Omwiiwelela Muluku Onniniphwanyiha Mareeliho

TI VOOLOKA omwiiwelela Yehova, yoowo ori Mukhulupale a olumwenku wotheene wira nipakeke yootthuna awe. Nave ninnisuwela wira Mwanawe tori muhooleli a muloko wa eKristau, nave ninnitthara malakiheryo onnivaha awe. Wiiwelela iwo onnaaphwanyiha mareeliho atthu otheene a Muluku.

² Wiiwelela okhulupale opacenrye ejardim ya wEdeni. Muupuwelo owo ninniphwanya malakiheryo Muluku aavanhe awe apinaatamu ari Maphattuwelo 1:28 ni 2:16, 17. Soopattuxiwa sotheene valaponi, saahaana owiiwelela apinaatamu. Vano Adamu ni Eva yaahaana wiiwelela okhulupale wa Muluku. Wiiwelela iwo okhulupale wa Muluku waamukumiherya okhalana murettele ni wiiraana. Malakiheryo a okhulupale annittittimiheriwa vanceene eliivuru ya 1 aKorinto 11:3. Murummwa Paulo aalempe so: “Kintthuna wira musuweleke etthu ila: Kristu ti murú [muhooleli] w’atthu othene, mulopwana ti murú [muhooleli] wa mwar’awe, vano Muluku ti murú [muhooleli] wa Kristu”. Ntoko enooniherya aya yoolepa ela, Yehova paahi tohirina mukhulupale awe.

³ Atthu anceene olelo-va, khaniphavela otthara malakiheryo a okhulupale. Mwaha wa xeeni? Muxankiho owo opacenrye ejardim ya wEdeni vaavo moolakelela anamuyari ahu oopacerya yaathanlale aya ohiiwelela okhulupale wa Muluku. (Maph. 3:4, 5) Masi, okathi yaapanke aya eyo awo khiyaakhanle ootaphuwa. Ohiya-vo, awo yaahipacerya wiiwelela soopattuxiwa sikina ntoko Satana Diabo. Ohiiwelela wa Adamu ni Eva woowiiriha apinaatamu otheene ovalaana ni Muluku. (aKol. 1:21) Nto apinaatamu anceene olelo-va anihooleliwa ni mutakhali, niire so, Satana Diabo.—1 Yoh. 5:19.

⁴ Okhala wira nihiixutta ekeekhai ya Nuulumo na Muluku ni ninneettela ele niixuntte ahu, hiyo khanneettihiwa-tho ni Satana Diabo. Nave okhala wira na Anamoona a Yehova yiivaherenrye ni apatisiwe, nihooniherya wira ninneemererya okhulupale wa Yehova mookumini mwahu. Mwene Davidi aanisuwela wira Yehova ‘onnettiha sothene’. Nto hiyo ninnisuwela wira eyo ekeekhai. (1 Wah. 29:11) Tthiri moowiiyeviha hiyo ninnikupali wira “Apwiya ti Muluku: Awo t’anipattuxale, vano hiyo ná nloko naya n’ipwittipwitthi sa nikoto naya”. (Esal. 100:3) Ohiya-vo, ninnisuwela wira Yehova tori Muulupalexa ni onniphwanela wiiweleliwa mwaha woowi topattunxe itthu sotheene sikhanle. (Wis. 4:11) Okhala wira na arumeyi eekeekhai a Muluku ni na atthareli a Kristu, hiyo ninnitthara ntakiheryo na Yesu na omwiiwelela Muluku.

⁵ Mixankiho sotheene Yesu aavirinhe awe ori ene valaponi saamwiixuttinhe exeeni? Yoolepa ya aHéberi 5:8 enaakhula so: “Arokhalaru Mwana a Muluku, ohìxutta wìwelela ahawaka”. Tthiri Yesu aaniroromeleya ni aanimwiiwelela Tiithi awe a wiirimu hata ovirihaka mixankiho. Ohiya-vo, Yesu khaikuxererya, nave khaalavula muupuwelo awe ni khaaphavela ovuwihiwa, maana aaphavela wira ovuwihiweke Tiithi awe. (Yoh. 5:19, 30; 6:38; 7:16-18) Okathi wa muteko awe woolaleerya valaponi, Yesu aanihakalala opaka yootthuna ya Tiithi awe nnaamwi aalupatthiwa ni atthu akina. (Yoh. 15:20) Hata vaari siiso, Yesu aahooniherya wira aanimwiiwelela Muluku. Tthiri Yesu “ahìyeviha nlelo, aìkhalihaka òwìwelela mpakha okhwa” vamwirini va nihaaxeryo. Okhala wira oomwiiwelela Tiithi awe mwa inamuna sinceene, Yesu ootthuveliwa mwa inamuna soovirikana. Owo oovahiwa okhulupale ni oonivaha nlipelelo na okhalana okumi woohimala.—aFil. 2:5-11; aHéb. 5:9.

TANI NINREERELA AHU OWIIWELELA?

⁶ Vaavo nniiwelela ahu okhulupale wa Muluku nipakaka yootthuna awe, ninnisyaka mixankiho sinceene ni onyoonyiheya onaaphwanya atthu anceene ahiniphavela wiiwelela okhulupale wa Yehova. Nwanani ahu Satana Diabo oniphavela onihapuxa. Nnoowerya waakiheriwa nwanani owo ootakhala akhala wira ninniivahererya wa Yehova nimwiiwelelaka ni murima wotheene.—Math. 6:10, 13; 1 Ped. 5:6-9.

⁷ Mmulokoni mwa eKristau, hiyo ninnisuwela okhulupale Kristu onvanhe awe “murumeyi òroromeleya ni ànkhili”. Nto eyo ennooneya moota ninthokoreryana ahu mukina ni mukhwaawe. Omwiiwelela Muluku mmulokoni mwa eKristau onniniiriha wiiwelela Nuulumo na Muluku mwa inamuna sotheene sa okokhorela wahu. Wiiwelela iwo onihela muhina muteko woolaleerya, orowela mithukumano ni wiirela mpantta, waataana wahu ni axitokweene ni okhaliherya wahu miteko sikina sa mutthenkeso wa Muluku.—Math. 24:45-47; 28:19, 20; aHéb. 10:24, 25; 13:7, 17.

⁸ Omwiiwelela Muluku onnikhaliherya muloko okhala wa murettele, woovareleleya ni wowiiraana. Nave mikhalelo sa Yehova, sinnooneya vaavo nimmwiiwelela ahu. (1 aKor. 14:33, 40) Itthu sikhumelenle mmutthenkesoni mwa Yehova, sinniniiriha okhalana moonelo mmosaru aarina awe Mwene Davidi. Nuumala oweha ovirikana okhanle eriyari ya arumeyi a Yehova ni atthu ootakhala, moohakalala Davidi aahihimya wira: “Noreriwa nloko Muluku aya akhanle Apwiya”.—Esal. 144:15.

⁹ Biibiliya onihimya wira mukasamentoni ni vatthokoni, muhooleli a muthiyana ti mulopwana. Nave muhooleli a mulopwana ti Kristu, vano muhooleli a Kristu ti Muluku. (1 aKor. 11:3) Muthiyana ohaana omwiiwelela iyawe, nto anamwane ahaana owiiwelela anamuyari aya. (aÉf. 5:22-24; 6:1) Vaavo atthu otheene a vatthokoni anitthara aya malakiheryo a okhulupale, onnikhala murettele ni wiiraana.

¹⁰ Mulopwana ohaana orumeela okhulupale awe mwa enamuna yoophenta omutakihaka Kristu. (aÉf. 5:25-29) Nave ohipuheryeke nnakhala okhootta okhulupale awe. Vaavo mulopwana onipaka awe eyo, mwaarawe ni anaawe annimwiiwelela ni murima wotheene. Muhiliyale wira muthiyana onimukhaliherya iyawe. (Maph. 2:18) Vaavo muthiyana onimukhaliherya awe ni omuttittimiha iyawe, owo onneemereriwa ni onninvuwiha Muluku. (1 Ped. 3:1-4) Vaavo mulopwana oothela ni muthiyana ootheliwa anitthara aya malakiheryo a mBiibiliyani voohimya sa okhulupale, awo annaavaha ntakiheryo nooloka anaaya na omwiiwelela Muluku.

¹¹ Omwiiwelela wahu Muluku onnivarihana ni “owìwelela alupale anettiha elapo” mwaha woowi “atokwene ari mulaponi, àkhalihiwa ni Muluku”. (aRom. 13:1-7) Hiyo ninniiwelela malamulo a elapo ninkhala ahu, nilivaka mpoosito ‘ninvahaka mwené [Seesari] ekhanle ya mwené [Seesari]: . . . Muluku ekhanlé ya Muluku’. (Math. 22:21) Nave muttetthe ninlaleerya ahu ninnitthara malamulo a elapo ninkhala ahu voohimya sa osuka isiiri sa atthu akina. Hiyo ninniiwelela malamulo a kuvernu akhala wira malamulo awo khanihonona malamulo a xariya a Yehova. Opaka eyo enninikhaliherya orumeela ikuru sahu wira nilaleye ihapari sooreera.—Mar. 13:10; Mit. 5:29.

¹² MaKristau otheene annittittimiha malakiheryo a okhulupale mwa inamuna sotheene mookumini mwaya. Waamini wahu onninikhaliherya oweha nihiku apinaatamu otheene anrowa aya wiiwelelaka okhulupale wa Yehova Muluku. (1 aKor. 15:27, 28) Atthu otheene ansuwela ni aniiwelela okhulupale wa Yehova anooreelihiwa moohimala!