Matheyo

27 Nuumala oxa, makhulupale a anamukuttho otheene ni makhulupale a ayuda, yaahikohana moota yaarowa aya omwiiva Yesu. 2 Awo yaahimutthukwa Yesu, amuroiha wa kuvernatoro Pilato.

3 Nto Yuda, yoowo anvarihale Yesu, voonale awe wira Yesu aahilamuliwa wiiviwa, aahoova, aahokoloxerya makhulupale a anamukuttho ni makhulupale a ayuda, musurukhu aya 30 wa eparatha. 4 Owo aahaahimeerya wira: “Koottheka okhala wira konvariha mutthu ohitthenke”. Awo yaahimwaakhula so: “Owo mulattu anyu, khahiyo wawihu!” 5 Nto, Yuda aahirihela musurukhu wa eparatha mutemplo, onakhuma. Nuumala-vo, aahirowa wiihopha. 6 Masi makhulupale a anamukuttho, yaahikuxa musurukhu ole wa eparatha, anahimya wira: “Khivanreerela opweha musurukhu ola opuro onisukiwa musurukhu mutemplo, okhala wira ola musurukhu wa ephome”. 7 Nuumala okohana, yaahikuxa musurukhu ole athumana ematta* wira yaavitheke anamurwa. 8 Tivonto ematta eyo eniitthaniwa aya Ematta ya Ephome mpakha olelo-va. 9 Vano yaahiiraneya ele yaahimmwale ni profeta Yeremiya, oriki: “Nave awo yaahikuxa musurukhu 30 wa eparatha, esisapo yaaliveriwe mulopwana, yoowo esisapo awe yaahimmwale ni anamwane a Isarayeli, 10 ni yaahithumana ematta, ntoko Yehova aakirumme awe”.

11 Vano Yesu aaheemela ohoolo wa Pilato, nto Pilato aahimukoha wira: “Niireke nyuwo mwa Mwene a ayuda?” Yesu aahaakhula oriki: “Ti nyuwo munihimya”. 12 Masi okathi ootheriwa awe ni makhulupale a anamukuttho ni makhulupale a ayuda, Yesu khaakhunle etthu. 13 Pilato aahimukoha Yesu wira: “Niireke khamuniiwa itthu iya sinceene atthu ala anihimya aya?” 14 Masi Yesu khaamwaakhunle, nnakhala nuulumo nimosa. Tivo Pilato aahitikinihiwa vanceene.

15 Nto khula efesta ya paasikha, Pilato aahilimalela omutaphula mutthu mmosa aatthukweliwe, yoowo muttitthi wa atthu wamphavela aya. 16 Mahiku awo, aahikhala mulopwana mmosa aatthukweliwe oosuwelexiwa, yoowo iihaniwa Baraba. 17 Tivo, okathi atthu yaathukumanne aya, Pilato aahaakoha wira: “Tuuvi oniphavela anyu wira kimutaphule? Munimphavela Baraba aahiiso Yesu, yoowo oniihaniwa Kristu?” 18 Tthiri, Pilato aanisuwela wira atthu ale yaahinvariha Yesu mwaha wa nrima. 19 Nave-tho, okathi Pilato aakilanthi awe opuro waaphukiwa milattu, mwaarawe aahimuroihela muhupi ohimyaka wira: “Muhiikelihe mulattu wa naxariya owo, maana ohiyu ovinre nkireere ohaawa moolohani mwaha wa yoowo”. 20 Masi makhulupale a anamukuttho ni makhulupale a ayuda, yaahiwoka mittitthi iye sa atthu wira amuthanle Baraba, ni amwiivihe Yesu. 21 Vano Pilato, aahaakoha wira: “Wa atthu ala anli, tuuvi muniphavela anyu wira kimutaphule?” Awo yaahaakhula ariki: “Baraba”. 22 Aahaakoha-tho oriki: “Muniphavela wira kimwiirihe exeeni Yesu, yoowo oniihaniwa Kristu?” Otheene yaahaakhula wira: “Okhomeliwe vamwirini!”* 23 Nto Pilato aahikoha oriki: “Mwaha wa xeeni? Otthenke-ni?” Nlelo awo yaamutepa okhuwela ariki: “Okhomeliwe vamwirini!”

24 Pilato oonale awe wira khaawerya opaka etthu, ni atthu yaamutepa onyakula, aahikuxa maasi onyawa ohoolo wa muttitthi ole, onahimya wira: “Miyo nkirina mulattu ni ephome ya mulopwana ola. Nyuwo ti murina mulattu”. 25 Atthu otheene yaahaakhula, yiiraka: “Ephome awe enimorele hiyo ni aniihu”. 26 Nto Pilato aahimutaphula Baraba, masi aahiruma owaxuliwa Yesu, ni aahaavahererya wira yamukhomele vamwirini.

27 Vano atoropa a Pilato yaahimukuxa Yesu, enamuroiha owannyawe Pilato. Nto yaahaathukumanya atoropa otheene, khimurukurerya Yesu. 28 Yaahimurula malaya awe, amukhuneela ni ekuwo yooxeerya. 29 Yaahipaka ekhara ya miiwa, khunwariha mmuruni, nave yaahinvareliha mutathi moono awe woolopwana. Vano akokhoraka ohoolo wawe, yaaninveeha ariki: “Ihaali, nyuwo Mwene a ayuda!” 30 Awo yaahimusenela ni yaahikuxa mutathi anammana vamuru. 31 Nuumala onveehasa, awo yaahimurula ekuwo eyo yooxeerya, anwariha-tho malaya awe a ota, anamuroiha okhomeliwa vamwirini.

32 Akhumaka opuro ole, yaahimphwanya mulopwana mmosa a oKirene, aihaniwa Simoni. Awo yaahimukhanyererya mulopwana owo oteexa mwiri wa nihaaxeryo* wa Yesu. 33 Nuumala ophiya nipuro niihaniwa oGolgotha, eyo piiyo, Muru Ohanle Makhuva-ru, 34 awo yaahinvaha eviinyu yaatakaaheriwe ni makukhu oowaawa wira owurye. Masi nuumala Yesu olawiha, aahikhootta owurya. 35 Nuumala omukhomela Yesu vamwirini, atoropa ale yaahikawana malaya awe a ota, yaavereryaka eparakha.* 36 Nave yaahikilaathi vaavo ananwehaweha. 37 Vasulu va muru awe, yaahipweha nipawe naahimya mulattu ene aakhomeliwa awe. Nipawe nlo naalempwe so: “Ola Yesu, Mwene a ayuda”.

38 Yaahikhomeliwa-tho vamwirini alatarau anli vamosa nuuwo. Mmosa moono awe woolopwana, mukina moono awe woothiyana. 39 Nto atthu yaavira, yaaninveeha Yesu attikinyaka muru, 40 yiiraka: “Nyuwo mwaahimya wira munoopwexa etemplo ni mwanwerya oteka-tho muhina mwa mahiku mararu, mwiixoopole! Mwaari mwaana a Muluku, mukhuruwe vamwirini wa nihaaxeryo-vo!”* 41 Nave-tho, makhulupale a anamukuttho, alipa-oowiixuttiha Nlamulo ni makhulupale a ayuda, yaaninveeha, ariki: 42 “Ola oowerya owoopola atthu akina, masi khoniwerya wiixoopola! Ola Mwene a Isarayeli, mmuhiye okhuruwe vamwirini wa nihaaxeryo* vale, nto hiyo nnoomukupali. 43 Ola onimuroromela Muluku; nto vakhala wira Muluku owo onnimoonela vatthu, weeso omoopole, maana ola oohimya wira: ‘Miyo ka Mwaana a Muluku’”. 44 Siiso-tho, hata alatarau yaakhomeliwe vamosa nuuwo, yaaninveeha.

45 Okhuma 12 oora,* elapo ele yotheene yaahikhumelela ewiriphi* mpakha 15 oora.* 46 Yeettaka 15 oora,* Yesu aahikhuwela ni nsu noowiiwanyeya, oriki: “Eli, Eli, lama sabakthani?”, eyo piiyo, “Muluku aka, Muluku aka, xeeni muhalaka okinyanyala?” 47 Atthu akina yeemenle opuro ole, nuumala omwiiwa, yaahiira: “Ola onimwiihana Eliya”. 48 Niinaano-ru, mutthu mmosa aahitthimakela exiponxa,* khuxuweya nviinyuni yoonyuunya, otthukwelela vamutathini, onanvaha Yesu wira owurye. 49 Masi akina yaahimya wira: “Mmuhiye! Noone vakhala wira Eliya onimoorwa omoopola”. 50 Yesu aahitthikela-tho okhuwela ni nsu noowiiwanyeya, nuumala-vo, aahikhwa.*

51 Nto, ekortiina ya mutemplo yaahikhereya okhuma osulu mpakha vathi. Nave-tho, elapo ele yaahitetereya, ni myala saahiphweeya. 52 Vano mahiye yaahitthukuwa, mirutthu sinceene sa ale oororomeleya,* yaawo yaakhwiiye, saahiriheliwa ota, 53 sinooniwa ni atthu anceene. (Atthu yaakhuma omahiye nuumala Yesu ohihimuxiwa, yaahikela epooma yoowaarya.*) 54 Nto, okathi mukhulupale a anakhotto ni atthu aarina awe anwehawehaka Yesu, voonale aya etetere ni itthu siiraneya, yaahoova vanceene, anahimya wira: “Tthiri, ola aari Mwaana a Muluku”.

55 Vaavo, yaahikhala athiyana anceene, yeemenle ottaiwene, awehaka. Athiyana awo, yaahimutthara Yesu okhuma oGalileya, anvarelaka muteko. 56 Mwa yaawo, aahikhala Maria Madalena, Maria maama awe Yakobo ni Yosefe, vamosa ni maama aya anamwane a Zebedeyo.

57 Nihinatthi okela nsuwa, aahirwa mulopwana mmosa thaaciri, aihaniwa Yosefe, a elapo ya wArimathaya, yoowo aari mwiixutti a Yesu. 58 Mulopwana ole aahirowa wa Pilato, onvekela murutthu wa Yesu. Nto Pilato owo aahiruma wira ovahiwe. 59 Yosefe aahikuxa murutthu wa Yesu, ovitikelela ni ekuwo ya eliinyu yooreera, 60 ni aahivitha mmahiye masya, yaathimpwale vamwala. Nuumala-vo, aahipirikixa nluku nuulupale, khuttiyela mukhora a mahiye awo, onarowa. 61 Masi Maria Madalena ni Maria mukina, yaahihala vaavale, akilanthi ene ohoolo wa mahiye.

62 Itthu iya siiraneyale nihiku naalokiheriwa aya esaabadu. Mmeeloni mwaya, makhulupale a anamukuttho ni afarisi, yaahithukumana ni Pilato, 63 anahimya wira: “Pwiya, ninnuupuwela wira nawoothe ole, ori ene mukumi aahihimya wira: ‘Yavira mahiku mararu, kinoohihimuxiwa’. 64 Tivonto, murume wira mahiye ale awehawehiweke saana mpakha nihiku na neeraru, wira awiixutti awe ahirowe wiiya murutthu awe, vano yaahimeeryeke atthu wira: ‘Owo oohihimuxiwa mookhwaani!’ Nto wootha nno, waarowa okhala wootepa otakhala ovikana wootha wawe woopacerya”. 65 Siiso, Pilato aahihimya wira: “Mwaakuxeke makwarta. Muroweke mwawehaweheke ntoko munoona anyu oreerela”. 66 Nto yaahirowa olipiha nluku naattiyeliwe mahiye, ni yaahaapweha makwarta.