46 MARIA MADALENA
“Konweha Pwiya!”
MARIA MADALENA, saahimphwanya mixankiho sinceene. Biibiliya, onihimya wiira Maria Madalena aanihaaxiwa ni “malaikha 7 ootakhala”. Masi Yesu aahoomola malaikha ale ootakhala, nto muxankiho ole waahivira. Nuumala otaphuliwa, aahilakela omutthara Yesu okumi awe wootheene omukhaliheryaka.
Maria aanimphenta vanceene Yesu ni aanimwiitthana Raboni, nuulumo nenlo na nttittimiho, nintaphulela “Mwiixuttihi”. Owo aaninweha Yesu ni arummwa awe 12, arowaka mittetthe sikina wiira yalaleye Omwene wa Muluku. Awo yaahihiya miteko saya wiira avare muteko yoowo orina efaita yinceene. Maria aapanke exeeni wiira omukhaliherye Yesu ni arummwa awe?
Nnaamwi okumi wa Maria Madalena waari wooxankiha, owo aahiivahererya wiira omukhaliherye Yesu ni awiixutti awe
Maria iirela mpantta ekurupu ya athiyana yaarumeela “mireerelo saya” wiira amukhaliherye Yesu ni arummwa awe, athumaka itthu yaaphavela aya. Moohaanyiherya, owo waari muteko muulupale okhala wiira yaahikhala ekurupu ya atthu yaavikana 20 alopwana ni athiyana, yaawo yeetta ni Yesu “ipooma sootheene ni mittetthe sootheene”. Okathi ole, khahiyo vaari vookhalela athiyana omuhoola mukhulupale a etiini okathi eetta awe mikwaha sawe, tivonto athiyana akina yaanikohakohiwa. Masi Maria Madalena ni athiyana akina, khiyaahiyale weetta ni Yesu, hata atthu akina vahaasivela. Para Maria ni athiyana akina yaamutthara Yesu, yaari eparakha omuhoola Yesu ni arummwa.
Mwaakha wa 33, yaahiiraneya etthu yeeyo yaamwiirihale Maria oriipiwa murima vanceene. Yesu aahitthukhweliwa, aahootheriwa itthu sinceene ni aahilamuliwa wiiviwa vamwirini wa nihaaxeryo. Hata vari siiso, olipa murima wa Maria, khiwaavukunwe. Maria Madalena, Maria maama awe Yesu ni athiyana akina, yaahirowa opuro Yesu aarowa awe wiiviwa. Okathi ole wooxankiha Yesu aari awe, yaahikhala athiyana yaari oororomeleya yaamukhaliherya, yooniheryaka niphento ni yooniheryaka wiira yaari oororomeleya wa yena. Nto awo yaahimoona Yesu okhalaka oororomeleya wa Tiithi awe ni omalelihaka muteko aarummwale awe. Nave Maria Madalena aari vaavo okathi Yesu akhwaawe.
Okathi Yesu aakhwiiye awe, moolipa murima athiyana ale yaahimunlela ohoolo wa atoropa a oRoma ni makhulupale a etiini, yaawo yaamwiivale Yesu. Maria Madalena, aahilakela opaka etthu ekina yooniherya wiira aanimphenta Yesu. Muttetthe ole wa oYudeya, nuumala mutthu okhwa, erutthu yaanaakuva wuntta ni wunkha vanceene. Tivo yaari aya yoolema nuumala mutthu okhwa, ottikittheliwa makhura oowunkhela ni makukhu oowunkhela wiira amusi ni apatthani aweryeke omwaattamela wiira amulaxerye. Masi Maria aaphavela opaka etthu yoovirikana ni ele yaapakiwa. Maana owo aarowa omuttikitthela makhura Yesu, hata nuumala ovithiwa. Nuumala-vo, esaabadu yaattharelana, Maria Madalena ni athiyana akina, yaahithuma itthu yaapirisari aya ni yaahivenya voosiisu arowaka mahiye Yesu aavithiwe awe.
Woonasa wene, Maria taapacenrye ophiya nikhuku Yesu aavithiwe awe. Nto okathi aawehale awe nihuleyale ene ni Yesu ohikhanle, owo aahitikinihiwa vanceene. Moowaakuveya, owo aahitthimaka wiira amuleele Pedru ni Yohani etthu yiiraneyale. Okathi Maria aatthikenle awe omahiye, athiyana aahiyale awe khaaphwanye. Nuumala-vo, Maria aahuurama onathurumela mmahiye. Nto okathi ene yoowo, “aahiweha malaikha manli yaawanre ikuwo sootteela, akilanthi ene opuro waapwehiwe murutthu wa Yesu.” Nuumala olavula ni malaikha ale, Maria aahirukunuwa ni aahinweha mulopwana mmosa yoowo aamuupuwela awe wiira aari mulipa-aakhapelela exarti. Yesu aahimukoha wiira: “Muthiyana, muninlela-ni?” Ophavelaka osuwela opuro waari murutthu wa Yesu, Maria aahimmye so: “Atokweene, vakhala wiira ti iwo akunxe murutthu awe, akileele apwenhe aya, nto miyo kinoorowa okuxa”. Okhala wiira etthu yuulupale Maria aaphavela awe waari osuwela opuro Yesu aapwehiwe awe, mowaakuveya aahivekela wiira amukuxe. Owo aanisuwela wiira aahaana opaka etthu.
Okathi Maria aarukunuwale awe wiira oroweke owaani, mulopwana owo aahihimya so: “Maria!” Nto Maria aahisuwela wiira naari nsu na Yesu. Otikinihiwe ene, Maria aahaakhula so: “Raboni!”, nuumala-vo aahimwaaparasari Yesu. Yesu aahimuleela Maria wiira ohiye onvarexexa, nto aahinvaha muteko wa efaita yinceene, oriki: “Mwaaleele axinnaka”. Ooniheryaka wiira aanimuroromela Maria, Yesu aahinvekela wiira orowe aaleele arummwa awe ihapari sootepa ohakalaliha soowi: Yesu vano mukumi. Nto moowaakuveya aahipaka ntoko aarummwale awe. Woopaceryani, arummwa khiyaakupali etthu Maria aahimya awe. Awo yuupuwela wiira ampakelela. Masi hata vari siiso, Maria khaakhulumunwe. Khiivo etthu wala mutthu aarowa omukhoottiherya Maria Madalena, ohiya olaleya ihapari iya, para atthu akina. Tthiri Maria oonihiyerya ntakiheryo nuulupale na olipa murima!
Musome yoowiiraneya ela mbiibiliyani, soolepa sinittharelana:
Nikoho para ovaanela:
Maria Madalena oonihenrye sai olipa murima?
Mutokose itthu sikina
1. Moota xeeni Maria Madalena ni athiyana akina woonasa wene yaamukhaliherye aya Yesu ni arummwa? (Mutakiheke waamini waya yoosoma 6 ipaax. 5-6) A
Eteseenyu A
2. Exeeni Maria ahaamusuwenle awe Yesu moowaakuveya nuumala ohihimuxiwa? (Mutakiheke waamini waya yoosoma 6 epaax. 16)
3. Xeeni Yesu aamulenle awe Maria Madalena wiira ohiye onvarexexa? (Owehaweha 15/04/2008 epaax. 32 etti. 6)
4. Okathi Maria Madalena aalenle awe arummwa wiira Yesu aahihihimuxiwa, awo yuupuwela wiira ampakelela. Woonasa wene, exeeni yaawiirihale okhalana muupuwelo owo? (Luka 24:11; Owehaweha 01/09/2012 epaax. 10 itti. 4-5)
Muupuwelele itthu mwiixuntte anyu
Maria Madalena aanivara miteko seiyo sahooneliwa vatthu, para waakhaliherya atthu akina. Ninrowa otthara sai ntakiheryo nawe? B
Eteseenyu B
Ikwaha sikina, atthu khanvaha efaita aahiiso khanikupali ihapari ninlaleya ahu. Nto eyo yiiraneya, ninrowa omutakiha sai Maria Madalena? (Luka 24:10, 11)
Munrowa otakiha sai olipa murima wa Maria Madalena?
Muupuwele yowiiraneya yootheene
Yoowiiraneya ela enikiixuttiha exeeni sa Yehova?
Yowiiraneya ela enivarihana sai ni yoolakela ya Yehova?
Etthu xeeni yoosivenleni osuwela wiira Maria Madalena oothanliwa ni Yesu wiira alamuleleke wiirimu?
Mwiixutte itthu sikina
Mulikanyihe ele atthu anihimya aya sa Maria Madalena, ni ele Biibiliya oniixuttiha awe.
“Ti pani aari Maria Madalena”? (Makoho Biibiliya onaakhula awe mwaha 172)
Enamuna Yesu aamuthokorenrye awe Maria Madalena ni athiyana akina, enniixuttiha exeeni sa moota nikhanle ahu oowaathokorerya athiyana? Musome mwaha oni:
“Athiyana makristau annireerela ottittimihiwa ni ovahiwa efaita” (Owehaweha 15/07/1995 ipaax. 15-18 itti. 3-8)