Matheyo

21 Okathi yaattamela aya oYerusalemu, yaahiphiya muttetthe wa oBethifaxe, vamwaako Olivera. Nto Yesu aahaaruma awiixutti awe anli, 2 aahimeeryaka wira: “Murowe muttetthe ori ohoolo wanyu, mukelaka-ru munomphwanya puuru oothiyana, otthukweleliwe ene, ori ene ni mwaaxaana awe. Nto mwaataphule, mukiruuhele. 3 Akhala mutthu onrowa wookohani etthu, mmwaakhule so: ‘Apwiya tanaaphavela’. Siiso, mutthu owo onimoohiyani wira mwaakuxe”.

4 Tthiri, etthu ela ehiiraneya wira emaliheriwe ele Muluku aalavunle awe omurumeelaka profeta awe, oriki: 5 “Mmuleele mwaana mwaamuthiyana a oSiyoni* wira: ‘Mwiiwe! Mwene anyu onnoorwa. Owo toowiiyeviha, oomaala, ni onirwa onwenle ene puuru, aayo, mwaaxaana a puuru’”.

6 Tivo, awiixutti ale yaahirowa, khupaka siisaale Yesu aarumale awe. 7 Awo yaahimuruuha puuru owo ni mwaaxaana awe, yaahaatala malaya aya a ota vasulu va apuuru awo, nto Yesu aahinwela mwaaxaana a puuru. 8 Anamunceene a muttitthi ole wa atthu yaanaatala malaya aya a ota mustaraatani, akina yaaninta makukhu a mikole, anaatala mustaraatani. 9 Nave-tho, mittitthi saari ohoolo wawe, vamosa ni ale yaamutthara ottuli, yaanikhuwela yiiraka: “Khoo Muluku, ninnoovekelani, mmoopole Mwaana a Davidi! Ooreelihiwa tuule onirwa mwa nsina na Yehova! Khoo Muluku, ninnoovekelani, mmoopole, nyuwo munikhala wiirimu!”

10 Okathi Yesu aaphiyale awe oYerusalemu, atthu otheene a epooma ele yaahixenkereya, anakohana wira: “Mutthu ola ti pani?” 11 Mittitthi iye sa atthu saanihimya wira: “Ola Yesu, profeta onikhuma oNazarethi wa oGalileya!”

12 Vano Yesu aahikela mutemplo, onapacerya owoomola atthu otheene yaatumiha ni yaathuma mutemplo memmo. Nave, aahipittula meesa a atthu yaaturuka musurukhu, ni aahipittula ikhattera sa atthu yaatumiha ipompa.* 13 Nto aahaahimeerya wira: “Voolempwa wira: ‘Empa aka, enrowa ohimmwaka okhala empa ya mavekelo’, masi nyuwo mookhaliha empa ya alatarau”. 14 Nave-tho, alipa-oohoona ni oorakala yaanirwa okumana ni Yesu mutemplo. Nto owo aanaapenuxa.

15 Makhulupale a anamukuttho ni alipa-oowiixuttiha Nlamulo, yaahinanariwa vanceene, nuumala oweha miiriirya Yesu aapanke awe ni owiiwa anamwane yaakhuwela mutemplo ariki: “Khoo Muluku, ninnovekelani, mmoopole Mwaana a Davidi!” 16 Nave yaahimukoha Yesu, wira: “Niireke munniiwa ele anamwane ala anihimya aya?” Owo aahiwaakhula, oriki: “Aayo, kinniiwa. Masi nyuwo khamunasome moolumo anihimya wira: ‘Nyuwo moowiiriha anamwane acikhaani ni anamwane a mmatatani woottottopelani’?” 17 Yesu aahaahiya atthu ale, onarowa epooma ya oBethania, khuviriha weiwo ohiyu wotheene.

18 Okathi aatthikela awe oYerusalemu oxaka, Yesu aahivoliwa etala. 19 Nto aahiweha mwiri wa ifiiku mustaraatani, aahaattamela, masi aaphwannye makukhu-ru paahi. Vano aahiirela mwiri ole wira: “We, khoniima-tho mihokorokho”. Mwiri owo wa ifiiku waahuuma niinaano-ru. 20 Nuumala awiixutti woona etthu ele, awo yaahitikinihiwa vanceene, anahimya so: “Mwiri ola wa ifiiku, wuumale sai niinaano-ru?” 21 Yesu aahiwaakhula wira: “Kinooleelani ekeekhai wira, mwakhalana waamini, muhinahoverya etthu, munoowerya opaka ele epanke aka ni mwiri ola wa ifiiku, nave-tho munoowerya oruma mwaako ola wira: ‘Nvenye-va, mmorele mphareya’, nto eyo enimwiiraneya. 22 Nave, sotheene sinrowa anyu ovekela, ni waamini, munoovahiwa”.

23 Yesu aahikela mutemplo, onawiixuttiha atthu. Okathi owo, makhulupale a anamukuttho ni makhulupale a ayuda, yaahimwaattamela anamukoha wira: “Owerya wawani oniwiirihani opaka itthu iya? Murummwale naani?” 24 Yesu aahiwaakhula wira: “Ni miyo-tho kinimookohani etthu emosa. Mwakileela, miyo-tho kinimooleelani ole okivanhe owerya wira kipake itthu iya. 25 Opatiso wa Yohani waakhumme vai? Wa Muluku* aahiiso wa atthu?” Awo yaahipacerya ovaanela yaawo-ru ariki: “Naakhula wira, ‘Wa Muluku’,* owo onoonikoha wira: ‘Nto xeeni muhalaka ohimwaamini Yohani?’ 26 Masi naakhula wira, ‘Wa atthu’, nooveke muttitthi ola, maana atthu ala otheene annimoona Yohani okhala profeta”. 27 Tivonto, yaahimwaakhula Yesu ariki: “Khaninsuwela”. Nto Yesu aahaaleela wira: “Ni miyo-tho nkinooleelani ole okivanhe owerya wira kipake itthu iya.

28 “Munoonela sai? Mulopwana mmosa aahikhalana anamwane anli. Aahimphwanya mwaana oopacerya, onamwiirela: ‘Mwanaka, olelo murowe mwavare muteko omatta wa ewuuva’. 29 Mwaana owo aahaakhula, oriki: ‘Nkiniphavela’. Masi, nuuvira okathi, aahituruka muupuwelo awe, khurowa. 30 Aahimphwanya-tho a nenli, khumuhimeerya etthu emosa-ru. Vano owo aahiwaakhula apapawe wira, ‘Kinoorowa’, masi khuhirowa. 31 Wa anaawe ale anli, tuuvi aapanke etthu aaphavela paapa awe?” Awo yaakhunle so: “Ole oopacerya”. Nto Yesu aahaaleela wira: “Kinooleelani ekeekhai wira, alipa-ooliviha mpoosito ni anamararuwa, anookela Moomweneni mwa Muluku, nyuwo muhinatthi okela. 32 Tthiri Yohani aahirwa, oothoonyeryani ephiro ya xariya, masi nyuwo khuhimwaamini. Alipa-ooliviha mpoosito ni anamararuwa ti yaamwaaminni. Vano nyuwo hata moonale ene itthu iya, khamurukununxe murima wira mmwaamini.

33 “Nwiriyane nlikanyiho nikina: Aahikhala mulopwana mmosa aarina ematta awe ya ewuuva. Aahitekelela ematta yotheene ni aahithipa nipuro naanyakattiwa ewuuva. Nave-tho aahiteka empa yoorakamela osulu* mmatta-mmo. Nuumala-vo, aahaahiyerya alimi, khurowa elapo ekina. 34 Okathi mihokorokho saattokotthale aya, aahaaruma arumeyi awe orowa okumana ni alimi ale, wira akuxe mihokorokho sawe. 35 Masi alimi ale, yaahaavara arumeyi awe, mmosa yaahimmana, mukina yaahimwiiva, mukina-tho yaahinvonyakasa maluku. 36 Aahaaruma-tho arumeyi awe akina anceene, waavikana ale oopacerya. Masi, awo-tho yaahiwiiriha etthu emosa-ru. 37 Wookiseryani, aahimuruma mwanawe, uupuwelaka so: ‘Awo anoomuttittimiha mwanaka’. 38 Nuumala alimi ale onweha mwaana owo, yaahihimeeryana wira: ‘Ola tonrowa ohalana ematta ela. Nrowe nimwiive, nihalane itthu sotheene!’ 39 Nto awo yaahinvara, ampurulela ota wa ematta ya ewuuva, khumwiiva. 40 Vano, mwaneene ematta eyo aarwaaka, onrowa owiiriha exeeni alimi ale?” 41 Siiso, makhulupale a anamukuttho ni makhulupale a ayuda, yaahimwaakhula, yiiraka: “Okhala wira awo tootakhala, onrowa owiivakasa, ni onimwaahiyerya ematta awe ya ewuuva alimi akina, yaawo anrowa onvahaka mihokorokho sawe, sattokottha vale”.

42 Yesu aahaaleela, oriki: “Soolempwa sinihimya wira: ‘Nluku alipa-ooteka empa yaakhontte aya, nookhalihiwa nluku nuulupale na alisenso.* Nluku nlo ninkhuma wa Yehova, ni ti nootikiniha vamaithoni vahu’. Niireke nyuwo khamunasome moolumo ala? 43 Tivo kinooleelani wira, Muluku onoowaakhani Omwene awe, aavahe atthu anipaka ele eniphavela awe. 44 Nave, mutthu onimorela nluku nla, onimuntakaseya. Ole onrowa omoreliwa ni nluku nla, onoonyakattiwa”.

45 Okathi makhulupale a anamukuttho ni afarisi yaiwale aya malikanyiho awe, yaahisuwela wira Yesu aahimya yaawo. 46 Nnaamwi awo yaaphavela onvara Yesu, yaanoova mittitthi sa atthu, maana atthu awo yaanimoona Yesu okhala profeta.