1 Mwaha wa xeeni?
OVEKELA. Sookhala myaha atthu akina aniphavela osuwela. Ninrowa oweha makoho 7 atthu animakela aya opaka voohimya sa ovekela, nuumala-vo ninrowa oweha moota Biibiliya onaakhula awe. Yoolakela ya myaha iya wookhaliheryani ovekela oratteene.
OLUMWENKU wotheene atthu a makhalelo otheene ni itiini sotheene annivekela. Awo annivekela ari ene mekhaya wala ari ene ni atthu anceene. Awo annivekela ari ene, mukerexa, mmuxikitthini, musinagoga, mutemplo ni ari ene waltaari. Woonasa wene okathi anivekela aya annirumeela itapeti, mapuro siniheliwa ifilori, ilatarato, iliivuru sa mavekelo wala mavekelo alempwale vathaapwani wala vanipaweni.
Nivekelo ninniwiiriha apinaatamu ovirikana ni soopattuxiwa sikina. Ekeekhai wira sookhala itthu sinceene ninlikana ahu ni inama. Hiyo ninniphavela yoolya, omumula ni maasi, nave inama sinniphavela itthu iyo. Nave ntoko inama, hiyo ninniyarana, ninnikhala nuumala-vo nnakhwa. (Musuweli 3:19) Masi apinaatamu paahi tarina eparakha ya ovekela. Mwaha wa xeeni?
Woonasa wene mwaarowa waakhula wira: Okhala wira hiyo ninniphavela ovekela. Okhala wene atthu annithokorerya nivekelo okhala etthu enaakhaliherya olavula ni minepa, okhala etthu yowaarya ni ya faita yinceene. Biibiliya onihimya wira nipattuxiwe ni yoophavela ya ovekela. (Musuweli 3:11) Yesu aahimmye so: “Oohakalala taale anisuwela wira ahaana omusuwela Muluku”.—Matheyo 5:3.
Ophavela omusuwela Muluku onnimwiiriha mutthu orowa mapuro ookokhorela, orumeela ilatarato sa itiini ni oviriha iwoora sinceene ovekelaka. Nave atthu akina annikupali wira ahaana okhaliheriwa ni atthu akina wira amusuwele Muluku. Niireke nyuwo khamunikupali wira apinaatamu khaniwerya onivaha nikhaliheryo noomalela? Otheene ahu sookhala itthu nihinwerya ahu opaka, ninkhala okathi vakhaani ni khaninsuwela itthu sotheene. Nto mutthu orina ankhili, owerya ni onkhala mahiku otheene tonrowa owerya onikhaliherya mwa inamuna sotheene. Itthu xeeni sinniiriha ovekela wira nimusuwele Muluku?
Nkahaya muupuwele ela: Niireke mootoko ophavela malakiheryo, miruku wala waakhuliwa wa makoho apinaatamu ahinwerya aya osuwela? Niireke mootoko ophavela omaalihiwa nuumala wookhumelelani muxankiho muulupale wala malakiheryo wira mpake yoothanla yoovila aahiiso ophavela oleveleliwa okathi mwaivaha anyu nthowa?
Biibiliya onnooniherya wira nihaana ovekela itthu iyo. Nave Biibiliya eliivuru yoororomeleya ni ookhalana mavekelo yaapakiwe ni alopwana ni athiyana oororomeleya yaamurumeela Muluku. Awo yaahivekela wira amaalihiwe, ovekela malakiheryo, oleveleliwa ni waakhuliwa wa makoho aya oovila.—Esalimo 23:3; 71:21; Daniyeli 9:4, 5, 19; Habakuki 1:3.
Nnaamwi mavekelo awo yaari oovirikana, masi sookhala itthu anlikana aya. Atthu awo otheene yaanivekela asuwelaka etthu yaawiiriha ovekela ni yaanikupali wira mavekelo aya yanwiriyaniwa, etthu yeeyo atthu anceene ahiniphavela aya olelo-va. Nave awo yaanimusuwela mutthu yanvekela aya.