Yoosoma 17

Ophavela Okhalana Mpatthani, Vantthuneya Opatthaneya

Opatthani onlipihiwa nniphento. Mwiixuttaka sinceene sa Yehova, munomphentaxa owo. Vaavo omphenta wanyu Muluku vanincerereyaya, ophavela wanyu omurumeela onimuncerereya-tho. Eyo enowirihani ophavela okhala awiixutti a Yesu Kristu. (Matheyo 28:19) Mu witakaaha ni emusi yoohakalala ya Anamoona a Yehova, munokhala mpatthani a Muluku mahiku otheene. Muntthuna wiira exeeni?

Muhaana wooniherya omphenta Muluku mwiwelelaka malamulo awe. “Vano, nnimphenta sai Muluku? Nnimphenta nettelaka soruma sawe. Vano, soruma sa Muluku khasinrika wettela.”—1 Yohani 5:3.

Mvareleke muteko ele eniixutt’anyu. Yesu aahihimya yowiiraneya enlikanyiherya yeela. Mutthu a miruku, aatenke emp’awe va mwala. Mutthu ohirina miruku, aatenke emp’awe voothakoni. Vaavo varwiiyawe munamukhaya a kuru, empa yaatekiwe va mwala khiyaamonre, masi empa yaatekiwe voothakoni yaahimora vootakhala-vo. Yesu ahimmye wira otheene aniiwa sowiixuttiha sawe oneettela onlikana ni mutthu a miruku, aatenke emp’awe va mwala. Vano, otheene oniiwa sowiixuttiha sawe ohineettela onlikana ni mutthu ohirina miruku, aatenke emp’awe voothakoni. Tanii wan’yaala anli muniphavel’anyu wilikanyiha?—Matheyo 7:24-27.

Wivahererya. Wivahererya onitaphulela olavula ni Yehova mu nivekeloni ni omuleela wi muniphavela wiira yotthuna awe mmahiku otheene. Mwaha wowiira yotthuna ya Muluku, nyuwo munithoonyiherya wira murii mwiixutti a Yesu Kristu.—Matheyo 11:29.

Obatiso. “Mbatisiwe ni murapihe soottheka sanyu orweela mwa oromola nsina nawe.”—Miteko 22:16, NM.

Mwivoloohe saaneenexa mwa ovara muteko wa Muluku. “Muteko ti muteko onivaranyu, nvareke ni murima wohikhanyererihiwa, munvarelaka Muluku, muhavarelaka atthu pahi.”—aKolosi 3:23.