lu l’era un omo tanto importante che comandea el esèrsito sìrio. Lu el gavea la lepra, che la ze una bruta malatia. — 2 Rè 5:1.

4. Come che Naaman el ga mostrà sabedoria?

⁴ La sposa de Naaman la gavea una serva israelita che la ghe ga dito che ghen’era un profeta in Israel che podaria curar la malatia de so omo. (2 Rè 5:2, 3) Naaman el podaria gaver pensà: ‘Sarà che una toseta che la ze de una nassion nemiga la pol dir qualcossa che ndarà giutarme?’ Ma invesse de gaver orgòlio e no badar quel che la toseta la ghe gavea dito, Naaman la ga scoltada. Cossita, lu el ga domandà al rè dela Sìria che lo assesse ndar par Israel par esser curà, e lu lo ga assà ndar. — 2 Rè 5:4, 5.

5. Cossa ga sucedesto con Naaman quando lu l’è rivà in Israel?

⁵ Naaman l’è ndà fin al rè israelita Georon par esser curà. Ma Georon el ga pensà che el rè dela Sìria el gavea mandà Naaman sol par barufar con lu. Quando el profeta Eliseo el ga savesto de questo, el ga domandà al rè che Naaman el vegnesse casa soa. (2 Rè 5:6-9) Le robe no le ze ndate come che Naaman spetea. Parché? Parché Eliseo no l’è ndato fora de casa par riceverlo e no’l ga gnanca parlà con lu. Invesse, Eliseo el ga mandà un messagero par dirghe a Naaman quel che el gavea de far par esser curà. — 2 Rè 5:10.

6. (a) Parché che fursi Naaman no’l ga volesto scoltar quel che el messagero el ghe ga dito de far? (b) Come che i servi de Naaman i ga mostrà sabedoria e cossa ga sucedesto? (2 Rè 5:13, 14)

⁶ Nel scomìnsio, Naaman no’l ga scoltà quel che el messagero el ghe gavea dito de far. Lu “l’è restà inrabià” e “l’è ndato via cativo”. (2 Rè 5:11, 12) Parché? Fursi lu el pensea che Eliseo el gavea de darghe de pi rispeto parché lu l’era una autorità importante nela Sìria. Anca pol esser che Naaman el ga pensà che Eliseo l’era drio far de poco dela Sìria. No savemo giusto quel che lu el ga sentio, ma savemo che lu l’era drio desister de esser curà e el volea tornar casa. Invesse, i so servi i gavea capio che Eliseo el volea pròpio giutarlo e i ghe ga domandà che el pensesse ben vanti de tornar casa. Alora, Naaman el ga assà de banda el so orgòlio e con umiltà el ga fato pròpio quel che Eliseo el ghe gavea dito. Cossita, lu l’è stà curà! — Ledi 2 Rè 5:13, 14.a

7. Cossa che podemo imparar del esémpio de Naaman? (Proverbi 22:4) (Varda anca la stampa.)

⁷ Cossa che podemo imparar del esémpio de Naaman? Noantri ghemo de pensarghe sora e capir ben le robe vanti de far qualcossa e no ghemo de assar che i nostri sentimenti i ne controle. Anca ghemo de esser ùmili. Una persona ùmile la capisse che no la sà de tuto e che la ga de bisogno del aiuto dei altri, ancora de pi de Geovà. Naaman no l’era gnancora un servo de Geovà, ma lu el ga mostrà sabedoria quando el ga scoltà con umiltà la toseta israelita, i so servi e el pi importante, el rapresentante de Geovà, Eliseo. Lu no l’è stà orgolioso e el ga fato una bela dessision. E anca noantri podemo ricever un consìlio che no semo mia de acordo o una orientassion dela organisassion che no capimo. Alora, vanti de dir o far qualcossa, noantri ghemo de fermarse e domandarse: ‘Quel che penso de dir o far mostra se son ùmile o orgolioso?’ — Ledi Proverbi 22:4.b

RESTA TRANQUILO E NÒ INRABIÀ

8. Quando che pol esser difìcile restar tranquili?

⁸ Dele volte sucede robe che pol assarne inrabiadi. Ma se se fermemo, pensemo e capimo ben le robe vanti de dir o far qualcossa, questo ne giutarà a restar tranquili. L’è vera che no l’è sempre fàcile restar tranquili, parché pol esser che qualchedun el fae o el ne dise qualcossa de cativo o che pensemo che no l’è mia giusto. (Efe. 4:26 e la nota “Fiquem irados” nela Bìblia de Stùdio in portoghese.) Varda come Davi e Abigail i ga mostrà sabedoria nte una situassion difìcile.

9. Come che Nabal el ga tratà Davi?

⁹ Pensa in quel che ga sucedesto quando Davi e i òmini che i era con lu i era drio scampar de Saul e i era drio viver nel deserto de Paran. (1 Sam. 25:1) Intanto che i era lì, lori i ga giutà a proteger i pastori e le bèstie de un omo sior che gavea nome Nabal. (1 Sam. 25:15, 16) Quando i òmini che i era con Nabal i era drio taiar la lana dele piégore, Davi el ga mandà arquanti òmini par domandar a Nabal qualcossa de magnar. (1 Sam. 25:6-8) Ma Nabal no ghe ga dato valor a tuto quel che Davi e i òmini i era drio far par lu. Invesse, lu l’è stà tanto rugno e el ga fin dito su a Davi e ai òmini con lu. — 1 Sam. 25:10, 11.

10. Come che Davi e Abigail i ga mostrà sabedoria? (1 Samuel 25:32, 33) (Varda anca la stampa.)

¹⁰ Come che ti te sentirissi se te fussi nel posto de Davi? Davi l’era tanto inrabià che el volea copar Nabal! (1 Sam. 25:13, 21, 22) Ma Abigail, la sposa de Nabal, la ga fermà Davi e i òmini con lu quando i era drio vegner copar Nabal. Parché che la ga fato cossita? Parché la ga capio che anca se in quel momento Davi l’era inrabià, lu l’era un omo bon. Alora, la volea far quel che la podesse par giutarlo a restar tranquilo e a far le robe con sabedoria. Ela la ghe ga portà un bel presente, e la ghe ga dato boni consili con umiltà. (1 Sam. 25:18, 23-31) Davi el ga mostrà sabedoria quando la ga scoltada e quando el ga capio che quei consili i vegnea de Geovà. Cossita Davi l’è restà tranquilo e no’l ga fato un bruto sbàlio. — Ledi 1 Samuel 25:32, 33.c

11. Come che pensar e capir ben le robe ne giuta quando qualchedun ne assa inrabià? (Proverbi 19:11)

¹¹ Cossa che podemo imparar del esémpio de Davi e Abigail? Anca quando ghemo motivi par restar inrabiadi, ghemo de fermarse, pensar e capir ben la situassion par no far robe sbaliade o parlar cole brute. Nantra roba che ghemo de far la ze pensar in quel che podaria suceder se femo le robe con ràbia. (Ledi Proverbi 19:11.d) Quando Abigail ghe ga ricordà a Davi che quel che lu el faria ndaria disgustar a Geovà, lu l’è stà bon de restar tranquilo. Alora, se qualcossa l’è drio assarte disgustà, no stà restar suito cativo. (Tia. 1:19) Invesse, tote un tempo par pregar a Geovà e par pensar come lu el se sente e come che lu el vede questa situassion. Questo te giutarà a restar calmo.

12. Come che i altri i pol giutarne a restar tranquili e a far bone dessision?

¹² Geovà el ga doperà Abigail par giutar Davi a restar tranquilo e a capir la maniera giusta de pensar. Lu el pol doperar anca i nostri fradei e sorele par giutarne a capir come che lu el pensa. Alora, se sucede qualcossa che te assa inrabià, proa parlar con qualchedun che te giute a veder le robe compagno a Geovà. (Pro. 12:15; 20:18) E se un dei to amighi l’è inrabià con qualcossa, come che te pol far compagno a Abigail? Ti te pol giutarlo a veder come che Geovà el pensa. L’è sicuro che Geovà el ndarà benedir i to sforsi par giutar i altri a far le robe con sabedoria e a restar tranquili.

FÌDATE IN GEOVÀ E NO STÀ RESTAR CON PAURA

13. Come che pensarghe ben vanti de far qualcossa ne giuta quando semo con paura?

¹³ Dele volte, ghemo de darghene fora con robe che ne assa con paura. Ma se pensemo in come Geovà l’è tanto pi poderoso de qualche altra roba o de qualche altra persona, questo pol giutarne a fidarse in lu anca se ghemo paura. (Sal. 27:1) Geovà anca el pol giutarne se catemo che no ghen’è solussion par el nostro problema. Ga sucedesto cossita con Giona. Lu el amea tanto a Geovà, ma l’è restà con paura quando Geovà ghe ga dato un laoro tanto difìcile de far.

14. Parché che Giona fursi el ga bio paura de far quel che Geovà ghe gavea domandà?

¹⁴ Geovà el ga domandà a Giona che el fesse una roba tanto difìcile. Lu el gavea de dir ale persone de Nìnive che Geovà presto ndaria finirle fora. (Giona 1:1, 2) Se Geovà el te domandesse de far una roba cossita, come che te te sentirissi? Giona el ghe meteria intorno de un mese par rivar a Nìnive, e le persone de quel posto le era cognosseste come persone tanto violente. La Bìblia la dise che Nìnive la era ciamada de ‘la cità piena de sangue’. (Naum 3:1, 7) Giona el ga dessidio scampar via invesse che obedir a Geovà. — Giona 1:3.

15. Cossa che ga giutà Giona a fidarse de pi in Geovà? (Giona 2:6-9)

¹⁵ Quando Giona l’era drio scampar distante de Nìnive, lu l’è stà trato do nel mar e Geovà lo ga salvà par meso de un miràcolo. Questo ga giutà Giona a ricordarse del grando poder de Geovà. (Giona 1:15, 17) Giona el ga imparà una roba tanto importante. Lu el ga capio che no ghe ocorea gaver paura de ndar parlar ai niniviti parché Geovà podea protegerlo de tuti i perìcoli. (Ledi Giona 2:6-9.e) Quando Geovà el ga dito nantra volta de ndar a Nìnive, Giona no’l se ga tirà indrio. Lu l’è ndato a Nìnive, le persone lo ga scoltà e no le ze mia state finide fora. — Giona 3:5.

16. Cossa che pol giutarne quando ghemo paura? (Proverbi 29:25) (Varda anca la stampa.)

¹⁶ Cossa che podemo imparar del esémpio de Giona? Mai volemo assar che la paura dei altri ne fae desobedir a Geovà. (Ledi Proverbi 29:25.f) Giona el ga pensà ben in tuto quel che gavea sucedesto e el se ga nicorto che invesse de preocuparse con quel che podaria suceder, lu el gavea de ricordarse che Geovà ndaria giutarlo. Anca noantri podemo fermarse de gaver paura de quel che podaria suceder se pensemo come che Geovà sempre el ne ga giutà e come che el ne ga protegesto nel passà. Anca podemo pensarghe sora in tanti esempi dei nostri fradei e sorele che i se ga fidà del tuto in Geovà e i ze stati boni de darghene fora cola paura.g (Ebr. 13:6) Alora, noantri volemo mostrar sabedoria, fidarse del tuto in Geovà e giutar i altri a far compagno.

PENSA CADA VOLTA DE PI COMPAGNO A GEOVÀ

17. Cossa che ne giutarà a esser una persona che capisse cada volta meio le robe?

¹⁷ Come ghemo visto, fermarse, pensar e capir ben le robe vanti de far qualcossa, ne giuta a darghene fora con situassion difìcili. Ma cossa che ne giutarà a farlo cada volta meio? Geovà la ze la meio persona che pol giutarne. Lu el ne ga dato la Bìblia e anca so spìrito santo. (Nee. 9:20; Sal. 32:8) Lu el ne dà consili che ne giuta a far bone dessision e a controlar i nostri sentimenti. (Sal. 119:97-101) Par quela, volemo pensar ben in quel che la Bìblia la dise e far orassion par domandar a Geovà el so spìrito santo. Questo ne giutarà a veder le robe come Geovà e a far quel che lu el vol. — Pro. 21:11.

18. Cossa volemo seitar a far?

¹⁸ Noantri volemo seitar a imparar e a darghe valor ala sabedoria de Geovà. (Sal. 14:2) Se femo cossita, gavaremo cada volta de pi sabedoria. (Pro. 21:16) Volemo seitar a pensar e a capir ben le robe vanti de dir o far qualcossa. Se femo cossita, Geovà el restarà felice.