Owo aahipaka etthu yootepa oxankiha

OKHALA wiira aaphavela omwiiwelela Yehova, Abrahamu aahipacerya weetta mukwaha. Owo anviriha mahiku vakhaani eettaka, masi waarowa okhala mukwaha wootepa ovila okumi awe wootheene.

Abrahamu eetta vakhaani-vakhaani, masi aahilakela orowa opuro Yehova aamulenle awe. Owo nlelo aanuupuwelela etthu Yehova anvekenle awe opaka. Owo aahimmye so: “Xontte, mmukuxe mwaninyu mmoseene Isaakhi, yoowo munimphenta anyu vanceene, murowe elapo ya oMoriya wiira mwanvahe ntoko yoovaha para opahiwa, vamwaako kinrowa aka owooniheryani”. Yehova aanisuwela wiira Abrahamu aanimphenta vanceene Isaakhi. Nto xeeni Muluku ohalaka onvekela Abrahamu ompaha mwanawe? Niireke Abrahamu aamukhalana waamini ni olipa murima wiira omwiiwelele Yehova?

Biibiliya onnimuhimya Abrahamu okhala “tiithi a atthu ootheene oowaamini.” (Arom. 4:11) Hata ohinatthi weetta mukwaha ole, Abrahamu aahikhalana waamini woolipa. Nave okumi awe wootheene, Yehova animukhaliherya Abrahamu olipiha waamini wawe. Mwa ntakiheryo, iyaakha sinceene saavinre, Muluku aahimuleela Abrahamu wiira ampwetexa esitati ya oSodoma ni oGomora, mwaha woowi atthu yaakhala isitati iyo, yaanipaka itthu sootakhala. Abrahamu aahixankiheya vanceene ni aahimukoha Yehova akhala wiira aarowa waapwetexa atthu ooreera murima, vamosa ni atthu ootakhala. Yehova aahipixa murima ni aahimuleela Abrahamu wiira khaarowa opwetexa isitati iye, akhala wiira aamwaaphwanya atthu vakhaani ooreera murima. (Maph. 18:​16-33) Abrahamu khaaliyanle etthu aixuntte awe, etthu ene tiila: Yehova ta xariya ni toomoriwa ikharari.

Ohinatthi ovira okathi munceene, Yehova aahimwiirela etthu yootikiniha Abrahamu ni Sara. Yehova aahaakhaliherya omuyara mwaana, yoowo yanvahale aya nsina noowi Isaakhi, nnaamwi Sara aarina iyaakha saattamela 90 ni Abrahamu aarina iyaakha saattamela 100. Abrahamu aanaamini wiira Yehova anwerya waakhaliherya omuyara mwaana hata yuuluvanle. (Arom. 4:​18, 19) Abrahamu aahiixutta etthu ekina yeeyo ahaaliyanle awe, aapwenhe awe vamurimani ni mmuupuweloni mwawe. Etthu ene tiila: Khiivo etthu Yehova onooceela awe.

Nuuvira iyaakha 25, Abrahamu khaaliyanle itthu iye piili aixuntte awe, okathi aarowa awe omwaako Moriya. Owo aanisuwela wiira hata Isaakhi aarowa okhwa, Yehova aamurowa omuhihimuxa! (Ahep. 11:19) Nlipelelo nno naahimukhaliherya Abrahamu olipa murima ni ohihiya weetta mukwaha ole.

Okathi yaattamenle aya mwaako Yehova aathanlale awe, Abrahamu aahaahimeerya arumeyi awe wiira ahale opuro ole aalenle awe, yena ni Isaakhi yaarowa omwaako ovaha mukuttho. Abrahamu aahaaleela arumeyi awe wiira owo ni Isaakhi yaamutthika. Awo yaahirowa omwaako opuro wahaavira-viriwa akhala mekhaya. Vano waahiphiya okathi. Isaakhi aaheemererya otthukiwa ni paapa awe ole uuluvanle ni waataleliwa vasulu valtaari. Abrahamu aahikuxa mwaalo ni aahookola moono awe wiira omuhite mwanawe para onvaha ntoko mukuttho. Vano nlaikha naahimwiitthana Abrahamu nihimyaka wiira: “Muhimwiive mmiravo owo, nnakhala muhimwiirihe etthu yootakhala.”

Okathi ole, Yehova aahimuttottopela Abrahamu mwaha wa waamini ni wiiwelela wawe. Tivonto, Yehova aahitthikela omuleela yooleiherya awe ya omureeliha Abrahamu, wiira osuulu awe waamwaatta ni aamureeliha “maloko ootheene a mulaponi”.

Etthu Yehova aamuleihenrye awe Abrahamu, nlelo khiyiiraneyale moomalela. Yooleiherya eyo, enooruuha mareeliho ahinrowa omala. Masi yoowiiraneya ya Abrahamu ni Isaakhi enniniixuttiha itthu sikina. Eyo enninikhaliherya oweha etthu Yehova aarowa awe opaka, wiira owoopole apinaatamu oororomeleya. Ntoko Abrahamu ahoovelenle awe onvaha mwanawe ntoko mukuttho, Yehova khoovelenle onvaha mwanawe mmoseene Yesu, wiira aaphwanyihe mureerelo atthu anceene. (Yoh. 3:16) Okathi nnuupuwelela ahu moota vaamuxankihale aya Abrahamu onvaha mwanawe ntoko mukuttho, ninnoona wiira Yehova onniniphenta vanceene.

Nimutakihaka Abrahamu, waamini wahu onimuncerereya vakhala wiira nnimuupuwelela itthu Yehova opanke awe khalai. Vakhala wiira waamini wahu onimuncerereya, nave olipa wahu murima onimuncerereyaka. Khivanireerela oxanka, nuupuwelaka wiira Muluku onoonivekela opaka etthu emosa-ru anvekenle awe Abrahamu. Muluku khotthikenle-tho onvekela mutthu wiira onvahe mwanawe ntoko mukuttho. Masi nihaana okupali etthu emosa, etthu ene tiila: Omwaamini wahu Muluku onoonikhaliherya okhala oolipa murima wiira nimwiiweleleke. Niira siiso, Yehova onooniphwanyiha mareeliho manceene ovikana ale anuupuwela ahu!

Musome yoowiiraneya ela mbiibiliyani, soolepa sinittharelana:

• Maphattuwelo 22:​1-19

• Aheeperi 11:​11, 12, 17-19

Nikoho para ovaanela:

Abrahamu oonihenrye sai olipa murima?

Mutokose itthu sikina

1. 1. Ninsuwela sai wiira Abrahamu ootoko okhala tthiri? (Nvenye! 05/2012 epaax. 18, ekaaxa; Perspicaz vol. 1 “Abrahamu” itti. 22-23) A

   Mwaakhule va

   

Muupuwelele itthu mwiixuntte anyu

• Nlipelelo Abrahamu aarina awe naamukhalihenrye sai olipa murima? Nlipelelo nahu ninnikhaliherya sai olipa murima? C

  Mwaakhule va

  

• Ninrowa otthara sai ntakiheryo na olipa murima wa Abrahamu, vaavo ninvara ahu miteko sa Yehova, eyo piiyo, okathi . . .

  • ninkhalana ahu eparakha ya olaleerya? (Ahep. 13:15)

    Mwaakhule va

  • nimphavela ahu orumeela mireerelo sahu wiira nikhaliherye mutthenkeso wa Yehova? (Mir. 3:9)

    Mwaakhule va

  • ninsuwela ahu wiira anna ni arokora annireerela okhaliheriwa? (Afil. 4:18)

    Mwaakhule va

• Munrowa otakiha sai olipa murima wa Abrahamu onilavuliwa ni yoowiiraneya ela?

  Mwaakhule va

Muupuwele yoowiiraneya yootheene

• Yoowiiraneya ela enikiixuttiha exeeni sa Yehova?

  Mwaakhule va

• Yoowiiraneya ela enivarihana sai ni yoolakela ya Yehova?

  Mwaakhule va

• Etthu xeeni kiniphavela aka omukoha Abrahamu ni Isaakhi nuumala ohihimuxiwa?

  Mwaakhule va

Mwiixutte itthu sikina

Nwehe moota yoowiiraneya ela eri aya yoovara murima. Nwehe eviitiyu eni:

Mutakiheke waamini waya— Abrahamu, mpantta 2 (11:10)

Abrahamu aawenrye sai okhala mpatthani a Yehova? Nto nyuwo munrowa owerya sai olipiha ompatthani anyu ni Yehova?

“Yehova aahimuhimya okhala ‘mpatthani awe’” (Owehaweha 02/2016 ipaax. 8-12)