YOOSOMA 11
Nyuwo munkela okhavihereya hayi ni yoosomaanyu ya Biblya?
Neereke nyuwo mwaninto otteettheya mwaha woowuupuwelela opatxera muteko mutokotoko? Apaale weera wookhweeleni muteko owo, nyuwo pooti weera mwaapatxenre ovara vakhaani-vakhani wamookhweeleni. Nyuwo pooti opaka etthu emoharu mwaamusomaka Biblya. Nyuwo pooti wiikoha ha: ‘Kinrowa opatxera vaviini?’ Mwa yoosomeene yeela, ninkela woona itthu sookhweya nyuwo mukhanlaanyu opaka weera yoosivenleni yoosomaanyu ya Biblya.
1. Heeni oraaya wootthuneya omusoma Biblya mahuku ootheene?
Mutthu ommusoma Biblya, naari neere “ikano sa Yahvéh,” onookhala oohakalala ni ookhumela nnene mweekumini mwawe. (Musome Nsalmu 1:1-3.) Weera mpatxerihe, mweerere omusoma Biblya mahuku ootheene iminuutu vakhaneene. Emaara munkelaanyu osuwela masu a Muluku, oneereke woosivelani omusoma Biblya.
2. Moota heeni nyuwo munkelaanyu okhavihereya ni yoosomaanyu ya Biblya?
Weera nittottele mureerelo yoosomaanhu ya Biblya, nintthuneya ‘ophimelela ele’ ninsomaahu. (Yehoxuwa 1:8, enoota) Eyo entaphulela weemela ni wuupuwela ele nisommaahu. Emaara munsomaanyu mwiikoheke ha: ‘Etthu ela kisommaaka enkixuttiha heeni voohima sa Yehova Muluku? Moota heeni kineeraaka kivarele muteko mweekumini mwaka? Kinkela ovarela hayi muteko ela kisommaaka weera kaakhavihere atthu akina?’
3. Nyuwo munkela ophwanya hayi ehuhu weera mmusomeke Biblya?
Nyuwo munnoona oxupa ophwanya ehuhu weera mmusomeke Biblya? Antxipale a hiyo, nnoona hiiho. Mweerere ‘ovarela muteko nnenesene ehuhu anyu yootheene.’ (Aefeso 5:16) Nyuwo pooti opaka eyo, mwaasaaseraka ehuhu vanihukuni weera mmusome Biblya. Atthu akina onnaarera omusoma Biblya oxeexelo. Akina onnaarera omusoma Biblya emaara yoothana. Ni atthu akina onnaasivela omusoma Biblya emaara yoohiyu, araaya ehinaaye okona. Ankhanto nyuwo? Emaara heeni yeera yoosiveleni?
WEERA MUXUTTERE SINTXIPALE
Moone miruku sineera sookhavihereni woona weera, yoosomaanyu ya Biblya ti yootthuneya. Nave-tho, moota nyuwo munkelaanyu wiireherera nnene weera mukhavihereye ni yoosomaanyu ya Biblya.
Ntoko hiihaale munpatxeraanyu osiveliwa otxa yootxa muhintalaanyu otxa, nyuwo pooti oxuttera osiveliwa omusoma Biblya
4. Muxuttere moota oneeraawe woosivelekeni omusoma Biblya
Ekhaikhai weera opatxeriha omusoma Biblya pooti ohikhala etthu yookhweya. Mene nyuwo pooti oxuttera “ohawela” naari neere, woosiveliwa omusoma Biblya. Etthu emoharu enneereya mwapatxeraka osiveliwa otxa yootxa muhintalaanyu otxa. Mmusome 1 Pedru 2:2, avinyaka mutthekule ni epontu sinttharelana:
Munoona weera omusoma Biblya mahuku ootheene onimookhaviherani?
Moone EVIIDIYU ni avinyaka nwehe ele atthu akina apankaaya weera waasiveleke omusoma Biblya. Avinyaka mutthekule ni ipontu sinttharelana
Nviidiyuni, maxupo heeni yaawootxeeliha amiravo omusoma Biblya?
Eheeni yaakhavihenre amiravo ala ohihiya omusoma Biblya mahuku ootheene?
Eheeni yaapankaaya weera yooneke yoosomaaya ya Biblya okhala yootthuneya?
Miruku sineera sookhavihereni:
Mmuthanle Biblya ootaphuleliwa nnene ni okhweya omusoma. Nyuwo pooti omuthanla ola Tradução do Novo Mundo, omphwanyeya ni muulumo mantxipale.
Mpatxerihe osoma impari munoonaanyu okhala sootthuneya. Nwehe miruku mikina va equaadru “Mpatxerihe yoosomaanyu ya Biblya.”
Mulepeke ele munsomaanyu mBiblyani. Weera mpake eyo nvarihele muteko equaadru “Neereke munuupuwela nipuro mukontanyuvo.”
Munvarele muteko aplikativu JW Library®. Ni aplikativu ola, munoowera osoma naari omwiwa Biblya ookaravariwa mutelefonini, mutabletini naari mukomputadoreni.
Munvarihele muteko Apêndice a Tradução do Novo Mundo. Owo onnawiiha mapa, iquaadru ni disionariyu. Itthu iyo sinneeriha yoosoma okhala yootthuneya.
5. Mwiireherereke mwaarowaka opaka Yoosomaanyu ya Biblya
Musome Nsalmu 119:34, ni avinyaka mutthekule ni ipontu sinttharelana:
Heeni oraaya wootthuneya opaka nivekelo muhinaaye omusoma Biblya naari mwiirehereraka mwaarowaka opaka Yoosomaanyu ya Biblya?
Munkela okhavihereya hayi ni yoosoma eri yootheene ya eliivuru ela? Emaara muniirehereraanyu weera mpake yoosomaanyu, mweerere opaka ela:
Musomeke iparagrafu soopatxera sa yoosoma ela.
Musomeke soolepa sa Biblya ni mweerereke woona moota sinvarihanaaya ni mwaha muraanyu.
Mukwenkhwe masu naari neere, ifrase sinaakhula nenne nri nikoho. Eyo enimookhaviherani emaara munrowaanyu osoma ni munhusihaanyu.
Nyuwo mwaasuwela?
Anamoona a Yehova ahaavarela muteko a Biblya oovirikana ootaphuleliwa. Nto onnansivela onvarihela muteko Biblya ola Tradução do Novo Mundo da Bíblia Sagrada mwaha wooweera owo teekhaikhai, okhweya omwiiwexexa ni nookhalamo nsina na Muluku.—Nwehe mwaha va saite jw.org “Niireke Anamoona a Yehova Arina Biibiliya Aya?”
ATTHU AKINA ANEERA: “Omusoma Biblya tiwooxupa. Opwaha mwa yeeyo, miyo sookaattela itthu soovara ni kinkhala ookhulumuweene.”
Nyuwo munoonela hayi eyo?
NYAHA SOOTTHUNEYA
Weera mukhavihereye ni ele masu a Muluku enhimaaya, mwiivahe ehuhu weera mmusomeke Biblya, mpakeke nivekelo weera mwiiwexexe ele munsomaanyu ni mwiirehereke mwa yoosomanyu eri yootheene.
Wuuluula
Moota heeni muneeraanyu mukhavihereye ni ele Biblya onxuttihaawe?
Emaara heeni nyuwo muneeraanyu mwiisukereke weera mmusome Biblya?
Mwaha wa heeni oraaya wootthuneya wiireherera muhinaaye opaka yoosoma ya Biblya?
WEERA MUSUWELE ITTHU SINTXIPALE
Moone miruku mikina sineera sookhweihereni yoosomaanyu okhala yootthuneya.
“Moota woosiveliwa omusoma Biibiliya?” (A Sentinela, N.º 1 a 2017)
Moone miruku miraru sa moota woomusoma Biblya
“Biibiliya Onrowa Okikhaliherya Sai?—Mpantta 1: Mmusuwele Oratteene Biibiliya” (Mwaha va jw.org)
Moonelele moota woowoosivelani omusoma Biblya.
Mutthare miruku sa atthu ale apatxenre omusoma Biblya mwa iyaakha sintxipale sa muttuli.
Muttottele mureerelo yoosomaanyu yameekwaanyu ya Biblya (2:06)