6 Niireke Ovekela Onnikhaliherya?

NIIREKE ovekela onninikhaliherya tthiri? Aayo. Maana Biibiliya onnihimya mavekelo arumeyi a Muluku yaapanke aya, yaawo yaakhalihenrye vanceene. (Luka 22:40; Yakobo 5:13) Tthiri ovekela pooti onikhaliherya momunepani, mmuupuweloni ni werutthuni. Moota xeeni?

Vaakhanle wira mookhalana mwaana, vano mwaana owo ovahiwa etthu, niireke khimwaarowa omwiixuttiha okhala mutthu ooxukhuru? Wala mwammwiixuttiha wooniherya wira mutthu ooxukhuru? Vaavo moonelo ahu nnooniherya ahu ni moolumo, ninnivaha ikuru ni ninnilipiha vanceene. Niireke etthu emosaru enniiraneya vaavo ninlavula ahu ni Muluku? Aayo! Nwehe matakiheryo vakhaani.

Mavekelo anooniherya oxukhuru. Vaavo nimmuxukhurela ahu Tiithi ahu mwaha wa itthu sooloka onnivaha awe, hiyo ninniwehexexa mareeliho awo onnivaha awe. Nto eyo enninikhaliherya okhala atthu ooxukhuru, oohakalala ni arina moonelo wooloka.—aFilipi 4:6.

Ntakiheryo: Yesu aahooniherya wira aanimuxukhurela Tiithi awe mwaha wa owiriyana ni waakhula mavekelo awe.​—Yohani 11:41.

Mavekelo a oleveleliwa. Vaavo nnivekela ahu Muluku wira onilevelele, ninniixuttiha murima ahu, ninnittharuwa ni murima wotheene ni ninniweha wira etampi nipanke ahu yuulupale. Nave ninnihiya wiivaha nthowa.

Ntakiheryo: Davidi aahivekela wira ooniherye ottharuwa wawe ni murima wotheene ni oriipiwa wawe murima.—Esalimo 51.

Ovekela malakiheryo ni ankhili. Onvekela Yehova wira onivahe malakiheryo ni ankhili wira nipake soothanla sooloka onninikhaliherya okhala atthu oowiiyeviha. Eyo enoonikhaliherya ohiliyala wira sookhala itthu nihinwerya ahu ni omuroromela Tiithi ihu a wiirimu.—Miruku 3:5, 6.

Ntakiheryo: Mowiiyeviha Salomoni aahaavekela ankhili wira osuwele olamulela oratteene wIsarayeli.—1 Mamwene 3:5-12.

Ovekela okathi wa mixankiho. Vaavo nimmutthukulela ahu murima ahu Muluku okathi wa mixankiho ninnikhala saana ni ninniixutta omuroromela Yehova ohiya wiiroromela mmensihu.—Esalimo 62:9.

Ntakiheryo: Mwene Asa aahivekela okathi aatupheliwa awe ni nwanani ootupa.—2 Wahala 14:11.

Waavekelela atthu akina. Mavekelo awo anninikhaliherya ohaakhalela nrima atthu akina, okhala mutthu oomoriwa ikharari ni oothunku.

Ntakiheryo: Yesu aahaavekelela atthareli awe.—Yohani 17:9-17.

Mavekelo a omuttottopela Muluku. Vaavo nimmuttottopela ahu Muluku mwaha wa mikhalelo sawe sooloka, ninnitepa omuttittimiha ni omuxukhurela wahu onnincerereya. Mavekelo awo anninikhaliherya okhalana waataana wooloka ni Muluku ahu ni Tiithi ahu.

Ntakiheryo: Moohakalala Davidi aahimuttottopela Muluku mwaha wa itthu opattunxe awe.—Esalimo 8.

Mareeliho makina nimphwanya ahu mwaha wa ovekela anihela muhina “murettele wa Muluku, yoowo onvikana osuwela wotheene wa apinaatamu”. (aFilipi 4:7) Tthiri okhalana murettele olumwenku ola wooxankiha eparakha yuulupale, maana atthu anceene kharina. Murettele owo onnikhaliherya ekumi ahu. (Miruku 14:30) Niireke murettele owo onikhumelela mwaha wa wiimananiha wahu? Wala yookhala etthu ekina ya faita yinceene enihela muhina?