Matheyo
22 Yesu aahitthikela olavula ni atthu orumeelaka malikanyiho, iiraka: 2 “Omwene wa wiirimu pooti olikanyihiwaka ni efesta ya ekasamento,* yeeyo mwene mmosa ampakenle awe mwanawe mwaamulopwana. 3 Nto mwene owo aahaaruma arumeyi awe owiitthana atthu aalattunle awe efesta eyo. Masi atthu ale yaahikhootta orowa. 4 Vano aahaaruma arumeyi awe akina, iiraka: ‘Mwaaleele atthu alattuliwe, wira: “Yoolya yoolikana. Inyompe saka ni inama sikina sooneneva, soohitiwa. Itthu sotheene soolikana. Murwe ofestani wa ekasamento”’. 5 Masi awo khiyaathokorenrye, mmosa khurowa omatta wawe, mukina khurowa omwiira nakoso awe. 6 Nave akina yaahaavara arumeyi awo, yaahaamana, khuwiiva.
7 “Mwene ole aahinanariwa vanceene, aahaaruma anakhotto awe orowa waapwetexa anawiive awo ni opaha epooma aya. 8 Nuumala-vo, aahaahimeerya arumeyi awe wira: ‘Efesta ya ekasamento yoolikana,* masi atthu yaalattuliwe khiyaaphwanelela. 9 Tivonto, murowe istaraata suulupale sinikhuma mpooma, mwaalattule atthu otheene anrowa anyu waaphwanya wira arowe efesta ya ekasamento’.* 10 Siiso, arumeyi awo yaahirowa istaraata iyo, yaathukumanya atthu otheene yaaphwannye aya, ootakhala ni ooreera murima. Nto opuro ole waapakiwa efesta ya ekasamento* yaahisareya atthu yaalya.*
11 “Okathi mwene aakenle awe wira aawehe* atthu yaalattuliwe, aahimoona mulopwana mmosa ahaawanre nlaya na ekasamento. 12 Tivo, aahimukoha wira: ‘Mpatthani, mukenle sai muhirina nlaya na ekasamento?’ Nto owo khaakhunle etthu. 13 Mwene aahiwiirela arumeyi awe wira: ‘Mmutthukwe mutthu ola metto ni matata, mmurihele ota, weepiphini. Weiwo tonrowa awe wunla ni olumanyiha maino awe’.
14 “Atthu oolattuliwa khareere, masi ale athanliwe ari vakhaani”.
15 Nto afarisi yaahikhuma opuro ole, anavaanela moota wonvara Yesu ni moolumo awe. 16 Vano yaahaaruma awiixutti aya vamosa ni atthu yaamutthara Herodi, orowa omuleela wira: “Mwiixuttihi, noosuwela wira okathi wotheene munilavula ekeekhai ni muniixuttiha ekeekhai ya Muluku, ni khamunimuthanla mutthu, okhala wira khamuniweha makhalelo a atthu. 17 Nkahaya munleele moonelo anyu: niireke vannireerela omuliva mpoosito Seesari wala nnaari?” 18 Yesu osuwelaka muupuwelo aya wootakhala, aahiira: “Nyuwo anawoothe, xeeni munikeehererya anyu? 19 Mukooniherye musurukhu wa mpoosito”. Awo yaahimuruuhela etenaario* emosa. 20 Yesu aahaakoha wira: “Elatarato ela ni nsina nilempwale-va, ti yawani?” 21 Awo yaahaakhula wira: “Ti ya Seesari”. Nto Yesu aahiwiirela: “Weeso, munvaheke Seesari ekhanle ya Seesari, nave munvaheke Muluku ekhanle ya Muluku”. 22 Nuumala wiiwa eyo, yaahitikinihiwa vanceene ni yaahimuhiya Yesu, nto anarowasa.
23 Nihiku nenlo, asaduki, yaawo anihimya wira alipa-ookhwa khanihihimuxiwa, yaahimwaattamela Yesu, anamukoha yiiraka: 24 “Mwiixuttihi, Moise aahihimya wira: ‘Mulopwana akhwa ohaayanre anamwane, munnawe ohaana omuthela naamukhweli owo, wira omuyarele anamwane ole okhwiiye’. 25 Nto yaahikhala eriyari ahu, axinna 7. Ole oopacerya aahimuthela mwaarawe, okhwa ohiyaranne mwaana. Siiso, munnawe aahimuthela muthiyana ole. 26 Munnawe owo a nenli aahikhwa ohiyanre, nave-tho a neeraru aahikhwa, mpakha ole a neethanu nenli. 27 Wookiseryani waya, muthiyana ole aahikhwa. 28 Vano, okathi anrowa aya ohihimuxiwa alipa-ookhwa, wa alopwana ale 7, tuuvi onrowa omukuxa muthiyana owo? Maana otheene aya, yaahimuthela”.
29 Yesu aahiwaakhula oriki: “Nyuwo munimwiiwoka, okhala wira khamunsuwela Soolempwa nnakhala owerya wa Muluku. 30 Okathi alipa-ookhwa anrowa aya ohihimuxiwa, alopwana khanrowa othelaka, nnakhala athiyana khanrowa otheliwaka, maana anrowa olikanaka ni malaikha ari wiirimu. 31 Vano, mwaha woohihimuxiwa wa alipa-ookhwa, khamunasome ele Muluku oohimenryaaweni, iiraka: 32 ‘Miyo ka Muluku a Abrahamu, Muluku a Isaakhi ni Muluku a Yakobe’? Owo khahiyo Muluku aalipa-ookhwa, masi Muluku a atthu akumi”. 33 Nuumala wiiwa eyo, mittitthi iye sa atthu saahitikinihiwa vanceene ni mwiixuttiho awe.
34 Afarisi vaiwale aya wira Yesu aahaamaaliha asaduki, yaahithukumanasa. 35 Mmosa a yaawo, aanisuwela saana Nlamulo. Nto, aahimweehererya Yesu omukohaka so: 36 “Mwiixuttihi, tiivi eri yooruma yuulupalexa ya Nlamulo?” 37 Yesu aahimwaakhula wira: “‘Mumphenteke Yehova Muluku anyu ni murima anyu wotheene, ni okumi* anyu wotheene, ni muupuwelo anyu wotheene’. 38 Ela teri yooruma yuulupalexa ni yoopacerya. 39 Yooruma ya nenli, yeeyo enlikana ni yoopacerya, tiila: ‘Mumphenteke mukhwiinyu ntoko muniiphenta anyu’. 40 Nlamulo na Moise ni soowiixuttiha sa Maprofeta, sinlipa ni sooruma iya piili”.
41 Nlelo afarisi athukumanne ene, Yesu aahaakoha wira: 42 “Nyuwo munuupuwela wira Kristu mwaana awani?” Awo yaahimwaakhula wira: “Mwaana a Davidi”. 43 Yesu aahaakoha oriki: “Nto moota xeeni Davidi eettihiwaka ni munepa woowaarya, onimuhimya awe Kristu okhala Pwiya, oriki: 44 ‘Yehova oomuleela Pwiya aka wira: “Mukilaathi moono aka woolopwana, mpakha miyo waapweha awanani inyu vathi va inawu sanyu”’? 45 Akhala wira Davidi onimuhimya Kristu okhala Pwiya, vaniweryaneya sai okhala mwanawe?” 46 Nto khuuvo mutthu aawerya omwaakhula etthu okhuma nihiku nenle, nave khuuvo aawerya omukoha-tho etthu.