Matheyo
20 “Omwene wa Muluku ori ntoko mwaneene ematta, yoowo aakhumme voosiisu orowaka waaphavela anamuteko wira yavare muteko ematta awe ya ewuuva. 2 Nuumala wiiwanana waaliva anamuteko ale etenaario* emosa vanihikuni, aahaaruma orowa ematta awe ya ewuuva. 3 Nave, ehalaka oruma 9 oora ya voosiisu,* aahaaweha atthu akina yeemenle ene omerkaatu ahirina muteko. 4 Nto, aahaahimeerya wira: ‘Ni nyuwo-tho murowe ematta aka ya ewuuva, kinimoolivani musurukhu muniphwanelela anyu’. 5 Atthu ale yaahirowa. Nave-tho, aahikhuma 12 oora* ni 15 oora,* onarowa waaphavela-tho anamuteko akina. 6 Wookiseryani waya, aahikhuma 17 oora* aaphwanya atthu akina yeemenle ene ahirina muteko, onaakoha wira: ‘Xeeni mukhalaka-va nihiku notheene muhivaraka etthu?’ 7 Awo yaahaakhula ariki: ‘Khuuvo onivahale muteko’. Nto owo aahaaleela wira: ‘Ni nyuwo-tho murowe ematta aka ya ewuuva’.
8 “Vahalaka wiila, mwaneene ematta aahimuhimeerya mulipa onaaweherya anamuteko awe, wira: ‘Mwawiitthane anamuteko, mwaalive musurukhu aya, mwaapacerye ale akisenrye orwa, ni mwaakiserye ale apacenrye orwa’. 9 Ale yaalattuliwe 17 oora,* yaahirwa. Khula mmosa aahaakhela etenaario* emosa. 10 Vano, okathi yaaphiyale aya ale yaapacenrye olattuliwa, yuupuwela wira yaamuliviwa vanceene. Masi, awo-tho yaakhenle etenaario* emosa. 11 Nto, nuumala waakhela siiso, awo yaahipacerya wunlaseya ohoolo wa mwaneene ematta, 12 ahimyaka wira: ‘Alopwana ala ookiserya ophiya avanre ewoora emosa paahi, masi muhaaliva musurukhu mwaattelo mmosa-ru ni hiyo, nivanre nihiku notheene nivilelaka oviha!’ 13 Mwaneene ematta aahimwaakhula mmosa, oriki: ‘Mpatthani, nkiwiirenleni etthu yoohiloka. Kiira naiwananne woolivani etenaario* emosa? 14 Mukuxe musurukhu anyu, muroweke. Kiniphavela waaliva anamuteko avanre ewoora emosa, musurukhu mwaattelo mmosa-ru ntoko wawinyu. 15 Niireke nkirina ehakhi ya opaka eniphavela aka ni musurukhu aka? Aahiiso, nyuwo* munikikhalela nrima mwaha wa opaka etthu yooloka?’* 16 Siiso, ale ookiserya anrowa okhala oopacerya, nave ale oopacerya anrowa okhala ookiserya”.
17 Orowaka oYerusalemu, Yesu aahaakuxa awiixutti awe 12 aaroiha opuro wahaakhanle atthu, onaaleela wira: 18 “Mwiiwe! Ninrowa oYerusalemu, nto Mwaana a mutthu onrowa ovahereriwa mmatatani mwa makhulupale a anamukuttho ni alipa-oowiixuttiha Nlamulo. Awo anrowa omulamula wira iiviwe. 19 Nave-tho, anonvahererya mmatatani mwa amalapo, wira oveehiwe, owaxuliwe ni iiviwe vamwirini. Masi onrowa ohihimuxiwa nihiku na neeraru”.
20 Okathi owo, mwaarawe Zebedeyo, ni anaawe anli, yaahimwaattamela Yesu, uurama ohoolo wawe, enanvekela etthu. 21 Yesu aahimukoha wira: “Muniphavela exeeni?” Muthiyana ole aahaakhula oriki: “Kiniveka wira anaaka ala anli yakilaathi vamosa ni nyuwo Moomweneni mwanyu, mmosa moono anyu woolopwana, mukina moono anyu woothiyana”. 22 Yesu aahaakhula wira: “Nyuwo khamunsuwela eniveka anyu. Niireke munoowerya owurya ele kihanle aka owurya?” Awo yaahimwaakhula, ariki: “Nnoowerya”. 23 Yesu aahaahimeerya oriki: “Tthiri munoowerya owurya. Masi okilaathi moono aka woolopwana ni woothiyana, khahiyo miyo kinivaha, maana ale aneemereriwa okilaathi mapuro awo, taale anithanliwa ni Tiithi aka”.
24 Nuumala awiixutti ale akina 10 wiiwa mwaha ole, yaahinanariwa ni awiixutti ale anli. 25 Vano Yesu aahaathukumanya awiixutti awe otheene, onaahimeerya wira: “Nyuwo munnisuwela wira anamalamulela a mulaponi annaapuherya atthu aya, nave makhulupale annaawerya atthu awo. 26 Nto nyuwosa muhiireke siiso. Masi ole oniphavela okhala muulupale eriyari anyu, ohaana okhala murumeyi anyu. 27 Nave ole oniphavela okhala oopacerya eriyari anyu, ohaana okhala epottha anyu. 28 Siiso-tho, Mwaana a mutthu khorwenle orumeeliwa, masi orwenle orumeela ni ovaha okumi awe, wira owoopole* atthu anceene”.
29 Okathi yaakhuma aya oYerikho, muttitthi muulupale wa atthu waahimutthara Yesu. 30 Vano, alopwana anli oohoona yaakilanthi mukerekhere mwa estaraata, yaahiiwa wira Yesu anvira. Nto yaahikhuwela ariki: “Pwiya, Mwaana a Davidi, munimorele ikharari!” 31 Masi muttitthi ole wa atthu, waahaapwapwela, waaleelaka wira amaale. Vano awo yaamutepa okhuwela ariki: “Pwiya, Mwaana a Davidi, munimorele ikharari!” 32 Nto Yesu aaheemela, owiitthana, onaakoha oriki: “Muniphavela wira kiwiiriheni exeeni?” 33 Awo yaahimwaakhula wira: “Pwiya, nimphavela wira maitho ahu atthukuwe”. 34 Nto Yesu aahimoriwa ikharari, okwannya maitho aya. Niinaano-ru, yaanoona, anamutthara.