Yoosoma 18
Mukhale Mpatthani A muluku Mahiku Otheene!
Opaka ompatthani ontthuneya wilipiha; okhaliha nave-tho ontthuneya wilipiha. Wilipiha wanyu wira mukhale mpatthani a Muluku ni wi ompatthani ohimalee, onoorowa oreelihiwa. Yesu aahaaleela yamwamini: “Munosuwela ekeekhai, ni ekeekhai enimotaphulani.” (Yohani 8:32, NM) Enitaphulelaya exeeni eyo?
Okhuma ninano-va nyuwo munoowerya okhala ootaphuwa. Munotaphuwa mwa sowiixuttiha soowoka ni sowootha simwarexiwe ni Satana. Munoophanya otaphuwa mu ohikhala ni nlipelelo orinaaya atthu ikonto ikonto sene ahinimusuwela Yehova. (aRoma 8:22) Apatthani a Muluku aataphuwa-tho “wova okhwa”.—aHéberi 2:14, 15.
Munoorowa ophwanya otaphuwa mu elapo esyaa ya Muluku. Moota oryaya wooreera otaphuwa muniiraanyu mphwanye muhoolo! Mu elapo esyaa khamunrowa okhala ikhotto, iretta ni otakhala. Ohaawa ni etala khasinrowa okhala. Wuluvala ni okhwa khonkhala. Woova, ohaaxana ni ohixariya khonkhala. Biibiliya onihimya sa Muluku iiraka: “Munnitthukula matat’anyu, munnavaha yolya atthu othene anaphentanyu.”—Esalimo 145:16.
Apatthani a Muluku anokhala nookumi mahiku otheene. Okumi woohimala erii yamahala yooreera ya Muluku wa otheene anihaayasa okhala apatthani awe. (aRoma 6:23) Mupuwelele ele enirow’aya otaphulela okumi woohimala wa nyuwo!
Munokhalana okathi wira mupake itthu sincipale. Naaniherya mwaniphavela omwiixutta omoopa viola. Aahiiso mwaniphavela osuwela opaka idesenyu aahiiso okhala kalapintero. Naaniherya mwaniphavela osuwela inamaa aahiiso mirii. Aahiiso pooti mwaaphavela weetta mukwaha woosuwela ilapo sikina n’atthu akina. Okhalana okumi woohimala, onowiirihani nyuwo osuwela sotheene iyo!
Munokhalana okathi wira mwapake apatthani anceene. Okhala wa mahiku oohimala onowiirihani wasuwela anceene yaale akhanle apatthani a Muluku. Munophiyerya osuwela mikhalelo saya sooloka ni inisuwelaaya ni awosa anokhala-tho apatthani anyu. Nyuwo munimwaphenta n’awo animophentani. (1 aKorinto 13:8) Okhala ni okumi woohimala onimovahani okathi wowi mukhale apatthani aatthu otheene eelapo ya vathii! Yooloka yoovikana: opatthani anyu ni Yehova onokhala woolipa moovira wa iyaakha sincipale. Khalani mpatthani a Muluku mwa mahiku otheene!