Ti heeni Biblya onthalihaawe sa makristu owura eviinyu?

Elapo yootheene atthu aakhalano nyoonelo soovirikana voohima sa owura eviinyu. Atthu akina onnaasivela owura ereene ni asinthamwene aya. Akina annathanla ohiwura. Ni atthu akina annawura mpaka enahapaliwa. Vanonto tuuvi ori moonelo wa Biblya woohima sa owura evinyu?

1. Neereke owura eviinyu tiyoottheka?

Biblya khanhima weera owura evinyu tiyoottheka. Opwaha mwa yeeyo, owo oohela mpuwa mwa soovaha Muluku onivanhaawe. Owo oneera “evinyu enamuhakalaliha mutthu mmurimani mwawe.” (Nsalmu 104:14, 15) Mweekhaikhai eri eriyari ya soovaha Muluku onivanhaawe. Alopwana ni athiyana anhimmwa Biblyani yannawura eviinyu.—1 Timotheyo 5:23.

2. Miruku heeni Biblya onvahaawe wa atthu enthanla owura?

Yehova onhima weera tiwoonanara waatxeera owura ni ohapaliwa. (Agalata 5:21) Biblya oneera: “ohipankane onthamwene ni anamuhapaliwa.” (Miruku 23:20) Mwa yeeyo, waakhala weera ninthanla owura eviinyu—nintthuneya owura ni wiikosoopa—nnaamweera nreenevo meekhiihu, waatxeera owura onnananariha muupuwelo wa mutthu mpakano, ahinawera wiikosoopa mwa itthu onuulumaawe ni ompakaawe. Opwaha mwa yeeyo, onnananariha okumi wa mutthu. Wakhala weera khaninwera wiikosoopa vaavo ninwuraahu, nintthuneya ohiya moomalela owura.

3. Moota heeni nneeraahu nttittimiheke soothanla saatthu akina yaawo anthanla owura ni wiikosoopa?

Owura eviinyu yoothanla ya mutthu meekhaawe. Khontthuneya waathoriha atthu akina yaawo anthanla owura ni wiikosoopa. Nave-tho khontthuneya omunyeserera mutthu owura eviinyu. (Aroma 14:10) Ninnathanla ohiwura wakhala weera etthu eyo ennaakwattuliha atthu akina naari waakumihera maxupo. (Mmusome Aroma 14:21.) Hiyo “ninnása itthu sa atthu akina opwaha sawihu.”—Mmusome 1 Akorinto 10:23, 24.

WEERA MUXUTTEREE SINTXIPALE

4. Muthanle wakhala weera munoowera naari hoye

Yesu oonela hayi owura eviinyu? Weera naakhule nikoho nna, nrowe nuupuwele mwiiriira Yesu aapankaawe weera naakhavihere atthu ophwanya waakhula. Mmusome Yohani 2:1-11, avinyaka mutthekule ni ipontu sinttharelana:

• Moota heeni mwiiriira ola wa Yesu onnikhaviheraaya osuwela moonelo wa Yesu wa ale anthanla owura?

• Mwaha wooweera Yesu khaahimme weera tiwoonanara owura eviinyu, neereke makristu annatthuneya owuupuwelela moonanara ale anthanla owura?

Mwaha wooweera makristu aakhalano otaphuwa woothanla owura naari ohiwura eviinyu, eyo khentaphulela weera etthu eyo tiyooreera opaka. Musome Miruku 22:3, avinyaka mutthekule woohima sa ipontu sinttharelana seiyo sineera sookhavihereni opaka soothanla sooreera woohima sa owura:

• Nyuwo munoowera weettiha ekaaro naari oreherera maquina makina.

• Nyuwo moorupala.

• Meediku onnooleelani weera muhiwureke eviinyu.

• Nyuwo munnawera wiiphima mwaawuraka eviinyu.

• Nlamulo khannaakhulela weera nyuwo nwureke.

• Nyuwo muri ni mutthu onthanla ohiwura mwaha wooweera aakhalano maxupo mwaha woowura eviinyu khalayeene.

Neereke nyuwo munnatthuneya owura eviinyu ofestani yoothela naari mithukumano sa mmawaani? Eheeni enkela wookhaviherani opaka yoothanla? Moone EVIIDIYU.

EVIIDIYU: Kinnatthuneya olawiha eviinyu? (2:41)

Mmusome Aroma 13:13 ni 1 Akorinto 10:31, 32. Mwasoma vale soolepa sootheene iya, mutthekule ni epontu enttharelana:

• Moota heeni ovarela muteko miruku iya oneeraaya wookhavihereni opaka soothanla simmuhakalaliha Yehova?

5. Muthanle ehuhu munkelaanyu owura

Wakhala weera munnathanla owura eviinyu muupuwele ela: Yehova khankhoottiha owura eviinyu mene owo onkhoottiha waatxeera owura. Mwaha wa heeni? Mmusome Hoseya 4:11, 18, ni avinyaka mutthekule ni ipontu sinttharelana:

• Ti heeni enkhumelela waakhala weera mutthu onnaatxeera owura?

Eheeni enkela onikhavihera ohaatxera owura? Ninnatthuneya owura ni wiikosoopa naari neere okhalano mwiilaano. Musome Miruku 11:2, ni avinyaka mutthekule ni epontu enttharelana:

• Mwaha wa heeni oraaya wooreera okhalano mwiilaano naawuraka?

6. Nikhavihero anvahiwaaya ale anwura vantxipale

EVIIDIYU: ‘Miyo ekumi aka yaari yoowaatteliwa’ (6:32)

• Nviidiyuni, etthu heeni Dmitry aapakaawe vaavo aawuraawe?

• Neereke owo aahiyale paahi owura eviinyu ekwaha yoopatxera?

• Moota heeni owo aawinnaawe mukhalelo owo woowura eviinyu?

Mmusome 1 Akorinto 6:10, 11, ni avinyaka mutthekule ni ipontu sinttharelana:

• Neereke ohapaliwa maxupo matokweene yaawo nihintthuneyaahu okuxera matheela?

• Eheeni enoonihera weera mutthu onaatxeerera owura pooti otxentxa mukhalelo awe?

Mmusome Matheyo 5:30, ni avinyaka mutthekule ni ipontu sinttharelana:

• Niphwanaphwaniho Yesu uulummaawe woohima othikila ntata, owo aatthuna ohima weera onnatthuneya wiilipihera weera nimuhakalalihe Yehova. Eheeni munkelaanyu opaka waakhala weera munniwanano mukhalelo wootthuna ohiya ohapaliwa?a

Mmusome 1 Akorinto 15:33, avinyaka mutthekule ni epontu enttharelana:

• Nyuwo mukhalanneene asinthamwene anaatxeerera owura eviinyu, moota heeni etthu eyo eneeraaya yoovoleeleni?

NYAHA SOOTTHUNEYA

Mweekhaikhai eviinyu eri eriyari ya soovaha Yehova onivanhaawe, owo onnamunanara waatxeera owura ni ohapaliwa.

Wuuluula

• Tuuvi ori moonelo wa Biblya woohima sa waatxeerera owura eviinyu?

• Maxupo heeni enkhumelela mwaha woowaatxera owura?

• Moota heeni nneerahu nttittimiheke soothanla sa atthu akina woohima sa owura eviinyu?

WEERA MUSUWELE ITTHU SINTXIPALE

Moota heeni mmiravo aneeraawe apake soothanla woohima sa owura eviinyu?

Muupuwele muhinaaye owura (2:31)

Moone etthu munkelaanyu opaka weera nwine maxupo oowura eviinyu.

“Muheleke eviinyu nipuro naya” (A Sentinela, a 1.º a Janeiro a 2010)

Neereke makristu annatthuneya omaniha ikoopho yaawuraka vale?

“Makoho empakiwa ni ale ansoma irevista sahu” (A Sentinela, a 15 a Fevereiro  a 2007)

Neereke makristu annatthuneya “omaniha ikoopho” yaawuraka vale?

Biblya onnatxentxa mirima sa atthu (A Sentinela, a 1.º a Maio a 2012)