2 Ti Pani ninreerela ahu onvekela?

NIIREKE mavekelo otheene aniphiya okathi omosaru, moohicikha mutthu ene onivekela? Olelo-va atthu anceene anuupuwela siiso. Muupuwelo owo onnaasivela atthu anceene, yaawo anikhaliherya muupuwelo wa othukumana wa itiini wira sivekele, maana anoona wira nnaamwi itiini sivirikanne ene, itiini sotheene ti sooloka. Niireke muupuwelo owo ti wooloka?

Biibiliya onnooniherya wira mavekelo manceene khoniroiheliwa mutthu eekeekhai. Okathi Biibiliya aalempwa awe, atthu yaanivekela ilatarato soopatthiwa. Masi Muluku aamakela waalopola wira ahipakeke eyo. Mwa ntakiheryo, Esalimo 115:​4-6 enihimya so voohimya sa ilatarato iyo: “Akhalanne-ru màru, khanìwa”. Moolumo ala toowiiwanyeya. Xeeni onvekelaka muluku ohiniiwa?

Yowiiraneya emosa ya mBiibiliyani enniiwanyeiha oratteene mwaha owo. Profeta oororomeleya iihaniwa Eliya aahaavekela maprofeta a Bayali onvekela muluku aya, nuumala-vo, Eliya aamunvekela Muluku awe. Nto Eliya aahimmye wira Muluku eekeekhai aamwaakhula mavekelo, masi muluku oowootha khaarowa waakhula etthu. Nuumala weemererya, maprofeta a Bayali yaahipacerya ovekela, arunyaka vanceene ni alalihaka mmilo aya mahala ene. Biibiliya onihimya wira: “Khuhìwanyeya nsu: khavo awakhunle, khivo yakhumelenle”. (1 Mamwene 18:29) Masi exeeni yiiraneyale ni Eliya?

Nuumala omaliha ovekela, Muluku a Eliya aahirumiha mooro waakhuma wiirimu yoowo waapanhe mukuttho ole. Mavekelo ale yaavirikanne sai? Waakhuliwa waya ori nivekelo Eliya aapanke awe nilempwale 1 Mamwene 18:36, 37. Nivekelo nne ti nookhuveya, nttaava na eHeeberi ya khalai ari moolumo 30 paahi. Hata vaari siiso, ni moolumo awo vakhaani Eliya aahinvekela Muluku orumeelaka nsina nawe, Yehova.

Nuulumo noowi Bayali nintaphulela “mwaneene” wala “pwiya”, nave aari muluku aaKanani ni yaahikhala amuluku anceene moovarihana ni muttetthe. Masi Yehova nsina nihinlikana ni mutthu mukina, yena paahi torina nsina nno olumwenku wotheene. Muluku owo aahaaleela atthu awe wira: “Miyo k’Apwiya [Yehova], nsina naka ti nenla. Khavo onimukawelaka ovuwa waka: miyo nkinavaha amuluku a èthiru nttittimiho ninkiphwanela”.​—Yesaya 42:8.

Niireke nivekelo na Eliya ni na maprofeta a Bayali naaronwe nipuro nimosa? Okokhoreliwa Bayali waanaahonona atthu ni orupihana woohiloka vamosa ni waapaha atthu yaavahaka mukuttho. Moovirikana ni vo, okokhoreliwa wa Yehova waanavaha efaita atthu a nloko na aIsarayeli, ni waaniwiiriha ohipaka soolema iyo soohiirya. Nkahaya muupuwele ela: Vaakhanle wira munimuroihela ekarta mpatthani anyu oottittimiheya, niireke mwamunvahererya mutthu mweettelo awe ori woohiloka ni ohinivarihana ni mweettelo wooloka wa mpatthani anyu? Nnaari!

Okathi muninvekela anyu Yehova, nyuwo munivekela Mpattuxa yoowi ori Tiithi a apinaatamu otheene.a Ovekelaka, profeta Yesaya aahimmye so: “Nyuwo, Apwiya, nyuwo pahi mwá Tithi’ihu”. (Yesaya 63:16) Owo Muluku yoole Yesu aamuhimmye awe vaavo aalenle awe atthareli awe wira: “Miyo kinrowa wa Tiithi aka, yoowo-tho okhanle Tiithi inyu; kinrowa wa Muluku aka, yoowo-tho okhanle Muluku anyu”. (Yohani 20:17) Yehova tori Tiithi ahu. Owo Muluku yoole Yesu anvekela awe ni aawiixuttinhe awe atthareli awe onvekela.​—Matheyo 6:9.

Niireke Biibiliya onnihimya wira nihaana onvekela Yesu, Maria, masanto ni malaikha? Nnaari, maana nihaana onvekela Yehova paahi. Nwehe itthu piili sinniiriha onvekela Yehova paahi. Yoopacerya, ovekela enamuna ya okokhorela ni Biibiliya onihimya wira nihaana onvekela Yehova paahi. (Okhuma 20:5) Ya nenli, Biibiliya onihimya wira: “Nyuwo munniwìwa ale anovekelani”. (Esalimo 65:3) Nnaamwi Yehova aavahaka miritti wala miteko atthu akina, owo khonvahe miteko iyo miili mutthu mukina. Owo Muluku oleihenrye owiriyana mmensawe mavekelo ahu.

Mwaaphavelaka wira Muluku owiriyaneke mavekelo anyu, muupuweleke moolumo ala Biibiliya onihimya awe oriki: “Otheene ale anivekela aromolaka nsina na Yehova, animoopoliwa”. (Miteko 2:21) Niireke Yehova onniwiriyana mavekelo otheene? Wala yookhala etthu ninreerela ahu opaka naaphavelaka wira Yehova owiriyaneke mavekelo ahu?