Miteko
28 Nuumala ophiya ni murettele, naahisuwela wira esisiro ele yaihaniwa Malta. 2 Atthu a muttetthe ole, yaahinireerela murima vanceene. Nto, okhala wira yaanirupa epula ni vaaniriirya, awo yaahipattiha mooro, ni yaahinaakhela saana. 3 Masi okathi Paulo aattottenle awe ikhuni, khurihela vaikho, yaahikhuma evili, mwaha wa oviha wa mooro. Nto eyo yaahimuluma ntata, epharelela vaavo. 4 Okathi atthu a muttetthe ole yaawenhe aya evili ele epharelenle ene ntata na Paulo, awo yaahipacerya ohimeeryana wira: “Veekeekhai, mulopwana ola nawiive. Hata owenrye ene woopowa mphareya, Exariya* khemweemihenrye okhala mukumi”. 5 Paulo aahitathela evili ele vaikho, masi eyo khiyaamooninhe owereya. 6 Vano awo yuupuwela wira Paulo aamwiipa moono aahiiso aamookhwa niinaano-ru. Masi nuumala olipelela okathi munceene, anoona wira khiyaamukhumelela etthu yootakhala, atthu ale yaahituruka muupuwelo aya, enapacerya ohimya wira Paulo aari muluku.
7 Waattamela opuro ole, saahikhala imatta sa mukhulupale a esisiro ele, yoowo aihaniwa Publio. Mulopwana owo, aahinaakhela saana ni aahinikhapelela mahiku mararu. 8 Paapa awe Publio owo, aarimummaathi vakhaamani, owereiwaka efeepere* ni ovaluwasa.* Nto Paulo aahirowa vaari awe, ovekela, omwiixaatherya matata, khimpenuxa. 9 Nuumala okhumelela etthu ela, atthu akina a esisiro ele yaawereiwa, yaahipacerya orwa wa Paulo, khiyapenuxiwa. 10 Awo yaahooniherya oxukhurela waya anivahaka itthu sinceene. Okathi naakhuma ahu ni pakiti, awo yaahihela mpakitini-mmo itthu sotheene saanithowa.
11 Vaamanle aya miyeeri miraru, naahinwela pakiti aarina esinaale eni: “Anamwane axilopwana a Zeu”. Pakiti owo aari a wAlexandriya, nto aahiviriha eyiita esisiro ele. 12 Naahiphiya eporto* ya oSirakusa, nikhala weiwo mahiku mararu. 13 Naahikhuma weiwo nnarowa oReexio. Mmeeloni mwaya, epheyo yaakhuma osuuli* yaahoopa. Vano naahiphiya oPotiyoli, nihiku na nenli. 14 Naahaaphwanya weiwo axinna, nto yaahinixonttela okhala naawo mahiku 7. Nuumala-vo, naahirowa oRoma. 15 Okathi axinna a oRoma yaiwale aya wira naanirwa, yaahirwa okumana ni hiyo, opuro wiihaniwa Apio ni Ipa Tthaaru.* Vaawehale awe axinna ale, Paulo aahimuxukhuru Muluku, ni khulipihiwa murima. 16 Nuumala ophiya oRoma, Paulo aaheemereriwa okhala mekhawe, masi owehawehiwaka ni toropa.
17 Nuuvira mahiku mararu, Paulo aahiwiihana alopwana oottittimiheya a ayuda. Okathi yaathukumanne aya, owo aahaahimeerya wira: “Axinnaka, miyo nkipanke etthu enaavirikanya atthu ahu, aahiiso enivirikanya soolema sa amuhavinre ahu. Kirwiiye ntoko mulipa-ootthukiwa, kikhumaka oYerusalemu, khuvahereriwa mmatatani mwa aroma. 18 Nuumala okikoha, aroma yaahoona wira nkaarina mulattu wira akiive, nto, yaaniphavela okitaphula. 19 Masi ayuda yaahikhootta, tivo kaavekenle aka wira mwaha aka waphukiwe ni Seesari. Hata vari siiso, nkaarina mulattu woowaahimyana atthu a nloko naka. 20 Siiso, koovekela wira kooweheeni ni koolavuliheni, okhala wira miyo kootthukiwa ni ikwirinti iya mwaha wa ole aisarayeli animulipelela aya”. 21 Awo yaahimuhimeerya wira: “Hiyo khinaakhenle ipaphelo sinikhuma oYudeya, soohimyakani nyuwo, nnakhala khuuvo munna okhumme weiwo, onihimenrye aahiiso olavunle etthu yootakhala, oohimyakani nyuwo. 22 Masi vannireerela wiiwa muupuwelo anyu, maana noosuwela wira etiini ela esya, ennivaanyihiwa mapuro otheene”.
23 Vano, atthu ale yaahiphavela nihiku wira arowe yakumane ni Paulo. Nto, yaahirwa atthu anceene okumana ni Paulo opuro aamanke awe. Okhuma voosiisu mpakha ohiyu, aahaatthokiherya itthu, aalaleeryaka oratteene Omwene wa Muluku, ni eereryaka owiiriha omukupali Yesu. Owo aarumenle nlamulo na Moise ni soolempwa sa Maprofeta. 24 Atthu akina yaahikupali moolumo a Paulo, masi akina khiyaakupanli. 25 Nto, okhala wira khiyaiwanana, awo yaahipacerya okhuma. Tivo, Paulo aahilavula moolumo ala:
“Munepa woowaarya woomukhaliherya Yesaya olavula moolumo ala eekeekhai, aahimyaka amuhavinre anyu, 26 oriki: ‘Murowe mwaahimeerye atthu ala wira: “Nyuwo munimwiiwa oratteene, masi khamunrowa osuwelaka etthu ene. Nave munrowa owehaka oratteene, masi khamunrowa woonaka etthu. 27 Mirima sa atthu ala soowaleya. Awo anniiwa, masi khanitthara, nave anniwala maitho aya ni maaru aya wira ahooneke nnakhala ahiiweke. Nave-tho, murima aya khoniiwexexa etthu, hata khaniwerya okitthikela wira kaapenuxe”’. 28 Vano, musuwele wira ale ahikhanle ayuda, aaroiheliwa ehapari ya woopowa nno onikhuma wa Muluku. Mweekeekhai, awo animwiiwelela”. 29 *——
30 Siiso, Paulo aahikhala iyaakha piili soomalela, empa ele aalukanri awe. Owo aaniwaakhela saana otheene ale yaarowa onweha. 31 Nave aanaalaleerya atthu awo Omwene wa Muluku, ni aaniwiixuttiha itthu saamuhimya Pwiya Yesu Kristu, ohoovaka etthu, ni ohikhoottiheriwaka ni mutthu.