Nikoho Naamukhaani Pooti Okumiherya Itthu Sooloka

Mary ni iyawe, John,a anikhala opuro vanikhweya aya waalaleerya ihapari sooreera anamuteko anikhuma oFilipina. Okathi wa eretta ya Koronaviiru, Mary aahipaceriha soosoma sa Biibiliya ilapo sikina ohiya elapo awe paahi. Aawenrye sai opaka eyo?

Mary aanakoha anaxikola awe a Biibiliya so: “Niireke munnimusuwela mutthu oniphavela omusoma Biibiliya?” Akhala wiira aakhula wiira “aayo”, owo aanaavekela wiira amusuwelihe. Opaka makoho ookhweya ntoko ala, onnikumiherya mireerelo. Mwaha wa xeeni? Mwaha woowi, ale anisiveliwa ni ele aniixutta aya mbiibiliyani, ikwaha sinceene vannaasivela waaleela amusi aya aahiiso apatthani aya etthu aniixutta aya. Exeeni yaapanke aya Anaxikola a Biibiliya a Mary, nuumala yena waakoha?

Naxikola a Biibiliya mmosa a Mary, oniihaniwa Jasmin, aahimusuweliha atthu axexe yaaphavela omusoma Biibiliya. Naxikola mmosa aihaniwa Kristine, vaanimusivela vanceene itthu aasomihiwa awe, tivo aahinvekela Mary wiira omusomiheke ikwaha piili vasumanani. Okathi Mary aamukonhe awe Kristine vakhala wiira onnaasuwela atthu akina aniphavela omusoma Biibiliya, owo aakhunle so: “Aayo, kinimoosuwelihani apatthani aka”. Sivinre ene isumana vakhaani, Kristine aahimusuweliha Mary apatthani awe axexe yaawo yaaphavela omusoma Biibiliya. Muhoolo mwaya, Kristine aahimusuweliha Mary apatthani awe akina, nave-tho awo yaahaaruuha apatthani aya yaaphavela omusoma Biibiliya.

Nave-tho, Kristine aaniphavela wiira amusi awe akina a oFilipina amusomeke Biibiliya. Mwaha wa yeeyo, aahilavula ni mwanawe mwamuthiyana oniihaniwa Andrea. Woopaceryani, Andrea uupuwela so: “Anamoona a Yehova, etiini yoohiroromeleya, khanimukupali Yesu, nave animurumeela paahi Biibiliya a Waataana wa Khalai”. Masi nuumala osoma ekwaha emosa paahi, owo aahituruka muupuwelo awe woohiloka. Khula okathi iixutta awe etthu esya mbiibiliyani, owo aahimya so: “Vakhala wiira elempwale mbiibiliyani, tthiri ekeekhai!”

Nuuvira okathi, Andrea aahimusuweliha Mary apatthani awe anli ni mpatthani awe aavarana awe muteko, yaawo yaapacenrye omusoma Biibiliya. Nave, Andrea aahikhalana titiya awe aihaniwa Angela. Owo aari mulipa-oohoona ni okathi wootheene aaninwiriyana Mary osomaka ni Andrea, masi Mary khaasuwela eyo. Nihiku nimosa, Angela aahinvekela Andrea wiira omuleele Mary vakhala wiira vanooweryaneya omusoma Biibiliya ni yena. Angela vaanimusivela vanceene ni etthu aixutta awe. Mweeri mmosa paahi, owo aahihela mmuru soolepa sinceene, nave aaniphavela wiira osomihiweke ikwaha xexe vasumanani! Okhaliheriwaka ni Andrea, Angela aahipacerya owiriyana mithukumano voohihiyererya orumeelaka videoconferência.

Okathi Mary aasuwenle awe wiira iyawe Kristine, aihaniwa Joshua, anivaha ephole okathi yaasoma aya, Mary aahimukoha akhala wiira aaniphavela osomaka hoothe. Joshua aahaakhula wiira: “Miyo kinrowa owiriyanaka paahi, masi muhikikohe etthu. Mwakikoha, kinookhuma”. Sivinre ene iminutu 5 paahi, owo aahimukoha Kristine itthu sinceene, nave aaniphavela omusoma Biibiliya.

Sookhumelela soosoma sa Biibiliya sinceene, mwaha wa nikoho nimosa naamukhaani paahi. Okhala wiira khiyaareere atthu yaaphavela omusoma Biibiliya, Mary aahaavekela anna ni arokora akina wiira yaasomiheke. Mary aahikhalana soosoma sa Biibiliya 28, ilapo soowiiraka 4.

Jasmin, yoowo nimuromonle ahu waanipacerya wa mwaha ola, opatisiwe mweeri wa Abril 2021. Kristine, opatisiwe mweeri wa Maio 2022 ni ootthikela elapo awe oFilipina wiira akhaleke ni amusi awe. Nave-tho, anaxikola anli aapatisiwa yaawo Kristine aamusuwelinhe awe Mary. Nuuvira miyeeri vakhaani paahi, Angela aahipatisiwa ni vano onirumeela ntoko pioneera ookilaatheya. Iyawe Kristine, oniihaniwa Joshua, vamosa ni mwanawe oniihaniwa Andrea, waahela muhina anaxikola akina a Biibiliya, annimusoma Biibilya voohihiyererya ni annilipiha ompatthani aya ni Yehova.

Okathi wa Yesu ni wa arummwa, atthu anceene yaanaaleela amusi aya ni apatthani aya itthu yiixutta aya mbiibiliyani. (Yoh. 1:​41, 42a; Mit. 10:​24, 27, 48; 16:​25-33) Munoonela sai waakoha anaxikola anyu a Biibiliya nikoho ntoko nla: “Niireke munnimusuwela mutthu oniphavela omusoma Biibiliya?” Mwiira siiso, woonasa wene munimwaaphwanya atthu anceene aniphavela omusoma Biibiliya.