Wahala Oopacerya
19 Nuuvira okathi, mwene Nahaxi a wAmoni aahikhwa. Nto mwanawe aahikhala mwene nipuro nawe.+ 2 Nto Davidi aahihimya wiira: “Kinoomooniherya ophenta woororomeleya+ Hanuni, mwaana a Nahaxi, ntoko paapa awe aakoonihenrye awe ophenta woororomeleya”. Tivo Davidi aahaaruma alopwana awe orowa ommaaliha Hanuni mwaha wa okhweliwa paapa awe. Masi okathi arumeyi a Davidi yaaphiyale aya elapo ya wAmoni,+ wiira yammaalihe Hanuni, 3 makhulupale a wAmoni yaahimuleela Hanuni wiira: “Munuupuwela wiira Davidi onimoottittimihani ohalaka waaruma atthu wiira arwe yoomaaliheni? Davidi ohaaruma arumeyi awe wiira arwe awehawehe elapo ela, ahottele ni apwetexe”. 4 Hanuni aahaavara arumeyi a Davidi, aamettha+ ni othikila malaya aya mpakha muyuununi, nuumala-vo owoomola. 5 Okathi Davidi aaleeliwe awe mwaha owo, aahaaruma alopwana akina orowa okumana ni arumeyi awe, okhala wiira khiyaareere wuulihihiwa muru. Nto mwene aahaaleela wiira: “Muhale oYeriko+ mpakha ereru anyu wunnuwa, nuumala-vo mutthikeke”.
6 Nuuvira okathi, atthu a wAmoni yaahiweha wiira Davidi aahinanariwa. Nto Hanuni ni atthu a wAmoni yaahiroiha italento* 1.000 sa eparatha, wiira aruuheliwe ikaaro sa ekhotto ni anakhavalo a oMesopotaamia,* wArami-Maakha ni oSoba.+ 7 Siiso awo yaahithuma ikaaro sa ekhotto 32.000, nave yaahimulattula mwene a oMaaka ni atoropa awe. Moottharelana, awo yaahirwa amaka ohoolo wa oMedaba.+ Atthu a wAmoni yaahikhuma mpooma, athukumana wiira awane ekhotto.
8 Okathi Davidi aiwale awe etthu eyo, aahimuruma Yowabi+ ni anakhotto awe ootheene, waahela muhina anakhotto awe ootupa.+ 9 Atthu a wAmoni yaahikhuma mpooma ni yaahiilokiherya wiira awane ekhotto vamukhora wa epooma. Vano mamwene ale yaarwiiye, yaahiilokiherya yeemela nipuro noowooneya saana.
10 Okathi Yowabi oonale awe wiira anakhotto yaanimurweela ohoolo ni ottuli, aahaathanla atoropa oosuwela owana ekhotto a wIsarayeli, aalokiherya wiira yawane ekhotto ni atthu a oSiiria.+ 11 Owo aahaahiya anakhotto akina ahooleliwaka* ni munnawe aihaniwa Abixayi,+ wiira aalokiherye wiira yawane ekhotto ni atthu a wAmoni. 12 Vano, Yowabi aahihimya wiira: “Vakhala wiira atthu a oSiiria+ anrowa okhala ootupa okivikana miyo, murwe mukaakihe. Masi, vakhala wiira atthu a wAmoni anrowa okhala ootupa woovikanani nyuwo, kinoowaakihani. 13 Niilipihe, niwaneke moolipa murima+ niwaakihaka atthu ahu ni naakihaka ipooma sa Muluku ahu. Nto Yehova onoopaka ele onoona awe oreerela vamaithoni vawe”.
14 Yowabi ni alopwana awe yaahirowa owana ni atthu a oSiiria, vano atthu awo yaahimutthyawa.+ 15 Okathi atthu a wAmoni yoonale aya wiira atthu a oSiiria yaahitthyawa, nave awo yaahimutthyawa munnawe Abixayi, akela mpooma. Nuumala-vo Yowabi aahitthikela oYerusalemu.
16 Okathi atthu a oSiiria yoonale aya wiira yaahiweriwa ni atthu a Isarayeli, yaahiruma wiihaniwa atthu a oSiiria yaakhala muttetthe wa muro Eufrate.+ Nto awo yaahirwa ahooleliwaka ni Xofaki, xeefi a anakhotto a Hadadezeri.+
17 Okathi Davidi aaleeliwe awe, moowaakuveya aahaathukumanya atthu ootheene a Isarayeli, olapuwela ekhopela ekina ya muro Yordani, orowa okumana naawo, ni iilokiherya owana ekhotto. Vano Davidi aahiilokiherya para owana ekhotto ni atthu a oSiiria, nto awo yaahiwana ni Davidi.+ 18 Masi atthu a oSiiria yaahaatthyawa atthu a Isarayeli. Vano Davidi aahiwiiva anakhotto 7.000 yeettiha ikaaro sa ekhotto ni anakhotto 40.000 a oSiiria yeetta mwentto, nave aahimwiiva Xofaki, xeefi aanakhotto aya. 19 Okathi arumeyi a Hadadezeri yoonale aya wiira yaahiweriwa ni atthu a Isarayeli,+ yaahikumiherya murettele ni Davidi, anamwiiwelela yoowo.+ Nto atthu a oSiiria khiyaaphavenle waakhaliherya atthu a wAmoni.