Mareeliho Aniphwanya Aya Ale Antthikela Elapo Aya

ANNA NI AROKORA anceene, yaawo yaathaamenle ilapo soothaaciri aatthikela ilapo saya. Nto mwaha wa omphenta Yehova ni atthu akina, awo yaahithaamela ilapo soothowa anamalaleerya a Omwene. (Math. 22:37-39) Itthu xeeni yaapanke aya? Mareeliho xeeni aphwannye aya? Nrowe niwehe waakhuliwa waya nithokoreryaka matakiheryo a anna ni arokora a oCamarões, wÁfrica.

“NIPURO NOOLOKA ‘OTOTHA’”

Mwaakha wa 1998 munna oniihaniwa Onésime aahikhuma elapo awe oCamarões onarowa okhala elapo ekina iyaakha 14. Nihiku nimosa okathi wa mithukumano, Onésime aahiiwa nlikanyiho noovara murima voohimya sa muteko woolaleerya. Mulipa-oolavula mwaha aahimmye so: “Alopwana anli yaatotha ihopa mapuro oovirikana, mmosa aahivara ihopa sinceene onvikana mukhwaawe. Nto ole aavanre ihopa vakhaani aahaana opaka exeeni? Niireke khivaarowa okhala vooloka ototha nipuro aatotha awe mpatthani awe?”

Nlikanyiho nne naahimwiiriha Onésime wuupuwela otthikela elapo awe oCamarões mwaha woowi muteko woolaleerya oCamarões waamukhumela saana ni aamwaakhaliherya anamalaleerya a elapo ele. Nto eyo yaanimuxankiha vanceene Onésime. Okhala wira aahikhala iyaakha sinceene elapo ekina, niireke anwerya olimalela makhalelo a elapo awe? Wira owehe akhala wira anwerya, Onésime aahiviriha myeeri 6 ori ene oCamarões. Vano mwaakha wa 2012, Onésime aahitthikela elapo awe oCamarões.

Onésime onihimya so: “Vano kaahaana olimalela oviha ni makhalelo makina a elapo aka. Nave Empa ya Omwene kaahaana otthikela okilaathi ipanko soowereya”. Masi moohakalala, owo onihimya so: “Vaavo kaavaha aka ephoole oratteene mithukumano, kaaniliyala ikhatera sooreera ni soohakalaliha kaarumeela aka khalai”.

Mwaakha wa 2013, Onésime aahimuthela Géraldine. Murokora ole aahitthikela oCamarões, nuumala oviriha iyaakha 9 okhalaka oFrança. Anamathelana ale yaanihela nipuro noopacerya mookumini mwaya ovara miteko sa Muluku. Mareeliho xeeni aphwannye aya? Onésime onihimya so: “Naahikhalana eparakha ya orowela Exikola ya Anamalaleerya a Omwene ni orumeela oBetheli. Mwaakha ovinre atthu 20 yaasomihiwa Biibiliya a muloko ahu aapatisiwa. Vano kinnoona wira kiri nipuro nooloka wira kaatotheke ‘atthu’”. (Mar. 1:17, 18) Nave Géraldine onihimya so: “Koophwanya mareeliho manceene ovikana ale kuupuwela aka”.

OHAKALALA ONIKHUMELELA MWAHA WOWAAPAKA AWIIXUTTI

Judith aahithaamela wEstados Unidos, masi owo aaniphavela vanceene wuncererya muteko awe woolaleerya. Judith onihimya so: “Okathi wotheene kaarowa aka waaxukurya amusi aka oCamarões kaatthika kinlaka, mwaha woowi kaanihiya soosoma sa Biibiliya kaapacerinhe aka”. Hata vaari siiso Judith aanoovelela otthikela oCamarões, maana ori ene wEstados Unidos aanivara muteko aaliviwa awe musurukhu munceene. Nto aaniwerya othuma mirette wira omukhaliherye paapa awe aawereiwa oCamarões. Masi omuroromelaka Yehova Judith aahitthikela oCamarões. Owo onneemererya wira oohiya itthu saamusivela wEstados Unidos. Nave Judith aahinvekela Yehova wira omukhaliherye olimalela makhalelo awe masya. Nave aahilipihiwa vanceene ni mutokweene a esirkwiitu ni mwaarawe.

Uupuwelaka itthu simukhumelenle, Judith onihimya so: “Eriyari ya iyaakha tthaaru paahi kihaakhaliherya atthu axexe okhala atthareli a Kristu, nto eyo ennikihakalaliha vanceene”. Muhoolo mwaya, Judith aahikhala pioneera a vameekhaaya. Nave olelo-va, owo ni iyawe oniihaniwa Sam-Castel anirumeela osirkwiitu. Ankhi paapa awe Judith? Exiripitaali ya elapo ekina yaahiivahererya omooperari mahala. Moohakalaliha, operasau ole aapakiwe aaheetta saana.

OKHALIHERIWA NI YEHOVA

Munna mmosa oniitthaniwa Victor aahithaamela oCanadá. Nuumala osoma mwaha mmosa erevista Owehaweha voohimya sa osoma wUniversidade, aahipacerya wuupuwela makhalelo awe. Owo aahihiya osoma wUniversidade, onapacerya wiixutta muteko. Victor onihimya so: “Eyo yaahikikhaliherya ophwanya muteko moohipisa ni opaka etthu kaaphavela aka vanceene, okhala pioneero”. Muhoolo mwaya Victor aahimuthela Caroline, vano oowanli aya yaahirowa oxukurya oCamarões. Okathi yaaxukurya aya oBetheli, awo yaahitumereriwa wuupuwela akhala wira yaaniphavela orumeela oCamarões. Victor onihimya so: “Hiyo khinaakhanle ookhootta. Okhala wira nookhweiherya okumi ahu nihaana weemererya”. Nnaamwi Caroline owereyasiwaka, anamathelana ale yaahithaama.

Okhala wira atthu anceene anneemererya ihapari sa Omwene, eyo yaahimwiiriha Victor ni Caroline opacerya orumeela ntoko mapioneero ookilaatheya. Waahivira okathi arumeelaka musurukhu yaasunke aya. Masi wira avikanihe orumeela ntoko mapioneero oCamarões, anamathelana ale yaahaana otthikela oCanadá wira yavareke muteko okathi vakhaani. Mareeliho xeeni yaaphwannye aya? Awo yaahirowela Exikola ya Anamalaleerya a Omwene, yaahikhala mapioneero a vameekhaaya. Nto vano aniteka ipa sinirumeeliwa ni mutthenkeso ahu. Victor onihimya so: “Nuumala okhuma nipuro naanisivela vanceene, nihoona wira Yehova onninikhaliherya”.

OHAKALALA ONIKHUMELELA MWAHA WOWAAKHALIHERYA ATTHU AKINA WIIVAHERERYA WA YEHOVA

Mwaakha wa 2002, Alain yoowo aasoma wUniversidade wAlemanha aahisoma efolyetu eni: Nyuwo Amiravo—Exeeni Munrowa Anyu Opaka Mookumini Mwanyu? Efolyetu ele yaahimukhaliherya okhalana soolukama sikina. Mwaakha wa 2016, aahirowa Exikola Eniixuttiha Orummwa, nto aahithanleliwa elapo awe oCamarões.

Ori ene oCamarões Alain aahiphwanya muteko wa okathi vakhaani. Muhoolo mwaya, aahiphwanya muteko aaliviwa awe musurukhu munceene. Masi aanixanka mwaha woowi muteko awe wa mulaponi khiwaamweemererya ovara muteko woolaleerya. Nto okathi aalattuliwe awe okhala pioneero a vameekhaaya, Alain aaheemererya moohipisa. Nnaamwi patarau awe aamuleihenrye omuliva musurukhu munceene, Alain khaatthikenle ottuli, owo aahivikaniha ni yoothanla awe. Muhoolo mwaya aahimuthela Stéphanie, yoowo aakhanle iyaakha sinceene oFrança. Mixankiho xeeni yaakumanne aya nuumala othaamela oCamarões?

Stéphanie onihimya so: “Kaaniwereyasiwa vakhaani ni erutthu yaanikineena, masi kaahilooliwa ni koopenuwa”. Vannooneya wira Yehova ooreeliha ovilela wa anamathelana ale. Alain onihimya so: “Okathi naalaleerya ahu mapuro oothowa anamalaleerya muttetthe oniihaniwa Katé, naaniiriha soosoma sa Biibiliya sinceene. Muhoolo mwaya naaniiriha soosoma iyo nimurumeelaka telefoni. Nto atthu anli naasomiha ahu Biibiliya nimurumeelaka telefoni aapatisiwa ni yookhala ekrupu muttetthe ole”. Stéphanie onincererya oriki: “Khekhanle etthu enniphwanyiha ohakalala ovikana waakhaliherya atthu akina wiivahererya wa Yehova. Nto orumeela opuro ola wooniphwanyiha ikwaha sinceene ohakalala iwo”. Olelo-va, Alain ni Stéphanie anirumeela osirkwiitu.

‘NIPANKE ETTHU NAAKHANLE AHU OOPAKA’

Gisèle opatisiwe osomaka wUniversidade ya medicina wItália. Owo aasomihiwa Biibiliya ni anamathelana yaari mapioneero ni aanisiveliwa vanceene mwaha wookhweiherya okumi aya. Ntakiheryo naya noomukhaliherya wuncererya muteko awe woolaleerya. Nto ohalaka omaliha osoma, owo aahipacerya orumeela ntoko pioneera ookilaatheya.

Gisèle aaniphavela vanceene otthikela oCamarões wira incererye muteko anvarela awe Yehova, masi yookhala etthu yaamuxankiha vanceene. Owo onihimya so: “Kaahaana ohiya itthu sinceene saakisivela wItália, waahela muhina apatthani ni amusi yaawo yaakhala elapo ele”. Hata aarina mixankiho iyo, Gisèle aahitthikela oCamarões Maio a 2016. Muhoolo mwaya, Gisèle aahitheliwa ni Léonce, vano eBetheli ya oCamarões yaahaavaha miruku wira athaamele wAyos, epooma yeeyo yoothowa anamalaleerya.

Makhalelo aya wAyos ari sai? Gisèle onihimya so: “Okathi mukina saanivira isumana ehikhanle enerxia, nnakhala khinaakhalana opuro naakhanle ahu oowaakarekari aselulaari ahu. Nto okathi munceene aselulaari ahu khiyaakhalana ekarka, nave kaahiixutta waapeya kirumeelaka ikhuni. Ohiya-vo naahaana orowela maasi weehimeni, okathi munceene yaanisareya-wo atthu. Nto naarowela ohiyu ni alampata okathi yoowo yahaakhala aya atthu anceene”. Yaawenrye sai ovilela mixankiho iyo? Gisèle onihimya so: “Munepa wowaarya wa Yehova woonikhaliherya ovilela mixankiho iyo. Miyo ni Léonce ninnikhaliheryana mukina ni mukhwaawe. Ikwaha sinceene, ninnilipihiwa ni okhaliheriwa nivahiwaka musurukhu ni apatthani vamosa ni amusi ahu”.

Niireke Gisèle onnihakalala nuumala otthikela elapo awe? Owo onaakhula so: “Aayo! Ninnihakalala ni murima wotheene. Wanipacerya naahikhalana mixankiho, nto naahipacerya okhulumuwa, masi mwaha woomuroromela Yehova ninnoona wira nookhalana waataana wooloka ni yena. Okathi ninxintta ahu mixankiho miyo ni Léonce ninnoona wira nipanke etthu naakhanle ahu oopaka”. Léonce ni Gisèle yaahirowela Exikola ya Anamalaleerya a Omwene, nto olelo-va anirumeela ntoko mapioneero a vameekhaaya a okathi vakhaani.

Wira mulipa-oototha ihopa ovare ihopa sinceene, owo ohaana olipa murima ni ovilela mixankiho. Mwa enamuna emosaru, ale anitthikela elapo aya anniimananiha waakhaliherya atthu ale ansiveliwa ihapari sooreera sa Omwene. Moohaanyiherya, Yehova khonrowa oliyala muteko anamalaleerya awo anivara aya mwaha woophenta nsina nawe. (Neh. 5:19; aHéb. 6:10) Akhala wira nyuwo munikhala elapo ekina ni elapo anyu aathowa anamalaleerya, niireke munoowerya otthikela elapo anyu wira mwakhaliherye? Akhala wira munoopaka eyo, musuweleke wira Yehova onimooreelihani vanceene.—Mir. 10:22.