MURUU WA NEETHANU NENLI

Ele Eniixutta Ahu Mwaha wa Muluku Weemererya Otakhala

1, 2. (a) Vaakhanleke wira Yehova aahaapwetexa okathi ene yoole anamavirikanya ale wEedeni, eyo yaarowa onihapuwela sai? (b) Marehereryo xeeni oophenta Yehova opanke awe wa hiyo?

MUHAVINRE Yakobe aahimmye wira: “Iyakha iya sivirihalyaka ti sokhuveya ni ti sotakhaliwa”. (Maphattuwelo 47:9) Moolikanasa, Yobi aahimmye wira mutthu “onnikhala okathi vakhani, khusareya ohawa”. (Yobi 14:1) Ntoko atthu ala, anamunceene a hiyo sooniphwanya mixankiho, nihiireliwa itthu soohikhala sa xariya, hataa soonikhumelela ihasara. Nnaamwi vari siiso, oyariwa wahu khahiyo mwaha woowi Muluku khorina exariya. Ekeekhai wira hiyo khanrina muupuwelo ni erutthu yoomalela ni khanrina Eparayiisu yeeyo Adamu ni Eva yaarina aya wanipacerya. Masi sai vaakhanleke wira Yehova aahaapwetexa Adamu ni Eva okathi yoole waamurukunuwenle aya? Ekeekhai wira khivaarowa okhala iretta, oriipiwa murima, aahiiso okhwa, nave-tho khivaarowa okhala nloko na apinaatamu. Nto hiyo khinaarowa oyariwa. Moomoriwa ikharari, Muluku aaheemererya wira Adamu ni Eva akhalane anamwane, nnaamwi yaarowa oyariwaka oottheka ene. Nto omurumeelaka Kristu, Yehova oopaka marehereryo wira aattikiherye apinaatamu ele Adamu yaayelenle aya, eyo piiyo, okumi woohimala mparayiisu valaponi.​—Yohani 10:10; aRoma 5:12.

² Moota ory’aya voohakalaliha owerya olipelela okhala moohimala mu elapo esyaa mParayiisu, memmo muhinrowa okhala-tho iretta, oriipiwa murima, ohaawa, ni okhwa, vamosaa ni atthu ootakhala! (Miruku 2:21, 22; Wisupulula 21:4, 5) Masi mBiibiliyani, hiyo ninniixutta wira nnaamwi woopowa wahu oryeene wootthuneyexa wa hiyo ni wa Yehova, wookhala-tho mwaha wootepa otthuneya oniheliwa muhina.

Nthowa na Nsina Nawe Nuulupale

3. Exeeni eniheliwa muhina mu waakhwaniheriwa wa yoolakela ya Yehova voohimya sa elapo ni apinaatamu?

³ Nsina na Muluku ninniheliwa muhina mu waakhwaniherya yoolakela awe voohimya sa elapo ni apinaatamu. Nsina nna, Yehova, nintaphulela “Owo Onnikhala Mulipa Oowaakhwaniherya Soolakela Sawe Sotheene”. Siiso, nsina nawe ninthoonyerya ovuwa wawe ntoko Mwene a Olumwenku Wotheene. Owo ti Namalakela ni Muluku eekeekhai. Mwaha wa Yehova okhala namalamulela muulupale, murettele ni okhala saana wa olumwenku wotheene onlipa ni nsina nawe ni ele enithoonyerya aya, ni wira atthu otheene anvahe nttittimiho noomalela nniphwanela, vamosaa ni omwiiwelela.

4. Etthu xeeni eniheliwa muhina mwa yoolakela ya Yehova voohimya sa elapo ya vathii?

⁴ Nuumala waapattuxa Adamu ni Eva, Yehova aahaavaha muteko woovara. Yehova aahiiwanyeiha oratteene wi yoolakela awe khahiyo yaari yoowi yeettiheryeke elapo yotheene paahi, yinnuuheryaka mikano sa Eparayiisu, masi-tho wira anaaya esareye valaponi. (Maphattuwelo 1:28) Niireke wira mwaha wa ottheka waya, yoolakela eyo khiyaarowa wiiraneya? Moota vaarowa aya onyoholeya nsina na Yehova, Muluku oowerya sotheene, vaakhanleke wira khaawerya waakhwaniherya yoolakela awe voohimya sa elapo ela ni apinaatamu!

5. (a) Vaakhanleke wira apinaatamu oopacerya yaamoolya mwirii waasuweliha yooloka ni yoohiloka, yaarowa okhwa silini? (b) Yehova aakhwanihenrye sai masuu awe ari mMaphattuwelo 2:17, okathi omosaru, ottittimihaka yoolakela awe voohimya sa elapo ya vathii?

⁵ Yehova aahaalopola Adamu ni Eva wi akhala wira khiyaarowa omwiiwelela ni olya mwirii waasuweliha yooloka ni yoohiloka, awo yaarowa okhwa nihiku naarowa aya olya. (Maphattuwelo 2:17) Yaakhwanelaka masuu awe, nihiku nenne yaatthenke aya, Yehova aahiwiitthana wira yaakhule mulattu aya ni aahaalamula okhwa. Mmoonelo wa Muluku, Adamu ni Eva yaahikhwa nihiku nenne. Masi, wira aakhwaniherye yoolakela awe voohimya sa elapo, Yehova aahiweemererya wira yaayare anamwane ahinatthi okhwa tthiri. Nto, okhala wira Muluku onithokorerya iyaakha 1.000 okhala nihiku nimosaa, vaavo Adamu vaakhanle aya iyaakha 930, entaphulela wira awo yaakhwiiye “nihiku” nenne. (2 Pedru 3:8; Maphattuwelo 5:3-5) Masuu a Yehova yaahooniherya okhala eekeekhai voohimya sa okathi waarowa aya ophukeliwa, ni okhwa waya khiwaarowa okhoottiherya yoolakela awe voohimya sa elapo ya vathii. Masi atthu oohimalela, vamosaa ni ale ootakhala, aheemereriwa wira akhaleke mpakha vano.

6, 7. (a) Moovarihana ni Okhuma 9:15, 16, nthowa xeeni Yehova oneemererya awe otakhala ovikanihaka mu okathi munceene? (b) Mmwaha wa Farawoo, ikuruu sa Yehova sooniheriwe sai, nto nsina Nawe naasuweliwe sai? (c) Omalihiwa wa mukhalelo ola wootakhala, onrowa okumiherya exeeni?

⁶ Ele Yehova yaamuhimenrye awe namalamulela a wEjiitu mmahiku a Moise ennooniherya-tho nthowa naya Muluku eemerenrya awe otakhala ovikanihaka. Vaavo Farawoo vaakhoottihenrye awe anaIsarayeli okhuma wEjiitu, Yehova khampwetenxe okathi yoole. Ihukhumu Mulokoo saahiroihiwa elapo ele, sooniheryaka ikuruu sa Yehova mu iphiro sootikiniha. Okathi vaamulopola awe voohimya sa ehukhumu ya neethanu nenli, Yehova aahimuhimeerya Farawoo wira Owo anwerya ompwetexa Farawoo mookhweya vamosaa ni atthu awe. Yehova aahimmye wira: “Masi kowòpolani, wira kothonyeryeni ikuru saka, wira nsina naka nivuwihiwe mulaponi mothene”.—Okhuma 9:15, 16.

⁷ Vaavo Yehova aawooponle awe anaIsarayeli, nsina nawe naahisuweliwa tthiri elapo yotheene. (Yoxuwa 2:1, 9-11) Olelo va, nuuvira iyaakha 3.500, ele yaapanke awe khalai nlelo kheliyaliwe. Khahiyo paahi nsina na Yehova ti naalaleiwe, masi-tho ekeekhai voohimya sa Mwaneene nsina nno. Ela ehooniherya ovuwa wa Yehova ntoko Muluku yoowo onaakhwaniherya soolakela sawe ni onaaphwanyiha mureerelo arumeyi awe. (Yoxuwa 23:14) Ela ehooniherya wira mwaha wa okhala oowerya sotheene, khiivo etthu eniwerya okhoottiherya yoolakela awe. (Yesaya 14:24, 27) Ti maana aya, hiyo nnoowerya ororomela wira moohipisa Muluku onrowa waaphwanyiha mureerelo arumeyi awe oororomeleya opwetexaka mukhalelo wotheene wootakhala wa Satana. Wooniherya wawe ikuruu sihirina mukano ni ovuwa onrowa aya okumiherya nsina na Yehova, khonkhala-khala oliyaliwaka. Mireerelo saya sinrowa okhala soohimala.​—Ezekiyeli 38:23; Wisupulula 19:1, 2.

‘Osuwela wa Muluku ti Wulupale’

8. Itthu xeeni Paulo onnitumererya awe othokorerya?

⁸ Mu ewarakha awe aalepelaka aRoma, murummwa Paulo aahipaka nikoho: “Nihimye wira Muluku khahiyó àxariya?” Moolipiherya aahaakhula wira: “Nnari!” Nuumala vo, aahittittimiherya ikharari sa Muluku ni aahiromola ele yaalavunle Yehova voohimya sa omweemererya Farawoo okhala okathi munceene. Nave-tho Paulo onnooniherya wira apinaatamu arii ntoko oloko mmatatani mwa mulipa-oowuupa mwaapu. Moottharelana onihimya wira: “Muluku, atthunalé, anwerya woniherya onanariwa wawe n’usuweliha owerya wawe: nto ahavilela vanjene ale yaphwanela oviruweliwa n’upwetexiwa. Muluku ohìra siso wira ansuwelihe ovuwa wawe wulupale, weiwo wakawenlyawe ale amorenlyawe ikharari, yale athanlenlyawe ovuwihiwa okhuma khalai. Yawo ti yohi nìtthaniwe ni Muluku, khahiyó eriyari y’aYuda pahi, nto eriyari-tho y’amalapo”.​—aRoma 9:14-24.

9. (a) Tanii ‘aniphwanela oviruweliwa n’upwetexiwa’? (b) Nthowa xeeni Yehova waavilenlya awe okathi munceene anamavaanyiha awe, ni moota xeeni yookhumelela yookiserya enrowa aya okhala yooloka wa ale animphenta?

⁹ Okhuma okathi yoole Muluku vaarukunuweliwa awe wEedeni, mutthu otheene oninvaanyiha Yehova ni malamulo awe, onnikhala ‘ophwanela oviruweliwa n’upwetexiwa’. Nto okhuma okathi ole, Yehova ohaavilela atthu awo. Alipa-ootakhala aanyohola iphiro sawe, ahaalupattha arumeyi awe, hataa omwiiva Mwanawe. Ooniheryaka wiihiiha wuulupale, Yehova oheemererya ovira okathi woophiyerya wira soopattuxiwa sotheene siwehee oratteene sookhumela sootakhala mwaha wa apinaatamu omurukunuwela Muluku ni wiilamulelaka mmensaya. Okathi omosaru, okhwa wa Yesu ohaahulela ephiro apinaatamu oowiiwelela ni ‘wopwetexa miteko sa Satana’.​—1 Yohani 3:8; aHéberi 2:14, 15.

10. Nthowa xeeni Yehova veemerenrya awe otakhala okhalaka iyaakha 1.900 sivinre?

¹⁰ Iyaakha soovikanaka 1.900 nuumala ohihimuxiwa Yesu, Yehova onnivikaniha waavilela ale “yaphwanela oviruweliwa”, ni khaapwetenxe mowaakuveya. Nthowa xeeni? Mpantta mmosaa, mwaha woowi owo onnaathukumanya ale anrowa olamulelaka ni Yesu Kristu mu Omwene awe wa wirimu. Awo arii 144.000 nummuru naya, ni ti ale Muluku “amorenlyawe ikharari” ntoko saahimmye awe murummwa Paulo. Wanipacerya, atthu eriyari ya aYuda yaahilattuliwa wira yiirele mpantta ekrupu ela ya wirimu. Vattuli vaya, Muluku aahaalattula Amalapo. Yehova khaamukhanyerenrye mmosaa a atthu ala wira omurumeeleke. Masi atthu yaale yaaxukhurenle marehereryo awe anooniherya ophenta, aahaavaha eparakha wira yalamulele vamosaa ni Mwanawe Momweneni wa wirimu. Othukumanyiwa wa ekrupu ela enrowa wirimu ohanle omala.​—Luka 22:29; Wisupulula 14:1-4.

11. (a) Ekrupu xeeni vano enittottela mureerelo ovilela wa Yehova? (b) Mureerelo xeeni onrowa aya ophwanya alipa-ookhwa?

¹¹ Masi sai voohimya sa atthu anrowa okhalaka valaponi? Nave-tho ovilela wa Yehova ohiiriha okhala wooweryaneya othukumanyiwa “muttitthi mulupalexa” wa maloko otheene. Vano waatta waya arii imilyau sene. Yehova aahileiherya wira ekrupu ela enrowa okhalaka valaponi, enimoopowa wanikisa wa mukhalelo ola ni enrowa okhalana okumi woohimala mparayiisu valaponi. (Wisupulula 7:9, 10; Esalimo 37:29; Yohani 10:16) Vaavo vaniphiya aya okathi wa Muluku, muttitthi muulupale wa alipa-ookhwa onrowa ohihimuxiwa ni ovahiwa okathi wira olamuleliweke ni Omwene wa wirimu. Nuulumo na Muluku naahihimya vahinatthi muliivuruni ya Miteko s’Arummwa 24:15 wira: “Ale òrera murima n’ale òtakhala murima, anohihimuwa mokhwani”.​—Yohani 5:28, 29.

12. (a) Nniixutta exeeni mwaha wa Yehova weemererya otakhala ovikanihaka? (b) Nyuwo munoonela sai moota Yehova siphunke awe miyaha iya?

¹² Mwa itthu iya sotheene, niireke wira sihooniherya ohikhala exariya? Nnaari, mwaha wa ohaapwetexa atakhali, aahiiso ale “yaphwanela oviruweliwa”, Muluku onaamorela ikharari atthu akina, moovarihana ni yoolakela awe. Ela ennooniherya wira owo Muluku a ikharari ni oophenta. Nave-tho, mwaha wa ovaha okathi wira niwehee wiiraneya wa yoolakela awe, onniniiriha wiixutta etthu voohimya sa Yehova mwaneene. Hiyo ninnitikinihiwa mwaha wa mikhalelo soovirikana sa omutthu awe, ntoko exariya awe, ikharari sawe, ovilela wawe, ni mikhalelo soovirikana sa miruku sawe. Moota Yehova siphunke awe mwa miruku mwaha wa olamulelo wa olumwenku wotheene, eyo piiyo, ehakhi awe ya olamulela, enrowa ovaha onamoona moohimala wira olamulelo wa Muluku tokhanle woolokexa. Ninnilavula ntoko murummwa Paulo wira: “Vekekhai, othajiri wa Muluku n’ankhili awe n’usuwela wawe ti wulupale. Hiyo khaninwerya otaphulela mupuwelo awe, nnákhala osuwela iphiro sawe”.​—aRoma 11:33.

Okathi Wowooniherya Wiivahererya Wahu

13. Vaavo vanihaawa ahu mwaha wa itthu sinniiraneela, okathi xeeni oniphwanya ahu, ni etthu xeeni enrowa onikhaliherya waakhula mwa miruku?

¹³ Arumeyi anceene a Muluku annihaawa mwaha wa itthu siniwiiraneela. Awo annivikaniha ahaawaka mwaha woowi nlelo Muluku khaapwetenxe atakhali ni khoruuhale itthu saaleihenrya awe apinaatamu. Niireke wira ela yahaana onriipiha murima? Aahiiso niireke wira mikhalelo iyo saahaana onivaha okathi wira nikhaliherye wooniherya wi Diabo nawoothe? Nnoowerya opaka eyo akhala wira nnuupuwela masuu oowi: “Mwan’aka, nwetteleke ankhili: siso miyo kinotteliwa murima, kinowerya omwakhula onkiveha”. (Miruku 27:11) Satana, yoowo oninveeha Yehova, aahimmye wira akhala wi atthu anoopweteiwa itthu aahiiso oxankiheya, awo anrowa omureya muritti Muluku, hataa onveeha. (Yobi 1:9-11; 2:4, 5) Hiyo ninnihakalaliha murima wa Yehova, mwaha wa ororomeleya wahu okathi wa mixankiho, nooniheryaka wira ele yaahimmye Satana waari wootha.

14. Namuroromela Yehova vaavo vanikumana ahu ni soweeha, mireerelo xeeni siniwerya ahu ophwanya?

¹⁴ Namuroromela Yehova vaavo vanikumana ahu ni soweeha, hiyo nnoowerya wunnuuherya mikhalelo sootthuneyexa. Mwa ntakiheryo, ntoko yookhumelela ya mixankiho samphwannye Yesu, owo “ohìxutta wìwelela ahawaka”, mmukhalelo ohaatonko awe woona. Nave-tho, hiyo nnoowerya wiixutta orweela mwa soweeha sahu siniirihaka wunnuuherya opixa murima, ovilela, vamosaa ni wuncererya wiiwexexa ni oxukhurela iphiro sa xariya sa Yehova.​—aHéberi 5:8, 9; 12:11; Yakobo 1:2-4.

15. Vaavo vanivilela ahu mixankiho moopixa murima, moota xeeni atthu akina aniphwanya aya mureerelo?

¹⁵ Atthu akina anrowa woonaka ele enipaka ahu. Mwaha wa yoweeha enikumana ahu nthowa na ophenta wahu exariya, mu okathi aya, atthu awo pooti waasuwela ale akhanle maKristau eekeekhai olelo va. Mwaha wa okokhorelaka vamosaa ni hiyo mowiiraana, awo anoowerya olipelela waakhela mareeliho a okumi woohimala. (Matheyo 25:34-36, 40, 46) Yehova vamosaa ni Mwanawe aniphavela wira atthu akhalane eparakha eyo.

16. Ovarihana xeeni okhanle moonelo ahu mixankiho sahu ni mwaha wowiiraana?

¹⁶ Moota vary’aya voottottopeleya vaavo vanithokorerya ahu hataa mikhalelo sooxankiha ntoko okathi wooreerela wooniherya wiivahererya wahu wa Yehova, vamosaa ni okhaliherya waakhwanela yoolakela awe! Mwaha woopaka eyo, hiyo ninnooniherya tthiri wira ninniphavela okhala oowiiraana ni Muluku vamosaa ni Kristu. Yesu aahinvekela Yehova wira aakhaliherye maKristau otheene eekeekhai, oriki: “Nkinalompela awixutti akaru yala pahi: kinalompela-tho ale antthuna okamini mwaha w’olaleya wa yala. Mwiré wira othene ekhale mmosáru, ntoko Nyuwo, Tithi, muryanyu mwa miyo, ni ntoko miyo kiryaka mwa Nyuwo: yawo-tho ekhale mmosáru mwa hiyo”.​—Yohani 17:20, 21.

17. Niwehereryeke exeeni akhala wira nnoororomeleya wa Yehova?

¹⁷ Akhala wira hiyo nrii atthu oororomeleya wa Yehova, owo onrowa ontthuvela vanceene. Nuulumo nawe nnihimya wira: “Mukhaleke aKristu òlipa ni òhittikinyeya. Mutepeke okelela oholo mmutekoni mw’Apwiya vohihiyererya, musuwelaka wira wilipiherya wanyu khahiyó w’ethiru vamaithoni v’Apwiya”. (1 aKorinto 15:58) Nuulumo nno nnihimya-tho wira: “Vekekhai, Muluku naxariya: owo khanliyala miteko sanyu sorera n’umphenta wanyu, weiwo othonyenryanyu nwirelaka sorera aKristu ntoko sinìranyu nlelo”. (aHéberi 6:10) Yakobo 5:11 onihimya wira: “Mone: hiyo nniwirela òreriwa ale anvilela ohawa. Nyuwo muhìwa ohimmwaka ovilela wa Yobi: nave mosuwela sorera Muluku sanvahalyawe wokiseryani. Tthiri Muluku t’òkhupanyerya ni t’òsareya othunku”. Yobi aatthuveliwe sai? “Apwiya yahireriha makhalelo masyá a Yobi vovikana mukhalelo wa khalai”. (Yobi 42:10-16) Aayo, Yehova “onnatthuvela ale animphavela” ni murima wotheene. (aHéberi 11:6) Nto, yookhala etthuvo eniwehererya ahu, eyo piiyo, okumi woohimala mparayiisu valaponi!

18. Exeeni enrowa wiiraneya ni itthu soowereya khino sinrowa ahu wuupuwelaka?

¹⁸ Olamulelo wa Omwene wa Muluku onrowa omaliha mixankiho sotheene sikumiheriwe nloko na apinaatamu mu iyaakha ikonto sinceene sivinre. Ohakalala onrowa ahu okhalana okathi owo, onrowa ovikana ohaawa orina ahu olelo va. Khinnirowa oxankiheyaka mwaha wa wuupuwela itthu sootakhala sa khalai. Miyuupuwelo soolipiha ni miteko seiyo atthu sinrowa aya ovaraka khuta nihiku mu elapo esyaa, sinrowa ottipihaka vakhaani-vakhaani miyuupuwelo soohiloka sa khalai. Yehova onihimya wira: “Miyo kinrowa opattuxa irimu isyá [eguvernu esyaa ya Omwene wa wirimu yeeyo enrowa waalamulelaka apinaatamu] n’ilapo esyá [atthu a xariya]: itthu sa khalai khasinupuweliwa-tho, itthu sivinre sinoliyaliwa khuluwi. Ohiya vo, miyo kinrowa opattuxa otthapa n’upuha wohimala”. Aayo, mu elapo esyaa ya Yehova, atthu a xariya anoowerya ohimya so: “Vano ilapo sothene siri somàleleya, sikhalaka ni murettele: atthu othene annòpa elulu, etteliwaka murima”.​—Yesaya 14:7; 65:17, 18.

Makoho Oowuuluula

• Hataa eemerenrye ene otakhala, Yehova oonihenrye sai moophwanelela ottittimiha vaalupale nsina nawe?

• Mwaha wa Muluku waavilela ale “yaphwanela oviruweliwa”, onnikhaliherya sai ottottela mureerelo ikharari sawe?

• Vaavo vanihaawa ahu mwaha wa itthu sinniiraneela, niimananiheke wuupuwela exeeni?

[Ilatarato siri epaaxina 67]

Yehova ‘ahireriha makhalelo masyá a Yobi vovikana mukhalelo wa khalai’