aHeeperi

9 Nivarihano nne noopacerya, naahikhalana malamulo, yaawo namukuttho aatthara awe, okathi aavara awe muteko wa Muluku opuro woowaarya valaponi. 2 Eheema ele yaatekiwe, yaarina ipantta piili. Epantta yoopacerya, waahikhala-mo muthuko,* ni meesa, ni iphaawu saavahiwa Muluku. Nipuro nlo, naihaniwa Nipuro Noowaarya. 3 Masi ottuli wa ekortiina ya nenli, naahikhala nipuro na eheema naihaniwa Nipuro Noowaaryexa. 4 Nipuro nno, naahikhala altaari a eweero, yaapahiwa aya erupani, nave naahikhala nivuku na nivarihano naapakiwe ni eweero, memmo mwaari aya murinki wa eweero waarina emana ni ekopo ya Aroni, yeeyo yaaphunwe ifilori. Nave-tho, saahikhala-mo ithaapwa sa nivarihano. 5 Vasulu va nivuku nlo, yaahikhala makerubi oovuwa, yaawo yaakhuneela etampa* ya nivuku ni mapupha aya. Masi ola khahiyo okathi woolavula itthu iya, kamosa-kamosa.

6 Nuumala itthu iyo otekiwa siiso, anamukuttho yaanikela khula nihiku epantta yoopacerya ya eheema, wira evareke miteko sa Muluku. 7 Masi namukuttho muulupale aanikela mekhawe epantta ya nenli ya eheema, ekwaha emosa khula mwaakha, ni aahaana okuxa ephome, yeeyo aavaha awe mwaha wa itampi sawe ni itampi atthu yaapaka aya ahisuwelaka. 8 Siiso, munepa woowaarya onnooniherya wira khuuvo aatonko wooniheriwa ephiro yaaroiha nipuro noowaarya, okathi eheema yoopacerya yaakhanle aya. 9 Eheema ela, nlikanyiho na itthu siniiraneya okathi ola, ni ennooniherya wira soovaha vamosa ni mikuttho saavahiwa, khasinwerya omwiiriha mutthu onivara muteko wa Muluku, okhalana murima* wooloka. 10 Masi soovaha iyo ni mikuttho, sinivarihana paahi ni soolya, ni soowurya ni inamuna soovirikana sa oreeriha itthu ni waareeriha atthu.* Itthu iyo, saanivekeliwa ni Nlamulo na Moise, nave saavarihana ni erutthu, ni saaneetteliwa mpakha ophiya okathi waarowa aya olokiheriwa itthu.

11 Okathi Kristu aarwiiye awe, aari namukuttho muulupale a itthu sooreera saavinre. Nave, owo aahikela muhina mwa eheema yuulupalexa ni yooreerexa, yeeyo ehipakiwe ni atthu, ni ehikhanle ya elapo yeela ya vathi. 12 Owo ookela nipuro noowaarya, ohikunxe ephome ya ipuri ni inyompe saamukhaani, masi okunxe ene ephome awe. Ookela ekwaha emosa paahi, ni oonoopola voohimala. 13 Anamukuttho annirumeela ephome ya ipuri ni ya inyompe, ni annaatathela ettuurwa ya mwaanyompe, ale ananarihiwe. Nto eyo enniwiiriha atthu awo okhala ooreera vamaithoni va Muluku. 14 Masi ephome ya Kristu yootepa okhalana efaita. Okhaliheriwaka ni munepa woowaarya ohinimala, Kristu ohiivahererya wa Muluku, ntoko mukuttho woomalela. Ephome awe enniiriha murima* ahu okhala wooloka ni khaninvara-tho miteko seethiru.* Siiso, nnoowerya onvarela muteko Muluku mukumi.

15 Tivonto owo ori awe mulipa-oowaataaniha a nivarihano na niinaano. Owo ookhala mulipa-oowaataaniha wira ale yiihaniwe, yaakhele etthu aleiheriwe aya, yeeyo ehinimala. Itthu iyo sotheene sinniweryaneya mwaha wa okhwa wawe ni yoowoopola* ovanhe awe, seiyo siwiirinhe woopoliwa itampi yaapanke aya, okathi yeettela aya nivarihano na khalai. 16 Tthiri, okathi mutthu onipaka awe nivarihano ni Muluku, mutthu owo ohaana okhwa, wira nivarihano nlo nilipe, 17 okhala wira nivarihano ninlipa akhala wira mutthu owo opanke ohookhwa, maana nivarihano nlo khaninrowa olipa, mutthu owo opanke nlelo ori ene mukumi. 18 Tivonto, nivarihano na khalai naapacerihiwe-tho ni ephome. 19 Nuumala Moise waaleela atthu sooruma sotheene sa Nlamulo, owo aahikuxa ephome ya inyompe saamukhaani ni ya ipuri, khutakaaherya maasi. Nto, aahikuxa ekuwo yooxeerya, khutthukwelela vamutathini mwaamukhaani,* onatathela ephome eliivuru* ya nivarihano ni onaatathela atthu otheene, 20 ohimyaka wira: “Ela ti ephome ya nivarihano, nenno Muluku oorumalyaaweni osuka”. 21 Siiso-tho, aahitathela ephome eyo eheema ni mihasa sotheene saarumeeliwa ovariwaka muteko wa Muluku. 22 Tthiri, nitthariwaka Nlamulo, itthu sinceene sinireerihiwa ni ephome. Nave-tho, yaahimwaraxiwe ephome, khivaniweryaneya oleveleliwa itampi.

23 Tivo, ele eri eruku ya itthu sa wiirimu sihaana oreerihiwa siisa, masi itthu sene sa wiirimu, sinivekela mikuttho sootepexa oreera. 24 Kristu khokenle nipuro noowaarya nipakiwe ni matata, nenno nri nlikanyiho na nipuro noowaarya neekeekhai. Masi ookela wiirimu, tivonto, onniwerya orowa ohoolo wa* Muluku, iirelaka mureerelo ahu. 25 Owo khaarowa wiivahererya ikwaha sinceene, ntoko oniira awe namukuttho muulupale, okathi onikela awe nipuro noowaarya, khula mwaakha, okunxe ene ephome ehikhanle yawawe. 26 Vaakhanle wira ti siiso, weeso owo aahaana ohaawa ikwaha sinceene, okhuma okathi opattuxiwe aya olumwenku.* Vano, ohiixooniherya ekwaha emosa paahi, wookiseryani wa olumwenku,* wira omalihe etampi, orumeelaka mukuttho awe. 27 Siisaale mutthu onikhwa awe ekwaha emosa paahi, nuumala-vo onaphukeliwa, 28 siiso-tho, Kristu aahivahereriwa ekwaha emosa paahi, wira okuxe itampi sa atthu anceene. Ekwaha ya nenli onirwa awe, khonirweela itampi, nave onoowehiwa ni ale animwaavya ni murima wotheene wira yoopoliwe.