Nivarexexe Moonelo wa Biibiliya Voohimya sa Naakhwa—Mpantta 4
Orowa oNaakhwani wa Ale Ahikhanle Anamoona
Orowa onaakhwani wa atthu anikupali sowiixuttiha sa etiini yoowootha okerexa waya wala opuro mukina, ti mwaha wooxankiha vanceene. (Nwehe A Sentinela 15 ya Maio, 2002, muru oni: “Perguntas dos Leitores”). Ti vooreera wuupuwela wira masikho anipakiwa okerexa, aniirela mpantta niira na itiini soowoka. Nto, pooti oheliwa muhina sowiixuttiha sinooniherya sookupali sihinivarihana ni Biibiliya, ntoko yowiixuttiha yoowi erooho ya mutthu khenikhwa, ni atthu ooreera murima anrowa wiirimu. Ikwaha sinceene, yoolema ya olaxerya murutthu, wiipa masipo a itiini sowootha, waavekelela amuhavinre, ovaha mikuttho, omwarexa eviinyu omahiye ni soolema sikina sa epagau, sinnipakiwa okathi wa naakhwa.
2 Ikwaha sikina, atthu a etthoko ekhweliwe, pooti okhanyereriwa opaka soolema sa naakhwa sihinivarihana ni Biibiliya. Mwa ntakiheryo, mwaana mwaamulopwana oopaceriwa nuumala okhwa tiithi awe ohikhanle Namoona, waaniheryasa onnilipeleliwa wira onoopaka soolema sa naakhwa sihinivarihana ni Biibiliya. Wala naamukhweli ori muKristau, waaniheryasa onnilipeleliwa wira onoopaka soolema sikina sa epagau. Okathi owo, ti vootthuneya owehaweha saana wira nihipake etthu yoohiloka. Nto, nihilipeleleke okhumela naakhwa wira naasuweliwe amusi ahu oohaamini sookupali sahu voohimya sa naakhwa. Akhala wira nnimwaaleela vahinatthi sookupali sahu, eyo enoonikhaliherya wiiwelela sookupali sahu seKristau okathi ninxanka ahu ni oriipiwa murima mwaha wookhweliwa.
3 Ankhi akhala wira munna onuupuwela wira orowa onaakhwani wa ale ahikhanle Anamoona onoomwiiriha opaka itthu sihinivarihana ni Biibiliya aahiiso waakhumuliha akina, wala onyakulihana ni ale oohaamini? Wuupuwelela itthu iyo, pooti omwiiriha muKristau okhalana mathowa ooloka wira ohirowe onaakhwani iwo. Akhala wira mwaha wa yowuupuxerya ya murima muKristau onithanla ohirowa onaakhwani, ohikhale mutthu a mmulokoni onirowa omunyohola wala ohisiveliwa. Anna akina annithanla oxukurya emusi ekhweliwe ahinatthi opakiwa masikho wala nuumala opakiwa. Okathi owo, emusi ekhweliwe woonasa wene enoorowa owiriyana saana ele Biibiliya oniixuttiha awe. Waakhaliherya ale akhweliwe naavahaka musurukhu nihooniwaka ni atthu akina, ti vooloka mwaha woowi eyo enimwaakhaliherya amusi awo.
4 Muupuwele Sowoopiha Sikhanle Ookhumelela: Atthu anceene oohaamini anoona wira onaakhwani opuro wootthekula, okumana ni atthu akina, olya ni owurya eviinyu enivahiwa onaakhwani iwo. Owoona atthu ni wooniwa onaakhwani, onnithokoreriwa ntoko etthu ya faita. Masi ohirowa onaakhwani, pooti othokoreriwa ntoko oveeha wuulupale wa emusi ekhweliwe. Akina anuupuwela wira akhala wira khanaattela orowa onaakhwani wa atthu akina, okathi anrowa aya okhwa khankela orwa atthu anceene! Mwaha wa mathowa ala, ti voolema wuumalani wa esumana, anamunceene orowa masikho oovirikana oowiiraka manli, mararu, wala manceene, hata yahaamusuwenle saana ole okhwiiye ni ahiweryaka opaka etthu wa emusi ekhweliwe. Niireke miyuupuwelo iyo sinnivarihana ni moonelo wa Muluku?
5 Okhala wira hiyo na arumeyi eekeekhai a Yehova, nihaana wuupuwelaka mixankiho sinikhumela mmukhalelo ahu womunepani voohimya sa omakela orowa onaakhwani wa atthu oohaamini. Khivaarowa okhala va miruku oviriha okathi munceene nrowaka onaakhwani woomalani wa esumana, nto khiyakhalana okathi vakhaani woorowa olaleerya ni ovara miteko sikina sa eKristau. (aÉf. 5:15, 16) Omasikhoni wa atthu oohaamini, ikwaha sinceene sinnipakiwa itthu sihinivarihana ni Biibiliya ntoko owurya eviinyu mootepana ni onamuttompe. Niireke vaamukhala va miruku orowa onaakhwani muttetthe woorakamela niryeene mekhihu wala omuruma ole othelanne ahu, aahiiso mutthu mukina a etthoko ahu oryeene ekhawe? Nto, nihaana okhalana ephoole, voohimya sa omakela orowa omasikhoni sinipakiwa itthu sihinimuhakalaliha Yehova, okhala wira eyo pooti onitteettheiha momunepani ni omutthu ahu wa eKristau.—Wis. 18:4.
6 Ikwaha sikina, maKristau oohikhalana ephoole khanuupuwela sowoopiha sikhanle ookhumelela, nto mwaha wa yeeyo aapaka itthu sowuuliha muru. Akina aayeleela iparakha saya sa orummwa wala okumihiwa mmulokoni. Biibiliya onilopola so: “Mulipa-ànkhili onnona yowopiha, anahuluwa”. (Mir. 22:3) Wiiwexexa malakiheryo ala ni wuupuwelela sowoopiha somunepani ni mweettelo ahu, ohaana oniiriha okhalana ephoole vaavo nnuupuwela ahu orowa onaakhwani wa atthu ahikhanle Anamoona.
Moonelo wa Biibiliya ti Wooloka ni Wowooneya Saana
7 Yoolepa ya 1 aKorinto 10:21 enihimya so: “Khamunwerya olya va mesa v’Apwiya [Yehova] ni va mesa va Satana”. Atthu a Muluku anniiwelela yoolopola ela. Nihimye exeeni akhala wira munna wala murokora onnipaka soolema sihinivarihana ni Biibiliya mwaha wookhanyereriwa ni amusi oohaamini wala anamwaattamanani? Akhala wira Namoona onoopaka etthu enooniherya waakokhorela amuluku eethiru wala wataana ni itiini sikina, eyo enooniherya mweettelo wa onammwareya. Nto axitokweene ahaana opaka etthu wira muloko ovikanihe okhala wooloka.—Otum. 18:9-13; Yer. 7:16-19.
8 Mukhalane Moonelo Wooloka Voohimya sa Naakhwa: Exeeni enirowa onikhaliherya okhalana moonelo wooloka voohimya sa naakhwa ni soolema sikina nithokorenrye ahu? Hiyo nihaana omphentaka Yehova ni murima ahu wotheene ni ‘okhotta sotakhala’. (Esal. 97:10) Nave, nihaana okhoottaka soolema sa naakhwa sinivarihana ni sookupali soowi alipa-ookhwa, anniwerya waakhaliherya atthu akumi. Ohiya-vo, waaphenta wahu vanceene atthu akina, ohaana oniiriha osyaka opaka etthu yaarowa waakhumuliha maKristau akhwiihu wala ohonona yowuupuxerya ya murima aya.—1 aKor. 10:32, 33.
9 Wiiwexexa wahu saana mukhalelo wa alipa-ookhwa, ohaana onikhaliherya osyaka miyuupuwelo ni mikhalelo sa atthu ari mweepiphini momunepani. Nave-tho, nihaana osyaka waatakiha yaale anipaka masikho moophavela onvuwiha ni omuttittimiha ole okhwiiye aahiiso, wooniherya muhakhu arina aya. Ohiya-vo, hiyo niheemyeke wira naakhwa oniirihe ohithokorerya miteko sootthuneya sa Muluku. Wala nihikhaleke atthu oowaakuva onanariwa nto khiyaxanka akhala wira munna mmosa onithanla ohirowa onaakhwani wala khonnivekela wira nimukhaliherye. MaKristau a eekeekhai annuupuwela ni opaka itthu moovirikana ni atthu oohaamini mwaha woowi awo aneettela ekeekhai ya Biibiliya. (aÉf. 5:8) Hiyo ninninla ni onvitha mmusi ahu okhwiiye mwa enamuna yoottittimiheya enooniherya wiiwexexa wahu wa omunepani, ni mwa enamuna yooloka, moohaattiherya itthu, niiwelelaka ekeekhai ya Biibiliya.—1 aTes. 4:13; 5:5, 8, 11.
10 Muhimooveke Mutthu: Ekeekhai wira hiyo khanniphavela waakhumuliha akina. Masi, nuupuweleke wira okathi wa Yesu atthu akina khiyaasiveliwa ni miteko sawe sooloka mwaha woohiiwexexa ekeekhai ya Biibiliya. (Yoh. 6:60, 66) Moolikanasa, atthu akina pooti ohisiveliwa ni okokhorela wahu wekeekhai. Okhootta wahu opaka soolema sa epagau, pooti owiiriha ale ari oohaamini oninyokha, oninyohola, oniveeha, ni onikumiherya maxakha. (1 Ped. 4:4) Anamoona a Yehova akina, aaleeliwa ni amusi aya wira khanirowa ovahiwa muhakhu wa anamuyari aya ni khanirowa okhaliheriwaka. Akina anninyokhiwa mwaha woovarexexa moonelo wa Biibiliya. (Yoh. 15:19) Anna akina, annooniwa ntoko anamattheka ni annihimmwa okhala atthu oohipatthaneya, ni ahinimuttittimiha ole okhwiiye. Nnaamwi wiireliwa itthu sootakhala ohihakalalihaka, hiyo ninnilipelela onyoholiwa, nisuwelaka wira na atthu oovirikana ni olumwenku. (2 Tim. 3:12) Tivonto, ohiya omoova mutthu, hiyo nihaana weemererya olamuleliwaka ni Yehova Muluku nto nimoovaka mookhalela nihiphavelaka onviruwiha.—Mir. 29:25; Mit. 5:29.
11 Ale Ahinaamini Yooneke Ovirikana: Atthu akina annaaveeha Anamoona a Yehova ariki: “Nyuwosa khimunaavitha amusi anyu anikhwa”. Niireke masu awo ahaana onitikiniha? Niireke ikwaha sikina, nnoona wira ti vootthuneya owooniherya atthu akina wira hiyo ninnisuwela waavitha amusi ahu akhwiiye? Nuupuweleke wira Yesu aahikhootta otuphela vathi va empa ya Muluku vaavo Satana aamuttehattenhe awe wira ooniherye akhala wira aari Mwaana a Muluku. Owo khaaphavenle opaka etthu yoohiloka wira owooniherye akina. (Math. 4:5-7) Moolikanasa, hiyo nihaana okhoottela yoophavela ya owooniherya akina wira ninnisuwela waavitha amusi ahu akhwiiye; maana hiyo khanimphavela otakiha masikho anipakiwa ni ale ari oohaamini. Ninrowa owerya sai opaka eyo? Nimutakiheke Yesu.
12 Atthu a Muluku annisyaka itthu sinivarihana ni okokhorela wowootha ni khanivara itthu sinilikanasa ni okokhorela wekeekhai masi siryeene soolema soohiloka. Opaka eyo waarowa owiiriha atthu akina wuupuwelaka wira Anamoona a Yehova aakhalana soolema saya sa epagau. (aGal. 6:12; Otum. 12:30) Masi, hiyo ninnoona wira soolema iya sinninveeha Muluku, ti sa epagau, ni khasinivarihana ni okokhorela wekeekhai. (1 aKor. 10:20) Vaavo ninkhalana ahu moonelo ola, ninnaavaha atthu eparakha ‘yowoona wira anaxariya, annimurumela Muluku, ni khanìreliwa ntoko sinìreliwaya alipa-òtakhala ahinimurumela’.—Mal. 3:18.
13 Moohipisa, okhwa khunrowa okhala-tho. Maithori ahu, oriipiwa murima, ni woona owereya vamurimani vahu, onoomala vaavo Yehova onrowa awe waahihimuxa ale akhwiiye. (Wis. 21:4) Masi, wira naawehe amusi ahu awo, nihaana okhalana waamini woolipa vano. Nto vaavo ninlipelela ahu wiiraneya wa sooleiherya iya soohakalaliha, nrowe niimananihe wira niphwanyiwe ni Yehova nirine ene murima wooreera ni woohittheka; nivalaanaka moomalela ni olumwenku ola wootakhala ni sowiira saya sihinimuttittimiha Muluku!—2 Ped. 3:14.