Miteko

27 Okhala wira vaahiiwananiwa wira nrowe wItaalia ni pakiti, Paulo vamosa ni atthu akina yaavariwe, yaahivahereriwa mukhulupale a anakhotto aihaniwa Julio, a ekrupu ya atoropa yaihaniwa Augustu. 2 Naahinwela pakiti a wAdramiti, yoowo aarowa iporto* sa wAsia. Nuumala-vo, naahikhuma. Aristarko yoowo aari a oTesaloonika, eprovinsia ya oMasedonia, aari ni hiyo. 3 Mmeeloni mwaya, naahiphiya oSidoni. Nto, mukhulupale a anakhotto Julio, aahimureerela murima Paulo ni aahimweemererya orowa waaxukurya apatthani awe, wira emukhapeleleke.

4 Naakhumale ahu weiwo, naahirowa esisiro ya oKiipero, weiwo epheyo yaanikakhela aya. 5 Nuumala-vo, naahilapuwa ephareya yoowiixerya niviraka oSilisia ni oPanfiilia, niphiya eporto* ya oMira, elapo ya oLisia. 6 Weiwo, mukhulupale a anakhotto aahimphwanya pakiti a wAlexandria, yoowo aarowa wItaalia. Nto, aahiniweliha pakiti owo. 7 Nuuvira mahiku manceene, neettaka vakhaani-vakhaani ni pakiti, naahiphiya oKinido ni mixankiho. Mwaha wa epheyo yaanikhoottiherya orowa ohoolo, tivo naahivira oSalimona, nuumala-vo naaheetta ni pakiti nrowaka oKereta wira nitthyawe epheyo. 8 Nto pakiti ahu aaheetta ni mixankiho okerekhere wa ephareya, khuphiya opuro wiihaniwa Iporto* Sooreera, yoowo waari waattamela epooma ya oLaseya.

9 Yaahivira mahiku manceene, nto vaanoopiha weetta mphareya ni pakiti, okhala wira otthukwa* wa Nihiku na Oleveleliwa Itampi waahivira. Tivo, Paulo aahaalopola 10 atthu ale, iiraka: “Apatthani, kinoona wira mukwaha ola, onookumiherya maxakha, nave itthu sinceene sinoohononeya, ohiya paahi miritti ni pakiti ola, masi-tho hiyo pooti okhwa”. 11 Masi, mukhulupale a anakhotto aahimwiiwelela mulipa-aamweettiha pakiti ni mwaneene pakiti ole, ohiya wiiwelela ele Paulo aahimya awe. 12 Okhala wira khivaareerela okhala eporto* ele eyiita, anamunceene yaahivaha miruku wira nikhume opuro ole, noone vakhala wira vanweryaneya ophiya oFeniki, wira navirihe eyiita weiwo. Eporto* eyo yaari oKereta, oluluwanya mpantta onikhuma nsuwa.

13 Okathi epheyo yaakhuma osuuli* yaapacenrye aya woopa vakhaani-vakhaani, awo yuupuwela wira yanwerya ophiya oFeniki. Nto, yaahimutaphula nankura, anavira oKereta, waattamela okerekhere wa ephareya. 14 Masi, nuuvira okathi vakhaani, yaahoopa epheyo yuulupale eniihaniwa Eurakiilo. 15 Okhala wira pakiti aanikakhiwa vanceene ni epheyo, hiyo khinaawerya omweettiha nrowaka ohoolo. Siiso naahimuhiya opuruliwaka. 16 Naahivira okerekhere wa ephareya, nittiyeleliwaka ni esisiro yaamukhaani eniihaniwa Kauda. Hata vari siiso, vaahinixankiha okhapelela ekalawa* yaamukhaani yaari ottuli wa pakiti. 17 Masi, ale yaamweettiha pakiti, yaahiweliha ekalawa ele mpakitini, nuumala-vo yaahimutthukwa pakiti ni mikhoyi wira olipe, maana yaanoova wira aarowa ophara vamihaavani sa oSirti.* Nto awo yaahuukulula eveela,* vano pakiti owo aahipacerya weettihiwa ni epheyo. 18 Mmeeloni mwaya, epheyo yaanitepa onimana ni ikuru, tivo atthu yaahipacerya orihela miritti mphareya. 19 Nto nihiku na neeraru, awo yaahirihela mmaasini ni matata aya, itthu sikina sa pakiti.

20 Vano, yaahivira mahiku manceene nihoonaka nsuwa nnakhala itheneeri, nave epheyo yuulupale yaamutepa onimana. Nto nlipelelo notheene naarina ahu noowi naamoopowa, naahipacerya omala-mala. 21 Nuumala ovira mahiku manceene alopwana ale ahilyaaka etthu, Paulo aaheemela eriyari aya, onahimya wira: “Alopwana, nyuwo mwaahaana okiwiriyana okathi kaahimmye aka wira nihikhume oKereta, nto eyo yooniiriha ohaawa ni opweteiwa. 22 Vano, kinooleelani wira mulipihe murima, maana khuuvo mutthu mmosa a nyuwo onrowa okhwa, masi pakiti paahi tonrowa ohononeya. 23 Ohiyu ola, Muluku kinimurumeela aka ni kinimukokhorela aka, ooruma nlaikha nawe, neemela ohoolo waka, 24 nnahimya wira: ‘Paulo, muhoove. Muhaana orowa ohoolo wa Seesari, tthiri Muluku onoowoopolani, vamosa ni otheene ale murina anyu mpakitini’. 25 Tivo, alopwana, mulipihe murima, okhala wira miyo kinnimukupali Muluku, wira vanimwiiraneya ntoko kihimeeriwe aka. 26 Masi, hiyo nihaana oriheliwa mukerekhere wa esisiro emosa”.

27 Nto nuumala oviriha mahiku 14, othana ni ohiyu, nimaniwaka ni epheyo ephareya ya wAdria, ohiyu eriyari, alipa yaamweettiha pakiti, yaahipacerya waanyiherya wira yaanaattamela etthaya. 28 Vaamanle aya ophima, yaahiphwanya wira wiixerya waya waari imeeturu 36. Nuumala weetta vakhaani, yaahiphima-tho, aphwanya imeeturu 27. 29 Nto yoovaka omana mwala, yaahaarihela anankura axexe ottuli wa pakiti, ananlela wira vaaxiiye. 30 Masi ale yaamweettiha pakiti, yaaheererya okhuma mpakitini. Awo yaahikuruxela ekalawa yaamukhaani mphareya, yoothereryaka wira yaaphavela waarihela anankura ohoolo wa pakiti. 31 Vano Paulo aahimuhimeerya mukhulupale a anakhotto ni atoropa wira: “Alopwana ala yaakhuma-ru mpakitini-mu, nyuwo khamunrowasa woopowa”. 32 Okathi yoowo, atoropa yaahikwasa mikhoyi sa ekalawa eyo, khuhiya emorelaka mmaasini.

33 Nto vahalaka oxa, Paulo aahaatumererya atthu otheene wira elye etthu, oriki: “Olelo, aniira mahiku 14 munilipelela anyu vanceene, nave khamulyiiye etthu. 34 Vano kinootumereryani wira mulyeeke, wira mukhale saana, maana khuuvo a nyuwo onrowa omora nnakhala ekharari emosa mmuruni mwawe”. 35 Nuumala olavula siiso, aahikuxa ephaawu, aahimuxukhuru Muluku ohoolo wa atthu otheene, aahikawanya, onakhuura. 36 Nto otheene aya yaahilipiha murima, anapacerya olya. 37 Pakiti ole, naari atthu 276. 38 Nuumala olya mpakha ovona, yaahivukula miritti mpakitini-mme, arihelaka etiriku mphareya.

39 Voosiisu, ale yaamweettiha pakiti, khiyaasuwela opuro yaari aya, masi yaahiweha nipuro noohiixa na ephareya, nto yaaniphavela omweemexa pakiti weiwo, vakhala wira vanweryaneya. 40 Tivo yaahikwasa mikhoyi sa anankura, yaahiya amorelaka mphareya, nave okathi ene yoowo, yaahitaphula mikhoyi sa eleemi yeettihaniwa pakiti. Nuumala-vo, yaahirukunuxela opheyoni eveela ya* ohoolo, enarowa ophareya. 41 Nuumala pakiti ophiya opuro waari mihaava sinceene, awo yaahimweettiha vamihaavani, nto mpantta wa ohoolo waahiphara, ohinattikinyeya. Masi mawimpi yaanimana mpantta wa ottuli wa pakiti ole, anampwexakasa. 42 Siiso, atoropa yaahuupuwela owiiva alipa-ootthukiwa, wira ahituphele mmaasini, etthyawe. 43 Masi mukhulupale a anakhotto aaniphavela omoopola Paulo, tivo khaaweemerenrye atoropa ale opaka ele yaaphavela aya. Nave aahaaruma ale yaasuwela okata wira atuphele mmaasini, apaceryeke orowa ota. 44 Nto ale yaarowa ohala, yaamwaattharaka ottuli: akina awenle ene ithaapwa, akina ipetaasu sa pakiti ole. Tivonto, otheene aya yaahiphiya vatthayani, ari ene akumi.