Mukhale Mmiravo Wala Oowunnuwela Munoowerya Waavaha Ntakiheryo Nooloka Akina — Mwaha ola okumihiwe Anuário das Testemunhas de Jeová de 2015
wEuropa
Ntakiheryo Nooloka na Tiithi
Epaaxina 71, ettima 2 mpakha epaaxina 72 ettima 4
Jemima, yoowo onikhala wEspanya, aiixuttihiwe ekeekhai okhuma enamwane awe. Masi okathi aarina awe iyaakha 7, ekumi awe yaahiturukeya moomalela. Maama awe khaaphavela okhala Namoona a Yehova nto aahimwalana ni paapa awe. Okathi waarina awe iyaakha 13, Jemima aahihiya orowa mithukumano sa Anamoona ni aanikhootta khula nikhaliheryo na omunepani aavahiwa awe ni apapawe.
Jemima aahinnuwa, khukelela okhaliherya mitthenkeso sa mmawaani ni epoliitika ophavelaka okumiherya “exariya” wa atthu yahooneliwa vatthu. Muhoolo mwaha, okathi ahaarina awe muteko, paapa awe Domingo, aahimulattula wira avareke hoothe muteko wa opintari ipa.
Nihiku nimosa avarasaka muteko, Domingo aahiimananiha wira opacerihe yoosoma ya Biibiliya ni Jemima. Owo aahikhootta khwiira, vakhala wira amphavela muhoolo aarowa omuhimeerya. Domingo aaniwiriyana masu oogravariwa a Biibiliya ni irevista okathi waavara awe muteko, masi mwanawe ole waamusivela owiriyana muusika oniireliwa pop orumeelaka ifooni.
Mweeri wa Novembro 2012, Domingo, iira omuthenle ene muthiyana mukina, nto aahilattuliwa wira orowe Exikola Eniwiixuttiha maKristau Oothelana. Eyo yaahinvara murima Jemima mwaha wa osuwela wira paapa awe aarowa exikola enimwiixuttiha Biibiliya ovirihaka myeeri miili ni ohiyaka miteko sawe sotheene. Ole waari mukwaha woopacerya Jemima aawenrye awe woona wira ekeekhai yaahikela saana vamurimani va paapa awe nto owo aahiphavela osuwela nthowa naya.
Okhuma vaavale Jemima aahihiya owiriyana isipo sawe iye onapacerya owiriyana etthu emosaru yaawiriyana awe paapa awe. Nave aahipacerya opaka makoho. Nihiku nimosa okathi Domingo iira awe opintariki vasulu, Jemima aahimmye so: “Munnuupuwela nihiku nle kaahimmye aka wira kaarowa wooleelani vakhala wira kaamweemererya omusoma Biibiliya? Vano okathi aya woophiya”.
Domingo waahimusivela wiiwa masu awo. Mweeri wa Janero 2013, awo yaanisoma ikwaha piili khula esumana. Okhala wira exikola yaarowa opacerya mweeri wa Abril, owo aahivikaniha omusomiha orumeelaka Interneti. Jemima aahirowa owiriyana muthukumano wa nihiku paapa awe aamaliha awe osoma, nto muthukumano ole waahimusivela. Nihiku na 14 a Dezembro 2013, Jemima aahibatiziwa.
Vano Jemima onihimya so: “Yehova ookipixerya murima vanceene, ni koosuwela wira khonakinyanyale. Owo ookiphwanyiha etthu kahaawerya aka ophwanya molumwenkuni, eyo piiyo, apatthani a ekeekhai. Annihu anikhala olumwenku wotheene annikiiriha osiveliwa vanceene niphento na Yehova”.
Oceania
Niireke Mootepa Oyeva Vahiniwerya Anyu Olaleerya?
Ipaaxina 76, 77
Nihiku nimosa vaasiisu, Teariki, mwammiravo orina iyaakha 7 onikhala esisiro ya oTarawa, yeeyo eniirela mpantta muttetthe wa oKiribati, aaronwe olaleerya ni paapa awe, Tueti, nuumala ophiya ntthoko nimosa yaahaaphwanya amiravo 10 alopwana ni athiyana yaarina munnuwelo wahaavikana iyaakha 20. Nuumala paapa awe Teariki opacerya waalaleerya atthu ale, mmiravo mmosa omuhimyaka Tueti aalavunle so: “Hiyo ninnoona wira ootheene anyu munnaakuxa aniinyu acikhaani mwaarowaka olaleerya. Xeeni munaakhanyererya anyu woottharani? Khamunoona wira aatepa oyeva vahiniphiyerya aya omulaleya Muluku?”
Tueti aakhunle so: “Nyuwo munniphavela oweha vakhala wira mwanaka onnisuwela olaleerya? Miyo Kinookhuma wira ohale olavule ele enisuwela awe”. Atthu ale moonyoholela yaahaakhula ariki: “Aayo hiyo nimphavela waawiriyana”.
Nuumala Tueti okhuma, Teariki aahaakoha atthu ale oriki: “Munnisuwela nsina na Muluku”?
Mmosa aakhunle wira “Aayo, ti Yesu”, mukina oomwi “Muluku”. Aahikhala-tho mukina aakhunle wira “Pwiya”.
Teariki aalavunle so: “Vano nrowe niwehe ele enihimya awe Biibiliya. Vakhala wira munoowerya omukhunula Yesaya 42:5 [NM] nnoowerya osoma hoothe”. Nuumala osoma yoolepa ele, aakonhe so: “Yoolepa ela enimuhimya paani?”
Mmiravo mmosa aahaakhula wira, “Muluku”. Nuumala-vo Teariki aalavunle so: “Aayo, Muluku a ekeekhai. Vakhala wira ninnisoma eversu 8, Muluku onnileela exeeni? ‘Miyo ti Yehova. Nla ti nsina naka, khavo onimukawelaka ovuwa waka’. Niireke moowerya woona nsina na Muluku?”
Atthu ale yaahaakhula ariki, “Yehova”.
Okhala wira atthu ootheene yaaninwiriyana, Teariki aakonhe so: “Mureerelo xeeni onniphwanyiha aya orumeela nsina na Muluku, Yehova? Vano nrowe nikhunule eliivuru ya Miteko 2:21 [NM], wira nisuwele. Yoolepa eyo ninsoma so: ‘Khula mutthu oniromola nsina na Yehova onimoopowa’. Nto mureerelo xeeni onniphwanyiha aya nsina na Muluku”?
Mmiravo mmosa aakhunle wira, “Nintaphulela woopowa wahu”.
Vano paapa awe Teariki aahitthikela okela mpaani-mme. Nto aahaakoha atthu ale wira, “Vano munoonela sai? Munoona wira aniihu anniwerya olaleerya? Niireke ti vooreerela hiyo waakuxa naalaleeryaka”? Egrupu ele moohihoverya yaahaakhula wira mwanamwane ole aaniphwanelela olaleerya ni vaanireerela okuxiwa tthiri okathi woolaleerya. Nuumala-vo Tueti aahimmye so: “Nyuwo nave mwanwerya olaleerya ekeekhai ya mBiibiliyani ntoko siniira awe Teariki vakhala wira munimwiixutta ele enihimya awe Biibiliya”.
[Ipaaxina soohikhala etthu 5,6]