Mmuttottele Mureerelo Anuário a 2015
Mwaha ola okumihiwe Anuário das Testemunhas de Jeová de 2015
Epaphelo ya Nikhuuru Noolamulela
Anna ni Arokora Oophentiwa:
“Mahiku othene, ninnimuxukhuru Muluku mwaha wa nyuwo othene, niwupuwelakani mmalompeloni mwahu. Vekekhai, oholo wa Muluku Tith’ihu ninnupuwela vohihiyererya wira munnittharihela wamini wanyu, ni miteko sorera, ni wira munniphentana muhawelanaka, ni wira munnikhalela nthiti omuroromela Yesu Kristu Pwiy’ahu”. (1 aTes. 1:2, 3) Tthiri masu ala annooniherya oratteene moota siniwoonelaahuni! Hiyo ninnimuxukhurela Yehova mwaha wa nyuwo ni muteko wooloka onivara anyu. Nthowa xeeni?
Mwaisana, nyuwo moovara miteko sinooniherya “wamini wanyu” ni “miteko sorera” wira mukhaliherye Omwene. Anamunceene a nyuwo yaahaavya inamuna wira yinnuuherye muteko aya woolaleerya. Akina yaahithaamela mittetthe wala ilapo soothowa anamalaleerya a Omwene. Akina yaahinnuuherya muteko aya woolaleerya alaleeryaka mapuro oowaatta atthu. Anceene taale yaakenle muteko wa opioneero wookhaliherya okathi wa Wuupuwelela Okhwa wa Yesu, ni myeeri saaxukuriwa aya ni mutokweene a esirkwitu wala okathi wa ekampaanya ya vameekhaaya ya Agosto 2014. Nnaamwi makhalelo a khula mutthu avirikanaka, hiyo nihoona wira nyuwo munninvarela Yehova muteko ni murima anyu wotheene, nto ninnoottottopelani. (aKol. 3:23, 24) Miteko sanyu sinooniherya “wamini” sinninitumererya omuxukhurela Yehova!
Hiyo ninnixukhurela nave “miteko sorera” sivariwe sitekiwaka ipa sinivareliwa miteko sa Omwene olumwenku wotheene. Tthiri ninniphavela ipa iyo mowaakuveya okhala wira mwaattelo wa atthu a Yehova onootepa wunnuwa khula nihiku. (Yes. 60:22) Nkahaya nwehe, mwaisana mwaattelo musya wa anamalaleerya waahiphiya 8.201.545, ni mwaattelo wa soosoma sa Biibiliya waari 9.499.933 khula mweeri. Mwaha wa mwaattelo owo, ifiliyaali sinceene sinitthuneya wunnuuheriwa wala olokiheriwa. Nave, sinnitthuneya Ipa sa Omwene sinceene! Vamosaru, sinnitthuneya iskritoorio sinivariwa muteko wootaphulela mapuro manceene a valaponi, wira anamataphulela ahu akhaleke ni ovara muteko mapuro yaale anilavuliwa nttaava anitaphulela aya.
Tivonto vanireerela aya khula mmosa a hiyo wiikoha so: ‘Kinrowa opaka exeeni wira kikhaliherye muteko owo wooteka ipa iyo?’ Akina anoowerya wiivahererya orowa okhaliherya oteka ipa iyo. Hata musuwelaka oteka ipa iyo, wala nnaari, otheene ahu nookhalana eparakha ya ovaha mireerelo sahu wira sivareliwe miteko iyo sootthuneya. (Mir. 3:9, 10) Okathi waatekiwa awe tabernaakulu, aIsarayeli yaahivaha mireerelo sinceene vanatthuneya oleeliwa wira ahiyeke oruuha soovaha saya. (Okhum. 36:5-7) Moohaaniherya, ntakiheryo nla niri mBiibiliyani ninninivara murima. ‘Miteko sanyu sorera’ seiyo sinikhaliherya mwa inamuna soovirikana miteko sa Muluku ti etthu ekina enniiriha omuxukhuru Yehova!
Nthowa nikina na vameekhaaya ninniiriha otteeliwa murima ti woona moota annihu anivilela aya mixankiho moohittikinyeya. Mwa ntakiheryo, muthokorerye ele eniwiiraneela annihu oophentiwa oCoreia do Sul. Okhuma mwaakha wa 1950, annihu amiravo a elapo ele annitthukiwa mwa okathi woovirikana mwaha wa okhoottaka opaka itthu saarowa opahula mweettelo aya wooloka wa eKristau. Osuulu munceene wa annihu annivilela makhalelo awo moohittikinyeya. Ntakiheryo naya na ovilela ninnilipiha waamini wahu!
Elapo ya Eritreia, annihu araru aaviriha iyaakha sinivikana 20 ari mukhatteya. Akina, waahela muhina arokora ni anaaya, aatthukweliwa iyaakha sinaattamela 20. Anna anniimananiha wira awo ataphuliwe, masi nlelo eyo khiyiranen’ye. Hata vari siiso anna ale nlelo toororomeleya. Awo aawerya ovikaniha okhala oororomeleya mmakhalelo ale ootakhalexa. Hiyo khanniliyala waavekelela anna awo.—aRom. 1:8, 9.
Ekeekhai wira nenna-va anamunceene khatthukiwe mwaha wa waamini waya. Hata vari siiso, aakhala akina anixankiheya mwaha wa wuuluvala, owereyasiwa, olupatthiwa ni ale athelanne aya ahikhanle namoona wala amusi akina, ohela muhina mixankiho sikina sinisuwela anyu mwaaneene. Nlelo nyuwo munnivikaniha omurumeela Yehova moororomeleya! (Yak. 1:12) Hiyo ninnoottottopelani vanci. Ovilela wanyu moororomeleya onniniiriha omuxukhurela Yehova.
Tthiri, miteko sanyu sooreera sinooniherya ororomeleya, ni ovilela wanyu okathi wa mixankiho sinniniphwanyiha mathowa wira ‘nimutthapele Yehova mwaha wa orera wawe murima’. (Esal. 106:1) Hiyo ninnoophentani nyuwo ni murima ahu wotheene, ni ninnoovekelelani wira Yehova woolipiheni, wookhaliheryeni ni wooreeliheni okathi onirowa anyu omurumeelaka mahiku otheene.
Anninyu,
Nikhuuru Noolamulela na Anamoona a Yehova
[Ipaaxina soohikhala etthu 6,7]