Miteko

2 Nihiku na Efesta ya Pentekoositi, awiixutti otheene yaahithukumana opuro omosa. 2 Okathi yaakilanthi aya, yaahiiwa niinaano-ru onyakula wuulupale, okhumaka wiirimu ntoko epheyo yootupa, khusareya mpaani motheene. 3 Nto yaahipacerya woona etthu yaalikana ni malumi a mooro, yaawo yaakawanyeyale. Malumi awo, yaahimmorela khula mmosa, 4 otheene aya khusareya munepa woowaarya, anapacerya olavula mattaava oovirikana, siisaale munepa owo waawiiriha aya olavula.

5 Okathi owo, ayuda otheene yaamurumeela Muluku, yaawo yaakhuma maloko otheene a olumwenku, yaari oYerusalemu. 6 Vano, nuumala wiiwa onyakula iwe, muttitthi wa atthu waahithukumana ni waahitikinihiwa, okhala wira khula mutthu aaniwiiwa awiixutti elavulaka ni nttaava nawe. 7 Tthiri, awo yaahitikinihiwa vanceene, enahimya wira: “Mooneke! Atthu ala otheene anilavula, khahiyo aGalileya? 8 Nto vaniweryaneya sai khula mmosa a hiyo, owiiwa elavulaka nttaava nahu?* 9 Aakhala vaava atthu anikhuma elapo ya oPartia, oMedia, wElami, oMesopotamia, oYudeya, oKapadosia, oPonto, muttetthe wa wAsia, 10 oFiriixia, oPanfiilia, wExiitu, muttetthe wa oLibia, yoowo ori waattamela oKirene. Aakhala-tho atthu anixukurya anikhuma oRoma, aakhala ayuda akina, ni ale anitthara soowiixuttiha sa ayuda. 11 Nave-tho, akina anikhuma oKereta ni wArabia. Hiyo ninniwiiwa alavulaka ni nttaava nahu miteko suulupale sa Muluku”. 12 Aayo, otheene aya yaahitikinihiwa vanceene, ahinasuwela yoowiira. Tivo yaanikohana ariki: “Etthu ela entaphulela-ni?” 13 Masi, akina yaanaatheya, ahimyaka wira: “Atthu ala aroohapaliwa”.

14 Vano Pedru aaheemela vamosa ni arummwa 11, onaahimeerya atthu ni nsu nowiiwanyeya, oriki: “Nyuwo atthu a oYudeya, ni nyuwo otheene munikhala oYerusalemu, nwiriyane oratteene moolumo aka. 15 Mweekeekhai, atthu ala khahapaliwe, ntoko munuupuwela anyu, okhala wira nlelo voosiisu.* 16 Masi, etthu enoona anyu-va, ti yeele yaahimmwale ni profeta Yoweli, oriki: 17 ‘Muluku onihimya wira: “Mahiku ookiserya, kinimwaamwarexela munepa aka atthu a makhalelo otheene. Nave aniinyu axilopwana ni axithiyana anrowa okhala maprofeta, ni amiravo anyu anrowa woonaka itthu sootikiniha, nave atthu anyu oowuuluvala, anrowa waakhela sooloha. 18 Nave-tho mahiku awo, kinoomwarexela munepa aka ipottha saka soolopwana ni soothiyana, nto iyo sinrowa olaleyaka ihapari sa Muluku. 19 Kinimooniherya mitikiniho osulu, ni ithoonyeryo vathi. Itthu iyo tiiya: ephome, mooro ni meeku a mwiixi. 20 Nsuwa nnootatuxiwa nikhale epiphi, nave mweeri onootatuxiwa okhale ephome, nihinatthi ophiya nihiku nuulupale ni noovuwa na Yehova. 21 Otheene ale anivekela aromolaka nsina na Yehova, animoopoliwa”’.

22 “Nyuwo atthu a wIsarayeli, nwiriyane moolumo ala: Muluku, oowooniheryani oratteene wira tomurumme Yesu munazarethi, opakaka miiriirya ni miteko sootikiniha eriyari anyu omurumeelaka yena, ntoko munisuwela anyu saana. 23 Nave, ntoko Muluku aalakenle awe ni aasuwela awe vahinatthi, Yesu owo oovahereriwa. Okhala wira monvahererya mmatatani mwa atakhali, nyuwo moomukhomela vamwirini ni moomwiiva. 24 Masi Muluku oomutaphula mookhwaani,* omuhihimuxaka, okhala wira khivaaweryaneya wira okhwa onwerye. 25 Tthiri, Davidi, onnimuhimya owo oriki: ‘Okathi wotheene Yehova ori mmuupuweloni mwaka,* okhala wira ori moono aka woolopwana, wira kihikhala-khale kixankaka. 26 Tivonto, murima waahikitteela ni kaanilavula voohakalala vanceene. Nave kinrowa okhalaka ni nlipelelo, 27 okhala wira khamunrowa okihiya Mmahiye,* nnakhala khamunrowa ohiya yinttaka erutthu ya murumeyi anyu oororomeleya. 28 Mookisuweliha iphiro sa okumi, munookitteeliha murima vanceene ohoolo wanyu’.

29 “Anna, mukihiye kooleeleni kihoovaka etthu, itthu sinimuhimya muhavinre ahu Davidi. Ntoko munisuwela anyu, Davidi owo ohookhwa ni oovithiwa, nave mahiye awe ari muttetthe yoola mpakha olelo-va. 30 Owo aari profeta, ni aanisuwela ele Muluku aamuhimenrye awe, omulaphelaka, wira mwaana mmosa a Davidi, aarowa okilaathi veehiceni vawe. 31 Nave-tho, aahiweha vahinatthi ohihimuxiwa wa Kristu, ni aahihimya wira Kristu owo khaarowa ohiiwa Mmahiye,* nnakhala erutthu awe khiyaarowa wuntta. 32 Muluku oomuhihimuxa Yesu, nave otheene ahu nihoona eyo. 33 Tivonto, okhala wira Yesu oorowa wiirimu ni ookilaathi moono woolopwana wa Muluku, nave Tiithi onvaha munepa woowaarya aamuleihenrye awe, siiso, owo oonivaha ele munoona anyu ni muniiwa anyu. 34 Tthiri, Davidi khowenle wiirimu, masi owo aahihimya wira: ‘Yehova oomuleela Pwiya aka wira: “Mukilaathi moono aka woolopwana, 35 mpakha miyo waapweha awanani inyu vathi va inawu sanyu”’. 36 Tivonto, atthu otheene a wIsarayeli, ahaana osuwela wira, mweekeekhai, Muluku oomukhaliha Yesu, Pwiya ni Kristu. Yesu owo ti yoole omukhomenle anyu vamwirini”.

37 Vano, nuumala wiiwa moolumo awo, atthu ale yaahiriipiwa murima vanceene, anamuhimeerya Pedru ni arummwa akina wira: “Anna, nipake exeeni?” 38 Pedru aahaahimeerya wira: “Murukunuxe murima, nave khula mmosa a nyuwo opatisiwe mwa nsina na Yesu Kristu, wira muleveleliwe itampi sanyu, nave munrowa waakhela munepa woowaarya mahala ene. 39 Atthu aleiheriwe waakhela etthu eyo, ti yaale Yehova Muluku, owiitthanne awe: Nyuwo, aniinyu, ni otheene yaale anikhala ottaiwene”. 40 Aanilavula ni aanaalaleerya atthu otheene, aatumereryaka wira: “Nvalaane ni atthu ala ootakhala wira muhipwetexiwe”. 41 Siiso, otheene yaale yaakhenle ni murima wotheene moolumo a Pedru, yaahipatisiwa. Nto nihiku nle, atthu oowiiraka 3.000 yaahitakaahana ni awiixutti. 42 Awo khiyaahiyererya wiixutta itthu arummwa yaixuttiha aya, yaanikawana itthu sotheene, yaanilya vamosa, ni yaanithipelela ovekela.

43 Tthiri, atthu otheene yaahipacerya woova, nave arummwa yaahipacerya opaka itthu sootikiniha ni miiriirya sinceene. 44 Otheene ale yaamwaamini Yesu, yaanithukumana vamosa ni yaanikawana itthu sotheene yaarina aya. 45 Nave yaanitumiha imatta saya ni itthu yaarina aya, nto musurukhu ene, yaanaakawela atthu otheene, anvahaka khula mutthu etthu yaamuthowa. 46 Mahiku otheene yaanithukumana mutemplo, yaanilya eyoolya aya itthoko soovirikana, ni yaanikawana eyoolya eyo, atteeliwe ene murima. Yaanipaka eyo ni murima wotheene. 47 Awo yaanimuttottopela Muluku, nave atthu yaanisiveliwa naawo. Khula nihiku, Yehova aaniwoopola atthu, nto awo yaanikhala awiixutti.