Muhiphavele Waaxerya Ehako!
Atthu anceene aniphavela osuwela etthu enrowa okhumelela muhoolo. Mwa ntakiheryo, anniphavela osuwela sa okathi, nto khiyaikoha so: “Kiireke meelo pooti omwaala nakhuwo aka?” Esumana enirwa kinoorowa ohepha epyo aka? Mweeri onirwa, okathi onrowa okhala sai nihiku na efesta ahu?”
2 Masi atthu anniphavela osuwela itthu sa muhoolo ohiya paahi voohimya sa okathi. Olumwenku wotheene, atthu annixankiheya ni itthu sinrowa wiiraneya muhoolo mmyaha sa elapo aya wala ilapo sikina, voohimya sa nakoso, ni vanceenexa mmyaha sinaahela muhina awo ni ale anaaphenta aya. Eyo ti etthu yuulupale eniwiiriha atthu anceene waaxerya ehako wira ephwanye waakhuliwa wa makoho aya voohimya sa muhoolo.
3 Ale anaaxerya ehako anihimya wira amuluku oopinaatamu anniwerya waaleela itthu sa muhoolo, atthu yaale yiinihiwe nikuruta wira eweryeke osoma ni otaphulela sooloha, ni owerya olavulana amuluku awo mwa inamuna soovirikana. Awo anihimya wira annisuwela itthu sa muhoolo arumeelaka itthu sa wiirimu, ntoko (makhalelo ni weetta wa itheneeri, iplaneta, ewiriphi wala eclipses, maluku animora osulu wala meteoros), ikuru sa mulaponi ntoko (epheyo, munamukhaya, mooro); makhalelo a inama ntoko (ovuwa wa alapwa, ovava wa axipalame, weetta wa inowa); makhalelo a makukhu a exa muxaavinani wala makhalelo a makhura vasulu va maasi, wala epantte enirowa aya mareetthe nuumala ovonyiwa; makhalelo a hapa, masasu ni marupo a inama sinivahiwa mukuttho, oweha iliinya mmatatani mwa mutthu ni orweela wa “minepa” sa alipa ookhwa.
MAPACERELO A EHAKO ANNOONIHERYA WIRA EYO KHAHIYO YOOLOKA
4 Inamuna sotheene sa waaxerya ehako, nnaamwi sihimmwaka ovara muteko mwa enamuna yoovirikana, khisineemereriwa ni Biibiliya. Yehova, orweela mwa Moise, aahaalopola aIsarayeli ikwaha sinceene wira yahaana osyaka waatakiha atthu a maloko makina voohimya sa waaxerya ehako, oriki:
“Mwakela mulaponi Apwiya Muluku anyu anrowaya wovahani, muhixutté otákiha solimalela sophweliha s’atthu a weiwo. Ahikhalé mutthu a nyuwo onrowa onviriha vaikho mwan’awe mwamulopwana walá mwamuthiyana, amuhelaka mukuttho: ahikhalé onrowa waxerya ehako, walá omurava mukhw’awe, walá wakoha amuluku a èthiru, nnákhala opaka maxitta walá omulowa mutthu, nnákhala wakoha majini ni minepa s’alipa-okhwa. Apwiya annanyokha atthu anìra sotakhala seiyo. Mulattu wa sonanara seiyo Apwiya Muluku anyu t’aniwomolelaya atthu a mulaponi munrowanyu okuxa”.—Otumererya 18:9-13; Onamukuttho 19:26, 31.
5 Ale yaaloherya itthu khalai, pooti oloha waya wala mitikiniho saya siireya, yaaniphwanya ehukhumu ya Muluku. (Otum. 13:1-5; Yer. 23:32; Zak. 10:2) Biibiliya onnaanyokha vanceene atthu anaaxerya ehako; nto khalai mutthu aapaka eyo aahaana wiiviwa.—Onam. 20:27.
6 Okathi wa olaleerya wa Yesu ni wa arummwa, yoolema ya waaxerya ehako khiyaareere. Vaavo murummwa Paulo aari awe esisiro ya oKiipero, aahikumana ni namaxitta mmosa aitthaniwa Baryesu, yoowo murummwa Paulo aamwiirinhe awe okhala oohoona. OMasedonia Paulo aahoomola munepa wa xetwani wa mwali mmosa oonyakula. Nto okhala wira mapwiya awe mwali ole yaaniphwanya musurukhu orweela wa muteko owo, awo yaahinanariwa. (Mit. 13:6-11; 16:16-19) Masi, atthu akina, ntoko Simoni oSamariya yaahihiya miteko saya sa maxitta moohikhanyereriwa, ni atthu anceene a muttetthe wa wÉfeso yaawo yaapahale iliivuru saya sa maxitta seiyo saari sa musurukhu munceene waaphiyerya ikonto miloko mithanu (50.000) sa eparatha (wala 8.000 idoolare sene).—Mit. 8:9-13; 19:19.
WAAXERYA EHAKO ONNIVIRIKANA NI IHAPARI SINIKHUMWA WA MULUKU
7 Wookhala ovirikana wuulupale voohimya sa oleeliwa ekeekhai wa mpantta wa Muluku ni mihupi siniphwanyiwa ni waaxerya ehako. Atthu yaale anaaxerya ehako, ikwaha sinci anniwereiwa vanceene ni olosiwa onikumiheriwa ni malaikha ootakhala ahinooneya. Ikwaha sikina minepa iyo sootakhala sinnimwiiriha mutthu oolosiwa wiipa isipo soohiloka wala olya mirette soohapala. Nuulumo na eGriki noowi “oloherya itthu sa muhoolo”, nikumihiwe nverbuni mai’ne·sthai, nintaphulela “olosiwa”; nto ninnirumeeliwa wira nimuthoonye mutthu onikhuma niphero mwaano yoowo orina maihi wala ikharari soohitthokiheya ni soohiloka.
8 Arumeyi a ekeekhai a Yehova khisaaphanya mixankiho ntoko iyo mwerutthuni mwaya wala mmuupuweloni, vaavo yaalavula aya akhaliheriwaka ni munepa wootteela. (Mit. 6:15; 2 Ped. 1:21) Okathi maprofeta a Muluku yaavara aya muteko yaarummwale aya, yaanilavula mootaphuwa, ni moohiliviha etthu. Moovirikana ni eyo, alipa owaaxerya ehako yaanivara muteko aya ephavelaka paahi ophwanya musurukhu mwa nrima.
9 MBiibiliyani khekhanle yoolepa enooniherya wira inamuna sikina sa waaxerya ehako ti sooloka. Ikwaha sinceene yoolepa emosaru eninyokha waaxerya ehako, ennilavula sa onammunepani vamosa ni onamuttompe ni oraruwa. (2 Mam. 9:22; Nah. 3:4; Mal. 3:5; aGal. 5:19, 20; Wis. 9:21; 21:8; 22:15). Mwa moonelo wa Muluku waaxerya ehako onlikana ni etampi ekumiheriwe ni anammwareya. (1 Sa. 15:23) Nto Biibiliya khonihimya wira Yehova onnilavula ni arumeyi awe arumeelaka oloha wala maxitta “ooloka” wala waaxerya ehako.
10 Mutthu aaloherya etthu, taaphavela osuwela yootaphulela aya orumeelaka ehako. Masi eyo khiyiiraneya vaavo oloha iwo waakhuma aya wa Yehova. Oloha waari wookhweya otaphuleliwa ni wiiwexexa, wooniherya wira waakhuma wa Yehova. (Maph. 20:3-7; Makh. 7:13-15; 1 Mam. 3:5; Math. 1:20; 2:12, 13, 19, 22). Nto vaavo saakhala aya itthu sootikiniha wala itthu soovitheya, khaavo mulipa ooloha arumeelaka ehako aawerya wiiwexexa; nto arumeyi a Yehova paahi ti yaawerya wiiwexexa.—Maph. 40:5-19; 41:1-32, 39; Dan. 2:1-47; 4:1-28.
ANAHAKO KHANEEMERERIWA NI YEHOVA
11 Mutakhali Hamani aahimwiiriha mulopwana mmosa (wonasa wene aasoma itheneeri (wala astrólogo) wira arumeele Purimi, eyo piiyo, eparakha . . . wira asuwele “mweri ni nihiku”, naareerela waapwetexa atthu a Yehova. (Esth. 3:7-9) Voohimya sa enamuna ela ya waaxerya ehako, ninsoma so:
“Vaavo Hamani aarumeela awe enamuna eyo wira asuwele nihiku nooreerela wira omaliherye soophavela sawe, owo aahipaka etthu yeele mamwene ni mapewe opersia yaamakela aya opaka; khiivo etthu yaapaka aya ehipacenrye waakoha asuweli yaasoma itheneeri (astrólogos), nto awosa yaanihakalala vanceene nuumala osuwela okathi wooreerela omaliherya yootthuna aya arumeelaka ehako”.—Jamieson’ Commentary, Vol. II, epax. 639.
12 Attharaka miruku sa anahako awe, Hamani moohipisa ahaamaliherya apalano awe ootakhala. Masi, owerya wa Yehova wira awoopole atthu awe, waahooneya vasya, vaavo Hamani yoole aaroromela ehako, aahomphwale awe vamwirini aaphavela awe omuhopha Mordekai.—Estheri 9:24, 25.
13 Ntakiheryo nikina nnooniherya owerya wuulupale wa Yehova, ti na atthu oMowabi yaawo yaakunxe mmatatani mwaya “sovaha saya s’omulivela nahako”, nto awosa yaahirowa wa Balaamu oMesopotamia wira aatakhalihe aIsarayeli. (Moth. 22:7) Nnaamwi Balaamu aaphavelasa ‘waxera ehako’, Yehova aahimwiiriha waareeliha aIsarayeli. Mwa mutthaka awe mmosa, Balaamu aahilavula voohimya sa owerya wa Yehova, ariki: “Khuvo murette onatakhaliha atthu a Yakobe: khuvo okhwiri onalowa atthu a Isarayeli”.—Mothakoni ikapiitulo 23, 24.
14 Okhala wira ehako enikhaliheriwa ni Satana, nto ole oniroromela ehako ayo okathi ola wookiserya wira asuwele itthu sa muhoolo, mulolo. Ekeekhai wira pinaatamu onniphavela osuwela sa muhoolo, masi soophavela sawe sinirowa wiiraneya saana akhala wira onoomurumeela Mpattuxa awe. Tthiri, Yehova tori Muluku oororomeleya onisuwela itthu sa muhoolo. Owo tonisuwela okhuma woopaceryani mpakha wookiseryani. (Yes. 46:9, 10) Ohiya-vo, orweela mwa ephiro Yehova onirumeela awe wira olavule ni atthu vamosa ni Nuulumo nawe, Biibiliya, moophenta owo onninleela vahinatthi ele eri yooloka wira apinaatamu esuweleke.—Am. 3:7.
15 Nto vaavo apinaatamu anihiya aya omurumeela Yehova, enamunyokha yoole onisuwela itthu sa muhoolo ti vookhweya awosa weettihiwa ni minepa sootakhala sa xetwani. Sawuli niri ntakiheryo nuulupale, na mutthu mmosa wanipacerya aamuroromela Yehova wira asuwele itthu sa muhoolo, masi nuuvira okathi, okhala wira Yehova aahihiya omureeliha mwaha wa ohiiwelela wawe, Sawuli aahimurantteliha Yehova nto onaroromela minepa sa axetwani wira asuwele itthu sa muhoolo. (1 Sam. 28:6, 7; 1 Wah. 10:13, 14) Tivonto, muhikhala-khale mpakaka etthu ntoko eyo yootakhala!
[Eponto yuulupale epaaxina 3]
Mwaha ola okumihiwe murevistani A Sentinela [Owehaweha] 1 a Feverero, 1970, ipaaxina 89-93.