Miteko

3 Nihiku nimosa, Pedru ni Yohani yaarowa mutemplo ovekela makaaripi. Mavekelo awo, yaapakiwa 15 oora.* 2 Okathi ene yoowo, aahikhala mulopwana mmosa aayariwe oorakala ene, aateexiwe. Khula nihiku, aaniruuhiwa onapwehiwa waattamela vamukhora wa etemplo, wiihaniwa mukhora Wooreera, wira aavekeleke esimola ale yaakela mutemplo. 3 Okathi anwenhe awe Pedru ni Yohani ahalaka okela mutemplo, aahipacerya waavekela esimola. 4 Masi Pedru ni Yohani, yaahinwehexexa mulopwana ole, anahimya wira: “Nkaniweheni”. 5 Nto owo aahaawehexexa oratteene, olipelelaka wira yaamunvaha etthu. 6 Vano, Pedru aahimuhimeerya wira: “Miyo nkirina eparatha nnakhala eweero. Masi kirina aka tiila kinoovahaakani. Mwa nsina na Yesu Kristu munazarethi, mweemele, mweetteke!” 7 Siiso, Pedru aahivarela moono woolopwana wa mulopwana ole, khimweemexa. Niinaano-ru, metto sawe saahilipa. 8 Nuumala-vo, aahitupha, onapacerya weetta naawo, okelaka mutemplo. Owo aaneetta ni aanitupha omuttottopelaka Muluku. 9 Atthu otheene yaahinweha eettaka ni omuttottopelaka Muluku. 10 Nto atthu awo yaahimusuwela, wira mulopwana ole ti yoole aamakela okilaathi Vamukhora Wooreera wa etemplo, olipelelaka ovahiwa esimola. Vano, yaahitikinihiwa vanceene mwaha wa ele yaamukhumelenle mulopwana ole.

11 Nlelo mulopwana ole ovarenle ene ntata na Pedru ni Yohani, atthu otheene yaahitthimakela opuro yaari aya, wiihaniwa Niphiryo na Salomoni, atikinihiwe ene vanceene. 12 Okathi Pedru aawenhe awe eyo, aahaahimeerya atthu ale wira: “Nyuwo atthu a wIsarayeli, xeeni munitikinihiwa anyu vanceene ni etthu ela? Nave xeeni munniwehexexa anyu, okhalaka ntoko nimwiirinhe mulopwana ola weetta nirumeelaka owerya wahu, aahiiso mwaha woowi ninnimurumeela Muluku ni murima wotheene? 13 Muluku a Abrahamu, ni a Isaakhi ni a Yakobe, ni Muluku aamuhavinre ahu, onvuwiha Murumeyi awe, Yesu, yoowo mwanvaherenrye anyu ni mwaamukhoottale anyu ohoolo wa Pilato, hata Pilato owo aalakenle omutaphula. 14 Aayo, nyuwo moomukhootta mulopwana oowaarya ni a xariya, nvekela wira nvahereriwe nawiive, 15 masi moomwiiva Murumeyi Muulupale onivaha okumi. Muluku oomuhihimuxa mookhwaani, nto hiyo nooweha eyo yiiraneyaka. 16 Mwa nsina na Yesu, ni mwaha woowi hiyo ninnaamini nsina nawe, metto sa mulopwana ola munimoona anyu ni munimusuwela anyu, soolipihiwa. Tthiri, okhala wira hiyo ninnimwaamini Yesu, mulopwana ola munimoona anyu, ookhala saana. 17 Axinnaka, koosuwela wira nyuwo moopaka itthu iya mwaha woohisuwela, siisaale yiirale aya anamalamulela anyu. 18 Siiso, Muluku oomaliherya itthu aahimmye awe khalai, aarumeelaka maprofeta awe otheene, wira Kristu aahaana ohaawa.

19 “Tivo, murukunuxe murima anyu, muturuke mweettelo anyu,* wira Yehova ooleveleleni itampi sanyu ni ooruuheleni mahiku a murettele, 20 nave ooruuheleni Kristu omuthanlale awe, eyo piiyo, Yesu. 21 Aarumeelaka maprofeta awe oororomeleya, Muluku ooleiherya khalai ene wira nihiku nimosa, itthu sotheene sinoolokiheriwa.* Masi mpakha ophiya okathi itthu sotheene sinrowa aya okhalihiwa isya, Yesu ohaana okhala wiirimu. 22 Mweekeekhai, Moise oohimya wira: ‘Eriyari ya atthu a nloko nanyu, Yehova Muluku anyu, onimookumiheryani profeta ntoko miyo. Muhaana owiriyana khula etthu onooleelaaweni. 23 Tthiri, ole ohinimwiiwelela Profeta owo, Muluku onompwetexa’. 24 Mweekeekhai, maprofeta otheene, opaceryaka ni profeta Samuweli, aalaleya oratteene mahiku ala. 25 Maprofeta awo aahimya nivarihano Muluku aapanke awe ni amuhavinre anyu. Nivarihano nlo, ninnoohelani-tho muhina, okhala wira Muluku aahimuleiherya Abrahamu wira: ‘Mwaha wa osuulu* anyu, maloko otheene a elapo ya vathi, anrowa waakhela itthu sinceene sooreera’. 26 Nuumala Muluku omuhihimuxa Murumeyi awe,* oomuruma wira opacerye wooreelihani nyuwo, owiirihakani ottharuwa miteko sanyu sootakhala”.