Nuulumo na Muluku ti Noowerya—Mwaha ola onikhuma Anuário das Testemunhas de Jeová, 2013
Ásia
Epaaxina 57, ettima 1 mpakha epaaxina 59, ettima 3
Mulopwana Mmosa Aasiveliwa Owara Ikuwo sa Athiyana Onniixutta Ekeekhai
Rek oyariwe emusi emosa ya oCamboja. Owo ni munnawe yaari maphapo; nto okhuma enamwane aya, awosa yuupuwela wira yaari athiyana. Yaanithweela ni aboneka ni yaanisiveliwa owara ikuwo sa athiyana. Amamaya yaaninanariwa ni wuuliwa muru nto khiyaasuwela etthu yoopaka. Okathi amiravo ala yaakhuma aya owaani erowaka oxikola, yaawara ikuwo sa alopwana, masi nuumala ophiya oxikola yaanirula enawara ikuwo sa athiyana. Nuumala okhalana iyaakha 16, awosa yaahiilepiha oxinttana ni alopwana akina voohimya sa ophwaneliwa, (concurso de beleza) yoowo aapakiwa ni alopwana yaale yaasiveliwa owara ikuwo sa athiyana, nto eyo yahaasivela anamunceene yaale yaasiveliwa ni matthekulelo. Awosa yaahilattuliwa wira yiirele mpantta iprograma sa Televisau ni opaka iteatru. Moohipisa Rek aahipacerya orupihana ni alopwana akhwaawe ni aahipaka opatthani ani alopwana akina yaawo yaasiveliwa owara ikuwo sa athiyana.
Amamawe Rek, yaahipacerya weetta okerexa nto yaanimukhanyererya orowana hoothe. Owo aaheemya owara ikuwo sa alopwana masi aahikhootta othikila maihi (ikharari) awe yaawo yaari oorakama. Muhooleli a ekerexa aamakela omunyohola Rek ni aaninveeha mwaha wa mweettelo awe. Masi nnaamwi vaari siiso, Rek uupuwela wira omusoma Biibiliya okerexa vaari vootthuneya. Esumana yoopacerya, aahivenya voosisu aheetta ikiloomo vakhaani mpakha okerexa, masi muhooleli a ekerexa khaaphavela omwiixuttiha ni ahoothererya ohikhalana okathi. Esumana ya nenli muhooleli ole khaarwaale okerexa nto Rek aahinanariwa.
Masi vaavo Rek aaphiyale awe owaani, munnawe aahimuleela wira aahixekuriwa ni muthiyana mmosa yoowo aavaha soosoma sa Biibiliya moohiliviha etthu. Murokora owo aahihiya eliivuru Biibiliya Oniixuttiha Exeeni Tthiri? Oowanli aya yaahipacerya omusoma Biibiliya ni murokora mmosa ni aiyawe yaawo yaari anamoona a Yehova. Nuuvira myeeri 6, munnawe Rek aahihiya omusoma Biibiliya maana uupuwela wira khaarowa owerya opaka marukunuxo mookumini mwawe. Masi yoolepa ya 1 aKorinto 6:9, 10, yaahimwiiriha Rek wuupuwelela makhalelo awe, nto khiweha wira aahaana opaka marukunuxo mookumini mwawe. Omusoma Biibiliya, orowa omuthukumanoni, ni onvekela Yehova, ti itthu saamukhalihenrye Rek opaka marukunuxo. Amamawe Rek aapacerya omusoma Biibiliya ni annirowa vahoolo. Vaavo Rek aabatiziwe awe, awo yaahimoroxa maithori khuhimya wira: “Nkireere ohakalala okhala wira mwanaka oobatiziwa ntoko mulopwana!”. Vano, Rek ti pioneero ookilaatheya.
Mukulukhana Mmosa Onnihiya Onamminepani
Mukulukhana mmosa, muthiyana, yoowo aitthaniwa Or-Ya, aanisuweliwa okhala mulipa oovaha miruku orumeelaka maxitta. Pioneero mmosa a vameekhaaya ni mwaarawe yaawo yaarumeela muttetthe wa Haifa, wIsarayeli, yaahimuxekurya mukulukhana owo vaavo yaalaleerya aya khula enupa. Nto vaavo yaaphiyale aya owannyawe aahiwaakhela ahimyaka so: “Akhala wira muniphavela olavula voohimya sa Muluku, mukeleke!” Owannyawe saahisareya itthu sootikiniha saavarihana ni onamminepani, okhwiri ni maxitta. Owo aahaaleela mapioneero ale wira aanihimeeriwa itthu ni Muluku, masi ikina aaleeliwa ni “munepa” wa mwiixuttihi mmosa aakhwiiye.
Or-Ya aahihakalala vaavo aaleeliwe awe sa osoma eliivuru Biibiliya Oniixuttiha Exeeni. Mahiku manli ahinatthi orwa mapioneero ale, owo aahinvekela Muluku wira amurume mutthu wira amukhaliherye omusoma Biibiliya, voohikhala sowiixuttiha soowoka. Nuuvira mweeri mmosa amusomaka Biibiliya, owo aahikoha so: “Kiireke aakhala atthu akina arina sookupali simosaru ni nyuwosa?” Owo aahirowa Osalau wa Omwene ni aahitikinihiwa ni moota aakheliwe awe moophenta. Nto okhuma vaavo, owo khonicompela mithukumano.
Vaavo aamalihale awe miyeeri miili amusomaka Biibiliya, Or-Ya aahikoha so: “Kiira Anamoona a Yehova anibatiziwa osembeleyani? Nto muhina mwa myeeri miili, nyuwosa muhaana okikhaliherya wira kibatiziwe!” Etthu yoopacerya aapakale awe, waari oriha itthu aarumeela awe sa onamminepani ni maxitta, seiyo saari sa musurukhu munceene. Etthu yanenli aapakale awe, waari opacerya waalaleerya otheene yaale khalai yaarwa waaxerya ehako, owooniheryaka eliivuru Biibiliya Oniixuttiha Exeeni, ni irevista. Vaavo aawereiwale awe, owo aahikhootta orumeela maxitta. Okhala wira aahihiya muteko awe, owo aahimaliha myeeri 4 voohikhalana musurukhu. Masi nnaamwi vaari siiso, owo aahithanla muteko yoowo waarowa omweemererya ovara miteko sa Muluku. Muteko owo wahaana okhala wa mahiku maxexe vasumanani, ni iwoora 6 vanihikuni. Nuumala, aahiphwanya muteko wooreerela. Nto aahitumiha enupa awe yuulupale ni aahaalukari enupa yaamukhaani. Nuuvira okathi, Or-Ya aahiphwanelela wira obatiziwe. Masi ehalaka esumana emosa wira niphiye nihiku na asembeleya, owo aahinta mwetto. Moohikhumuwa owo aahibatiziwa mwetto oheliweene gesso. Olelo-va, Or-Ya namalaleerya ooluttuweliwa. Owo onnaalaleerya atthu yaale khalai yaarwa owannyawe waaxerya ehako; nave-tho, onniiriha soosoma sa Biibiliya.