I fioi “i ze un presente de Geovà”

TI TE ghè belche guadagnà un presente che te ga piasesto tanto? Fursi l’è stà una persona che te ami tanto che te lo ga dato. Sicuro che te ndarissi doperar tanto ben questo presente.

La Bìblia la dise che i fioi “i ze un presente de Geovà”. (Sal. 127:3) I genitori che i ama a Geovà i vede i so fioi come presenti tanto valiosi. Par quela, lori i fà el so meio par darghe ai so fioi quel che i ga de bisogno par viver e par tender dela so salute. Anca, lori li giuta a esser felici e a gaver una forte amicìssia con Geovà.

Ma arquanti genitori no i pensa che i so fioi i ze un presente che vien de Dio. (Isa. 49:15; 2 Tim. 3:1-3) Altri i vol tender ben dei so fioi, ma ghe fà fadiga parché ghen’è tante dificoltà. Che dificoltà i genitori i infronta par tender dei so fioi? Cossa che Geovà el vol che i genitori i fae? E come che i genitori i pol slevar ben i so fioi e giutarli a esser felici quando i vien grandi?

DIFICOLTÀ CHE GHEN’È PAR SLEVAR SU I FIOI

• Quel che la fameia e i altri i speta che i genitori i fae. In arquante parte del mondo, le persone le rispeta pi i genitori che i ga tanti fioi. Par quela, arquanti casai i pensa che ghe toca gaver de pi fioi de quel che i pol tender.

• Preocupassion col futuro. In arquante parte del mondo, ghen’è tante malatie, no ghen’è magnar che basta e gnanca ospedai. Alora, arquanti casai i fà tanti fioi par esser sicuri che al manco un per de lori i vegnarà grandi. Pol esser che altri casai i dessida gaver tanti fioi parché i vol che i li tenda quando i vien pi veci. Questo sucede ancora de pi nei paesi ndove el governo no’l dà tanto aiuto par quei che i ze pi veci.

• Ghe fà fadiga al casal controlar quanti fioi i gavarà. In tanti posti, no ghen’è tante opsion de remedi e robe che se pol far par la dona no restar gràvida. Altri i ga paura de restar maladi se i dopera robe cossita. E ghen’è fameie che no le ze bone de comprar questi remedi parché i costa tanto.a

COSSA CHE GEOVÀ EL VOL CHE I GENITORI I FAE?

Deghe ai vostri fioi quel che ghe ocore. Geovà el vol che i genitori i laore par dar de magnar, robe de vestir e un posto de star par i so fioi fin che i vegna grandi. Geovà anca el vol che el pare e la mare i giute so fioi a ndar ala scola e che ghe insegne a far robe che le sarà bone par lori nela so vita. Lu anca el vol che i genitori i passe tempo con cada fiol. Cossita, i fioi i sentirà protession e amor nela fameia. Alora, no saria bon che i genitori i mandesse i fioi studiar nte una scola distante de lori. Geovà no’l speta che i genitori i sìpia siori. La Bìblia la mostra che Geovà no’l ga scoliesto par tender del so Fiol una fameia che la gavea tanti soldi, ma una che la era laoradora. — Mat. 13:55, 56; Luc. 2:24.

La Bìblia la dise: “L’è sicuro, se qualchedun no’l dà quel che ghe ocore ala so fameia, ancora de pi a quei che i ze de star nela so casa, l’è come se el assesse de banda la so fede e l’è pedo de quei che no i ga mia fede.” — 1 Tim. 5:8.

Geovà el sa che i genitori i gavarà bisogno de aiuto quando i vegnarà pi veci. Una maniera che i fioi i pol darghe onor l’è giutarli a tenderli quando i vien pi veci. (Éso. 20:12; 1 Tim. 5:4) Ma Geovà el resta contento quando i genitori i pensa prima come che lori ndarà tender dei so fioi, invesse de preocuparse tanto in come che i fioi ndarà tender de lori. — 2 Cor. 12:14.

Insegné ai vostri fioi sora Geovà. Geovà el vol che i genitori i insegne ai so fioi a amarlo e adorarlo. Par lu, questa ze la roba pi importante che i genitori i pol insegnarghe. — Deu. 6:6, 7.

La Bìblia la dise: “E valtri pare, no sté far inrabiar i vostri fioi, ma seité slevarli nela dissiplina e nela orientassion de Geovà.” — Efe. 6:4.

GEOVÀ EL VOL GIUTARVE A SLEVAR SU I VOSTRI FIOI

Penseghe sora quanti fioi gavaré. Penseghe se gavaré soldi che basta par comprar magnar e robe de vestir ai vostri fioi e se saré boni de mandarghe ala scola. Alora, parla col to omo o cola to dona par saver quanti fioi gavaré. Cossita, saré boni de slevarli su come Geovà el vol. Lu el sa che arquante robe nela vita sucede sensa che spetemo. (Ecl. 9:11) Ma lu el benedirà el vostro sforso de esser bravi genitori.

La Bìblia la dise: “L’è sicuro che i progeti de quei che pensa ben vanti i gavarà boni resultadi. Ma quei che i ga sempre prèssia i restarà poareti.” — Pro. 21:5.

“Par esémpio, quando qualchedun el vol far su una tore, vanti el se senta e el pensa quanto el va guastar par veder se el ga i soldi par finir el laoro, mia vera?” — Luc. 14:28.

Servir a Geovà ga de esser la roba pi importante par valtri. Se valtri gavé fioi, insegneghe cada un de lori a amar a Geovà. Giuteli a star atenti nele riunion e a imparar tuto quel che i pol. Fé sempre la adorassion in fameia e insegné ai vostri fioi come predicar. No sté spetar che i fioi pi veci o altre persone dela fameia sleve su i vostri fioi. Ghe vol tempo e tanto sforso par giutar i fioi a amar a Geovà. Ma valtri saré tanto contenti de vederli servir a Geovà con alegria.

La Bìblia la dise: “No go alegria pi granda che questa: scoltar che i me fioi i continua a caminar nela verità.” — 3 Gio. 4.b

Fideve in Geovà. Pol esser che gavé belche fioi o sì drio pensar de gaverli. Alora, ricordeve che quel che Geovà el vol che valtri fé come genitori l’è pi importante de quel che le persone de ndove sì de star le vol che valtri fé.

Se la vostra dessision la ze de no gaver tanti fioi, fideve che Geovà ndarà tenderve quando vegnaré pi veci. No importa quel che i altri i pense, no sté pensar che i vostri fioi i ga de guadagnar de pi soldi par tenderve nel futuro. Podé fidarve che Geovà mai el ve abandonarà. Lu sempre el ve tenderà. — Gios. 23:14.

La Bìblia la dise: “Fìdate in Geovà de tuto el to cuor, no stà fidarte nel to pròpio saver. Ricòrdate de Dio in tuto quel che te fè e lu el ndarà mostrarte quala che la ze la strada giusta.” — Pro. 3:5, 6.

“Mi ero gióveno e adesso son vècio, ma mai go visto un giusto abandonà gnanca i so fioi drio ndar in serca de pan.” — Sal. 37:25.

“Seité a far che el Regno e la obediensa a Dio i sìpie le robe pi importante dela vostra vita. Cossita, Dio el ve darà tute queste robe che ve ocore.” — Mat. 6:33.

I fioi i ze come un presente tanto valioso che Geovà el ga dato ai genitori. Lu el resta tanto contento quando i genitori i fà el so meio par tender ben dei so fioi dela maniera che lu el vol. Par lori, quel che Geovà el vol l’è pi importante de quel che le persone le speta che i fae. Par quela, i genitori i pensa ben vanti de dessider quanti fioi i gavarà. Cossita, i sarà boni de mantegner cada un dei fioi, i ndarà giutarli a esser felici nel futuro e i ndarà insegnarghe a amar a Geovà. Se i genitori i fà cossita, i mostrarà che i ama tanto i so fioi e che li vede come presenti pressiosi che i vien de Geovà.