54 MURUMMWA YOHANI
Aahilipa murima okathi wooxankiha
MURUMMWA YOHANI aalempe so: “Ola okathi wookiserya”. Uuluvanle ene, owo aanisuwela wiira okathi wa arummwa waahanle omala. Iyaakha sinceene saavinre, Yesu ni murummwa Paulo yaahihimya wiira awiixuttihi oowootha, yaamuhonona muloko yiixuttihaka itthu sa anamavirikanya. Yohani ni arummwa akina, yaanikhaliherya wiira anamavirikanya ahihonone muloko. Nuumala yena okhwa, anamavirikanya yaahihonona muloko. (Math. 7:15; Mit. 20:29, 30; 2 Ates. 2:6, 7) Vanikhala wiira Yohani taakisenrye okhwa. Owo aanikhaliherya wiira muloko ohihinoniwe. Nkahaya muupuwele moota aaripiwe awe murima, okathi aaweha awe anamavirikanya ahononaka miloko. Tthiri ole waari okathi wooxankiha. Hata vaari siiso, Yohani khaahiyale okhala mutthu oolipa murima.
Murummwa Yohani aawenrye sai ovilela olupatthiwa, otthukweliwa oPatmo ni waakhoottiherya anamavirikanya ohonona miloko?
Okathi Yohani aarina awe iyaakha 90, nlelo aahikhalana ikuru. Nto khaahiyale “omulaleya Muluku ni olavula ekeekhai ya Yesu.” Mwaha waivaavo, mukhulupale a oRoma aahimutthukwela esisiro ya oPatmo, opuro yoowo wahaakhaliwa ni wahaareere maluku ephareya Ageu. Etthu xeeni yaamukhalihenrye Yohani olipa murima ni okhalana moonelo wooloka? Etthu yaamukhalihenrye, yaari wuupuwela yooleiherya ya Yesu eni: “Miyo kiri ni nyuwo mahiku ootheene mpakha olumwenku ola omala”. — Math. 28:20.
Okhuma okathi Yesu aaleihenrye awe eyo saahivira iyaakha 60, nto Yohani aahikhalana eparakha yuulupale. Eparakha ene tiila: Yohani aahitthikela onweha ni onwiriyana Yesu. Owo aahimooniherya Yohani etthu yaarowa wiiraneya muhoolo. Yowoonihiwa eyo, Yesu aahimooniherya Yohani “nihiku na Apwiya”, okathi yoowo arumeyi a Yehova anrowa aya omukokhorelaka Yehova ntoko oniphavela awe ni mowiiraana. Yesu aahimooniherya Yohani wiira aamwaakhaliherya arumeyi awe hata alupatthiwaka ni Satana.
Yoowoonihiwa ele yaari ntoko isinaale. Vanikhala ntoko wiira itthu sinceene Yohani oonihiwe awe khaaiwexenxe. Masi hata vaari siiso, etthu Yohani aasuwela awe tiila: Yehova ni Yesu khiyaaxinttiwe ni anamavirikanya yiixuttiha itthu sowoothiwa. Okathi wa nihiku na Apwiya arumeyi a Yehova yaamuncerereya, nave Yehova aamwaareeliha vanceene. Satana aamuxinttiwa ni woomoliwa wiirimu, oriheliwaka vathi. Nave muhoolo, onrowa opwetexiwa voomalela. Yowoonihiwa ele, yaahimulipiha Yohani ni aahilepa itthu sootheene aawehale awe.
Okathi aatthukweliwe awe esisiro ya oPatmo, Yohani aahikhalana mixankiho. Masi eyo khiyaamalihale ohakalala wawe ni okhalela nthiti ovara muteko wa Muluku. Nuumala okhwa mukhulupale a oRoma Domiciano, yoowo aalupattha makristau, Yohani aahikumihiwa mukhatteya. Nuuvira okathi, woonasa wene Yohani aatthikenle elapo ya wEefeso. Okathi aarina awe iyaakha 100, Yohani aahivahiwa muteko wooxankiha.
Yehova aahimuruma Yohani olepa evanxeelyu ya neexexe ni yookiserya. Owo aanisuwela wiira evanxeelyu eyo yamphiya miloko sinceene, yaamulipiha waamini ni olipa murima wa atthu akina. Hata vaari siiso, Yohani aarowa onyokhiwaka ni awanani a makristau. Masi eyo khiyaamwiirihale woova.
Saahivira iyaakha 70, okhuma vaavale Yohani aari awe ni Yesu. Hata vaari siiso, okhaliheriwaka ni ikuru soowaarya, Yohani aanuupuwela itthu Yesu aahimyale awe ni aapanke awe. Owo oolepa evanxeelyu yoovara murima ya okumi wa Yesu, nave itthu sinceene olempe awe khasikhanle ivanxeelyu sikina. Mwa ntakiheryo, Yohani paahi tolempe ohihimuxiwa wa Laazaro ni palano ootakhala a ahooleli a itiini a ophavela omwiiva Laazaro. (Yoh. 11:1-46; 12:10) Nave, Yohani tolempe itthu sootheene Yesu aaleelale awe awiixutti awe ohiyu wookiserya ni nivekelo noovara murima aapanke awe ohiyu ole. Nto, ninnimuxukhurela Yohani olepa itthu iya sootheene, maana sinninlipiha vanceene.
Okathi ene yoowo, Yohani aahaalepela makristau ipaphelo 3. Moolipa murima, Yohani aahaalopola makristau wiira anamavirikanya yaamutepa wuncerereya okathi ole. Owo aahaaleela wiira aheetteke ni anamavirikanya awo ni aahaakoheke ihaali. Nave ikarta 3 Yohani aalempe awe, sinnilavula vanceene sa ophenta ni nlipelelo. Owo aahiixuttiha wiira “Muluku ti ophenta”, nto ophenta iwo onnooneya ni miruku ni moolumo oolipiha aalavunle awe. Yohani aalempe wiira aanihakalala waaweha atthu aakhalihenrye awe wiixutta ekeekhai “yeettelaka ekeekhai”. Tthiri moolumo awo yahaakhaliherya atthu ohihiya weettela ekeekhai.
Olelo-va, makristau khanipirisari oxanka yuupuwelaka wiira anamavirikanya anoohapuxa muloko ntoko okathi wa Yohani. Ekeekhai wiira olelo-va aakhala anamavirikanya, masi Yehova khonrowa oweemererya ohonona okokhoreliwa ntoko oniphavela awe, ntoko siisaale yiiraneyale aya nuumala Yohani okhwa. (Yes. 54:17; Mit. 3:21) Ntoko Yohani, hiyo nnoolupatthiwaka, otthukweliwa mukhatteya ni sinooniphwanyaka mixankiho sikina. Otheene ahu, niimananiheke otthara ntakiheryo na Yohani. Moohixikha etthu enrowa onikhumelela, nihihiye olipa murima nimuroromelaka Yehova!
Musome yoowiiraneya ela mbiibiliyani, soolepa sinittharelana:
Nikoho para ovaanela:
Yohani oonihenrye sai olipa murima?
Mutokose itthu sikina
1. Exeeni enooniherya wiira Yohani aari mutthu aarina ikuru ni aanikhalela nthiti muteko wa Muluku? (Mulaleyeke oratteene omwene wa Muluku epaax. 37, ekaaxa itti. 3-4)
2. Xeeni Yohani aahimmwale awe okhala mutthu ahaasomme ni mutthu pure? (Mit. 4:13; Owehaweha 15/05/2008 epaax. 30 etti. 6)
3. Mwa enamuna xeeni Yohani aarowa awe okhala mpakha Yesu orwa? (Enoota ya Bíblia de estudo eri Yohani 21:22)
4. Exeeni ennikupaliha wiira Yohani tolempe evanxeelyo enikuxa nsina nawe? (Perspicaz vol. 1 “Ihapari sooreera moovarihana ni Yohani” itti. 2-8) A
Fondation Martin Bodmer, Cologny (Genève)
Eteseenyu A: Etukumento yaalempwale mwa iyaakha 200 Nuumala Kristu Orwa (yaarina muru oni) “Ihapari sooreera moovarihana ni Yohani”
Muupuwelele itthu mwiixuntte anyu
Iliivuru sa mbiibiliyani Yohani olempe awe, onnilavula ikwaha 100 sa mukuttho wa Yesu ni mareeliho onniphwanyiha awe. Ninrowa wooniherya sai oxukhurela wahu mukuttho wa Yesu?
Vanikhala ntoko wiira Yohani aarina iyaakha 100, okathi aarummwale awe olepa iliivuru 5 sa mbiibiliyani. Eyo enniixuttiha exeeni sa moota Yehova oniwoonela awe atthu oowuuluvala? B
Efootu B
Munrowa otakiha sai olipa murima wa Yohani?
Muupuwele yoowiiraneya yootheene
Yoowiiraneya ela enikiixuttiha exeeni sa Yehova?
Yoowiiraneya ela enivarihana sai ni ele Yehova oniphavela awe?
Yoowiiraneya ela, etthu xeeni mwiixuntte anyu nuumala osuwela wiira Yohani oothanliwa wiira alamuleleke ni Kristu wiirimu?
Mwiixutte itthu sikina
Olelo-va, anna ni arokora oowuuluvala anrowa otakiha sai olipa murima wa Yohani? Nwehe eviitiyu eni:
Yohani oolepa itthu sinceene sa ophenta. Nwehe itthu nniixutta ahu ni ele Yohani aarummwale awe olepa ni ntakiheryo nawe. Musome mwaha oni:
“Itthu nniixutta ahu ni mwiixutti ole aaphentiwa ni Yesu” (Owehaweha 01/ 2021 ipaax. 8-13)