7 Niireke Muluku Onnaakhula Mavekelo Ahu?
ATTHU anceene anniphavela osuwela waakhuliwa wa nikoho niri vasulu-vo. Biibiliya onnooniherya wira Yehova onniwiriyana mavekelo anipakiwa olelo-va. Wira Muluku owiriyane mavekelo ahu sookhala itthu ninreerela ahu opaka.
Yesu aahooniherya wootha wa ahooleli a itiini a mahiku awe yaawo yaavekela mapuro oowaatta atthu wira yooniweke. Awo yaaphavela paahi wira yooniweke wira yaari anaxariya. Yesu aahimmye wira atthu awo ‘yahaakhela etthuvo aya’. Ni moolumo ala, Yesu aahooniherya wira etthuvo aya yaari etthu yeele yaaphavela aya, eyo piiyo, ovuwihiwa ni apinaatamu ohiya ophavela owiriyaniwa ni Muluku. (Matheyo 6:5) Mwa enamuna emosaru, olelo-va atthu anceene anivekela moovarihana ni ele aniphavela aya ohiya ele Muluku oniphavela awe. Awo annikhootta otthara malakiheryo a mBiibiliyani yaawo nithokorenrye ahu, nto Muluku khoniwiriyana mavekelo aya.
Ankhi nyuwo? Niireke Muluku onniwiriyana ni waakhula mavekelo anyu? Waakhuliwa waya khonlipa ni nikhuli nanyu, elapo muyariwe anyu nnakhala okhulupale murina anyu mmuttettheni. Biibiliya onihimya so: “Muluku khonaathanya atthu, masi khula elapo, owo onnimwaakhela khula mutthu onimoova, ni oneettela exariya”. (Miteko 10:34, 35) Niireke moolumo ala annoohimyani nyuwo? Akhala wira munnimoova Muluku, nyuwo munnimuttittimiha vanceene ni munnikhootta opaka itthu sihinimusivela. Akhala wira mwa naxariya, nyuwo munniimananiha otthara ele Muluku onihimya awe ohiya otthara moonelo wala itthu apinaatamu akina anihimya aya. Niireke munniphavela wira Muluku owiriyaneke mavekelo anyu? Biibiliya onnooniherya moota mukhanle anyu oovekela wira Muluku owiriyaneke mavekelo anyu.a
Atthu anceene aniphavela wira Muluku aakhule mavekelo aya mwa mwiiriirya. Musuweleke wira hata okathi wa Biibiliya, Muluku khaamakela opaka miiriirya. Okathi mukina waanivira okathi munceene Muluku ohipanke miiriirya. Nave Biibiliya onnooniherya wira miiriirya saamanle nuumala ovira okathi wa arummwa. (1 aKorinto 13:8-10) Niireke eyo enooniherya wira Muluku khonaakhula mavekelo anipakiwa olelo-va? Nnaari! Nwehe matakiheryo vakhaani a mavekelo Muluku aakhunle awe.
Muluku onnileiherya onivaha ankhili. Yehova tori mwaneene ankhili otheene eekeekhai. Okhala wira owo Muluku oovaha, owo onnaavaha ankhili ale aniphavela malakiheryo awe ni anikhala moovarihana ni ele oniphavela awe.—Yakobo 1:5.
Muluku onninivaha munepa awe woowaarya ni onniniphwanyiha mireerelo. Munepa woowaarya ti ikuru Muluku onirumeela awe. Ikuru iyo ti sooweryexa ovikana itthu sotheene. Iyo pooti onikhaliherya ovilela mixankiho. Nave pooti oniphwanyiha murettele okathi wa mixankiho. Ohiya-vo, pooti onikhaliherya okhalana mikhalelo sikina sooloka. (aGalasia 5:22, 23) Yesu aahaaleela atthareli awe wira Muluku aamwaavaha munepa awe woowaarya.—Luka 11:13.
Muluku onnaavaha osuwela ale animphavela ni murima wotheene. (Miteko 17:26, 27) Olumwenku wotheene, aakhala atthu aniphavela osuwela ekeekhai. Awo aniphavela omusuwela Muluku, nsina nawe, yoolakela awe ni elapo ya vathi ni apinaatamu ni moota akhanle aya ookhalana waataana wooloka ni yena. (Yakobo 4:8) Anamoona a Yehova animakela waaphwanya atthu ntoko awo ni annisiveliwa waakhula makoho atthu awo arina aya.
Etthu xeeni ewiirinheni weemererya erevista ela? Niireke muniphavela omusuwela Muluku? Woonasa wene, waakhuliwa wa mavekelo anyu.